Tau Huhu Mai he Tau Tagata Totou

Ia Heperu 2:14, ko e ha ne ui a Satani “ko ia ne toka ai e [“tau puhala ke fakatupu e mate,” NW]”?

Ke talahau fakaku, kua pehe a Paulo na maeke ia Satani, he taute ne ia po ke he tau hukui hana, ke fakatupu e mate he tau tagata. Ke fakatatai atu ke he tala ia, ne ui e Iesu a Satani “ko e keli tagata a ia tali mai he kamataaga.”—Ioane 8:44.

Kua liga mafuta hake e tau fekehekeheaki ke he Heperu 2:14 ha ko e puhala ne tohi hifo he falu a fakaliliuaga, he tohi kua ha ha ia Satani e “kautu he mate” po ke “kautu ke he mate.” (King James Version; Revised Standard; New International Version; Jerusalem Bible) Kua fakakite he tau talahauaga pihia ke tuga kua toka ia Satani e malolo katoatoa ke kelipopo ha tagata ni ne fifili e ia. Ka kua nakai moli e mena ia. Kaeke ke moli, liga ni kua leva tuai he tatafi kehe e ia e tau tagata tapuaki ha Iehova mai he lalolagi katoa.—Kenese 3:15.

Ko e talahauaga faka-Heleni ne pehe “pule ke he mate” i loto he falu a fakaliliuaga mo e “tau puhala ke fakatupu e mate” i loto he New World Translation ko e “kraʹtos tou tha·naʹtou.” Ko e tou tha·naʹtou ko e taha vahega he talahauaga ne fakakakano ko e “mate.” Ko e kakano he Kraʹtos ko e “malolo, mao, pule.” Ti hagaao ke he Theological Dictionary of the New Testament, kua talahau ai “e ha ha i ai mo e kakano he malolo po ke mao ka e nakai ko e hana fakaaogaaga.” Ti ko e mena ia, he Heperu 2:14, kua nakai pehe a Paulo kua ha ha ia Satani e pule katoatoa ke he mate. Ka kua tuhi a ia ke he malolo po ke maekeaga ha Satani ke fakatupu e mate.

Kua fakaaoga fefe e Satani “e tau puhala ke fakatupu e mate”? I loto he tohi ha Iopu, kua totou e tautolu ke he taha mena tupu ne fakakite e mena nei. Ne talahau he fakamauaga ne fakaaoga e Satani e afa ke “fakatupu e mate” he fanau ha Iopu. Ka e, kia mailoga, kua maeke ni ia Satani ke taute e mena nei he fakaata he Atua, ti kua fakaata ai ha ko e matakupu aoga lahi ne kua lauia ai. (Iopu 1:12, 18, 19) Moli ai, kua nakai maeke ia Satani ke kelipopo ne ia a Iopu. Kua nakai fakaata e mena ia. (Iopu 2:6) Kua fakakite he mena nei ko e pete ni, he falu magaaho, kua maeke ia Satani ke fakatupu e mamate he tau tagata tua fakamoli, kua nakai lata ia tautolu ke matakutaku he kua maeke ia ia ke fakaoti e tau momoui ha tautolu ka manako a ia.

Kua fakatupu foki e Satani e mate he puhala he tau tagata hukui. Ati kua tokologa e tau Kerisiano ne mamate ma e tua ha lautolu, ko e falu kua kelipopo he tau matakau vale po kua tamate nakai tonu ha ko e tau poakiaga he tau tagata fakatufono po ke tau iki fakafili ne mahani keukeu.—Fakakiteaga 2:13.

Mua atu foki, kua fakatupu e Satani e mate he falu a magaaho he fakaaoga e loleloleaga fakatagata. Mai he tau vaha a Isaraela, ne fakatonutonu he perofeta ko Palaamo e tau tagata Moapi ke fakaohooho e tau Isaraela ke ‘holi e kupu a Iehova.’ (Numera 31:16) Kua fua mai e mena ia he molea e 23,000 he tau Isaraela ne mamate. (Numera 25:9; 1 Korinito 10:8) He vaha nei, kua mokulu pihia foki e falu ke he “tau lagatau” ha Satani ti kua tataki atu ke he mahani feuaki po ke falu a gahua nakai mahani Atua. (Efeso 6:11) Moli, ko lautolu pihia kua nakai fa amanaki ti galo vave e tau momoui ha lautolu. Ka kua fakahagahaga kelea a lautolu ke nakai moua e moui tukulagi, ti ke he puhala ia kua fakatupu e Satani e mate ha lautolu.

Pete ni kua iloa e tautolu na maeke ia Satani ke fakatupu e matematekelea, kua nakai lata ia tautolu ke matakutaku noa ki a ia. He magaaho ne talahau e Paulo kua ha ha ia Satani e tau puhala ke fakatupu e mate, ne talahau foki e ia kua mate e Keriso ke maeke ia ia ke “fakaoti ai e ia [a Satani] . . . kia toka noa ai foki a lautolu oti kua fakatupatupa he matakutaku ke he mate ke he mouiaga katoa ha lautolu.” (Heperu 2:14, 15) E, ne totogi e Iesu e lukutoto ti kua toka noa mai e tau tagata talitonu he fakatupa ke he hala mo e mate.—2 Timoteo 1:10.

Moli, kua kakano lahi ke manamanatu kua ha ha ia Satani e tau puhala ke fakatupu e mate, ka kua mauokafua a tautolu kua maeke ia Iehova ke vetevete ha hagahaga kelea ne fakatupu e Satani mo e tau hukui hana. Kua fakamoli mai a Iehova ki a tautolu, ko Iesu ne fakaliu tu mai to “moumou e ia e tau gahua he tiapolo.” (1 Ioane 3:8) Ha ko e malolo ha Iehova, to fakaliu tu mai e Iesu a lautolu ne mamate ati fakaotioti ai tuai e mate. (Ioane 5:28, 29) Fakahiku, to fakatapakupaku fakamaali e Iesu e tau kaupaaga he malolo ha Satani he liti a ia ke he pahua. Kua fakahala fakahiku ai a Satani ke he fakaotiaga tukumalagi.—Fakakiteaga 20:1-10.