Puhala ke Tolomaki e Fakaalofa Moli

“Ko e fakaalofa e tuluiaga he moui; ko e fakaalofa e moui.”​—Living to Purpose, mai ia Joseph Johnson, 1871.

MAEKE fefe he tagata ke ako ke fakaalofa? He fakaako ke he gahuahuaaga he manamanatuaga? He totou e tau tohi lagomatai? He kitekite ke he tau kifaga fakaalofa fakavihiloto? Nakai pihia. Kua ako e tau tagata ke fakaalofa he magaaho fakamua ha ko e fakafifitakiaga mo e fakamahani he tau mamatua ha lautolu. To ako he tau fanau e kakano he fakaalofa kaeke, kua ha ha he takatakaiaga e hofihofi mafanatia, ti kitia e lautolu e tau mamatua ha lautolu ne fagai mo e puipui a lautolu, matutaki mo lautolu, mo e fakakite e fiafia lahi fakatagata ki a lautolu. Kua ako foki a lautolu ke fakaalofa he magaaho ne fakaako he tau mamatua ha lautolu a lautolu ke kitekite ke he tau matapatu fakaakoaga mitaki he hako mo e hepe.

Ko e fakaalofa moli kua mua atu mai he mokoina po ke logonaaga noa. Kua gahua tumau ke he fiafia lahi mahaki he falu, pete ni kaeke ke nakai loto fakaaue katoatoa e lautolu ke he magaaho ia, ne kua fa tupu ai ke he tau fanau ka putoia e akonaki fakaalofa. Ko e fakafifitakiaga mitaki katoatoa hana kua fakakite e fakaalofa nakai lotokai ko e Tufuga hokoia. Ne tohi he aposetolo ko Paulo: “Haku tama na e, aua neke fakateaga a koe ke he akonakiaga he Iki, aua foki neke fakalolelole a koe ka akonaki mai e ia a koe. Ha ko ia kua ofania he Iki kua akonaki atu a ia kia ia.”—Heperu 12:5, 6.

Tau matua, maeke fefe a koe ke fifitaki ki a Iehova he fakakite e fakaalofa ke he magafaoa hau? Ti aoga fefe e fakafifitakiaga kua fakatoka e koe he fakafetuiaga ha mua ko e tane mo e hoana?

Fakaako e Fakaalofa ha ko e Fakafifitakiaga

Kaeke ko e tane a koe, tuku fakatokoluga nakai e koe, po ke uho nakai ki a koe, e hoana hau mo e taute fakalilifu e koe a ia? Kaeke ko e hoana a koe, kua fakaalofa mo e lagomatai nakai e koe e tane hau? Kua pehe e Tohi Tapu kua lata e tane mo e hoana ke fefakaalofaaki mo e fefakalilifuaki. (Efeso 5:28; Tito 2:4) Ka taute pihia e laua, kua kitia fakamua he tau fanau ha laua e gahuahua he fakaalofa Kerisiano. Ko e fakaakoaga malolo mo e aoga ha ia kua maeke ai!

Kua fakatupu foki he tau matua e fakaalofa he kaina he magaaho kua pipiki a lautolu ke he tau tutuaga tokoluga ma e magafaoa ke felauaki ke he tau mena tuga e fakafiafiaaga, mahani mitaki, mo e tau foliaga mo e tau mena kua mua e aoga. He lalolagi katoa, ne moua he tau tagata e Tohi Tapu ke lagomatai lahi he fakatoka e tau tutuaga he magafaoa, he foaki e fakamoliaga ko e Tohi Tapu kua moli na “mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.” (2 Timoteo 3:16) Moli, ko e tau matafakatufono  mo e takitakiaga he mahani mitaki ma e moui ne moua ni i loto he Lauga he Mouga nukua mua ue atu e aoga lahi.—Mataio, veveheaga 5 ke he 7.

Ka onoono e magafaoa katoa ke he Atua ma e takitakiaga mo e pipiki ke he tau tutuaga hana, kua igatia e tau tagata takitaha mo e logona e haohao mitaki mo e to liga ke tutupu hake e tau fanau ke he fakaalofa mo e fakalilifu ke he tau mamatua ha lautolu. Tutala ai, ko e kaina ne ha ha i ai e tau kelea fakafahiua, po ke tau mahani fakahanoa, to liga hogohogomanava, ita, mo e totoko e tau fanau.—Roma 2:21; Kolose 3:21.

Ka e kua e tau matua tokotaha? Kua nakai aoga kia ia lautolu he fakaako e fakaalofa ke he ha lautolu a tau fanau ikiiki? Nakai lata. Pete ni e nakai fai mena ke hukui aki e matua fifine mo e matua tane gahua tokoua mitaki, kua fakakite he iloaaga e aoga he tau fakafetuiaga he magafaoa kua maeke ke fua mai ai ha kua galo e taha matua. Kaeke ko e matua tokotaha a koe, lali ke fakaaoga e tau matapatu fakaakoaga he Tohi Tapu he kaina hau. E, taha e fakatai kua talahau ki a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala”—putoia e puhala he tuaga fakamatua.—Tau Fakatai 3:5, 6; Iakopo 1:5.

Tokologa e tau fanau ikiiki ne feaki he kaina he matua tokotaha ne kitia mogonei hane fekafekau tua fakamoli ke he Atua fakalataha mo e tokoafe he tau fakapotopotoaga Kerisiano he Tau Fakamoli a Iehova he lalolagi katoa. Kua fakamoli e mena nei kua maeke foki he tau matua tokotaha ke kautu he fakaako e tau fanau ha lautolu hagaao ke he fakaalofa.

Puhala kua Maeke he Tau Tagata Oti ke Feaki e Fakaalofa

Ne talahau tuai he Tohi Tapu “ko e tau aho fakamui” to fakamailoga he nakai “fai fakaalofa,” ko e nakai fai fakaalofa pauaki ne fa mahani ke ha ha he tau tagata he magafaoa ma e taha mo e taha. (2 Timoteo 3:1, 3) Ka e, pihia foki a lautolu ne tutupu hake he kaina ne ai fai hofihofi kua maeke ke ako ke feaki e fakaalofa. Fefe? He ako mai ia Iehova, ko e Punaaga he fakaalofa mo e kua fakatata e fakaalofa mo e hofihofi ki a lautolu kua fuluhi loto fakamoli ki a ia. (1 Ioane 4:7, 8) “Ha kua tiaki au he haku a matua tane mo e haku a matua fifine, ti talia ai e Iehova au,” he talahau he taha salamo.—Salamo 27:10.

Ne fakakite e Iehova e fakaalofa hana ki a tautolu ke he loga he tau puhala kehekehe. Kua putoia he tau mena nei e takitakiaga fakamatua tane he puhala mai he Tohi Tapu, ko e lagomatai he agaga tapu, mo e lalagoaga mafanatia he fakamatakainaga Kerisiano. (Salamo 119:97-105; Luka 11:13; Heperu 10:24, 25) Manamanatu ke he puhala he tau foakiaga tolu nei kua maeke ke lagomatai a koe ke tupu e fakaalofa ma e Atua mo e katofia.

Leveki Fakamatua Tane ne Omoomoi

Ke feaki e pipiaga mafanatia mo e taha tagata, kua lata ia tautolu ke iloa mitaki e tagata ia. He fakakite e ia a ia ke he tau lau he Tohi Tapu, ne uiina e Iehova a tautolu ke fakatata atu ki a ia. Pete ia, nakai lahi e totou hokoia he Tohi Tapu. Kua lata ia tautolu ke fakagahua e tau fakaakoaga mo e iloa e tau aoga kua fua mai ai. (Salamo 19:7-10) “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe,” talahau ai he Isaia 48:17. E, ko Iehova, ko e peresona he fakaalofa, kua fakaako a tautolu ma e aoga ni ha tautolu—nakai ha kua manako a ia ke fakakaupa e tokanoaaga ha tautolu ke he tau matafakatufono mo e tau poakiaga nakai aoga.

Ko e iloilo moli he Tohi Tapu kua lagomatai foki a tautolu ke tupu e fakaalofa ma e tau  katofia ha tautolu. Kakano he mena nei kua fakaako he kupu moli he Tohi Tapu ki a tautolu e onoonoaga he Atua ke he tau tagata mo e fakakite ki a tautolu e tau matapatu fakaakoaga kua lata ke takitaki e tau fakafehagaiaga ha tautolu ko e taha ke he taha. Mo e vala tala pihia, ha ha ia tautolu e fakaveaga mauokafua ma e feaki e fakaalofa he katofia. Ne pehe e aposetolo ko Paulo: “Ko e haku a liogi hanai, kia fakatupu lahi ue atu ha mutolu a fakaalofa, mo e maama, katoa mo e loto matala oti kana.”—Filipi 1:9.

Ke fakatata e puhala he fakaalofa kua maeke ke fakakite fakamitaki e “maama,” he manamanatu ke he matapatu kupu moli ne talahau ia Gahua 10:34, 35: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” Ane fakafili he Atua e tau tagata ke he ha lautolu a tau gahua tututonu mo e matakutaku mahani Atua, nakai ke he ha lautolu a aga fakamotu po ke kili, ti kua lata kia ia tautolu ke onoono ke he matakainaga ha tautolu mo e nakai fakamailoga tagata pihia?—Gahua 17:26, 27; 1 Ioane 4:7-11, 20, 21.

Fakaalofa​—Ko e Fua he Agaga he Atua

Tuga ne uha kua to hifo he magaaho tonu ke he ulu akau ati lafi ke he heleheleaga mitaki, kua maeke he agaga he Atua ke moua mai he tau tagata fakateliga e tau mahani kua fakamaama he Tohi Tapu ko e “fua he [a]gaga.” (Kalatia 5:22, 23) Mua atu ke he fua nei ko e fakaalofa. (1 Korinito 13:13) Ka e maeke fefe ia tautolu ke moua e agaga he Atua? Ko e puhala aoga mai he liogi. Ka liogi a tautolu ma e agaga he Atua, to foaki mai e ia ki a tautolu. (Luka 11:9-13) “Kia” liogi nakai a koe ma e agaga tapu? Ka taute pihia e koe, ti ko e fua uho mogoia, putoia e fakaalofa, kua lata ke kitia lahi he moui hau.

Pete ia, ha ha i ai e taha vahega agaga kua gahuahua he totoko ke he agaga he Atua. Kua fakahigoa ai he Tohi Tapu “ko e agaga he lalolagi nai.” (1 Korinito 2:12; Efeso 2:2) Ko e omoomoiaga kelea, ti ko e punaaga ni ko Satani ko e Tiapolo, “[ko e] iki he lalolagi nai” he tau tagata ne omai kehe he Atua. (Ioane 12:31) Tuga ni e matagi ne puhi hake e tau efu mo e tau veve, “[ko e] tau gahua he tino” kua fakalagalaga e tau manako fakamamahi ne moumou e fakaalofa mo e fakatupu e tau lolelole he tino.—Kalatia 5:19-21.

Kua hufia he tau tagata e aga kelea he magaaho ka fakatapakupaku a lautolu ni ke he velevelekoloa, manamanatu na ko ia ni, ke he tau aga vale, mo e ke fiofio mo e fa ulu moumou e onoonoaga he fakaalofa nukua mahani ke he lalolagi. Ka manako a koe ke tupu e fakaalofa moli, kua lata ia koe ke totoko fakamalolo e agaga he lalolagi. (Iakopo 4:7) Kia nakai falanaki ke he malolo ni hau; kia ui ki a Iehova ma e lagomatai. Ko e agaga hana—ko e malolo ue atu ke he lalolagi mo e lagi katoatoa—kua maeke ke fakamalolo a koe mo e foaki ki a koe e kautuaga.—Salamo 121:2.

Ako e Fakaalofa Mai he Fematakainagaaki Kerisiano

Tuga ne fanau kua ako ke fakakite e fakaalofa ne tupu he kaina, igatia a tautolu oti—ikiiki mo e fuakau—ke tupu ke he fakaalofa he feoaki mo e falu Kerisiano. (Ioane 13:34, 35) Moli, ko e taha  he tau gahuahuaaga aoga lahi he fakapotopotoaga Kerisiano ko e foaki e takaiaga kua maeke he tau tagata takitaha ke “fakalagalaga ai e fakaalofa mo e tau gahua mitaki.”—Heperu 10:24.

Ko e fakaalofa pihia kua loto fakaaue pauaki e lautolu kua ‘fakafita mo e tiaki atu ai’ he lalolagi nakai fakaalofa nukua viko takai ia tautolu. (Mataio 9:36) Ko e iloaaga kua fakakite ko e tau fakafetuiaga fakaalofa he tagata lahi kua maeke ke fakakautu e loga he tau lauiaaga kelea he vaha tote ne nakai fai fakaalofa. Ko e aoga ha ia, mogoia, kua fakalaulahi atu ke he tau Kerisiano tukulele oti e fiafia mai he loto ki a lautolu ne fou kua fakalataha mai mo lautolu!

“Nakai Tuai Oti e Fakaalofa”

Kua pehe e Tohi Tapu “nakai tuai oti e fakaalofa.” (1 Korinito 13:8) Maeke fefe e mena ia? Ne talahau he aposetolo ko Paulo ki a tautolu: “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, nakai mahani fuafuakelea, nakai kumi e ia hana tau mena, nakai ita vave, nakai talahaua e kelea ke he taha.” (1 Korinito 13:4, 5) Maali ai, nakai ko e miti po ke manamanatuaga fakavai anei. Kehe ai—ko lautolu kua fakakite e mataala mo e talahau e tau fakaita mo e tau mamahi he moui, ka e nakai fakaata e lautolu e tau mena nei ke moumou e fakaalofa ha lautolu ma e tau matakainaga. Ko e fakaalofa moli ia ko e “pipi haia ke fakamaopoopo ai.”—Kolose 3:12-14.

Manamanatu ke he fakafifitakiaga he tama fifine Kerisiano i Korea ne 17 e tau he moui. He magaaho ne kamata a ia ke fekafekau ki a Iehova ko e Atua, ne nakai talia he magafaoa hana a ia ti fano kehe a ia mai he fale. Pete ia, kua nakai ita a ia, ne liogi a ia hagaao ke he mena ne tupu, he fakaata e Kupu he Atua mo e agaga ke fakahakohako e manamanatuga hana. Fakamui, ne fa tohi a ia ke he hana magafaoa, he fakapuke hana tau tohi aki e hofihofi mafanatia moli ne logona e ia ki a lautolu. Ko e fua, tokoua e tugaane fakamua hana ne kamata ke fakaako e Tohi Tapu ti ko e mogonei ko e tau Kerisiano tukulele. Ko e matua fifine mo e tugaane tote hana ne talia foki e kupu moli he Tohi Tapu. Fakahiku ai, ko e matua tane hana, ne totoko vevela, ne hiki hana loto. Kua tohi he tama fifine Fakamoli: “Kua mau a mautolu oti ke he tau matakainaga Kerisiano, ti ko e magafaoa ha mautolu ko e tau tagata tapuaki fakalataha mogonei ne katoatoa ke toko 23.” Ko e kautuaga ha ia ma e fakaalofa!

Manako nakai a koe ke feaki e fakaalofa moli mo e lagomatai e falu ke taute pihia? Ti, fuluhi ki a Iehova, ko e Punaaga he mahani ia kua uho. E, tokaloto e Kupu hana, liogi ma e agaga tapu, mo e fio tumau mo e fakamatakainaga Kerisiano. (Isaia 11:9; Mataio 5:5) Ko e mafanatia ha ia he loto ke iloa to nakai leva ti galo e mahani kelea, ati toe ni a lautolu kua fakagahuahua e fakaalofa Kerisiano moli! Moli, ko e fakaalofa e kei ke he fiafia mo e moui.—Salamo 37:10, 11; 1 Ioane 3:14.

[Tau Fakatino he lau 6]

To lagomatai he liogi mo e fakaako ke he Kupu he Atua a tautolu ke feaki e fakaalofa moli