Kia Tumau, mo e Kautu ke he Poitufi ma e Moui

KAEKE kua lata ia koe ke fenoga he tahi to afa, ko e vaka fefe ne manako a koe ki ai? To manako nakai a koe ke he poti tote ne mama po ke toga mao ne ta fakamitaki? To fifili moli ni e koe e toga, ha kua maeke ke holo mitaki i luga he tau peau malolo.

He o atu a tautolu he fakatokaaga to afa mo e lukeluke nei, kua fehagai a tautolu mo e tau paleko tehatehaua. Ko e tau tagata fuata, ke tuga anei, kua liga logona hifo e fakahahaku mo e nakai haohao mitaki ha ko e tau manatu fakaniniko mo e tau puhala he lalolagi nei. Ko lautolu ne kamata laia ke eke mo tau Kerisiano kua liga logona hifo agaia e fakahahaku. Pihia foki falu ne fakatumau ke he tau tau loga he fekafekauaga tua fakamoli ke he Atua nukua liga hane ha ha i lalo he kamatamata ha kua nakai la fakamoli katoatoa e tau mena ne talifaki a lautolu ki ai.

Kua nakai fou e tau logonaaga pihia. Ko e tau fekafekau tua fakamoli ha Iehova, tuga a Mose, Iopu, mo Tavita, kua logona e fakahahaku he falu magaaho. (Numera 11:14, 15; Iopu 3:1-4; Salamo 55:4) Pete ia, kua fakamailoga he fakamoli tumau ki a Iehova e tau puhala moui ha lautolu. Kua fakamalolo he tau fakafifitakiaga ha lautolu a tautolu ke fakatumau foki, ka kua manako a Satani ko e Tiapolo ke hahaga kehe a tautolu mai he poitufi ma e moui tukulagi. (Luka 22:31) Ti maeke fefe ia tautolu ke fakatumau, ‘mauokafua ke he tua’? (1 Peteru 5:9) Mo e maeke fefe ia tautolu ke fakamalolo e tau katofia talitonu ha tautolu?

Manako a Iehova ki a Tautolu ke Fakatumau

Kaeke kua tua fakamoli a tautolu ki a Iehova, to ha ha ai hokoia a Iehova ke lagomatai a tautolu ke fakatumau e malolo ha tautolu. Nukua fakafehagai e salamo ko Tavita ke he tau tutuaga paleko loga, ka kua falanaki a ia ke he Atua ti kua maeke ai ke lologo: “Ne ta hake e [Iehova] au mai he luo he malaia, mo e mena pelapela ue atu; ne fakatu foki e ia haku tau hui ki luga he maka tumau, ti fakamau ai e ia haku a fanoaga.”—Salamo 40:2.

Kua fakamalolo e Iehova a tautolu ke “tau ke he tau mitaki kua lata mo e tua” ke maeke ia tautolu ke “toto e moui tukulagi.” (1 Timoteo 6:12) Kua foaki foki e ia e tau puhala ma tautolu ke malolo tumau mo e kautu ke he tau felakutaki fakaagaga ha tautolu. Ne fakamafana he aposetolo ko Paulo e tau katofia Kerisiano ke “kia fakamalolo a mutolu ke he Iki ke he malolo he hana mana,” mo e ke ‘kia tapulu ke he tau tapulu tau katoa he Atua, kia maeke ia lautolu ke totoko atu ke he tau lagatau he tiapolo.’ (Efeso 6:10-17) Ka ko e heigoa la ka fakahahaku aki a tautolu? Mo e maeke fefe ia tautolu ke totoko atu ke he tau fakaohoohoaga hagahagakelea pihia?

Mataala ke he Tau Mena Fakalolelole

Kua pulotu ke manatu e talahauaga moli nei: Ko e tau fifiliaga ne taute e tautolu ka fakahiku ni ke lauia ai ha tautolu a malolo faka-Kerisiano ke he puhala mitaki po ke kelea. Ko e tau fuata kua fakafehagai a lautolu mo e tau fifiliaga hagaao ke he tau mena tuga e tau feua pauaki, fakatolomaki he fakaakoaga, mo e fakamauaga. Ko e tau tagata lalahi  kua fifili ke hiki ke he taha matakavi po ke kamata taha gahua lafi ki luga. Kua taute e tautolu e tau fifiliaga he tau aho oti hagaao ke he fakaaogaaga he magaaho mo e falu a matagahua loga foki. Ko e heigoa ka lagomatai a tautolu ke taute e tau fifiliaga pulotu ka lafi ke he ha tautolu a malolo ko e tau fekafekau he Atua? Ne talahau he taha ne kua leva e Kerisiano: “Ne ole lagomatai au ki a Iehova he magaaho ka taute e tau fifiliaga. Kua aoga lahi he iloa e au ke talia mo e fakagahuahua e tau fakatonuaga ne foaki mai i loto he Tohi Tapu, he tau feleveiaaga Kerisiano, he tau motua, mo e he tau tohi fakave ke he Tohi Tapu.”

Ka taute e tau fifiliaga, kua mitaki ia tautolu ke huhu hifo ki a tautolu ni: ‘Ka lima po ke hogofulu e tau i mua, to fiafia nakai au ke he tau fifiliaga ne taute e au he mogonei, po ke to tokihala nakai au ki ai? Eketaha nakai au ke taute e tau fifiliaga ka nakai fakalolelole fakaagaga ki a au ka e to lafi ke he holoaga fakaagaga haku?’—Filipi 3:16.

He mahala atu ke he tau kamatamata po ke fakaata ne lautolu a lautolu ke teitei ke holitu e tau fakatufono he Atua nukua taute falu takitokotaha ne papatiso ke takitaki e moui fakahahaku. Ko e tokogahoa ne tuku kehe he fakapotopotoaga ha kua nakai tokihala mo e he tutuli mau e tau puhala agahala nukua lali fakalahi ke liu talia, ka e kua liu ni ke tuku kehe foki—falu magaaho nakai la leva ia—he taute agaia e hehe fakamua. Kua pihia kia ha kua nakai liogi a lautolu ma e lagomatai faka-Atua ke ‘fakavihia e tau mena kelea mo e pipiki ke he tau mena mitaki’? (Roma 12:9; Salamo 97:10) Kua lata ia tautolu oti ke “kia eke mo e fakamolemole e tau puhala ma e tau hui ha [ta]utolu.” (Heperu 12:13) Ati lata ai ia tautolu ke manamanatu ke he falu a puhala ka lagomatai a tautolu ke fakatumau e malolo fakaagaga.

Kia Fakatumau he Puhala Gahua Faka-Kerisiano

Taha puhala ke poi fakalatalata he ha tautolu a poitufi ma e moui, ke fakamakai nakai noa ke he gahua fakamatala he Kautu. E, ko e fekafekau faka-Kerisiano ha tautolu ko e lagomatai uho ke taute e tau loto mo e tau manamanatuaga ha tautolu ke fakamahao ke taute e finagalo he Atua mo e matakaki atu ke he palepale he moui tukulagi. Hagaao ke he mena nei, ne fakamafana e Paulo e tau Korinito: “Ko e haku a tau matakainaga fakahelehele na e, kia tumau a mutolu mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.” (1 Korinito 15:58) Ko e kakano he “tumau” ke ‘fakamau hifo.’ Ke “nakai fagahuatia” kua kakano ‘na nakai fakaata he tagata a ia ni ke tokanoa mai he fakakaupaaga hana.’ Ti, he lavelave lahi ke he fekafekau ha tautolu ka ha ha ai e lauiaaga malolo ke he puhala faka-Kerisiano ha tautolu. He lagomatai falu tagata ke o mai ke iloa a Iehova ka foaki ke he tau momoui ha tautolu e kakano mo e tamai ki a tautolu e fiafia lahi.—Gahua 20:35.

Ko Pauline, ko e Kerisiano ne fakaaoga ke molea 30 e tau ko e misionare mo e ke he falu gahua mau foki, ne talahau: “Ko e fekafekauaga ko e puipuiaga a ia ha kua fakamoli mai ki a au he fakamatala atu ke he falu na haia ia au e kupu moli.” Ko e mauokafua pihia kua fua mai foki he fakalataha ke he tau gahua faka-Kerisiano, tuga e o atu ke he tau feleveiaaga ke tapuaki mo e taute e kumikumi fakailoilo fakatagata ke he Tohi Tapu.

Fakamalolo he Fematakainagaaki Mokoina

He eke mo taha he tau tagata tapuaki moli he fakatokatokaaga he lalolagi katoa ka maeke ke lauia fakamalolo mai ki a tautolu. Ko e monuina ha ia ke feoaki mo e fematakainagaaki mokoina pihia he lalolagi katoa! (1 Peteru 2:17) Mo e kua maeke ia  tautolu ke ha ha ai e lauiaaga malolo ke he ha tautolu a tau katofia talitonu.

Mailoga e tau matagahua lagomatai he tagata tututonu ko Iopu. Nukua omoi foki e tagata fakamafana fakavai ko Elifasa ke talahau: “Ko e tau kupu hau ne fakatu ai a ia ne tauveli, ne fakamalolo ai foki e koe e tau tulihui ne tagatagato.” (Iopu 4:4) Kua fefe a tautolu hagaao ke he mena nei? Kua ha ha ia tautolu takitokotaha e matagahua ke lagomatai e tau matakainaga fakaagaga ha tautolu ke fakauka ke he fekafekauaga he Atua. Ke he ha tautolu a fakafehagaiaga, kua lata ia tautolu ke gahuahua hagaao ke he agaga he tau kupu: “Kia fakamalolo a mutolu e tau lima kua piki, ti fakamalolo foki e tau tulihui kua tagatagatō.” (Isaia 35:3) Ti ko e ha he eke mo foliaga hau ke fakamalolo mo e fakamafana taha po ke ua e katofia Kerisiano he tau magaaho oti ka feleveia a koe mo lautolu? (Heperu 10:24, 25) Ko e tau kupu fakamafana he nava mo e fakaaue ma e tau laliaga tumau ha lautolu ke fakafiafia a Iehova ka lagomatai moli a lautolu ke fakatumau fakalataha mo e amaamanakiaga ke kautu ke he poitufi ma e moui.

Kua lahi e mena ke taute he tau motua Kerisiano he fakamafana a lautolu ne fou. Kua maeke e mena nei he foaki e tau lagomatai mo e tau tomatomaaga tonu mai he Tohi Tapu mo e he gahua mo lautolu he fekafekauaga he fonua. Ne fakaaoga he aposetolo ko Paulo e tau magaaho oti ke fakamalolo e falu. Ne manako lahi a ia ke kitia e tau Kerisiano i Roma ke maeke ia ia ke lagomatai ke fakamalolo a lautolu fakaagaga. (Roma 1:11) Ne fioia e ia e tau matakainaga fakahele hana i Filipi ko e “fiafia mo e foufou” hana mo e tomatoma a lautolu ke ‘tumau pihia ke he Iki.’ (Filipi 4:1) He logona hagaao ke he mena uka he tau matakainaga hana i Tesalonia, ne fakafano e Paulo a Timoteo ke ‘fakatumau a lautolu, mo e tomatoma a lautolu, neke fagahuatia taha he tau matematekelea.’—1 Tesalonia 3:1-3.

Kua fakakite mo e fakaaue atu e tau aposetolo ko Paulo mo Peteru ke he tau laliaga tua fakamoli he tau katofia tapuaki ha laua. (Kolose 2:5; 1 Tesalonia 3:7, 8; 2 Peteru 1:12) Kia mamata atu ai a tautolu, nakai ke he tau lolelole he tau matakainaga ha tautolu, ka ke he tau fua mitaki ha lautolu mo e ha lautolu a taufetului monuina ke fakatumau mo e fakalilifu ki a Iehova.

Kaeke ka manatu kelea po ke tuhituhi a tautolu, liga kua fakahanoa a tautolu ati fakalaulahi e uka ma e falu ke fakatumau ke he tua. Ti kua lata ha ia mogoia ke manatu ko e tau matakainaga ha tautolu hane ‘fakafita mo e tiaki’ i loto he fakatokaaga nei! (Mataio 9:36) I loto he fakapotopotoaga Kerisiano, kua tonuhia ia lautolu ke amanaki ke moua i ai e mafanatia mo e hauhauaga. Kia lata ai ia tautolu, mogoia, ke taute e mena kua fahia ia tautolu ke ati hake e tau katofia talitonu mo e lagomatai a lautolu ke fakatumau.

Kua liga fehagai mai e falu ki a tautolu he falu magaaho ke he puhala ka maeke ke fakalolelole e fakatumau ha tautolu. To fakaata kia e tautolu e tau kupu mao po ke tau matagahua nakai totonu ke fakatuai aki a tautolu he ha tautolu a fekafekau ki a Iehova? Kia nakai fakaai a tautolu ke toka taha tagata ke futia kehe a tautolu mai he fakatumauaga ha tautolu!—2 Peteru 3:17.

Tau Maveheaga he Atua—Ko e Fakaohoohoaga Malolo

Ko e maveheaga a Iehova ke he vaha anoiha homo ue atu i lalo he pule Kautu ne kua foaki ki a tautolu e amaamanakiaga ka lagomatai a tautolu ke tokamau e fakatumauaga ha tautolu. (Heperu 6:19) Mo e he talitonu na fakamoli tumau he Atua e tau maveheaga hana ne kua omoi ai a tautolu ke ‘mataala mo e tumau ke he tua.’ (1 Korinito 16:13; Heperu 3:6) He matamata kua fakatuai e falu maveheaga he Atua ke fakamoli ka liga kamatamata e tua ha tautolu. Ti kua aoga mahaki ke fakaeneene a tautolu neke fakahehe he tau fakaakoaga fakavai mo e hiki mai he amaamanakiaga ha tautolu.—Kolose 1:23; Heperu 13:9.

Ko e fakafifitakiaga kelea he tau Isaraela ne mamate ha kua nakai tua a lautolu ke he tau maveheaga ha Iehova, nukua lata ke eke mo hatakiaga ma tautolu. (Salamo 78:37) He nakai tatai mo lautolu, kia fakatumau a tautolu he fekafekau ke he Atua fakalataha mo e manamanatuaga mafiti ke he tau aho fakahiku nei. “Kua nofo au he tau aho oti ke tuga kua hoko mai fai e aho lahi a Iehova a pogipogi,” he talahau he taha motua mauokafua.—Ioelu 1:15.

E, kua tata lahi mai e aho lahi a Iehova. Pete ia, kua nakai fai mena ia tautolu ke matakutaku ki ai ka fakatumau a tautolu ke fakatata atu ke he Atua. Kaeke tumau a tautolu ke pipiki atu ke he tau tutuaga tututonu hana mo e ke fakatumau, kua maeke ia tautolu ke tafepoi mo e kautu ke he poitufi ma e moui tukulagi tukumuitea!—Tau Fakatai 11:19; 1 Timoteo 6:12, 17-19.

[Fakatino he lau 31]

Kua taute nakai e koe e tau mena oti kua fahia a koe ki ai ke lagomatai e tau katofia Kerisiano ke fakatumau?

[Fakatino Credit Line he lau 30]

The Complete Encyclopedia of Illustration/J. G. Heck