Foakiaga kua Fakafiafia e Atua

KO IESU mo e tau tutaki hana ne fiafia ke he taumafa mitaki i Petania mo e tau kapitiga tata, putoia a Maria, Mareta, mo Lasalo ne fakaliu tu mai laia. He magaaho ne uta e Maria e litara vala lolo fakafua uka mo e takai aki e tau ve a Iesu, ne ita lahi a Iuta Isakariota mo e vagahau atu. “Ko e ha nakai fakafua ai e lolo manogi ia ke he tolu geau e tenari [tatai mo e kavi ke he totogi he tau katoa], mo e age ke he tau nonofogati?” he totoko e ia. Ne mafiti e falu ke gugu pihia foki.—Ioane 12:1-6; Mareko 14:3-5.

Pete ia, ne tali e Iesu: “Toka ai a ia. . . . Ha kua nonofo mau e tau tagata nonofogati ia mutolu, ko e tau aho oti ka loto ki ai a mutolu, kua maeke ia mutolu ke eke fakamitaki atu kia lautolu; ka ko au nai, nakai nofo mau au ia mutolu.” (Mareko 14:6-9) Ko e tau takitaki lotu Iutaia ne fakaako ko e foakiaga mena fakaalofa kua nakai ni mitaki ka e fakafeilo aki e tau agahala. Ko Iesu, he taha fahi, ne fakamahino ko e foakiaga kua fakafiafia e Atua kua nakai ni fakakaupa ke he tau mena fakaalofa foaki noa ki a lautolu ne nonofogati.

Ko e onoono fakaku ke he puhala foaki ne taute he fakapotopotoaga Kerisiano fakamua ka fakamaama falu he tau puhala aoga kua maeke ia tautolu ke fakakite e kapaletu ha tautolu ti fiafia foki e Atua ke he foakiaga ha tautolu. To fakakite foki e vahega kehe lahi he foaki kua tamai e mitaki lahi.

‘Age e Tau Mena Fakaalofa’

He tau magaaho loga ne fakamalolo e Iesu hana tau tutaki ke ‘age e tau mena fakaalofa.’ (Luka 12:33) Ka e hataki e Iesu, ke he aga fia kitia ne taute pauaki ke fakaheke aki e tagata ne foaki ka e nakai ke he Atua. “Ka age e koe e tau mena fakaalofa,” he talahau e ia, “aua neke ulo e koe e pu i mua hau, tuga ne eke he tau tagata fakavai ke he tau sunako mo e tau hala, kia nava ai e tau tagata kia lautolu.” (Mataio 6:1-4) He fakagahua e tomatomaaga nei, ne fakamamao e tau Kerisiano fakamua he tau fia kitia he tau takitaki fakalotu tokoluga he vaha ha lautolu mo e fifili ke lagomatai e tau tagata nonofogati he foaki atu fakatagata e tau lagomataiaga po ke tau mena fakaalofa foki.

Ia Luka 8:1-3, ma e fakatai, ne talahau mai ki a tautolu ko Maria Makatala, Ioana, Susana, mo e falu ne fakaaoga e “tau mena ha lautolu” he fekafekau fakatekiteki ki a Iesu mo e tau aposetolo hana. Pete ni kua muhukoloa e tau tagata tane nei, ne toka e lautolu e tau puhala tutuli tupe ha lautolu ka e hagaaki e tau laliaga katoatoa ha lautolu ke he fekafekauaga. (Mataio 4:18-22; Luka 5:27, 28) He lagomatai a lautolu ke fakakatoatoa e  kotofaaga ne foaki he Atua, ne fakatokoluga he tau fifine nei e Atua. Ti fakakite he Atua hana loto fakaaue he fakamau hifo e fakamokoi fakaalofa noa ha lautolu he Tohi Tapu ma e tau atuhau a mui ke totou.—Tau Fakatai 19:17; Heperu 6:10.

Ko Toreta taha fifine totonu ne “loga hana tau gahua mitaki mo e tau mena fakaalofa ne eke.” Ne taute e ia e tau tapulu ma e tau takape nonofogati he fahi tahi he taone a Iopa. Ne nakai iloa e tautolu ko e mena fakatau oti e ia e tau ie po ke age noa e gahua hana. Moha ia, ne ofania e lautolu ne lagomatai e ia a ia ha ko e tau gahua mitaki hana, ti pihia foki ke he Atua, ne fakamonuina fakaalofa noa hana manatu mitaki.—Gahua 9:36-41.

Kua Aoga e Manamanatuaga Hako

Ko e heigoa ne fakalagalaga a lautolu nei ke foaki? Ne nakai mai ni he fakaalofa hofihofi noa ne laga mai he manako he loto ma e lagomatai. Ne logona fakatagata e lautolu ko e matagahua tonuhia ke taute e mena kua maeke ia lautolu he tau aho takitaha ke lagomatai a lautolu ne mativa, matematekelea, gagao, po ke falu mena uka. (Tau Fakatai 3:27, 28; Iakopo 2:15, 16) Ko e vahega foaki anei kua fakafiafia e Atua. Kua fakalagalaga pauaki he fakaalofa hokulo ma e Atua mo e manako ke fifitaki hana fakaalofa noa mo e aga fakamokoi.—Mataio 5:44, 45; Iakopo 1:17.

Ne fakamaama he aposetolo ko Ioane e vala aoga nei he foaki he magaaho ne huhu a ia: “Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakaalofa ke he Atua ke he loto hana?” (1 Ioane 3:17) Kua maaliali e tali. Kua omoi he fakaalofa he Atua e tau tagata ke gahua fakaalofa noa. Kua loto fakaaue e Atua mo e palepale a lautolu, kua tatai mo ia, ne fakakite e aga fakamokoi. (Tau Fakatai 22:9; 2 Korinito 9:6-11) Kitia nakai e tautolu e vahega fakamokoi pihia he vaha nei? Mailoga la e mena ne tupu fou ke he fakapotopotoaga he Tau Fakamoli a Iehova.

Ko e kaina he fuakau fifine Kerisiano ne lata lahi mahaki ke fakafou. Na nofo tokotaha a ia ti nakai fai magafaoa ke lagomatai a ia. He tau tau loga kua mole, ne hafagi tumau e ia hana kaina ke fakahoko ai e tau feleveiaaga Kerisiano, ti fa mahani a ia ke fakatoka e mena kai ke kai auloa mo lautolu kua talia hana uiina. (Gahua 16:14, 15, 40) He kitia hana tuaga, kua kaufakalataha e fakapotopotoaga ke lagomatai. Ne foaki he falu e tau tupe, ka e gahua e falu. He falu matahiku fahi tapu gahoa, ne tuku hake he tau tagata gahua noa e tuafale fou, talaga e fale koukou fou, fakamomole mo e vali e foloa, ti tuku hake e tau kapeneta fou he peito. Ko e foaki ne nakai ni felauaki mo e manako he fifine ka e fefakatataaki foki e fakapotopotoaga ti nava e tau katofia ko e fakafifitakiaga he foakiaga Kerisiano moli.

Ha ha i ai loga lahi e tau puhala kua maeke ia tautolu fakatagata ke lagomatai e falu. Maeke nakai ia tautolu ke fakaaoga taha magaaho mo e tama tane po ke tama fifine nakai fai matua? Maeke nakai ia tautolu ke fakatau  po ke tuitui ma e takape motua kua iloa e tautolu? Maeke nakai ia tautolu ke tunu e mena kai po ke lagomatai he age taha tupe ke he taha tagata kua temotemoai e mena moua? Nakai lata ia tautolu ke muhu koloa ke lagomatai. Ne tohi he aposetolo ko Paulo: “Ha ko e mena ka ha i ai e loto fakamakai, ti talia fakamitaki e tagata, kua fakalata ke he tau mena ha ha ia ia, ka e nakai fakalata ke he tau mena nakai ha ha ia ia.” (2 Korinito 8:12) Ko e foakiaga age fakahako he tagata ni kia e vahega foaki ka fakamonuina he Atua? Nakai.

Ka e Kua e Lagomatai Lahi?

He falu magaaho ko e tau laliaga fakatagata kua nakai lahi. Kakano, ha ko e fakaputu tupe a Iesu mo e hana tau aposetolo ke lata mo lautolu ne nonofogati, ti talia e lautolu e tau tupe mai he tau tagata fakaalofa ne feleveia mo lautolu he gahua ha lautolu. (Ioane 12:6; 13:29) Pihia foki, ko e tau fakapotopotoaga he senetenari fakamua ne oko tupe he magaaho kua manako lahi ki ai mo e fakatoka ai e lagomataiaga lahi.—Gahua 2:44, 45; 6:1-3; 1 Timoteo 5:9, 10.

Taha e magaaho pihia ne tupu kavi ke he 55 V.N. Kua hokotia e nonofogati ke he tau fakapotopotoaga i Iutaia, liga ko e fua he to laia e hoge lahi i ai. (Gahua 11:27-30) Ne manamanatu tumau e aposetolo ko Paulo ki a lautolu ne nonofogati, ati ole lagomatai ke he tau fakapotopotoaga mamao atu ki Maketonia. Ne fakatokatoka e ia e tanakiaga mo e fakaaoga e tau patu kua kotofa ke foaki ai. (1 Korinito 16:1-4; Kalatia 2:10) Nakai moua e ia po ke falu ne putoia e totogi ke lata mo e gahua ha lautolu.—2 Korinito 8:20, 21.

Kua mafiti foki e Tau Fakamoli a Iehova he vaha nei ke lagomatai ka tupu fakaofo e matematekelea. He vaha mafana he 2001, tuga anei, ko e tau afa malolo ne fakatupu e fakapukeaga makimaki i Houston, Texas, U.S.A. Katoatoa ai, ko e 723 e kaina he Tau Fakamoli ne fai malona, loga ai ne malona tiaki. Ko e komiti lagomatai matematekelea ne fakatu mafiti he tau motua Kerisiano kua lata ne kumikumi e tau manako he tau tagata takitaha mo e ke fakatokatoka e tau tupe foaki ke lagomatai aki e Tau Fakamoli he matakavi ke fahia mai he tuaga mo e fakafou e tau kaina ha lautolu. Kua makai e tau tagata lagomatai noa mai he tau fakapotopotoaga tu tata mai ke taute e tau gahua oti. Taha e Fakamoli ne loto fakaaue lahi ke he lagomatai ia he magaaho ne moua e ia e totogi mai he kamupani inisua hana ke totogi aki e tau fakafouaga he fale hana, ne foaki mafiti e ia e tupe ke he fakaputuaga tupe lagomatai ke maeke ke lagomatai e falu kua lata.

Hagaao ke he foaki lagomatai noa ne fakatoka, kua lata ia tautolu ke mataala he fokifoki e tautolu e tau tutuaga loga ne feleveia mo tautolu. Kua tauuka lahi e totogi he falu foaki fakaalofa noa he falu fakatokatokaaga po ke  tutuli tupe, ti toe hifo ni e vala tupe tote he tupe ne oko ma e amaamanakiaga anoiha. Kua pehe e Tau Fakatai 14:15: “Kua talia he tagata goagoa e tau kupu oti; ka ko e tagata lotomatala, kua manamanatu a ia ke he hana tau puhala.” Ti ko e puhala kua pulotu ke kumikumi fakamitaki e tau mena kua moli.

Foakiaga kua Mua Atu e Mitaki

Ha ha i ai e vahega foakiaga ne mahomo atu e aoga ke he gahua fakaalofa noa. Ne hagaao a Iesu ke he mena nei he magaaho ne huhu e fuata muhu koloa, ke he mena kua lata ia ia ke taute ke moua e moui tukulagi. Ne tala age a Iesu ki a ia: “Kia fano a koe mo e fakafua atu hau a tau mena, ti age ke he tau nonofogati, ati moua ai e koe e tau koloa loga ke he lagi; ati hau a, mo e mui mai kia au.” (Mataio 19:16-22) Mailoga kua nakai ni pehe a Iesu, ‘Age ke he tau nonofogati, ati to moua e koe e moui.’ Nakai, ne lafi e ia, “Mui mai kia au.” He falu kupu, he nava mo e aoga ke he tau gahua fakaalofa noa, kua lahi atu e mena kua putoia ke he tuaga tutaki Kerisiano.

Ko e fiafia ne mua ha Iesu ko e lagomatai fakaagaga e falu. Nakai leva ti hoko hana mate, ne tala age a ia ki a Pilato: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli.” (Ioane 18:37) He taki e ia e ia e matagahua ke lagomatai a lautolu ne nonofogati, fakamaulu a lautolu ne gagao, mo e fagai a lautolu ne hoge, ne matapatu e fakaako e Iesu hana tau tutaki ke fakamatala. (Mataio 10:7, 8) Moli, he hana tau fakaakoaga fakahiku ki a lautolu ko e poakiaga: “Kia o atu a a mutolu ke eke e tau motu oti kana mo tutaki.”—Mataio 28:19, 20.

Moli, to nakai fakamafola he fakamatala e tau lekua oti kana he lalolagi. Ka e, ko e folafola he tala mitaki he Kautu he Atua ke he tau vahega tagata oti kana kua fakaheke e Atua ha ko e fakamatala kua fakakatoatoa e finagalo he Atua mo e hafagi e puhala ke he tau aoga tukulagi ma lautolu kua talia e fekau faka-Atua. (Ioane 17:3; 1 Timoteo 2:3, 4) He ha he fanogonogo ke he mena ne talahau he Tau Fakamoli a Iehova he taha magaaho ka ahiahi mai a lautolu? Kua o mai a lautolu mo e mena fakaalofa fakaagaga. Ti iloa e lautolu ko e puhala mitaki lahi ni anei kua maeke ia lautolu ke atu ki a koe.

[Tau Fakatino he lau 6]

Loga e tau puhala ke fakakite kua fakaalofa a tautolu

[Fakatino he lau 7]

Ko e fakamatala ha tautolu he tala mitaki kua fakafiafia e Atua mo e hafagi e puhala ke he tau aoga tukulagi