Kia Tutu mo e Kitekite Atu ke he Fakamouiaga ha Iehova!

“Kia tutu a a mutolu, kia tutu a mutolu, mo e kitekite atu a mutolu ke he fakamouiaga mai ia Iehova ko ia ha ha ia mutolu.”—2 NOFOAGA HE TAU PATUIKI 20:17.

1, 2. Ko e ha e favale mafiti ha “Koku he motu a Makoku” kua hagahagakelea lahi ke he fakamatakutaku he lalolagi katoa?

KO E fakamatakutaku ne fakamaama he falu ko e favaleaga ke he maaga he lalolagi, pihia ni foki e kaufakalatahaaga. Maama ai, ko e fakamatakutaku pihia kua lata ke uta fakahokulo. He taha fahi, ha ha i ai taha favaleaga lahi mahaki kua mua atu e hagahagakelea, ne kua tote e onoonoaga he tau tagata he lalolagi. Ko e heigoa a ia?

² Ko e favale ha “Koku he motu a Makoku,” nukua tutala ki ai e Tohi Tapu he Esekielu veveheaga 38. Nukua fakalahi kia ke talahau ko e favaleaga nei kua hagahagakelea lahi ke he fakamatakutaku he lalolagi katoa? Nakai pihia, ha ko e favaleaga ha Koku kua nakai ni ko e ekefakakelea he tau fakatufono he tagata. Kua favale foki ke he fakatufono he Atua he lagi! Pete ia, nakai tuga e tau tagata, ne kaupa ni e kautuaga he fahia ke he tau ekefakakelea he fakatokaaga ha lautolu, kua iloa katoatoa he Tufuga e  puhala ke fehagai mo e favale vevela lahi ha Koku.

Favale ke he Fakatufono he Atua

3. Ko e heigoa kua uiina e tau pule he lalolagi ke taute tali mai he 1914, ti kua tali atu fefe a lautolu?

³ Ko e taufetoko he vahaloto he Patuiki he Atua hane pule mogonei mo e fakatokaaga kelea ha Satani ne tupu agaia tali mai he fakave e Kautu he Atua he lagi he 1914. He magahala ia, ne fakailoa ke he tau pule he tagata ke muitua ke he Pule ne fifili he Atua. Ka kua fakaheu e lautolu ke taute ai, tuga he talahau tuai: “Kua tutu mai e tau patuiki he lalolagi, kua pulega fakalataha foki e tau iki, ke totoko atu kia Iehova mo ia ne fakauku e ia. ‘Kia momotu e tautolu ha laua a tau liliaga, mo e tiaki ha laua a tau toua mai ia tautolu.’ ” (Salamo 2:1-3) Ko e totoko ke he pule he Kautu ka hokotia maaliali ke he tapunu he magaaho ka favale a Koku ha Makoku.

4, 5. Maeke fefe e tau tagata ke tau ke he fakatufono nakai kitia he Atua he lagi?

⁴ Fa manamanatu a tautolu ke he puhala kua maeke he tau tagata ke tau atu ke he fakatufono nakai kitia he lagi. Ko e fakatufono nai kua fakakite he Tohi Tapu, ne ha ha ai e “teau e afe mo e fagofulu ma fa e afe hoko lautolu, ko lautolu ne fakafua mai he lalolagi,” fakalataha mo e “Punua mamoe,” ko Keriso Iesu. (Fakakiteaga 14:1, 3; Ioane 1:29) He lagi, kua tutala hagaao ke he fakatufono fou ko e “lagi fou,” ka ko e tau tagata he lalolagi kua fakahigoa ko e “lalolagi fou.” (Isaia 65:17; 2 Peteru 3:13) Laulahi he 144,000 ko e tau ekegahua mo Keriso ne fita e fakakatoatoa e puhala tua fakamoli ha lautolu he lalolagi. Ti kua fakamoli e lautolu ha lautolu a latatonu ke taute e tau kotofaaga fou he lagi.

⁵ Ko e tote ha lautolu ne toe he 144,000, mogoia, kua ha ha agaia he lalolagi. He molea e 15,000,000 ne o mai ke he fakamanatuaga he  Kai Afiafi he Iki he 2002, toko 8,760 ni ne fakakite e amaamanakiaga ha lautolu ne fifili ma e kotofaaga nei he lagi. Ko e taha kua lali ke favale ke he tau tagata nei ne toe he Kautu kua moli ke totoko ke he Kautu he Atua.—Fakakiteaga 12:17.

Fakakatoatoa he Patuiki Hana Kautuaga

6. Fefe e onoonoaga ha Iehova mo Keriso ke he totokoaga fakahako ke he tau tagata he Atua?

⁶ Ko e tali atu ha Iehova ke he totokoaga he hana Kautu ne fakave kua talahau tuai: “To kata a ia kua haele ke he lagi; to va e Iki kia lautolu. Ti vagahau atu ai a ia kia lautolu ke he hana ita, ti fakamatakutaku foki e ia a lautolu ke he hana ita lahi. Ka ko au, kua fakauku tuai e au haku a Patuiki ki luga a Siona, ko e haku a mouga tapu.” (Salamo 2:4-6) Ko e magaaho anei ma e Keriso, i lalo hifo he takitakiaga ha Iehova, “to kautu ni a ia.” (Fakakiteaga 6:2) Onoono fefe a Iehova ke he totokoaga ne hagaaki atu ke he hana tau tagata he kautuaga fakahiku hana? Kua hagaaki totoko moli ki a ia mo e hana Patuiki pule. “Ko ia kua piki atu kia mutolu, kua piki atu ai a ia ke he alito mata he hana fofoga,” he talahau e Iehova. (Sakaria 2:8) Ne talahau fai logonaaga e Iesu na mailoga e ia e tau mena ne taute po ke kaumahala ke taute ke he tau matakainaga fakauku hana na taute po ke nakai taute ki a ia.—Mataio 25:40, 45.

7. Ko e heigoa e tau kakano ne iloa e lautolu he “moto tagata tokologa,” kua fakamaama he Fakakiteaga 7:9, hagaao ke he ita ha Koku?

⁷ Moli, ko lautolu ne lalago fakamalolo ki a lautolu ne fakauku ne toe ka logona pihia foki e ita ha Koku. Ko e tau tagata fakalataha nei he “lalolagi fou” he Atua ko e “moto tagata tokologa” ne “mai he tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakiteaga 7:9) Ne tutala ki ai “kua tutu mai a lautolu ki mua he nofoaiki, ki mua foki he Punua mamoe, kua tapulu a lautolu ke he tau tapulu hina.” Kua ha ha ia lautolu e tuaga talia ki mua he Atua mo Keriso Iesu. He toto e “tau lau pama ke he tau lima ha lautolu,” ne fakaheke e lautolu a Iehova ko e Pule Katoatoa kua tonuhia he lalolagi mo e lagi katoatoa, ne fakakite e tuaga pule ne takitaki he hana Patuiki he nofoaiki, ko Iesu Keriso, “ko e Punua mamoe he Atua.”—Ioane 1:29, 36.

8. Ko e heigoa he favale ha Koku ka fakatupu a Keriso ke taute, mo e heigoa e fua?

⁸ Ko e favaleaga ha Koku ne fakatupu e Patuiki he nofoaiki he Atua ke fakahoko e tau i Amaketo. (Fakakiteaga 16:14, 16) Ko lautolu ne fakaheu ke talahau e pule katoatoa ha Iehova ka matematekelea he moumouaga. Ko lautolu ne fakauka ke he matematekelea ha ko e ha lautolu a mahani fakamoli ke he Kautu he Atua, ke he taha fahi, ka moua e totokaaga tukulagi. Hagaao ke he mena nei, ne tohi he aposetolo ko Paulo: “Ko e fakamailoga ia he fakafiliaga tonu he Atua, kia talahaua ai a mutolu kua lata mo e kautu he Atua, ko e mena ia kua mamahi ai a mutolu; Kaeke ko e mena tonu ke he Atua ke taui atu e matematekelea kia lautolu kua matematekela ai a mutolu;  Kia mutolu foki kua matematekelea, e okiokihaga fakalataha mo mautolu, ka fakakite mai e Iki ko Iesu mai he lagi, fakalataha mo e tau agelu he hana malolo, Ke he afi puhopuho, ke taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.”—2 Tesalonia 1:5-8.

9, 10. (a) Foaki fefe e Iehova e kautuaga ki a Iuta ke he fi fakalialia? (e) Ko e heigoa kua lata he tau Kerisiano he vaha nei ke fakatumau ke taute?

⁹ He matematekelea lahi hane gutu mai, ko e fakaotiaga i Amaketo, to tau a Keriso ke he tau mahani kelea oti kana. Ka e to nakai lata ma e tau tutaki hana ke tau, pete ni kua nakai lata e mena nei ma e tau tagata ne nonofo ke he kautu ne ua ha Iuta he tau afe tau kua mole ki tua. Ko e tau ha Iehova, ti foaki e ia e kautuaga. Totou pehe he talahauaga: “Ti tuku atu ai e Iehova e tau kau kua tatao ke tau mo e fanau a Amoni, mo Moapi, mo e tau tagata ne nonofo he mouga ko Seira, ne o mai ke tau mo Iuta; ti kelipopo ai a lautolu. He mamatike e fanau a Amoni mo e fanau a Moapi ke tau mo lautolu ne nonofo ke he mouga ko Seira, ke kelipopo ni mo e fakaoti ai a lautolu; kua fakaotioti e lautolu a lautolu ne nonofo i Seira, ti fekeliaki e lautolu a lautolu. Kua hohoko atu a Iuta ke he kolo ke toko ai ha ha he tutakale, ti kitekite atu a lautolu ke he motu o tagata, kitiala, ko e tau tagata mamate a lautolu, kua takaveli a lautolu ke he kelekele, nakai ni hao taha.”—2 Nofoaga he Tau Patuiki 20:22-24.

¹⁰ Ne tuga ni e mena ne talahau tuai e Iehova: “Nakai tau a mutolu.” (2 Nofoaga he Tau Patuiki 20:17) Kua fakatoka he mena nei e puhala ma e tau Kerisiano ke muitua he magaaho ka hau a Iesu Keriso “to kautu ni a ia.” To hoko ki ai, kua fakatumau ni a lautolu ke tau ke he kelea, he nakai fakaaoga e tau kanavaakau he tino, ka e fakaagaga. Ko e mena ia ki a lautolu ati “mahala e kelea ke he mitaki.”—Roma 6:13; 12:17-21; 13:12; 2 Korinito 10:3-5.

Ko Hai ka Takitaki e Favale a Koku?

11. (a) Ko e heigoa e matakau ka fakaaoga e Koku ke fakahoko e favale hana? (e) Ko e heigoa kua putoia he mataala fakaagaga?

¹¹ Kua kitia a Koku ha Makoku ko Satani ko e Tiapolo he hana tuaga fakalialia tali mai he 1914. Ha ko e mena moui agaga, nakai maeke ia ia ke favale fakatonu, ka e fakaaoga e ia e tau matakau tagata ke taute hana tau gahua. Ko hai la e tau matakau tagata nei? Nakai tala mai fakamatafeiga he Tohi Tapu ki a tautolu, ka e mai ki a tautolu e falu fakakiteaga ke maeke ia tautolu ke lagomatai a tautolu ke kitia ko hai a lautolu ia. He kitia ai e tau mena tutupu he lalolagi he fakamoli e tau perofetaaga he Tohi Tapu, to fakahiku ke kitia maali lahi e tautolu e fakatino. Fakamamao e tau tagata ha Iehova he fuafua manatu ka e fakatumau ke  mataala fakaagaga, he mailoga katoatoa e tau tutupuaga fakapolitika mo e fakalotu kua hao tonu mo e fakamoliaga he perofetaaga he Tohi Tapu.

12, 13. Talahau tuai fefe he perofeta ko Tanielu e favale fakahiku ke he tau tagata he Atua?

¹² Kua fakakite he perofeta ko Tanielu e maama he favale fakahiku ke he tau tagata he Atua, he tohi: “Ti fina age a ia [ko e patuiki he fahi tokelau] mo e ita lahi kia fakaoti ai e ia mo e kelipopo ai e tau tagata tokologa. To fakatu e ia e tau fale ie he hana fale iki ke he vaha he tahi mo e mouga fulufuluola mo e tapu.”—Tanielu 11:44, 45.

¹³ I loto he Tohi Tapu, ‘ko e tahi homo ue atu’ e Tahi Lahi, po ke Metiteraneani, mo e “mouga tapu” ko Siona, nukua pehe a Iehova: “Ka ko au, kua fakauku tuai e au haku a Patuiki ki luga a Siona, ko e haku a mouga tapu.” (Salamo 2:6; Iosua 1:4) Ti, he puhala fakaagaga, ko e motu “he vaha he tahi mo e mouga fulufuluola mo e tapu” kua hukui e motu fakaagaga monuina he tau Kerisiano fakauku. Kua nakai liu kitia a lautolu ke fakalataha mo e tahi he tau tagata ne o kehe mai he Atua, mo e amaamanaki lahi atu a lautolu ke pule mo Keriso Iesu ke he Kautu he lagi. Maama ai, ko e tau fekafekau fakauku he Atua, fakalataha mo e tau hoa fakamoli he moto tagata tokologa, ka eke mo matafi he patuiki he fahi tokelau ka fakatoka e favale vevela hana he fakamoli e perofetaaga ha Tanielu.—Isaia 57:20; Heperu 12:22; Fakakiteaga 14:1.

To Tali Fefe e Tau Fekafekau he Atua?

14. Ko e heigoa e tau mena tolu ka taute he tau tagata he Atua ka favale ki ai?

¹⁴ Ko e heigoa kua amanaki e tau fekafekau he Atua ke taute kaeke ke hokotia e favale ki a lautolu? Liu ai e motu fakatai he Atua he vaha ha Iehosafata fakatoka foki e puhala. Mailoga na poaki atu ke he tau tagata ne nonofo ai ke taute tolu e mena: (1) kia tutu a a mutolu, (2) kia tutu a, mo e (3) kitekite atu ke he fakamouiaga mai ia Iehova. To fakalautatai fefe e tau tagata he Atua mo e tau kupu nei?—2 Nofoaga he Tau Patuiki 20:17.

15. Ko e heigoa e kakano ma e tau tagata ha Iehova ke tutu a a lautolu?

¹⁵Kia tutu a a mutolu: He nakai maueue, to  fakatumau e tau tagata he Atua ke tutu mau a lautolu he lalago fakamalolo e Kautu he Atua. To fakatumau a lautolu ke he tuaga tu uho faka-Kerisiano ha lautolu. To ‘tumau mo e nakai fagahuatia’ a lautolu he ha lautolu a fekafekau fakamoli ki a Iehova mo e to fakatumau ke fakaheke atu a Iehova ma e hana fakaalofa-totonu ke he tau tagata. (1 Korinito 15:58; Salamo 118:28, 29) Nakai fai pehiaaga mogonei po ke anoiha kua maeke ke luelue a lautolu mai he tuaga talia faka-Atua nei.

16. Ko e heigoa e puhala ka tutu ai e tau fekafekau ha Iehova?

¹⁶Kia tutu a: To nakai lali e tau fekafekau ha Iehova ke fakahao a lautolu ka e to falanaki katoatoa a lautolu ki a Iehova. Ko ia hokoia kua maeke ke fakahao hana tau fekafekau mai he matematekelea he lalolagi, ti mavehe a ia ke taute pihia. (Isaia 43:10, 11; 54:15; Tagi Aue 3:26) Ko e falanaki ki a Iehova ka putoia e falanaki ke he halavaka kitia he vaha fou nei nukua fakaaoga moli e ia ke he tau hogofulu tau ke lata mo e tau finagalo hana. Nakai la pihia ia fakamua, to lata e tau Kerisiano moli ke fakave e mauokafua ke he ha lautolu a tau matakainaga tapuaki ne foaki e Iehova mo e hana Patuiki pule ke takitaki ai. To takitaki he tau tagata tane fakamoli nei e tau tagata he Atua. Ko e fakaheu e takitakiaga ha lautolu ka fakahiku ke he matematekelea.—Mataio 24:45-47; Heperu 13:7, 17.

17. Ko e ha to kitia he tau fekafekau tua fakamoli he Atua e fakamouiaga ha Iehova?

¹⁷Kitekite atu ke he fakamouiaga mai ia Iehova: Ko e fakamouiaga e palepale ma lautolu oti kua tumau ke he tuaga ha lautolu he fakamoli Kerisiano mo e falanaki ki a Iehova ma e fakahaoaga. Ato hoko e magaaho fakahiku—mo e maeke agaia ia lautolu—to fakapuloa e lautolu e hokomaiaga he aho he fakafiliaga a Iehova. Kua lata e tau mena momoui oti ke iloa ko Iehova ko e Atua moli mo e fai fekafekau fakamoli a ia he lalolagi. To nakai liu ke lata foki e tau fetokoaki leva ke he tutonuhia he pule katoatoa ha Iehova.—Esekielu 33:33; 36:23.

18, 19. (a) Fakaata fefe he lologo he kautuaga ia Esoto veveheaga 15 e tau logonaaga ha lautolu ka hao he favale ha Koku? (e) Ko e heigoa kua latatonu ma e tau tagata he Atua ke taute mogonei?

¹⁸ Mo e malolo fakafou, to huhu atu e tau tagata he Atua ke he lalolagi fou, makai ke uhu e lologo he kautuaga, tuga ni e tau Isaraela i tuai he mole e fakamouiaga ha lautolu he Tahi Kula. He loto fakaaue tukulagi ki a Iehova ma e hana puipuiaga, tokotaha mo e auloa, to taogo e lautolu e tau kupu i tuai: “To lologo au kia Iehova, ha kua kautu ue atu a ia. . . . Ko Iehova ko e toa a ia, ko Iehova ko e hana higoa ia. . . . Ko e hau a lima matau, Iehova na e, kua lilifu ia ke he malolo; ko e hau a lima matau, Iehova na e, kua lipilipi a ia ne fai fi mai. Ko e lahi he hau a malolo kua fakaotioti e koe a lautolu ne tutu mai kia koe; kua fakafano atu e koe hau a ita, kua kai ai a lautolu, tuga ne gutugutu saito. . . . Ko e hau a fakaalofa kua takitaki mai e koe e motu nai kua fakamoui ai e koe; ko e hau a malolo kua takitaki mai ai e koe a lautolu ke he hau a haeleaga tapu. . . . To fakahoko atu e koe a lautolu, ti to e koe a lautolu ke he mouga kua eke māu; ko e mena kua taute ai e koe, Iehova na e, ke haele ai a koe; ko e mena tapu, ma Iki na e, kua fakamau he hau a tau lima. Kua eke a Iehova mo patuiki tukulagi tukumuitea.”—Esoto 15:1-19.

¹⁹ Mogonei mo e amaamanakiaga he moui tukulagi kua kikila lahi mai i mua, ko e magaaho mitaki ha ia ma e tau fekafekau he Atua ke fakatata e mahani fakamoli ha lautolu ki a Iehova mo e ke fakafou e fifiliaga ha lautolu ke fekafekau ki a ia ko e ha lautolu a Patuiki tukulagi!—1 Nofoaga he Tau Patuiki 29:11-13.

Maeke Nakai a Koe ke Fakamaama?

• Ko e ha ne hagaaki e favale ha Koku ki a lautolu ne fakauku mo e tau mamoe kehe?

• To tutu fefe e tau tagata he Atua?

• Ko e heigoa e kakano ke tutu a?

• To kitia fefe he tau tagata he Atua e fakamouiaga ha Iehova?

[Tau Huhu he Fakaakoaga]

[Fakatino he lau 25]

Ne age e Iehova ki a Iehosafata mo e hana tau tagata e kautuaga, mo e nakai lata ia lautolu ke tau

[Fakatino he lau 27]

Kua fakalataha a lautolu ne fakauku mo e tau mamoe kehe he fakatokoluga e pule katoatoa ha Iehova

[Fakatino he lau 28]

Tuga e tau Isaraela i tuai, to nakai leva ti uhu he tau tagata he Atua e lologo he kautuaga