Aoga Lahi e Fakaalofa

PETE he fuakau, aga fakamotu, vagahau, po ke lanu, kua manako lahi e tau tagata oti kana ke he fakaalofa. Ka nakai fakamakona e manako ia, kua nakai fiafia a lautolu. Ne tohi he tagata kumikumi fakaekekafo: “Ko e fakaalofa mo e fakafetuiaga e vaka he mena kua taute a tautolu ke gagao mo e mena kua taute a tautolu ke malolo, ko e mena ne fakatupu e momoko mo e mena kua tamai e fiafia, ko e mena kua taute a tautolu ke mamahi mo e mena kua takitaki a tautolu ke fakamaulu. Ka tatai ai e malolo mo e tulaki fou, teitei ni ke fakainaina atu ai he tau ekekafo oti he motu ke he tau tagata gagao ha lautolu. To kaumahala ai ke nakai fai tohi fakaata ki ai.”

Ka e, ko e kaufakalatahaaga fou, mua atu ke he uta tala mo e tau tagata fakafifitaki talahaua i ai, ne fa tuku fakalahi e peehiaga ke he muhukoloa, malolo, talahaua, mo e mahani fakatane mo e fifine ki luga he manako he tau tagata ma e tau fakafetuiaga mafana he fakaalofa. Tokologa e tau tagata fakaako ne peehi e tau foliaga mo e tau gahua fakalalolagi, he talahau e kautuaga matapatu ke he tau mouaaga. Moli, kua aoga e fakaakoaga mo e feakiaga he tau taleni he taha, ka kua lata kia ia lautolu ke tutuli fakamakamaka ke nakai fai magaaho e taha ma e magafaoa mo e tau kapitiga? Ko e tagata tohia i tuai na ko e tagata kitekite lotomatala he aga tagata ne fakatatai ke he tagata taleni ne nakai fai fakaalofa ke tuga e “apa kula kua fakapako po ke kumepalo kua fakatagi.” (1 Korinito 13:1) Ko e tau tagata pihia kua maeke ke muhukoloa, talahaua foki, ka e nakai fiafia moli.

Ko Iesu Keriso, ne ha ha ai e maamaaga hokulo mo e hofihofi pauaki ma e tau tagata, kua tuku e fakaalofa ma e Atua mo e katofia ko e matapatu he hana fakaakoaga. Ne pehe a ia: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa. . . . Kia fakaalofa atu a koe kia ia ne katofia a mua, kia tuga foki na koe kia koe.” (Mataio 22:37-39) Ko lautolu ni ne muitua ke he tau kupu nei ka eke moli mo tau tutaki ha Iesu. Ti, pehe a ia: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”—Ioane 13:35.

Maeke fefe mogoia he taha ke feaki e fakaalofa he lalolagi ke he vaha nei? Ti maeke fefe he tau matua ke fakaako e fakaalofa ke he tau fanau ha lautolu? To tutala e vala tala ka mui mai ke he tau huhu nei.

[Tau Fakatino he lau 3]

Ko e paleko e feaki he fakaalofa i loto he lalolagi ne puke he lotokai