Ko e Heigoa kua Tupu ke he Gahua Fakaalofa Noa?

HE MOLE e tau moumouaga ia Sepetema 11, 2001, i New York City mo Washington, D.C., kua kehe lahi e lagomatai he tau tagata oti ki a lautolu ne lauia he matematekelea. Ne ofogia e tau fakatokatokaaga gahua fakaalofa noa ha kua $2.7 piliona ne foaki noa ke lagomatai e tau magafaoa he tau tagata ne moua he matematekelea. Momoko ha ko e lahi he moumouaga ia, ne manako e tau tagata he tau kalakala oti ke lagomatai.

Ko e aga he falu tagata kua hukia mafiti, he magaaho ne iloa ko e tau tufatufaaga he tau gahua fakaalofa noa talahaua ia ko e tau foakiaga tupe kua fakaaoga fakahehe. Ha ha i ai e felatauaki lahi mahaki ke he hokotaki ha ko e taha e fakatokatokaaga gahua fakaalofa noa makimaki ne pulega ke leveki e teitei hafa he $546 miliona ne moua ai mo e fakaaoga ma e falu mena foki. Pete ni kua huhui e fifiliaga he fakatokatokaaga he magaaho fakamui mo e fakamolemole ke he mena ne tupu, taha e tagata hokotaki ne talahau: “Ko e tau tagata tuhituhi ne kitia e tau gahua fou nei kua tomui tuai ke liuaki mai e falanakiaga” nukua fakaaoga ai ato hoko e tau moumouaga. Ka e fefe a koe? Kua tote kia e falanaki hau mogonei ke he gahua fakaalofa noa?

Aoga po ke Moumou?

Ko e foaki ke he gahua fakaalofa noa ko e mena kua mitaki. Ka e, nakai kitia pihia oti he tau tagata. Molea e 200 he tau tau kua mole, ko Samuel Johnson, ko e tagata tohia esei Peritania, ne tohi: “Na mauokafua moli a koe to taute e koe e mena mitaki he totogi tupe atu ki a lautolu kua gahua, ha ko e palepale he ha lautolu a gahua, mai he foaki noa ni e koe e tupe ke he gahua fakaalofa noa.” Mena taha ia ne tupu ke he falu he vaha nei, ti ko e tau hokotaki kua nakai taute fakamitaki po ke nakai fatifati fakamitaki he tau tupe foaki noa he fakakatokatokaaga gahua fakaalofa noa ne nakai lahi e mena ke fakamalolo aki e mauokafua he tau tagata. Manamanatu la ke he ua e fakafifitakiaga nakai la leva.

Ko e takitaki he gahua fakaalofa noa fakalotu i San Francisco ne fakaoti he mole e foaki e kaitalofa ke he hana fahi gahua ha ko e hana cosmetic surgery mo e hana tau kaitalofa $500 he kai ke he tau fale kai he tau fahi tapu takitaha he ua e tau kua mole. I Peritania, ko e tau tagata fakatokatoka ke he televisoni gahua fakaalofa noa ne ma he magaaho ne kitia kua mai he 6.5 miliona pauna (kavi ke $10 miliona, U.S.) ne fakafano ke lagomatai aki e talaga he tau fale leveki tama nakai fai matua i Romania, kua 12 ni e fale fakateaga ne talaga, ka e galo noa e tau teau afe he tau tala. Ko e tau hokotaki kelea pehenei kua fakatupu moli e falu tagata foaki ke  mataala fakalahi ke he lahi he mena ka foaki e lautolu mo e foaki ki a hai.

Ke Foaki po ke Nakai Foaki

Ko e mena fuafuakelea mogoia ke fakaata e tau gahua he tokogahoa po ke tau fakatokatokaaga ke moumou e manamanatu moli mo e fakaalofa hofihofi ha tautolu ma e falu. Pehe e Tohi Tapu: “Ko e hanai e oma ke he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea.” (Iakopo 1:27) E, ko e manamanatu makai ki a lautolu ne nonofogati mo e mativa ko e vala uho lahi faka-Kerisiano.

Ka e liga manamanatu agaia a koe, ‘Kua lata nakai au ke tumau e foaki ke he gahua fakaalofa noa, po kua lata au ke lali ke lagomatai he foaki e tau mena fakaalofa fakatagata ki a lautolu?’ Ko e heigoa e foakiaga ne amanaki e Atua ki ai? Ko e vala tala ka mui mai to fakatutala ke he tau huhu nei.