‘Aua Neke Matakutaku ti Ua Fakaatukehe’
‘Aua Neke Matakutaku ti Ua Fakaatukehe’
‘Aua neke matakutaku ti ua fakaatukehe; ha ko e mena ha ha ia mutolu a Iehova.’—2 NOFOAGA HE TAU PATUIKI 20:17.
1. Ko e heigoa e lauiaaga he fakamatakutaku ke he tau tagata, ti ko e ha kua maama ai ha lautolu a matakutaku?
FAKAMATAKUTAKU! Ko e kupu fakamatakutakuina, ne fakalagalaga e tau logonaaga he nakai haohao mitaki mo e nakai aoga. Kua fakalagalaga e tau logonaaga fiofio he hopoate, maanu, mo e ita. Ti ko e kupu kua fakamaama e matakutaku ai he tokologa to fakatupetupe aki e tau tagata he tau vaha i mua. Kua moli ha kua totou hogofulu tau e falu motu he taufetului ke he tau fakamatakutaku kehekehe loga mo e tote ni e kautuaga ne fakave ke he matakutaku pihia.
2. Tali atu fefe e Tau Fakamoli a Iehova ke he lekua he fakamatakutaku, takitaki atu ke he tau huhu fe?
2 Moha ia, ha ha i ai e kakano moli ma e amaamanakiaga. Ko e Tau Fakamoli a Iehova, ne fakamatala malolo ke he 234 e motu mo e tau fahi motu he lalolagi, kua ha ha i ai e onoonoaga mitaki lahi. He nakai matakutaku ke he fakamatakutaku ia ka nakai utakehe, kua mauokafua a lautolu to maeke—ti mafiti mai. Kua moli kia ke fakalataha ke he onoonoaga mitaki ia ha lautolu? Ko hai ka kautu he utakehe e mamahi he lalolagi nei, ti to tupu fefe e mena ia? Ha kua liga lauia a tautolu oti kana he falu vahega mahani vale, to latatonu ke kumikumi ke he fakaveaga ma e onoonoaga mitaki pihia.
3. Ko e heigoa kua fakatupu e matakutaku, ti ko e heigoa kua talahau tuai hagaao ke he vaha ha tautolu?
3 He vaha nei, kua matakutaku mo e fakaatukehe e tau tagata ha ko e tau kakano kehekehe. Manamanatu ke he tokologa kua nakai maeke ke leveki ni e lautolu a lautolu ha ko e fuakau, lautolu hane lolelole ha ko e tau gagao nakai maulu, mo e tau magafaoa kua taufetului fakatupe ke lata mo e moui. Pihia foki, manamanatu la ke he nakai iloa tonu he moui! Ko e mate fakaofo he pakia po ke matematekelea kua tuga ke tupu mau ai, ati mautali ke moumou e tau mena kua ofania e tautolu. Ko e matakutaku mo e tupetupe pihia, lafi ke he taufetoko fakatagata mo e tau fakaita loga, ne fakafelauaki tonu mo e mena ne fakamaama he aposetolo ko Paulo: “Kia iloa e koe e mena nai, ko e tau aho fakamui to hohoko mai ai e tau aho uka; Ha ko e mena ke ofaofa he tau tagata a lautolu ni, . . . To nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki.”—2 Timoteo 3:1-3.
4. Ko e heigoa e puhala fakamalolo ke he fakatino ataata ne fakakite mai ia 2 Timoteo 3:1-3?
4 Pete ni kua fakakite mai he fakatino nei e tuaga ataata, kua tuhi agaia ke he amaamanakiaga. Mailoga e tau magaaho uka ka tutupu he “tau aho fakamui” he fakatokaaga kelea nei ha Satani. Ko e kakano anei ko e fakatotokaaga kua tata mai ti ko e fakatokaaga he lalolagi kelea to nakai leva ti hukui he pule he Kautu he Atua kua mitaki katoatoa, nukua fakaako e Iesu hana tau tutaki ke liogi ki ai. (Mataio 6:9, 10) Ko e Kautu ia ko e fakatufono he Atua he lagi, ka “nakai fakaoti tukulagi,” he talahau he perofeta ko Tanielu, ka e “to tuki malipilipi mo e fakaotioti e tau kautu oti ia [he tagata], ka ko ia to tumau tukulagi a ia.”—Tanielu 2:44.
Tu Uho Kerisiano mo e Fakamatakutaku
5. Tali atu fefe e tau motu he fou nei ke he fakamatakutaku?
5 Ke he tau hogofulu tau, ne kelipopo he fakamatakutaku e tau momoui totou afe. Ko e mataala he lalolagi katoa he matematekelea nei kua tupu ki mua he mole e tau moumouaga ha New York City mo Washington, D.C., ia Sepetema 11, 2001. He onoonoaga ke he laulahi mo e kaputia e lalolagi he fakamatakutaku, ko e tau motu he lalolagi katoa kua mafiti ke kaufakalataha ke totoko ki ai. Ma e fakatai, ia Tesemo 4, 2001, hagaao ke he tau hokotaki uta tala, “ko e tau ikipule atu motu mai he tau motu Europa, Amerika Tokelau mo Asia Lotouho kua talia e pulega” ne fakatoka ke kaufakalataha e tau laliaga. Ko e tagata gahua tokoluga U.S. ne talia e gahua nei ko e foaki he “fakatokaaga malolo fou” ke tiaki e laliaga fakamatakutaku. Ofogia ai, totou teau miliona e tau tagata ne auhia he mena ne fakahigoa he The New York Times Magazine “ko e kamataaga he latau taufetului.” Ko e kautuaga ke he tau laliaga ia kua toe agaia ke kitia. Ko e fua he magaaho fakahiku he tauaga pihia, kua liu fatiaki, ne fakalagalaga e tau logonaaga matakutaku mo e tupetupe he tokologa, ka e nakai ki a lautolu kua falanaki ki a Iehova.
6. (a) Ko e ha falu magaaho ne uka he falu ke talia e tuaga tu uho Kerisiano ne uta he Tau Fakamoli a Iehova? (e) Ko e heigoa e fakafifitakiaga hagaao ke he gahua fakapolitika ne fakatoka e Iesu ma e hana tau tutaki?
6 Kua talahaua e Tau Fakamoli a Iehova ha ko e ha lautolu a tu uho fakapolitika. Ha kua tokologa e tau tagata ne liga makai ke talia e tuaga he tau magaaho mafola, ne fano fakahaga ai ti nakai fahia ka tutupu e tau tutuaga ofoofogia. Fa mahani, na fakatupu he matakutaku mo e fakauaua he felakutaki e fakalagalaga he tau manako malolo he papale fakamotu. Ko e mena uka anei ma e falu ke maama e kakano ati tehatehaua ha tagata ke lalago e tau gahua talahaua fakamotu. Ko e mena ia he tau Kerisiano moli kua iloa na kua lata ia lautolu ke omaoma e poakiaga ha Iesu he eke ke “nakai ko e tau tagata he lalolagi.” (Ioane 15:19; 17:14-16; 18:36; Iakopo 4:4) Kua lata e mena nei ke fakatumau e tu uho ha lautolu ke he tau mena fakapolitika mo e tau fakalatahaaga. Kua fakatoka e Iesu e fakafifitakiaga tonu. He mailoga hana a pulotu mitaki katoatoa mo e tau iloaaga kehe lahi, ane kua taute e ia e taha mena mitaki ke he tau mena fakatagata he vaha hana. Ka e, ne fakamamao a ia he putoia ke he tau mena fakapolitika. He kamataaga he fekafekauaga hana, ne totoko fakamalolo e ia e foakiaga ha Satani ke pule ke he tau kautu oti kana he lalolagi. Fakamui, ne fakamamao fakatonu a ia he fakamailoga ma e kotofa fakapolitika.—Mataio 4:8-10; Ioane 6:14, 15.
7, 8. (a) Ko e heigoa kua nakai fai kakano he tu uho fakapolitika he Tau Fakamoli a Iehova, mo e ko e ha? (e) Uta kehe fefe he Roma 13:1, 2 e fai vala ke he tau matagahua mahani vale he totoko e tau fakatufono?
7 Ko e tu uho ne uta he Tau Fakamoli a Iehova kua lata ke nakai maama ko e lalago po ke tiaki e lautolu e tau gahua he mahani vale. Ma lautolu ke taute pihia kua fakapiko e talahauaga ha lautolu ko e tau fekafekau he “Atua hana e fakaalofa mo e monuina.” (2 Korinito 13:11) Ne ako e lautolu e puhala ne logona e Iehova ke he mahani vale. Ne tohi he salamo: “To kamatamata e Iehova a ia ne tututonu; ka kua vihiatia he hana finagalo e tagata ne mahani kelea, katoa mo ia kua fiafia ke he vale.” (Salamo 11:5) Kua mataala foki a lautolu ke he mena ne talahau e Iesu ke he aposetolo ko Peteru: “Ati liuaki a hau a pelu ke he hana tokaaga; ha ko lautolu oti kana ke toto e pelu, to mamate a lautolu he pelu.”—Mataio 26:52.
8 Pete ni he fakakite fakamahino mai he fakamauaga tuai ko e tau Kerisiano fakavai ne fa kumi ‘ke he pelu,’ kua nakai moli ke he Tau Fakamoli a Iehova. Ne fakamamao a lautolu mai he tau gahua oti pihia. Ne omaoma fakamoli e Tau Fakamoli ke he poakiaga he Roma 13:1, 2: “Kia omaoma e tau tagata oti kana ke he tau tui ne mua [tau pule fakatufono]; ha kua nakai fai pule kua nakai mai he Atua; ka ko lautolu ha ha i ai e pule ainei, kua kotofa he Atua a lautolu. Hanai, ko ia kua totoko atu ke he pule kua totoko atu a ia ke he kotofaaga he Atua; ko lautolu foki kua totoko atu, to hoko kia lautolu e fakahala.”
9. Ko e heigoa e tau puhala ua kua totoko he Tau Fakamoli a Iehova e fakamatakutaku?
9 Ha kua kelea muikau e fakamatakutaku, pete ia, kua nakai kia lata he Tau Fakamoli a Iehova ke taute taha mena ke totoko fakamalolo ki ai? E, kua lata ia lautolu, ti hane fa e taute e lautolu. Fakamua, kua fakamamao a lautolu mai he ha matagahua pihia. Uaaki, kua fakaako e lautolu e tau tagata ka muitua ke he tau matapatu fakaakoaga Kerisiano to nakai ha ha ai ha mahani vale. * He tau kua mole, ne fakaaoga he Tau Fakamoli 1,202,381,302 e tula ke lagomatai e tau tagata ke ako e puhala Kerisiano nei. Nakai ko e moumou magaaho anei, ha ko e fua he matagahua nei ko e 265,469 e tagata ne papatiso ko e Tau Fakamoli a Iehova, ati fakakite ke he toloaga ha lautolu a tiaki katoatoa he mahani vale.
10. Ko e heigoa e tau amaamanakiaga he tatafi kehe e mahani vale he lalolagi he vaha nei?
10 Lafi ki ai, ne mailoga he Tau Fakamoli a Iehova kua nakai maeke ia lautolu hokoia ke utakehe e kelea muikau he lalolagi. Ko e mena haia ne tuku e falanaki katoatoa ha lautolu ki a ia kua maeke—ko Iehova ko e Atua. (Salamo 83:18) Pete ni e tau laliaga moli, nakai maeke he tau tagata ke tamai e fakaotiaga ke he mahani vale. Ne hataki tuai he tagata tohia he Tohi Tapu ne mai he agaga a tautolu ke he vaha ha tautolu, “ko e tau aho fakamui,” mo e pehe: “Ko e tau tagata mahani kelea mo e tau tagata kua fakavai, to tolomaki atu a lautolu ke au atu he kelea, kua fakahehe atu ti fakaheheina foki a lautolu.” (2 Timoteo 3:1, 13) Onoono mai he tuaga nei, ko e tau amaamanakiaga he tagata ke kautu he totoko e kelea muikau kua nakai mahuiga lahi. He taha fahi, maeke ia tautolu ke falanaki ki a Iehova ke utakehe katoatoa mo e fakahiku tukulagi e mahani vale.—Salamo 37:1, 2, 9-11; Tau Fakatai 24:19, 20; Isaia 60:18.
Nakai Matakutaku he Fehagai mo e Favale ka Hoko Mai
11. Ko e heigoa e tau lakaaga ne fita a Iehova he taute ke utakehe aki e mahani vale?
11 Ha kua vihiatia he Atua he mafola e mahani vale, maeke ia tautolu ke maama e kakano ne fakatoka e ia e tau lakaaga fakamua ke moumou e punaaga, ko Satani ko e Tiapolo. Moli, ne fita a Ia he fakamatematekelea a Satani he kaumahala fakama ke he tau lima he agelu ne mua ko Mekaeli—ko e Patuiki fou he Atua he nofoaiki, ko Keriso Iesu. Kua fakamaama he Tohi Tapu ke he puhala nei: “Kua tau foki a lautolu he lagi; ko Mekaeli mo e hana tau agelu kua tau ke he tarako, ko e tarako foki kua tau a ia mo e hana tau agelu; ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.”—Fakakiteaga 12:7-9.
12, 13. (a) Ko e heigoa e aoga he tau 1914? (e) Ko e heigoa he perofetaaga a Esekielu ne talahau tuai ma lautolu ne lalago e Kautu he Atua?
12 Ko e matohiaga he Tohi Tapu mo e tau mena tutupu he lalolagi kua moli he tuhi ke he tau 1914 ko e magaaho ne tau ai he lagi. Tali mai, ko e tau tuaga he lalolagi ne tupu lahi e kelea. Kua fakamaama he Fakakiteaga 12:12 e kakano, pehe: “Ko e mena ia kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”
13 Maama ai, ko e ita he Tiapolo ne matapatu fakatonu ke he tau tagata tapuaki fakauku he Atua mo e ha lautolu a tau hoa “mamoe kehe.” (Ioane 10:16; Fakakiteaga 12:17) Ko e totokoaga nei ka nakai leva ti hoko ke he tapunu ka totoko ita mai e Tiapolo ki a lautolu kua lalago e Kautu fakave he Atua mo e tuku atu ha lautolu a falanaki ki ai. Ko e malolo nei he favale ne hagaao ki ai he Esekielu veveheaga 38 ko e favale ha “Koku he motu a Makoku.”
14. Ko e heigoa e tau laliaga puipui ne olioli he Tau Fakamoli a Iehova i tuai, mo e to pihia tumau kia?
14 Tali he liti mai a Satani he lagi, ko e tau tagata he Atua he falu magaaho ne puipui mai he tau favale ha Satani ha ko e tau gahua he falu matagahua fakapolitika, ne fakamaama he vagahau fakatai ia Fakakiteaga 12:15, 16. Kehe ai, kua fakakite mai he Tohi Tapu ko e favale fakahiku ha Satani, nakai fai matakau he tau tagata ke lalago a lautolu kua falanaki ki a Iehova. Kua taute kia he mena nei e tau Kerisiano ke matakutaku po ke fakaatukehe? Nakai pihia!
15, 16. (a) Ko e tau kupu fakamafana ha Iehova ke he hana tau tagata he vaha ha Iehosafata ne fakakite e heigoa ma e onoonoaga mitaki ke lata mo e tau Kerisiano he vaha nei? (e) Ko e heigoa e puhala ne fakatoka e Iehosafata mo e tau tagata ma e tau fekafekau he Atua he vaha nei?
15 To lalago he Atua hana tau tagata tuga ni ne lalago moli e ia e motu fakatai he vaha he Patuiki ko Iehosafata. Totou e tautolu: “Ko mutolu ko Iuta oti, mo mutolu kua nonofo i Ierusalema, mo koe ko e patuiki ko Iehosafata na e, kia fanogonogo mai a a mutolu, kua pehe mai e vagahau a Iehova kia mutolu, Aua neke matakutaku a mutolu, ti ua fakaatukehe a mutolu, ha ko e motu o tagata tokologa na, he nakai ko e mena ha mutolu e tau, ka ko e mena he Atua. . . . Nakai tau a mutolu ke he tau nai; kia tutu a a mutolu, kia tutu a mutolu, mo e kitekite atu a mutolu ke he fakamouiaga mai ia Iehova ko ia ha ha ia mutolu; Iuta mo Ierusalema na e, aua neke matakutaku a mutolu, ti ua fakaatukehe a mutolu; kia o atu a mutolu kia lautolu a pogipogi; ha ko e mena ha ha ia mutolu a Iehova.”—2 Nofoaga he Tau Patuiki 20:15-17.
16 Ne fakamafana ke he tau tagata ha Iuta to nakai lata ia lautolu ke tau. Pihia foki, ka oho mai a Koku ha Makoku ke he tau tagata he Atua, to fakamamao a lautolu he fakaaoga e tau kanavaakau tau mo papale. Ka e, to ‘tutu a lautolu mo e kitekite atu ke he fakamouiaga mai ia Iehova’ ke lata mo lautolu. Moli, ko e tutu noa nakai ko e fakakite kua nakai gahuahua katoatoa, ha ko e mena gahuahua foki e tau tagata he Atua he vaha ha Iehosafata. Totou e tautolu: “Ti tukutukuhifo ai a Iehosafata ke he kelekele; ko Iuta foki mo lautolu kua nonofo i Ierusalema ne fakaveveli fakafohifo ai a lautolu ki mua a Iehova, kua hufeilo a lautolu kia Iehova. . . . Kua pulega a [Iehosafata] mo e motu, ti kotofa ai e ia e tau tagata ke uhu lologo kia Iehova, mo e fakaheke atu a lautolu mo e tau mena tapu kua fulufuluola, he o atu a lautolu ki mua he kau, mo e pehe atu a lautolu, Kia fakaaue atu kia Iehova, ha ko e mena tukulagi hana fakaalofa.” (2 Nofoaga he Tau Patuiki 20:18-21) E, he fehagaaoaki mo e favale he fi, ne matutaki e tau tagata ke fakaheke fakamalolo ki a Iehova. Kua fakatoka he mena nei e puhala ma e Tau Fakamoli a Iehova ke muitua ka fakatoka mai e Koku hana favale ki a lautolu.
17, 18. (a) Ko e heigoa e aga fakamalolo ne ha ha he Tau Fakamoli a Iehova he vaha nei hagaao ke he favaleaga ha Koku? (e) Ko e heigoa e fakamanatuaga ne age fou ke he tau fuata Kerisiano?
17 Ato hoko ki ai—mo e he mole foki e kamata he favale ha Koku—to matutaki e Tau Fakamoli a Iehova ke he lalagoaga ha lautolu he Kautu he Atua. To matutaki a lautolu ke kumi e malolo mo e puipuiaga he feoaki ke he molea e 94,600 he tau fakapotopotoaga he lalolagi katoa. (Isaia 26:20) Ko e magaaho ni a ia ke fakaheke fakamalolo ki a Iehova! Haia, he amaamanaki atu ke he favale mafiti ha Koku kua nakai fakatupu a lautolu ke tolomuli he matakutaku. Ka e, kua fakamalolo a lautolu ke fakatolomaki fakalahi atu ki mua e poa ha lautolu he fakaheke ne fahia ki ai.—Salamo 146:2.
18 Ko e aga fakamalolo nei kua fakatata fakamitaki he tokoafe ia lautolu kua ikiiki he lalolagi katoa ne kamata e fekafekauaga gahua mau. Ke fakamaama e uho lahi he fifili e puhala moui pihia, ne fakatoka mai he 2002 he fonoaga he fahimotu e tuleke Youths—What Will You Do With Your Life? Ko e tau Kerisiano, ikiiki mo e momotua, kua fiafia lahi ke he tau fakamanatuaga magaaho tonu pihia.—Salamo 119:14, 24, 99, 119, 129, 146.
19, 20. (a) Ko e ha ne nakai fai kakano e tau Kerisiano ke matakutaku po ke fakaatukehe? (e) Ko e heigoa he vala tala fakaako ka mui mai ka taute?
19 Pete ni e tau tutuaga he lalolagi, kua nakai lata he tau Kerisiano ke matakutaku po ke fakaatukehe. Na iloa e lautolu to nakai leva ti tatafi kehe tukulagi he Kautu a Iehova e tau mahani vale oti kana. Na moua foki e lautolu e mafanatia he iloa to liuaki mai he liu tu mai ke he moui e tokologa kua galo e tau momoui ha ko e mahani vale. He foaki he mena nei ke he falu e magaaho fakamua ke ako hagaao ki a Iehova, to fakamalolo e falu ke matutaki ha lautolu a puhala he fekafekauaga tukulele ki a ia.—Gahua 24:15.
20 Ko e tau Kerisiano moli, kua loto fakaaue a tautolu he lata ke fakatumau e tu uho Kerisiano mo e fifili mau ai ke taute pihia. Manako a tautolu ke pipiki mau ke he amaamanakiaga mua ue atu he maeke ai ke ‘tutu mo e kitekite atu ke he fakamouiaga mai ia Iehova.’ To fakamalolo he vala tala ne mui mai e tua ha tautolu he fakamataala a tautolu ke he tau mena he vaha fou nei kua fakakite fakalaulahi e maama ke fakamoli e perofetaaga he Tohi Tapu.
[Matahui Tala]
^ para. 9 Ma e fakafifitakiaga ha lautolu ne tiaki e tau mahani vale oti ke eke mo Tau Fakamoli, kikite e Awake!, tau fufuta ia Mati 22, 1990, lau tohi 21; Aokuso 8, 1991, lau tohi 18; mo e Watchtower, tau fufuta ia Ianuari 1, 1996, lau tohi 5; Aokuso 1, 1998, lau tohi 5.
Maeke Nakai a Koe ke Fakamaama?
• Ko e ha e tau tagata tokologa he vaha nei ne onoono fakateaga?
• Ko e ha e Tau Fakamoli a Iehova he vaha nei kua onoono mitaki ke he vaha anoiha?
• Ko e heigoa kua fita a Iehova he taute ke he punaaga he tau mahani vale oti?
• Ko e ha ne nakai fai kakano ma tautolu ke matakutaku ke he favaleaga ha Koku?
[Tau Huhu he Fakaakoaga]
[Fakatino he lau 21]
Ne fakatoka e Iesu e fakafifitakiaga mitaki ma e tu uho Kerisiano
[Tau Fakatino he lau 23]
Totou afe e Tau Fakamoli ikiiki ne olioli he taute e fekafekauaga gahua mau
[Fakatino Credit Line he lau 19]
UN PHOTO 186226/M. Grafman