Iehova, ko e Atua Fakamoli

“Kua fakamoui e koe au, ma Iehova na e, ko e Atua fakamoli.”—SALAMO 31:5.

1. Ko e heigoa e tau tutuaga he lagi mo e he lalolagi he magaaho ne nakaila fai fakavai?

HA HA i ai e magaaho ne nakai fai fakavai. Ko e tau mena fakaagaga mitaki katoatoa ne nonofo he lagi nakai kitia ne fekafekau ke he ha lautolu a Tufuga, “ko e Atua fakamoli.” (Salamo 31:5) Nakai fai fakavai, nakai fai fakahehe. Ne matutaki e Iehova e kupu moli ke he hana tau tama tane fakaagaga. Ne taute e ia ha ko e fakaalofa a ia ki a lautolu mo e ha kua fiafia lahi a ia ke he tau momoui ha lautolu. Ne pihia foki e tuaga he lalolagi. Ne tufugatia e Iehova e tagata tane mo e fifine fakamua, mo e puhala he halavaka fifili hana, ne matutaki tumau a ia mo lautolu ke he puhala maama, hako tonu, mo e fakamoli. Ko e homo ue atu ha ia mogoia!

2. Ko hai ne tamata e fakavai, ti ko e ha?

² Fakahiku ai mogoia, ko e tama tane fakaagaga fakatokoluga he Atua ne fakatu e ia a ia ko e atua fetoko, he totoko ki a Iehova. Ko e moui fakaagaga nei, ne iloa ai ko Satani ko e Tiapolo, ne manako ke he falu ke tapuaki ki a ia. Ke moua hana foliaga, ne tamata e ia e fakavai ko e puhala ke tamai e falu ki lalo he pule hana. He taute pihia, ne “pikopiko a ia, mo e matua he pikopiko.”—Ioane 8:44.

3. Fefe e tali atu ha Atamu mo Eva ke he tau pikopiko ha Satani, ti ko e heigoa e tau fua?

³ He puhala he gata, ne tala age a Satani ke he fifine fakamua ko Eva, ka tiaki e ia e poakiaga he Atua mo e kai e fua akau ne fakatapu, to nakai ni mate a ia. Ko e pikopiko a ia. Ne tala age foki a ia ki a Eva he kai ai ka taute a ia ke tuga e Atua, ke iloa e mitaki mo e kelea. Ko e pikopiko foki a ia. Pete he nakai la fakavai atu ai ki a Eva tali mai, kua maeke ke mailoga e ia e mena ne logona e ia mai he gata kua nakai tatai mo e mena ne tala age he Atua ke he hana tane, ko Atamu. Kua fifili ni a ia ke talitonu ki a Satani, nakai ki a Iehova. He fakavaia moli, ne uta e ia e fua he akau mo e kai ai. Fakamui, ne kai foki e Atamu e fua he akau. (Kenese 3:1-6) Tuga a Eva, ne nakai la logona e Atamu e pikopiko, ka e nakai fakavaia a ia. (1 Timoteo 2:14) He hana tau gahua, ne fakakite e ia na tiaki e ia hana Taute. Ko e tau fua kua moua he tau tagata ne kelea lahi mahaki. Ha ko e liuliu ha Atamu, ko e agahala mo e mate—fakalataha mo e matahavala mo e tau tupetupe loga—ne holofa ke he tau hologa hana.—Roma 5:12.

4. (a) Ko e heigoa e aga pauaki he tau pikopiko ne talahau i Etena? (e) Ko e heigoa kua lata ia tautolu ke taute ke nakai fakahehe e Satani?

⁴ Kua holofa foki e fakavai. Kua lata ia tautolu ke mailoga ko e tau pikopiko ia ne talahau he kaina i Etena ko e tau totokoaga ke he mahani fakamoli ha Iehova. Ne fakapuloa e Satani kua utakehe fakahehe he Atua e mena mitaki mai he hoa mau fakamua. Nakai moli e mena ia. Ne nakai aoga a Atamu mo Eva mai he liuliu ha laua. Ne mamate a laua, tuga ni ne talahau e Iehova to hoko ki a laua. Moha ia, ne matutaki e totokoaga pikopiko ha Satani ki a Iehova, ke hoko ke he tau senetenari fakamui ne omoomoi e aposetolo ko Ioane ke tohi ko Satani “kua fakahehe e lalolagi oti.” (Fakakiteaga 12:9) Ke fakamamao mai he fakahehe e Satani ko e Tiapolo, kua lata ia tautolu ke moua e mauokafua katoatoa ke he fakamoli ha Iehova mo e hana Kupu. Maeke fefe ia koe ke feaki mo e fakamalolo e falanakiaga hau ki a Iehova mo e fakamalolo a koe ke he fakavaia mo e tau pikopiko ne fakatolomaki he Fi hana?

Iloa e Iehova e Kupu Moli

5, 6. (a) Ko e heigoa e iloilo ne ha ha ia Iehova? (e) Maeke fefe e iloilo he tagata ke fakatatai mo e ha Iehova?

⁵ Kua fakakite tumau he Tohi Tapu a Iehova ko ia “ne eke e tau mena oti kana.” (Efeso 3:9) Ko ia  “ko e Atua . . . ne eke e lagi, mo e lalolagi, mo e tahi, mo e tau mena oti kana ne toka ai ia lautolu.” (Gahua 4:24) Ha ko Iehova ko e Tufuga, ne iloa e ia e kupu moli hagaao ke he tau mena oti. Ke fakatai: Manamanatu ke he tagata ne talaga mo e ati hana ni a fale, he tukutuku e tau akau takitaha mo e paopao ai. To iloa mitaki e ia e fale mo e to lahi atu e maamaaga ne moua ai mai he ha tagata ne mamata mai. Kua iloa he tau tagata e tau mena ne talaga mo e taute e lautolu. Tatai ai, kua iloa he Tufuga e tau mena oti ne ha ha i ai ke iloa he tau mena ne tufuga e ia.

⁶ Ne fakakite fakamitaki he perofeta ko Isaia e lahi he iloilo ha Iehova. Ne totou e tautolu: “Ko hai kia kua fafati ai e tahi ke he hana aloalolima, mo e fafati e lagi ke he hagatike, mo e fafati e kelekele ke he fua ke fafati aki e tau mena puke; kua fafati foki e tau mouga ke he fua hahamo, mo e tau matiketike ke he fuatautau? Ko hai kia kua fafati e agaga a Iehova? ko hai foki e tagata kua pulega fakalataha mo ia, kua fakaako ai a ia? Ko hai kia ne pulega fakalataha mo ia, ti pulotu ai a ia, mo e fakaako ai a ia ke he puhala he fakafiliaga, mo e fakaako a ia ke iloilo ai, mo e fakailoa atu kia ia e puhala ke manamanatu ai?” (Isaia 40:12-14) Moli, ko Iehova “ko e Atua iloilo” mo e “katoatoa hana iloilo.” (1 Samuela 2:3; Iopu 36:4; 37:16) Ko e tote ha ia he mena ne iloa e tautolu he fakatatai ki ai! Pete ni e iloilo lahi ne kua iloa he tau tagata, ko e maamaaga ha tautolu he taute mena kua nakai lahi atu ke ‘hiku ke he tau puhala’ he Atua. Kua tuga e “tote kili[i]ku kua logona” he fakatatai mo e ‘pakulagi malolo.’—Iopu 26:14.

7. Ko e heigoa ne mailoga e Tavita hagaao ke he iloilo ha Iehova, ati ko e heigoa kua lata ke talahau e tautolu?

⁷ Ha kua tufuga e Iehova a tautolu, fakahiku ai na iloa mitaki e ia a tautolu. Ne mailoga he Patuiki ko Tavita e mena nei. Ne tohi e ia: “Iehova na e, kua kumikumi e koe au, ti kua fioia ni e koe au. Ko koe ni kua fioia haku a nofo ki lalo mo e haku a tu mai ki luga; kua fioia fakamamao e koe haku a manamanatu. Kua kumi ni e koe haku a puhala mo e haku a takotoaga, kua mahani a koe mo e haku a tau puhala oti kana. Nakai fakai ha kupu ke he gutu haku, kitiala, Iehova na e kua fioia fakaoti ai e koe.” (Salamo 139:1-4) Ko Tavita, moli, ne mailoga kua fakagahuahua he tau tagata e manamanatuaga tokanoa—ne foaki he  Atua ki a tautolu e malolo ke omaoma po ke ke liuliu ki a ia. (Teutaronome 30:19, 20; Iosua 24:15) Moha ia, kua iloa mitaki atu e Iehova a tautolu mai he iloa e tautolu a tautolu. Ne manako a ia ke he mena kua mua atu ma tautolu, ti ko ia he tuaga ke takitaki e tau puhala ha tautolu. (Ieremia 10:23) Moli, nakai fai faiaoga, nakai fai pulotu, nakai fai tagata fakatonutonu kua mua atu ke fakaako a tautolu ke he kupu moli mo e ke taute a tautolu ke pulotu mo e fiafia.

Kua Fakamoli a Iehova

8. Iloa fefe e tautolu kua mahani fakamoli a Iehova?

⁸ Ko e taha mena ke iloa e mena moli, ka kua mahomo atu mogoia ke talahau tumau e mena moli, he mahani fakamoli. Ko e Tiapolo, ma e fakatai, ne fifili ke “nakai tumau ni a ia ke he mena moli.” (Ioane 8:44) Kehekehe ai, ko Iehova kua “lahi e . . . fakamoli.” (Esoto 34:6) Kua fakakite tumau he tau Tohiaga Tapu e mahani fakamoli a Iehova. Ne fakakite he aposetolo ko Paulo “kua nakai maeke ke pikopiko ai e Atua” ti ko e Atua kua ‘nakai pikopiko.’ (Heperu 6:18; Tito 1:2) Ko e mahani fakamoli ko e vala aoga he aga he Atua. Maeke ia tautolu ke tua mo e falanaki ki a Iehova ha kua fakamoli a ia; ne nakai fakavaia e ia hana tau tagata mahani fakamoli.

9. Maeke fefe e higoa ha Iehova ke matutaki mo e kupu moli?

⁹ Kua fakakite moli he higoa ha Iehova e mahani fakamoli hana. Kua kakano e higoa faka-Atua “Ko Ia ne Taute ke Tupu Moli.” Kua fakakite he mena nei a Iehova ko ia kua tupu ke eke mo Fakamoli he tau mena oti ne mavehe e ia. Nakai fai tagata he tuaga ia. Ha ko Iehova ko ia ne Mua Ue Atu, nakai fai mena ke tauhele e mailogaaga he hana tau finagalo. Nakai ni ko Iehova kua mahani fakamoli ka e ko ia hokoia kua ha ha i ai e pule mo e pulotu ke taute e tau mena oti kua talahau e ia ke tupu moli.

10. (a) Kitia mata fefe e Iosua e mahani fakamoli a Iehova? (e) Ko e heigoa e tau maveheaga ha Iehova ne kitia e koe kua fakamoli?

¹⁰ Ko Iosua e taha he tokologa ne kitia moli e tau mena tutupu ofoofogia kua fakakite moli ke he mahani fakamoli ha Iehova. Ko Iosua i Aikupito he magaaho ne tamai e Iehova e tau malaia hogofulu ke he motu ia, he talahau tuai takitaha mai. He falu he tau mena ia, ne iloa e Iosua e fakamoliaga he tau maveheaga ha Iehova ke fakahao e tau Isaraela mai i Aikupito mo e ke takitaki a lautolu ke he Motu he Maveheaga, he fakakaumahala e tau kau Kanana malolo ne totoko ki a lautolu. Ke hoko atu ke he fakaotiaga he moui hana, ne tala age a Iosua ke he tau patu he motu ha Isaraela: “Kua iloa e mutolu mo e ha mutolu a tau loto katoa, mo e ha mutolu a tau agaaga katoa, nakai to ha kupu he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu, nakai ni to ha kupu taha.” (Iosua 23:14) Pete ni he nakai kitia mata e koe e tau mana ne taute e Iosua, kua iloa nakai e koe e moli he tau maveheaga he Atua he moui katoa hau?

Fakakite e Iehova e Kupu Moli

11. Ko e heigoa kua fakakite kua manako a Iehova ke fakamatutaki e kupu moli ke he tau tagata?

¹¹ Manamanatu la ke he matua ne lahi e iloilo ka e lavea ke vagahau ke he hana tau tama. Nakai kia fakaaue a koe he nakai pihia a Iehova? Kua matutaki fakaalofa a Iehova mo e tau tagata, ti taute fakamokoi e ia. Ne ui he tau Tohiaga Tapu a ia ko e “Faiaoga Homo Ue Atu.” (Isaia 30:20, NW) He hana fakaalofa totonu, ne oho atu foki a ia ki a lautolu kua hihiga ke nakai fanogonogo ki a ia. Ma e fakatai, ne kotofa a Esekielu ke fakamatala ki a lautolu kua iloa e Iehova ke nakai fanogonogo. Ne pehe a Iehova: “Ko e tama he tagata na e, fano a koe, kia fano a ke he magafaoa a Isaraela, mo e vagahau atu e koe e tau kupu haku kia lautolu.” Ti hataki e ia: “Nakai mafai a lautolu ke fanogonogo kia koe; he nakai mafai a lautolu ke fanogonogo mai kia au; ha kua maō e tau matalē mo e maō e tau loto he magafaoa oti a Isaraela.” Ko e kotofaaga uka a ia, ka e taute fakamoli ai e Esekielu, ti he taute pihia ne fakaata e ia e fakaalofa hofihofi noa ha Iehova. Ka paleko e mena nei ki a koe he kotofaaga fakamatala mo e falanaki a koe ke he Atua, to liga maeke ia koe ke mauokafua to fakamalolo e ia a koe tuga  ne taute e ia ke he perofeta ko Esekielu.—Esekielu 3:4, 7-9.

12, 13. Ko e heigoa e tau puhala ne matutaki e Atua mo e tau tagata?

¹² Kua “finagalo [a Iehova] ke fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) Ne vagahau a ia puhala mai he tau perofeta, mai he tau agelu, mo e mai foki he Tama fakahele hana, ko Iesu Keriso. (Heperu 1:1, 2; 2:2) Ki a Pilato, ne pehe a Iesu: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli. Ko lautolu oti kana ha ha he kupu moli, kua fanogonogo mai a lautolu ke he haku a leo.” Ha ha ia Pilato e magaaho uho lahi ke ako e kupu moli hagaao ke he foakiaga ha Iehova ma e fakamouiaga mai he Tama he Atua. Pete ia, ne nakai ha ha a Pilato he kupu moli, ti nakai manako a ia ke ako mai ia Iesu. Ka e, tali fia lahi a Pilato: “Ko heigoa e kupu moli?” (Ioane 18:37, 38) Ko e momoko ha ia ma hana! Ka e, tokologa ia lautolu ne fanogonogo ke he kupu moli ne fakailoa e Iesu. Ke he tau tutaki hana ne pehe a ia: “Uhoaki ha mutolu a tau mata, nukua kitekite; mo e tau teliga ha mutolu, nukua fanogonogo.”—Mataio 13:16.

¹³ Ne fakamau e Iehova e kupu moli he puhala he Tohi Tapu ti kua taute e ia ke moua he tau tagata oti kana. Kua fakakite he Tohi Tapu e tau mena nukua tutupu moli. Kua fakamaama ai e tau fua, tau finagalo, tau poakiaga he Atua, ti pihia mo e tuaga moli he tau tagata. Ne pehe a Iesu he liogi ki a Iehova: “Ko e hau a kupu ko e kupu moli haia.” (Ioane 17:17) Ha ko e mena nei, ko e tohi kehe lahi e Tohi Tapu. Ne tohi hokoia i lalo he fakaohoohoaga he Atua ne iloa e tau mena oti. (2 Timoteo 3:16) Ko e mena fakaalofa uho ke he tau tagata, ko e mena ne tokiofa he tau fekafekau he Atua. Kua pulotu a tautolu ke totou ai he tau aho takitaha.

Kuku Mau e Kupu Moli

14. Ko e heigoa falu mena ne talahau e Iehova to taute e ia, ti ko e ha kua lata ke talitonu a tautolu ki a ia?

¹⁴ Kua lata ke uta fakahokulo e tautolu e mena ne talahau e Iehova i loto he hana Kupu. Kitia a ia ke he mena ne talahau e ia, mo e to taute e ia e mena kua talahau e ia to taute e ia. Ha ha ia tautolu e tau kakano oti ke falanaki ke he Atua. Maeke ia tautolu ke talitonu he pehe a Iehova na to “taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.” (2 Tesalonia 1:8) Kua falanaki foki a tautolu ke he kupu ha Iehova he pehe a ia kua fakaalofa a ia ki a lautolu kua tutuli e tututonu, he pehe a ia to foaki e ia e moui tukulagi ki a lautolu kua fakagahuahua e tua, mo e he pehe a ia to utakehe e ia e mamahi, tagi, mo e mate foki. Ne peehi e Iehova e talitonu he maveheaga fakahiku nei he foaki e hatakiaga nei ke he aposetolo ko Ioane: “Tohi ā; ha ko e tau kupu nai kua moli mo e fakamoli ia.”—Fakakiteaga 21:4, 5; Tau Fakatai 15:9; Ioane 3:36.

15. Ko e heigoa falu pikopiko kua fakatupu e Satani?

 ¹⁵ Kehe mamao a Satani mai ia Iehova. He nakai fakamalolo, kua fakavaia a ia. Ke moua hana foliaga ke fuluhi e tau tagata mai he tapuakiaga mea, ne fakatupu e Satani e loga he tau pikopiko. Ma e fakatai, to taute e Satani a tautolu ke talitonu kua mamao ligo e nakai fakaalofa mo e manamanatuaga he Atua ke he matematekelea he lalolagi. Ka e, kua fakakite he Tohi Tapu kua fakaalofa hokulo a Iehova ma e hana tau mena momoui ti maanu ha ko e kelea mo e matematekelea. (Gahua 17:24-30) Kua manako foki a Satani ke he tau tagata ke talitonu ko e tau mouaaga fakaagaga kua moumou magaaho. Kehe ai, kua fakamalolo he tau Tohiaga Tapu a tautolu kua “nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” Lafi ki ai, kua fakamaaliali mai i loto “ko ia foki kua taui mai a lautolu kua kumi fakamakutu kia ia.”—Heperu 6:10; 11:6.

16. Ko e ha e tau Kerisiano kua lata ke mataala tumau mo e kuku mau e kupu moli?

¹⁶ Hagaao ki a Satani, ne tohi he aposetolo ko Paulo: “Kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.” (2 Korinito 4:4) Tuga a Eva, kua fakavaia lahi e Satani ko e Tiapolo e falu. Kua muitua he falu e puhala ha Atamu, ne nakai fakavaia ka e fifili pauaki ke he mahani liuliu. (Iuta 5, 11) Ti, kua lata ke mataala tumau e tau Kerisiano mo e kuku mau e kupu moli.

Manako a Iehova ke he “Tua Fakamoli”

17. Ko e heigoa ha tautolu kua lata ke taute ke moua e taliaaga ha Iehova?

¹⁷ Ha kua mahani fakamoli a ia ke he tau puhala oti kana hana, kua amanaki a Iehova ki a lautolu ne tapuaki ki a ia ke mahani fakamoli foki. Ne tohi he salamo: “Iehova na e, ko hai kia ke nofo ke he hāu a fale uta fano? Ko hai kia ke nofo mau ke he hāu a mouga tapu? Ko ia kua fano mo e mahani hako, mo e tututonu, kua vagahau foki mo e moli ke he hana loto.” (Salamo 15:1, 2) Ke he tau Iutaia ne lologo e tau kupu ia, he totoku e mouga tapu ha Iehova ne manatu moli e Mouga ha Siona ne tamai ki ai he Patuiki ko Tavita e puha he maveheaga ke he fale ie ne fakatu e ia i ai. (2 Samuela 6:12, 17) Ko e mouga mo e fale ie ne manatu e matakavi ne takele fakatai a Iehova i ai. Ne o atu e tau tagata ke he Atua ke maeke ke ole ke he hana taliaaga.

18. (a) Ko e heigoa ne manako mai he kapitiga mo e Atua? (e) Ko e heigoa ka fakatutala ki ai he vala tala ka mui mai?

¹⁸ Ko e ha tagata kua manako ke kapitiga mo Iehova kua lata ke vagahau e kupu moli “ke he hana loto,” nakai ni ke he hana tau laugutu.  Ko e tau kapitiga moli he Atua kua lata ke loto fakamoli mo e fakakite e “tua fakamoli,” ha ko e tau gahua he mahani fakamoli na mai ia he loto. (1 Timoteo 1:5; Mataio 12:34, 35) Ko e kapitiga he Atua kua nakai eke lagatau po ke fakavaia, ha kua “vihiatia lahi e Iehova e tagata . . . fakavai.” (Salamo 5:6) Ko e Tau Fakamoli a Iehova he lalolagi katoa kua gahua malolo ke he mahani fakamoli he fifitaki ha lautolu a Atua. To kumikumi ki ai e vala tala ka hau ke he matakupu nei.

To Tali Fefe e Koe?

• Ko e ha ne iloa e Iehova e kupu moli ke he tau mena oti kana?

• Ko e heigoa kua fakakite kua mahani fakamoli a Iehova?

• Fakakite fefe e Iehova e kupu moli?

• Hagaao ke he kupu moli, ko e heigoa kua manako mai ia tautolu?

[Tau Huhu he Fakaakoaga]

[Tau Fakatino he lau 20]

Kua iloa he Atua he kupu moli e tau mena oti hagaao ke he tau mena ne tufuga e ia

[Tau Fakatino he lau 23]

To fakamoli e tau maveheaga ha Iehova