Fanogonogo ke he Tau Mena ne Talahau he Agaga!
Fanogonogo ke he Tau Mena ne Talahau he Agaga!
‘Ko ia kua fai teliga, kia fanogonogo a a ia ke he tau mena kua talahau mai he agaga ke he tau fakapotopotoaga.’—FAKAKITEAGA 3:22.
1, 2. Ko e heigoa e fakatonuaga kua liu fatiaki he tau fekau ha Iesu ke he tau fakapotopotoaga fitu ne totoku he Fakakiteaga?
KO E tau fekafekau ha Iehova kua lata ke fakateliga ke he tau kupu ha Iesu Keriso ne omoi he agaga ke he tau fakapotopotoaga fitu ne totoku i loto he Tohi Tapu he tohi a Fakakiteaga. Moli, kua igatia e tau fekau nei mo e toka ai e tau fakatonuaga: ‘Ko ia kua fai teliga, kia fanogonogo a a ia ke he tau mena kua talahau mai he agaga ke he tau fakapotopotoaga.’—Fakakiteaga 2:7, 11, 17, 29; 3:6, 13, 22.
2 Kua fita he kikite atu a tautolu ke he tau fekau ha Iesu ke he tau agelu, po ke tau leveki, ha Efeso, Semurana, mo Perekamo. Maeke fefe a tautolu ke aoga mai he mena ne talahau e ia he puhala he agaga tapu ke he tau fakapotopotoaga fa ne toe?
Ke he Agelu i Tuataira
3. I fe a Tuataira, mo e kua talahaua lahi ha ko e heigoa?
3 Ne foaki ua he “Tama he Atua” e nava mo e akonaki ke he fakapotopotoaga Tuataira. (Totou Fakakiteaga 2:18-29.) Ko Tuataira (mogonei ko Akhisar) kua ati hake he vai he Gediz (Hermus i tuai) River he fahi lalo a Asia Tote. Kua talahaua e maga ma e tau gahua lima kua loga. Ne fakaaoga he tau tagata fakahu vai e vaka he akau madder ma e matapatu he lanu mahuiga kula momoho, po ke kula uhi, ha lautolu. Ko Litia, ne eke mo Kerisiano he magahala he ahiaga a Paulo ki Filipi i Heleni, ko e “fifine fakafua ie kula uhi, ko Tuataira hana māga.”—Gahua 16:12-15.
4. Ko e heigoa ne nava ai ke he fakapotopotoaga i Tuataira?
4 Ne nava a Iesu ke he fakapotopotoaga i Tuataira ma e hana tau gahua mitaki, fakaalofa, tua, fakauka, mo e gahua he fekafekauaga. Ko e moli, ‘kua mua foki ha lautolu a tau mena fakamui ke he tau mena fakamua.’ Ti pete ni kaeke kua talahaua mitaki e mahani ha tautolu, kua nakai lata ia tautolu ke fakahanoa hagaao ke he ha tautolu a tau mahani mitaki.
5-7. (a) Ko hai e “fifine ko Iesepela,” ti ko e heigoa ka taute ha ko e fakaohoohoaga hana? (e) Ko e heigoa ne lagomatai he fekau he Keriso e tau fifine mahani Atua he fakapotopotoaga i Tuataira ke taute?
5 Ko e fakapotopotoaga i Tuataira kua tokanoa e lautolu e tapuaki tupua, tau fakaakoaga fakavai, mo e mahani feuaki. Haia mo lautolu ko e “fifine ko Iesepela”—kau ko e matakau he tau fifine ne ha ha ai e tau mahani ne tuga he Patuiki Fifine ko Iesepela he Kautu he magafaoa tokohogofulu ha Isaraela. Na talahau he falu tagata fakaako tokoluga ne lali e ‘tau perofeta fifine’ ha Tuataira ke fakataki e tau Kerisiano ke tapuaki e tau atua mo e tau atua fifine taute mena auloa mo e ke fakalataha ke he tau fiafiaaga ne foaki e tau mena kai ke he tau tupua. Kia nakai toka ha perofeta fifine ne kotofa ne lautolu a lautolu ke pule ke he falu i loto he fakapotopotoaga Kerisiano he vaha fou nei!
6 ‘To palu e Keriso a Iesepela ke he mohega, katoa mo lautolu kua faivao mo ia, kia matematekelea lahi ai, kaeke ke nakai tokihala a lautolu mai he tau gahua hana.’ Kua nakai lata e tau leveki ke mahala ke he tau fakaakoaga mo e tau fakaohoohoaga pihia, mo e nakai lata ha Kerisiano ke putoia ke he feuaki fakaagaga mo e he tino po ke fakalataha ke he tapuaki tupua ke maeke ia lautolu ke mailoga na kelea muikau e “tau mena hokulo a Satani.” Kaeke omaoma a tautolu ke he hatakiaga a Iesu, ‘ko e tau mena ha ha ia tautolu to taofi mau e tautolu,’ mo e to nakai fai taofi e agahala ki a tautolu. Ha kua fakaheu e lautolu e tau gahua nakai mahani Atua, tau manako lahi, mo e tau foliaga, kua moua e lautolu ne fakauku e “pule ke he tau motu kehe” mo e to matutaki atu ke he Keriso ke lipilipi a lautolu. Kua ha ha he fakapotopotoaga he mogonei e tau fetu fakatai, mo e to foaki ki a lautolu ne fakauku e “fetu aho kikila,” ko e Kitofaihoana, ko Iesu Keriso, he magaaho ka liu fakatutu mai a lautolu ke he lagi.—Fakakiteaga 22:16.
7 Kua fakalaga atu ke he fakapotopotoaga Tuataira ke nakai tokanoa e fakaohoohoaga kelea he tau fifine tiaki taofiaga. Ko e fekau omoi agaga he Keriso ke he fakapotopotoaga kua lagomatai e tau fifine mahani Atua ke taofi mau e tau kotofaaga foaki Atua ha lautolu he vaha nei. Kua nakai lali a lautolu ke pule ke he tau tagata tane mo e nakai fakataki ha matakainaga tane ke he mahani feuaki fakaagaga po ke he tino. (1 Timoteo 2:12) Ka e kua fakatoka he tau fifine pihia e fakafifitakiaga he tau gahua mitaki mo e tau fekafekauaga mitaki ke he fakahekeaga he Atua. (Salamo 68:11; 1 Peteru 3:1-6) Kaeke puipui he fakapotopotoaga e tau mena ha lautolu—ko e taofiaga mo e mahani mea mo e fekafekauaga uho he Kautu—to haele mai e Keriso mo e tau palepale monuina lahi, nakai mo e fakahalaaga.
Ke he Agelu i Sarataisa
8. (a) I fe a Sarataisa, ti ko e heigoa e tau tala matafeiga hagaao ki ai? (e) Ko e ha ne manako lagomatai e fakapotopotoaga i Sarataisa?
8 Ko e fakapotopotoaga i Sarataisa kua lata lahi mo e lagomatai mafiti ha kua mate fakaagaga ai. (Totou Fakakiteaga 3:1-6.) Kua tu ai ke kavi 50 e kilomita he fahi toga i Tuataira, ko Sarataisa ko e maga tupuolaola. Ko e fakafua koloa, ko e talumelie he kelekele, mo e tufuga he tau ie mamoe mo e tau kapete ne lagomatai ai ke eke ai mo maga maukoloa lahi ne ha ha ai ke kavi 50,000 tagata ne nonofo i ai fakamua. Hagaao ke he tagata he fakamauaga tala tuai ko Josephus, kua ha ha i Sarataisa e kaufakalatahaaga Iutaia lahi he senetenari fakamua F.V.N. Haia he tau malona he maga ko e sunako mo e faituga he atua fifine he tau Efeso, ko Tiana.
9. Ko e heigoa kua lata ke taute kaeke kua fakateaga e tau gahua ha tautolu he fekafekauaga?
9 Ne tala age e Keriso ke he agelu he fakapotopotoaga Sarataisa: “Kua iloa e au hau a tau gahua, he ha ia koe e higoa kua moui a koe, ka kua mate ni.” Ka e kua kaeke talahaua a tautolu ke mataala fakaagaga ka kua momohe lahi ke he tau kotofaaga faka-Kerisiano, ti kua fakateaga mo e ‘mamate fakaagaga ha ne fai’ e tau gahua ha tautolu he fekafekauaga? Ti kua lata ia tautolu ke ‘manatu e tau mena ne moua mo e fanogonogo e tautolu’ mai he fekau he Kautu, mo e lata ia tautolu ke liu fakamalolo e tau laliaga ha tautolu he fekafekauaga tapu. Kua lata moli ia tautolu ke kamata ke fakalataha mo e loto katoatoa ke he tau feleveiaaga Kerisiano. (Heperu 10:24, 25) Ne hataki e Keriso e fakapotopotoaga i Sarataisa: “Kaeke foki ke nakai mataala a koe, ti fina atu au kia koe tuga e kaiha, ti nakai iloa foki e koe po ke magaaho fe ke fina atu ai au kia koe.” Ka e kua e vaha ha tautolu? Nakai leva to foaki foki e tautolu e fakalagoaga.
10. Pihia foki he tuaga tuga a ia i Sarataisa, ko e heigoa kua moli hagaao ke he tau Kerisiano tokogaogao?
10 Ti tuga ni e tuaga ia i Sarataisa, liga to ha ha ai e tokogaogao ‘kua nakai fakakelea ha lautolu a tau tapulu mo e maeke ke o fano mo e Keriso ke he tau tapulu hina, kua lata ai a lautolu.’ Kua taofi mau e lautolu e talahaua faka-Kerisiano ha lautolu, he tumau ke fakamoli, mo e nakai ila ke he tau mahani mo e tau lotu he lalolagi nei. (Iakopo 1:27) Ko e mena ia, ‘to nakai tamate e Iesu e higoa ha lautolu he tohi he moui, ka e totoku e ia e higoa ha lautolu ki mua he Matua hana mo e tau agelu.’ He talahaua mitaki ke o mo e Keriso, ko e vahega kitofaitane fakauku hana to tapulu ke he ie mitaki, kua kikila mo e mea ne fakatino e tau gahua tututonu he tau tagata tapu he Atua. (Fakakiteaga 19:8) Ko e tau kotofaaga homo ue atu ne fakatalitali ki a lautolu i luga he lagi ne omoi ai a lautolu ke kautu ke he lalolagi nei. Kua fakatokatoka foki e tau monuina ki mua ha lautolu ne amanaki ma e moui tukulagi he lalolagi. Kua tohi foki e tau higoa ha lautolu i loto he tohi he moui.
11. Ko e heigoa kua lata ia tautolu ke taute kaeke tauveli mohe fakaagaga a tautolu?
11 Kua nakai fai ia tautolu ne manako ke hokotia atu ke he tuaga momoko fakaagaga he fakapotopotoaga i Sarataisa. Ka e kua ka mailoga e tautolu hane tauveli mohe fakaagaga a tautolu? Kua lata ia tautolu ke gahua fakamafiti ma e mitaki ma ha tautolu ni. Kau kua futia atu a tautolu ke he tau puhala nakai mahani Atua po kua fakalolelole ke o atu tumau ke he feleveiaaga po ke ke he ha tautolu a fekafekauaga. Kia kumi ai e tautolu e lagomatai ha Iehova he liogi fakamakai. (Filipi 4:6, 7, 13) Ko e totou Tohi Tapu he tau aho oti mo e kumikumi ke he tau Tohiaga Tapu mo e tau tohi he “fekafekau pule,” ka lafi mai ke he alaala fakaagaga ha tautolu. (Luka 12:42-44) Ti eke ai a tautolu ke tatai mo lautolu i Sarataisa ne moua e fiafia he Keriso, mo e to eke a tautolu mo monuina ke he tau katofia talitonu.
Ke he Agelu i Filatelefaia
12. To fakamaama fefe e koe e tuaga fakalotu i Filatelefaia i tuai?
12 Kua nava a Iesu ke he fakapotopotoaga Filatelefaia. (Totou Fakakiteaga 3:7-13.) Ko Filatelefaia (mogonei ko Alasehir) ko e matapatuaga mahuiga he matakavi taute uaina he fahi lalo ha Asia Tote. Ko e moli, ko e atua lahi i ai ko Dionysus, ko e atua he uaina. Maali ai, ko e tau Iutaia i Filatelefaia kua nakai kautu he lali ke fakaohooho e tau Kerisiano Iutaia i ai ke taofi ke he falu matagahua he Fakatufono faka-Mose po ke liliu ki ai.
13. Nukua fakaaoga fefe he Keriso e “tau kei a Tavita”?
13 Kua ha ha he Keriso “e tau kei a Tavita,” ti kua foaki ki a ia e tau koloa oti he Kautu mo e levekiaga he magafaoa he tua. (Isaia 22:22; Luka 1:32) Ne fakaaoga e Iesu e kei ia ke hafagi aki e tau hala mo e tau kotofaaga he Kautu ke he tau Kerisiano i Filatelefaia i tuai mo e falu matakavi foki. Tali mai he 1919 ne fakatoka e ia i mua he “fekafekau pule” “e pa gutuhala kua lahi” ne takitaki atu ke he fakamatalaaga he Kautu ne nakai maeke he ha tagata totoko ke pa. (1 Korinito 16:9; Kolose 4:2-4) Moli, ko e pu gutuhala ke he tau kotofaaga he Kautu kua pa ki a lautolu he “sunako a Satani,” ha kua nakai ko e tau Isaraela fakaagaga a lautolu.
14. (a) Ko e heigoa e maveheaga ne foaki e Iesu ke he fakapotopotoaga i Filatelefaia? (e) Taofi mau fefe a tautolu neke veveli he magahala he “magaaho kamatamata”?
14 Ne foaki e Iesu ke he tau Kerisiano i Filatelefaia i tuai e maveheaga nei: “Kua taofi e koe e kupu he haku a fakauka, ko e mena ia ke taofi ai foki e au a koe ke he magaaho kamatamata ko e hoko mai ne fai ke he lalolagi oti.” Kua lata ke fakauka ke he fakamatalaaga ke tuga ne fakakite e Iesu. Ne nakai fakaai a ia ke mahala ke he tau fi ka e fakatumau ni ke taute e finagalo he Matua hana. Ati, fakaliu tu mai e Keriso ke he moui nakai mate he lagi. Kaeke taofi mau a tautolu ke he tau fifiliaga ha tautolu ke tapuaki ki a Iehova mo e lalago e Kautu he fakamatala e tala mitaki, to nakai veveli a tautolu he magahala he “magaaho kamatamata.” To ‘taofi mau e tautolu e tau mena ha ha ia tautolu’ mai he Keriso he eketaha ke fakatolomaki e tau koloa ia he Kautu. He taute e mena nei ka moua e foufou patuiki mua ue atu i luga he lagi ma lautolu ne fakauku mo e moui tukulagi ma e tau kapitiga fakamoli ha lautolu ke he lalolagi.
15. Ko e heigoa kua lata mo lautolu ka eke mo ‘tau pou he faituga he Atua’?
15 Ne lafi a Keriso: “Ko ia kua kautu to eke e au a ia mo pou he faituga he Atua haku, . . . ti tohi foki e au ki ai e higoa he Atua haku, mo e higoa he māga he haku a Atua, ko Ierusalema fou ia ne hifo mai he lagi mai he haku a Atua, katoa foki mo e haku a higoa fou.” Kua latatonu e tau leveki fakauku ke fakamoli ke fakatokoluga e tapuakiaga moli. Kua latatonu ia lautolu ke fakatumau ke fakamoli ke eke mo tau tagata he “Ierusalema fou” he fakamatala hagaao ke he Kautu he Atua mo e fakatumau ke mea fakaagaga. Kua aoga e mena nei kaeke manako a lautolu ke eke mo tau pou he faituga lilifu he lagi mo e kaeke ke fua e lautolu e higoa he maga he Atua ko e tau tagata he lagi mo e fai vala ke he higoa he Keriso ko e hana kitofaitane. Mo e, moli, kua lata a lautolu ke fai teliga ke ‘fanogonogo ke he tau mena kua talahau mai he agaga ke he tau fakapotopotoaga.’
Ke he Agelu i Laotikaia
16. Ko e heigoa falu a talahauaga moli hagaao ki a Laotikaia?
16 Ne akonaki e Keriso e fakapotopotoaga loto mauokafua lahi i Laotikaia. (Totou Fakakiteaga 3:14-22.) He kavi ke 150 e kilomita he fahi uta ha Efeso mo e tu ai he lotouho he puhala tu lahi he pahua talumelie he Lycus River, ko Laotikaia ko e maga gahua mo e matapatuaga fakatupe mahuiga. Kua talahaua lahi e tau mena tui ne taute mai he tau fulu mamoe uli he matakavi ia. Ko e matakavi he aoga fakaekekafo mahuiga, liga kua taute mai i Laotikaia e vai ekekafo mata ne iloa ko e pauta Ferukia. Ko Asclepius, ko e atua he tau vai ekekafo, ko e taha he tau atua lalahi he maga. Kua tuga ke tokologa e tau Iutaia i Laotikaia, ko e falu kua mautu lahi.
17. Ko e ha ne akonaki ai e tau Laotikaia?
17 He vagahau ke he fakapotopotoaga i Laotikaia he puhala he “agelu” i ai, ne fai pule e vagahau ha Iesu ko e “talahau kua fakamoli mo e moli, ko ia ko e kamataaga he tau mena ne eke he Atua.” (Kolose 1:13-16) Kua akonaki e tau Laotikaia ha kua ‘nakai momoko, ti nakai vevela’ fakaagaga foki. Ha kua mafanafana a lautolu, kua amanaki e Keriso ke fakalua a lautolu mai he gutu hana. Kua nakai lata ke uka ia lautolu ke maama e manatu ia. Tata ki ai ne ha ha i Iarapoli e tau vaipuna vela, mo e ha ha i Kolose e tau vai momoko. Ha kua mamao e puhala ne uta hala paipa e vai ki Laotikaia, ti kua tuga mafanafana ni e vai ka hoko atu ke he maga. He taha vala he hala, kua utu ai ke he halavai. Tata atu ki Laotikaia, ne fakatafe ki loto he tau luo maka ne pili aki e timeni.
18, 19. Puhala fe ne kua lata ke lagomatai e tau Kerisiano he vaha fou nei ne tuga a lautolu i Laotikaia?
18 Ko e tau tagata takitokotaha ne tuga e tau Laotikaia he vaha nei kua nakai vevela lahi po ke momoko mitaki. Ke tuga e vai mafanafana, kua fakalua mai a lautolu he gutu! Kua nakai manako a Iesu ke taute a lautolu mo tau tagata fakahoko kupu hana, ko e tau ‘fekau fakauku kua hukui aki e Keriso.’ (2 Korinito 5:20) Ka nakai tokihala a lautolu, to galo e lautolu e tau kotofaaga ha lautolu ko e tau tagata fakapuloa he Kautu. Ne kumi he tau Laotikaia e tau koloa fakalalolagi ‘ka e nakai iloa kua malaia, matematekelea, nofogati, matapouli, mo e nakai fai felevehi a lautolu.’ Ke utakehe ha lautolu a nonofogati fakaagaga, matapouli, mo e nakai fai felevehi, ko e ha tagata ne tuga a lautolu he vaha nei kua lata ke fakatau mai e Keriso e “auro kua fakamea ke he afi” he tua kua kamatamata, “tau tapulu hina kia fakatapulu” he tututonu, mo e “vaimata” ne fakatolomaki e maama fakaagaga. Kua fiafia lahi e tau leveki Kerisiano ke lagomatai a lautolu ke manamanatu atu ke he tau manako fakaagaga ha lautolu ke maeke ia lautolu ke “maukoloa ke he tua.” (Iakopo 2:5; Mataio 5:3) Mua atu, kua lata e tau leveki ke lagomatai a lautolu ke fakaaoga e “vaimata”—ke talia mo e fakatatai atu ke he tau fakaakoaga, fakatonuaga, fakafifitakiaga, mo e tau puhala manamanatu ha Iesu. Ko e vai fakamaulu ainei ke he “manako lahi he tino, mo e manako lahi he tau mata, katoa mo e tau mena he mouiaga nai ke hula ki ai.”—1 Ioane 2:15-17.
19 Kua akonaki mo e oofe hifo e Iesu a lautolu oti ne ofania e ia. Ko e tau leveki i lalo ia ia kua lata ke fakamolulu ka taute pihia foki. (Gahua 20:28, 29) Kua lata e tau Laotikaia ke ‘eke taha mo e tokihala,’ ke taute e tau hikihiki ke he tau manamanatuaga mo e tau puhala moui ha lautolu. Ka e, kua mahani lahi kia e falu ia tautolu ke he tau puhala moui ne fakateaga e fekafekauaga tapu ha tautolu ke he Atua he eke ai mo mena fakateaga he moui? Ti o mai a a tautolu ke ‘fakatau e vaimata mai ia Iesu’ ke maeke ia tautolu ke kitia e aoga lahi he kumi fakamakutu fakamua e Kautu.—Mataio 6:33.
20, 21. Ko hai ne logona mitaki e “tukituki” ha Iesu he vaha nei, mo e heigoa e tau amaamanakiaga ha lautolu?
20 “Kitiala,” he talahau he Keriso, “kua tu atu au ke he pahala mo e tukituki atu; kaeke ke fanogonogo e taha ke he haku a leo, mo e hafagi mai e pahala; to hu atu au kia ia, ti kai mena foki au mo ia, ko ia foki mo au.” Kua fa mahani a Iesu ke foaki e tau fakaakoaga fakaagaga he taumafa a ia ke he tau kaiaga. (Luka 5:29-39; 7:36-50; 14:1-24) Mogonei kua tukituki e ia e puhala he fakapotopotoaga ne tuga e tau Laotikaia. To logona nakai e lautolu i loto e tukituki hana, liu fakamalolo e ofania ha lautolu ki a ia, talia fiafia ke ha ha a ia mo lautolu, mo e toka a ia ke fakaako a lautolu? Kaeke pihia, to taumafa a Keriso mo lautolu ma e ha lautolu ni a aoga fakaagaga lahi.
21 Kua fakaata fakatai he ‘tau mamoe kehe’ he vaha nei a Iesu ki loto, ati takitaki atu e tau gahua pihia ke he moui tukulagi. (Ioane 10:16; Mataio 25:34-40, 46) Ke he tau tagata kautu takitaha ne fakauku, to foaki age he Keriso e kotofaaga he ‘nonofo mo ia ke he hana nofoaiki, tuga na ia foki kua kautu mo e nonofo foki mo e Matua hana ke he Hana nofoaiki.’ E, ke he tau tagata kautu ne fakauku, kua mavehe age e Iesu e palepale ne mua he nofoaiki fakalataha mo ia ke he lima matau he Matua hana i luga he lagi. Ti kua matakaki atu e tau mamoe kehe ne kautu, ke he matakavi homo ue atu he lalolagi i lalo he pule Kautu.
Tau Fakaakoaga ma Tautolu Oti
22, 23. (a) Maeke fefe e tau Kerisiano oti ke aoga mai he tau kupu ha Iesu ke he tau fakapotopotoaga fitu? (e) Ko e heigoa kua lata ke fakamalolo a tautolu ki ai?
22 Kua nakai kapaletu kua maeke he tau Kerisiano oti ke aoga lahi mai he tau kupu ha Iesu ke he tau fakapotopotoaga fitu i Asia Tote. He mailoga nukua foaki he Keriso e nava kua lata, ke tuga anei, kua omoomoi ai e tau motua Kerisiano mokoina ke nava ki a lautolu takitokotaha i loto he tau fakapotopotoaga hane tupuolaola fakaagaga. Ke he mena ne ha ha ai e fakalolelole, kua lagomatai he tau motua e tau katofia talitonu ke fakaaoga e tau fakamauluaga faka-Tohiaga Tapu. Kua maeke ia tautolu oti ke fakatumau ke aoga mai he tau puhala kehekehe he fakatonuaga ne foaki he Keriso ke he tau fakapotopotoaga fitu, kaeke tolomaki a tautolu ke fakagahuahua ai he liogi fakamakai mo e nakai fakatuai. *
23 Kua nakai fai magaaho ke fakateaga he tau aho fakahiku nei, ke velevelekoloa, po ke ha mena ka taute a tautolu ke foaki e fekafekauaga fakateaga ke he Atua. Kia lata he tau fakapotopotoaga oti mogoia ke kikila tumau tuga e tau tuaga lamepa ne fakatu e Iesu he tau tuaga ha lautolu. Ko e tau Kerisiano tua fakamoli, kia lata ia tautolu ke fakamalolo tumau ke fakateliga he magaaho ka vagahau e Keriso mo e fanogonogo ke he tau mena ne talahau he agaga. Ti to moua e tautolu e fiafia tukulagi ko e tau tagata fua he maama he lilifu a Iehova.
[Matahui Tala]
^ para. 22 Kua fakatutala foki ke he Fakakiteaga 2:1–3:22 he tau veveheaga 7 ke he 13 he tohi Revelation—Its Grand Climax At Hand!, ne lomi fakailoa he Tau Fakamoli a Iehova.
To Tali Fefe a Koe?
• Ko hai e “fifine ko Iesepela,” mo e ko e ha ne nakai fifitaki he tau fifine mahani Atua a ia?
• Ko e heigoa e tuaga ne ha ha ai he fakapotopotoaga i Sarataisa, mo e heigoa kua lata ia tautolu ke taute ke puipui mai neke eke ke tuga e tau Kerisiano tokologa ne nonofo i ai?
• Ko e heigoa e tau maveheaga ne foaki e Iesu ke he fakapotopotoaga Filatelefaia, mo e fakagahuahua fefe ai he vaha nei?
• Ko e ha ne akonaki ai e tau Laotikaia, ka ko e heigoa e tau amaamanakiaga ne fakatoka i mua he tau Kerisiano fakamakutu?
[Tau Huhu he Fakaakoaga]
[Fakatino he lau 14]
Ko e tau puhala kelea he “fifine ko Iesepela” kua lata ke puipui mai ai
[Tau Fakatino he lau 16]
Kua fakatoka e Iesu i mua he tau tutaki hana e “pu gutuhala kua lahi” ke takitaki atu ke he tau kotofaaga he Kautu
[Fakatino he lau 18]
Kua talia fiafia nakai e koe a Iesu mo e fanogonogo ki a ia?