Fifitaki a Iehova, ha Tautolu a Atua Nakai Fakamailoga Tagata
Fifitaki a Iehova, ha Tautolu a Atua Nakai Fakamailoga Tagata
“Kua nakai fakamailoga tagata e Atua.”—ROMA 2:11.
1, 2. (a) Ko e heigoa e finagalo ha Iehova hagaao ke he tau tagata Kanana oti kana? (e) Ko e heigoa ne taute e Iehova, mo e heigoa e tau huhu ne mafuta mai he mena nei?
HEAPI ke he Kelekele Tatai ha Moapi he 1473 F.V.N., ne fakateliga e tau Isaraela ki a Mose. Kua tatali mai e paleko he taha fahi he Vailele ko Ioritana. Ne fakapuloa e Mose e finagalo ha Iehova ke fekau a Isaraela ke kelipopo e tau motu malolo ne fitu ha Kanana ne haia he Motu he Maveheaga. Kua fakamafanatia ha ia e tau kupu ha Mose: “Ka tuku mai ai e Iehova hau a Atua a lautolu kia koe, ti kelipopo e koe a lautolu”! Kua nakai lata a Isaraela ke taute ha maveheaga mo lautolu, ti kua nakai lata e tau Kanana ke moua ha fakaalofa.—Teutaronome 1:1; 7:1, 2.
2 Pete ni ia, ne fakahao e Iehova taha magafaoa mai he maga fakamua ne tapaki e Isaraela. Ti moua foki he tau tagata mai he tau maga ne fa e puipui he Atua. Ko e ha e mena nei? Ko e heigoa kua fakaako mai ki a tautolu he tau tutupuaga lalahi ne hagaao atu ke he fakahaoaga he tau tagata Kanana nei hagaao ki a Iehova? Mo e maeke fefe ia tautolu ke fifitaki a ia?
Tau Mailogaaga ke he Talahaua ha Iehova
3, 4. Kua lauia fefe e tau tala hagaao ke he tau kautuaga he tau Isaraela, ke he tau tagata takitokotaha i Kanana?
3 He magahala he 40 tau ha Isaraela he tutakale ato huhu atu ke he Motu he Maveheaga, ne puipui mo e tau a Iehova ma e tau tagata hana. Ke he fahi toga he Motu he Maveheaga, ne fehagaaoaki a Isaraela mo e patuiki Kanana ha Arata. Ha ko e lagomatai ha Iehova ne kelipopo ai he tau Isaraela a ia mo e tau tagata hana i Horema. (Numera 21:1-3) Fakamui, ne takai e Isaraela e motu ko Etoma mo e o atu ke he fahi tokelau ke he fahi tokelau uta he Tahi Mate. He matakavi nei, ne nonofo fakamua he tau tagata Moapi, kua ha ha ai mogonei e tau tagata Amori. Ne nakai mahalo e Patuiki ko Sikono ha Amori ke fakaata a Isaraela ke o he loto maga hana. Ati matutaki e felakutaki i Iaesa, he fahi tokelau he Vai ko Arinona, matakavi ne fakafehagai a Sikono mo e mate hana. (Numera 21:23, 24; Teutaronome 2:30-33) Mamao atu he fahi tokelau, ne pule a Oko ke he falu a tagata Amori i Vasana. Pete ni ko e tagata makimaki a Oko, kua nakai fakaai a ia ke fakatai mo Iehova. Ne kelipopo ai a Oko i Etirei. (Numera 21:33-35; Teutaronome 3:1-3, 11) Ko e tau tala hagaao ke he tau kautuaga nei fakalataha mo e tau tala ke he O Fenoga ha Isaraela mai i Aikupito, kua lahi e lauia ke he tau tagata takitokotaha ne nonofo i Kanana. *
4 He magaaho ne huhu fakamua atu a Isaraela ki Kanana he mole e o atu ke he taha fahi he Ioritana, ne taute e lautolu e apiaga i Kilikala. (Iosua 4:9-19) Nakai mamao mai ko e maga puipui ke he pa ha Ieriko. Ko e tau mena ne logona he Kanana ko Raava hagaao ke he tau gahua ha Iehova ne fakaohooho aki a ia ke fakagahuahua e tua. Ko e fua, he magaaho ne tamai e Iehova e fakaotiaga ki Ieriko, ne fakahao e ia a Raava mo lautolu he fale hana.—Iosua 2:1-13; 6:17, 18; Iakopo 2:25.
5. Ko e heigoa ne fakalagalaga e tau tagata Kipeona ke eke lagatau fakavai?
5 Mogonei, kua omai a Isaraela he tau fahi tatai ne tata ke he vailele ke hohoko atu ke he tau fugamatiketike he lotouho he magamotu. He muitua ke he takitakiaga ha Iehova, ne fakaaoga e Iosua e tau lagatau ke tatao aki e maga ko Ai. (Iosua, veveheaga 8) Ne fakalagalaga he tala matematekelea ne mui mai e tau patuiki tokologa ha Kanana ke fakaputuputu auloa ke tau. (Iosua 9:1, 2) Ko e tau tagata ne nonofo tata mai he maga Hivi i Kipeona kua kehe e mena ne taute. “Ti eke lagatau fakavai e lautolu,” he talahau ia Iosua 9:4. Ke tatai mo Raava, kua logona e lautolu na laveaki e Iehova hana tau tagata he O Fenoga mo e he kelipopo a Sikono mo Oko. (Iosua 9:6-10) Ati fioia he tau tagata Kipeona e nakai aoga he totoko. Ti, ko Kipeona mo e tau maga tolu ne tatatata mai—ko Kafira, Perota, mo Kiriata-iarima—ne fakafano e lautolu ki a Iosua i Kilikala e hukui ne fakatupua ke tuga kua hau he motu mamao. Ne kautu ai e lagatau ia. Ti taute e Iosua e maveheaga mo lautolu ke puipui aki a lautolu. Tolu e aho he mole ne iloa e Iosua mo e tau Isaraela kua fakahehe tuai a lautolu. Pete he pihia, nukua omonuo a lautolu ki a Iehova ke he maveheaga mo e fakamoli ai. (Iosua 9:16-19) Talia nakai e Iehova?
6. Tali fefe a Iehova ke he maveheaga ne taute e Iosua mo e tau tagata Kipeona?
6 Kua fakaata ai e tau tagata Kipeona mo tau tagata hele akau mo e tau tagata utu vai ma e tau Isaraela, pihia foki ma e “fatapoa a Iehova” he faituga utafano. (Iosua 9:21-27) Taha mena foki, he magaaho ne fakamatakutaku he tau patuiki ne lima ha Amori mo e ha lautolu a tau kau e tau tagata Kipeona, ne hulalo fakamana mai a Iehova. Ne tamate he tau uha tuli e tau fi ke molea atu ke he numera ne tamate he tau kau ha Iosua. Ne tali foki e Iehova e olelalo ha Iosua ke tu mau e la mo e mahina ke maeke ke kelipopo e tau fi. “Nakai fai aho fakamua foki po ke fakamui ke tuga ne aho ia,” he talahau e Iosua, “ne fanogonogo ai e Iehova ke he leo he tagata; ha kua kau ni a Iehova mo Isaraela.”—Iosua 10:1-14.
7. Ko e heigoa e kupu moli ne fakailoa e Peteru ne kua fakatata mai he tau mena ne tutupu ke he falu tagata Kanana?
7 Ko e tagata Kanana ko Raava mo e magafaoa hana, pihia foki e tau tagata Kipeona, kua matakutaku ki a Iehova mo e gahua fakatatau ki ai. Kua fakatata fakamitaki he tau mena ne tutupu ki a lautolu e moli he talahauaga he aposetolo Kerisiano ko Peteru he magaaho fakamui: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.
Tau Fehagaiaga ki a Isaraela mo Aperahamo
8, 9. Fakakite fefe e nakai fakamailoga tagata ha Iehova ke he hana tau fehagaiaga mo Aperahamo mo e ke he motu a Isaraela?
8 Ne fakamahao atu e tutaki ko Iakopo ke he fakaalofa noa he Atua mo e Hana tau fehagaiaga mo Aperahamo mo e tau huli hana. Ko e tua a Aperahamo, nakai ko e tupumaiaga hana, ne talahaua a ia “ko e kapitiga he Atua.” (Iakopo 2:23) Ne tamai he tua mo e fakaalofa ha Aperahamo ma Iehova e tau monuina ke he tau hologa hana. (2 Nofoaga he Tau Patuiki 20:7) Ne mavehe e Iehova ki a Aperahamo: “Ko e mena ia ke fakamonuina fakalahi ai e au a koe, mo e fakatokologa lahi ue atu e au hau a fanau ke tuga e tau fetu he lagi, ke tuga foki e oneone he matafaga.” Ka e mailoga e maveheaga he kupu ne mui mai: “Ko e hau a fanau foki ke monuina ai e tau motu oti kana he lalolagi.”—Kenese 22:17, 18; Roma 4:1-8.
9 Mamao mai he fakakite e fakamailoga tagata, ne fakatata e Iehova he tau puhala ne fehagai a ia mo Isaraela e tau mena ka taute e ia ma lautolu kua omaoma ki a ia. Ko e tau fehagaiaga pihia ko e fakafifitakiaga he puhala ne fakakite e Iehova e fakaalofa fakamoli ke he tau fekafekau fakamoli hana. Pete ni ko Isaraela ko e “koloa uho” ha Iehova, kua nakai pehe e mena nei kua tiaki e falu tagata mai he logona e fakaalofa fakamokoi he Atua. (Esoto 19:5; Teutaronome 7:6-8) Moli, kua liu fakatau e Iehova a Isaraela mai he fakatupa i Aikupito ati fakapuloa: “Kua iloa e au a mutolu hoko mutolu he tau magafaoa oti he lalolagi.” Ka e he puhala he perofeta ko Amosa mo e falu, ne mavehe foki e Iehova e amaamanakiaga homo ue atu ma e tau tagata he “tau motu oti.”—Amosa 3:2; 9:11, 12; Isaia 2:2-4.
Iesu, ko e Faiaoga Nakai Fakamailoga Tagata
10. Fifitaki fefe e Iesu e Matua hana he fakakite e nakai fakamailoga tagata?
10 He magahala he fekafekauaga hana he lalolagi, ko Iesu, ko e fakataiaga moli he Matua hana, kua fifitaki e mahani nakai fakamailoga tagata ha Iehova. (Heperu 1:3) Ko e mena aoga lahi ki a ia he magaaho ia ke kumi e “tau mamoe ni hokoia he faoa a Isaraela ne galo.” Pete he pihia, ne nakai liutua a ia mai he fakamatala ke he fifine Samaria he vaikeli. (Mataio 15:24; Ioane 4:7-30) Ne taute foki e ia e mana ha ko e fakamakamaka he takitaki kau, ne nakai ko e Iutaia. (Luka 7:1-10) Ko e fakatataaga foki a ia he fakaalofa hana ma e tau tagata he Atua he puhala he hana tau gahua. Kua mamao atu mo e laulahi atu foki e fakamatala he tau tutaki ha Iesu. Ati kitia maaliali ai ko e puhala ke moua e monuina ha Iehova kua matutaki, nakai ke he papale fakamotu, ka e ke he aga. Ko e tau tagata mahani fakatokolalo mo e loto fakamoli ne hoge ma e kupu moli, kua tali atu ke he tala mitaki he Kautu. Ke he taha fahi, ko e tau tagata fakaikaluga mo e fakatokoluga kua vihiatia e lautolu a Iesu mo e fekau hana. “Kua fakaaue au kia koe ma Matua na e, ko e Iki he lagi mo e lalolagi,” he fakapuloa e Iesu, “he ufiufi e koe e tau mena nai he tau tagata iloilo, mo e loto matala, ka kua fakakite atu ai ke he tau tama mukemuke; ko e haia ma Matua na e, ha ko e hau a finagalo ni haia.” (Luka 10:21) He magaaho ka fehagai a tautolu mo e falu he fakave ke he fakaalofa mo e tua, kua nakai fakamailoga tagata a tautolu, he iloa ko e puhala anei kua talia e Iehova.
11. Fakatata fefe e nakai fakamailoga tagata he fakapotopotoaga Kerisiano fakamua atu?
11 I loto he fakapotopotoaga Kerisiano fakamua atu, kua tatai ni e tau Iutaia mo e tau tagata nakai Iutaia. “Ko e fakahekeaga, mo e lilifu, mo e monuina kia lautolu oti kua eke e mahani mitaki,” he fakamaama e Paulo, “kua fakamua e tau tagata Iutaia, katoa mo e tau tagata Heleni. Ha kua nakai fakamailoga tagata e Atua.” * (Roma 2:10, 11) Ti ko e mena ke iloa moli ai kua moua e lautolu e aoga he fakaalofa noa ha Iehova, nakai ha ko e ha lautolu a feakiaga fakamotu, ka ko e ha lautolu a tali he magaaho ne fakaako hagaao ki a Iehova mo e he tau amaamanakiaga ne foaki he lukutoto he hana Tama, ko Iesu. (Ioane 3:16, 36) Ne tohia e Paulo: “Ko e mena nakai ko e Iutaia a ia kua kitia, nakai ko e peritome foki a ia kua kitia ke he tino. Ka ko ia kua nakai kitia, ko e Iutaia ni a ia; ko e peritome foki, ko e mena he loto ia ha ha he agaga haia, nakai ha he tohi.” Ti, he fakaaoga fakapulotu e tau kupu ne putoia ai e talahauaga “Iutaia” (kakano “ha Iuta,” pehe a ia, ke fakaheke), ne lafi e Paulo: “Ko e hana fakahekeaga nakai mai he tau tagata ia, ka e mai he Atua.” (Roma 2:28, 29) Kua taute e Iehova e fakahekeaga mo e nakai fakamailoga tagata. Taute pihia nakai e tautolu?
12. Ko e heigoa e amaamanakiaga ne foaki he Fakakiteaga 7:9, mo e ki a hai?
12 Fakamui, i loto he fakakiteaga, ne fioia he aposetolo ko Ioane e tau Kerisiano fakauku tua fakamoli ne fakatino ko e motu fakaagaga he 144,000, kua “fakamau fakamailoga mai he tau magafaoa oti he fanau a Isaraela.” He mole e tau mena nei, ti kitia e Ioane e “moto tagata tokologa . . . mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua he Punua mamoe, kua tapulu a lautolu ke he tau tapulu hina, kua toto foki e tau lau pama ke he tau lima ha lautolu.” (Fakakiteaga 7:4, 9) Kitia ai, kua nakai fai matakau po ke vagahau fakamotu kua tiaki mai he fakapotopotoaga Kerisiano he vaha fou nei. Kua ha ha he tau tagata takitokotaha ne mai he tau feakiaga oti kana e amaamanakiaga ke hao mai he “matematekelea lahi” mo e ke inu ke he “tau vaipuna he moui” he lalolagi fou.—Fakakiteaga 7:14-17.
Tau Lauiaaga Mitaki
13-15. (a) Maeke fefe ia tautolu ke kautu mai he tau kehekeheaga he lanu tagata mo e aga fakamotu? (e) Talahau e tau fakafifitakiaga he tau mena aoga ka tamai he fakakite e fakakapitiga.
13 Iloa mitaki e Iehova a tautolu, ke tuga ne iloa he matua tane mitaki hana fanau. Ke tuga foki, he magaaho ka moua e tautolu e maamaaga ke he falu, he fakakite e fiafia ke he ha lautolu a tau puhala fakamotu mo e tau feakiaga, kua temotemoai e tau fekehekeheaki. Kua galomoki e tau fakakaupaaga fakamotu, mo e fakamalolo ai e tau liliaga he fakakapitiga mo e fakaalofa. Kua fakatolomaki tuai e kaufakalataha. (1 Korinito 9:19-23) Kua fakatata fakamitaki e mena nei ha ko e tau gahua he tau misionare ne fekafekau he tau kotofaaga he tau motu kehe. Kua fakakite e lautolu e fiafia ke he tau tagata ne nonofo i ai, ti ko e fua, nakai leva kua mahani lahi e tau misionare mo e tau fakapotopotoaga he matakavi i ai.—Filipi 2:4.
14 Ko e tau lauiaaga mitaki he nakai fakamailoga tagata kua kikila mai he tau motu loga. Ko Aklilu, ne hau i Aitiope, nukua logona e kikioka he nofo he maga lahi a Peritania, ko London. Kua fakamalikiti e tau logonaaga hana he kikioka ha ko e tau mena ne kitia e ia, ko e nakai kapitiga ke he tau tagata mai he falu motu, ko e lekua nukua kitia mau ke he tau maga lalahi loga i Europa fou. Ka kua kehe lahi e mena ne moua e Aklilu he magaaho ne finatu a ia ke he feleveiaaga Kerisiano he Fale he Kautu he Tau Fakamoli a Iehova! Ko lautolu i ai kua fiafia atu ki a ia, ti nakai ni leva ne logona hifo e ia e mafanatia lahi. Kua taute e ia e holo ki mua mafiti ke fakahokulo e loto fakaaue hana ma e Tufuga. Nakai leva ne kumi e ia e tau magaaho ke fakalataha ke folafola e tala mitaki he Kautu ke he falu he matakavi ia. Ti, he taha aho ne huhu e hoa fakamatala ha Aklilu ki a ia ko e heigoa e tau foliaga he moui hana mogonei, ne tali fakaave age a Aklilu kua amanaki a ia ke fakalataha he taha aho mo e fakapotopotoaga ne vagahau e vagahau hana, ko e vagahau Amharic. He magaaho ne logona he tau motua he fakapotopotoaga vagahau Peritania he matakavi e tala nei, ne mautali fiafia a lautolu ke taute e lauga faka-Tohi Tapu ke he toloaga tagata he vagahau motu ha Aklilu. Ko e uiina ke fakalataha mai kua tamai ai e mano he tau tagata motu kehe mo e tau tagata he matakavi ke lalago e feleveiaaga ma e toloaga tagata fakamua he vagahau Amharic i Peritania. He vaha nei, ko e tau tagata Aitiope mo e falu foki i ai kua kaufakalataha ke he fakapotopotoaga nukua tupuolaola. Kua moua he tokologa i ai kua nakai fai mena ke taofi mai a lautolu he taute e tuaga ma Iehova ti fakamailoga ai e mena nei he papatiso faka-Kerisiano.—Gahua 8:26-36.
15 Na kehekehe e tau aga mo e tau feakiaga. Ti nakai fuafua he tau mena ia e tuaga tokoluga po ke tokolalo; ka ko e tau puhala kehekehe noa ni. He kitekite atu ke he papatisoaga he tau fekafekau tukulele fou ha Iehova he aelani ko Melita, ne lafi e olioli fiafia he Tau Fakamoli i ai ke he tau hihina mata fiafia ne tafetafe hifo he tau mata he tau tagata aahi mai i Peritania. Kua fakakite he tau matakau ua ha Melita mo e tau Peritania e tau logonaaga ha lautolu, ka e ke he tau puhala kehekehe, ti ko e fakaalofa malolo ha lautolu ma Iehova kua simeni aki e tau liliaga he kaufakalataha faka-Kerisiano.—Salamo 133:1; Kolose 3:14.
Kautu Mai he Fili Tagata
16-18. Talahau taha mena tupu ne fakatata e puhala ka kautu e nakai fakamailoga tagata i loto he fakapotopotoaga Kerisiano.
16 He hokulo fakahaga e fakaalofa ha tautolu ma Iehova mo e ma e tau matakainaga Kerisiano ha tautolu, kua maeke ia tautolu ke fifitaki fakalahi a Iehova ke he puhala ne kitia e tautolu e falu. Ko e ha fili tagata ne liga logona fakamua e tautolu ke he falu motu, tau lanu tagata, po ke aga fakamotu kua maeke ke kautu mai i ai. Manamanatu, ke fakatai ki ai, ke he mena ne tupu ki a Albert ne gahua he Matakau Kautau ha Peritania he magahala he Felakutaki II he Lalolagi mo e kua tapaki he tau Sapani he magaaho ne kaumahala a Sigapoa he 1942. Magaaho fakamui ne fakamole e ia ke kavi tolu e tau he gahua ke he “hala lelue mate,” ne tata ke he mena ne talahaua ko e halalaupapa i luga he vailele Kwai. He fakatokanoa mai a ia he oti e felakutaki, ne 32 e kilo hana he mamafa, mapaki e kauloa mo e ihu, mo e matematekelea ke he gagao hihi, lafa, mo e malaria. Tokoafe e tau katofia pagota hana kua lahi mahaki atu e matematekelea; tokologa ne nakai momoui. Ha ko e fua he tau mahani fakalialia ne kitia mo e fakafita a Albert ki ai, ne liu a ia ke he motu he 1945 ko e tagata ita lahi, ne nakai fiafia ke he Atua po ke lotu.
17 Ko e hoana a Albert, ko Irene, kua eke mo taha he Tau Fakamoli a Iehova. Ti ke fakafiafia e hoana, ne fano a Albert ke he falu a feleveiaaga he fakapotopotoaga he Tau Fakamoli a Iehova he matakavi ia. Ko e Kerisiano fuata, ne gahua mau he fekafekauaga, ne higoa ko Paul, ne aahi atu ki a Albert ke fakaako e Tohi Tapu mo ia. Nakai leva ne mailoga e Albert kua fioia e Iehova e tau tagata takitokotaha hagaao ke he tuaga he tau loto ha lautolu. Ne tukulele e ia e moui hana ki a Iehova mo e papatiso.
18 Fakamui ne hiki a Paul ki London, fakaako e vagahau Sapani, ti fakalataha mo e fakapotopotoaga vagahau Sapani. He magaaho ne talahau e ia ke uta falu Fakamoli Sapani ne ahiahi mai ke he fakapotopotoaga tuai hana, ne manatu he tau matakainaga i ai e vihiatia lahi ha Albert ke he tau tagata mai he feakiaga ia. Tali mai he liu a ia ki Peritania, ne kalo mau a Albert neke fakafehagao mo e ha tagata mai i Sapani, ti tuaha e tau matakainaga to fehagai fefe a ia mo e tuaga nei. Kua nakai ni lata a lautolu ke tupetupe—ha kua fakafeleveia e Albert e tau tagata ahiahi katoa mo e fakaalofa fakamatakainaga ne mua.—1 Peteru 3:8, 9.
‘Kia Fakalahi ha Mutolu a Tau Loto’
19. Ko e heigoa e tomatomaaga he aposetolo ko Paulo ka lagomatai a tautolu kaeke hagahaga a tautolu ke fakamailoga tagata?
19 “Ko e fakamailoga tagata, nakai mitaki ia,” he tohia he pulotu ko e Patuiki ko Solomona. (Tau Fakatai 28:21) Kua mukamuka ke fakatata atu ki a lautolu ne iloa mitaki e tautolu. Ka e, he falu magaaho, kua hagahaga a tautolu ke tote e fiafia ki a lautolu ne nakai iloa lahi e tautolu. Ko e fakamailoga tagata pihia kua nakai lilifu ma e fekafekau ha Iehova. Moli ni, kua lata ia tautolu oti ke muitua ke he tomatomaaga maaliali ha Paulo ke ‘fakalahi ha tautolu a tau loto’—e, kia fakalahi e fakaalofa ha tautolu ma e tau katofia Kerisiano ne omai he tau feakiaga kehekehe.—2 Korinito 6:13.
20. He tau puhala fe he moui ne kua lata ia tautolu ke fifitaki a Iehova, ko e ha tautolu a Atua nakai fakamailoga tagata?
20 Pete kua moua e tautolu e lilifu ke o hake ke he lagi po ke amaamanakiaga ke moui tukulagi he lalolagi, ko e ha tautolu a nakai fakamailoga tagata kua taute a tautolu ke olioli e kaufakalataha he taha e fuifui, taha e Leveki Mamoe. (Efeso 4:4, 5, 16) He eketaha ke fifitaki a Iehova, ko e Atua nakai fakamailoga tagata ha tautolu, ka lagomatai a tautolu he ha tautolu a fekafekauaga Kerisiano, i loto he magafaoa ha tautolu, mo e i loto he fakapotopotoaga, haia, he tau puhala oti he moui. He puhala fe? To fakatutala e vala tala ka mui mai ke he matakupu nei.
[Tau Matahui Tala]
^ para. 3 Ko e talahaua ha Iehova he magaaho fakamui kua fakamataulu aki e tau lologo tapu.—Salamo 135:8-11; 136:11-20.
^ para. 11 Ke he mena nei, ko e talahauaga “tau tagata Heleni” kua hagaao ke he tau Tagata Motu Kehe oti.—Insight on the Scriptures, lomi fakailoa he Tau Fakamoli a Iehova, Volume 1, lau tohi 1004.
To Tali Fefe e Koe?
• Fakatata fefe e Iehova e nakai fakamailoga tagata ki a Raava mo e tau tagata Kipeona?
• Fakatata fefe e Iesu e nakai fakamailoga tagata he tau fakaakoaga hana?
• Ko e heigoa ka lagomatai a tautolu ke kautu mai he fili aga fakamotu mo e lanu tagata?
[Tau Huhu he Fakaakoaga]
[Fakatino he lau 11]
Kamata e kautuaga a Isaraela ki Kanana
[Fakatino he lau 12]
Ne nakai liutua a Iesu mai he fakamatala ke he fifine Samaria
[Fakatino he lau 13]
Ko e feleveiaaga ma e toloaga tagata e vagahau Amharic i Peritania
[Fakatino he lau 13]
Ko e fakaalofa ha Albert ma Iehova ne lagomatai a ia ke kautu ke he fili tagata