Kua Ha Ha Nakai Ia Koe e “Amaamanaki”?

“Po ke fefe ha mutolu a mahani ke lata ai ke he tau mahani [tapu] mo e tau mahani Atua; kua fakatalitali mo e foli atu kia hoko mai e aho he Atua.”—2 PETERU 3:11, 12.

1, 2. Liga fakataitai fefe e tautolu e fai “amaamanaki” hagaao ke he aho ha Iehova?

MANAMANATU la ke he magafaoa ne hane fakatalitali ke he tau tagata ne uiina ke o mai ke kai. Kua mafiti mai e matahola ne fakatoka ke o mai ai a lautolu. Kua tepetepetu e hoana he taute fakaotioti e tau mena kai. Kua lagomatai ai he tane hana mo e ha laua fanau ke fakamaopoopo e tau mena oti. Kua loto fiafia e tau tagata oti. E, kua fakatalitali e magafaoa katoa ke o mai e tau kapitiga mo e kua amaamanaki atu ke he kaiaga lolo mo e lafiaga mitaki.

² Ko e tau Kerisiano, kua amaamanaki foki a tautolu ke he taha mena mua atu e aoga. Ma e heigoa? Kua amaamanaki oti a tautolu ke he “aho he Atua”! Ato hoko mai ai, kua lata a tautolu ke tatai mo e perofeta ko Mika, ne talahau: “To tatali atu au kia Iehova, to amaamanaki atu ke he Atua he haku a fakamouiaga.” (Mika 7:7) Kua kakano kia e mena ia ke nonofo fakatekiteki? Nakai. Kua lahi mahaki e gahua ke taute.

3. Hagaao ke he 2 Peteru 3:11, 12, ko e heigoa e aga ne kua lata ke moua he tau Kerisiano?

³ Ne lagomatai he aposetolo ko Peteru a tautolu ke moua e aga hako he magaaho ka fakatalitali. Ne talahau e ia: “Po ke fefe ha mutolu a mahani ke lata ai ke he tau mahani [“tapu,” NW] mo e tau mahani Atua; kua fakatalitali mo e foli atu kia hoko mai e aho he Atua?” (2 Peteru 3:11, 12) Kia mailoga, kua nakai fakatupu he talahauaga ha Peteru e fakauaua po ke fefe ha tautolu a mahani. I loto he tau tohi omoi faka-Atua ua hana, ne fakamaama e ia po ke kua lata ke fefe e tau Kerisiano. Ne tomatoma foki e ia a lautolu ke fakagahuahua e “tau mahani tapu mo e tau mahani Atua.” Pete ni kua kavi ke 30 e tau tau he mole tali mai he foaki e Iesu Keriso e fakamailoga he “fakaotiaga he fakatokaaga he tau mena nei,” nukua nakai lata e tau Kerisiano ke tukuhifo e tau puipuiaga ha lautolu. (Mataio 24:3) Kua lata ia lautolu ke “fakatalitali mo e foli atu” ke he ha ha hinei he aho ha Iehova.

4. Ko e heigoa kua putoia ke he “fakatalitali mo e foli atu kia hoko mai e aho he Atua”?

⁴ Ko e kakano moli he kupu Heleni nei ne talahau ke “foli atu” ko e “ke fakamafiti.” Moli, kua nakai maeke ia tautolu ke “fakamafiti” e aho ha Iehova. Ha ko e mena ia, ‘kua nakai iloa e tautolu e aho, po ke magaaho’ ka hau ai a Iesu Keriso ke fakahoko e fakafiliaga ke he tau fi he Matua hana. (Mataio 24:36; 25:13) Ne fakamaama mai he taha tohi, ko e matapatu vepi he talahauaga nei “ke fakamafiti” kua kakano “ ‘ke fakaaveave’ ti  kua fakafetui mo e ‘ke fakamakutu, hakahakau, ke manamanatu hagaao ke he taha mena.’ ” Kua fakamalolo ai e Peteru e tau katofia talitonu ke manako fakamakutu atu ke he ha ha hinei he aho ha Iehova. Kua maeke ia lautolu ke taute e mena nei he tokaloto tumau ai. (2 Peteru 3:12) Mo e “aho a Iehova kua lahi mo e matakutakuina” hane tata lahi mai, kua lata ia tautolu ke moua e manamanatuaga taha ia ni.—Ioelu 2:31.

Kia Amaamanaki mo e “Tau Mahani Tapu”

5. Kua lata ke fakakite fefe e tautolu kua manako fakamakutu a tautolu ke kitia e “aho he Atua”?

⁵ Kaeke kua manako fakamakutu a tautolu ke hao mai he aho ha Iehova, to fakakite moli e tautolu e mena ia ha ko e “tau mahani tapu mo e tau mahani Atua” ha tautolu. Ati fakamanatu mai he talahauaga “tau mahani tapu” ki a tautolu e tomatomaaga ha Peteru: “Kia tuga e fanau omaoma, aua neke fakatai e mutolu a mutolu ke he tau manako lahi tuai ha mutolu ke goagoa ai a mutolu; ka e tuga ne tapu a ia kua ui kia mutolu, kia pihia foki a mutolu ke tapu ke he tau mahani oti ha mutolu; ha kua tohi Kia tapu a mutolu, ha ko au nai kua tapu ni au.”—1 Peteru 1:14-16.

6. Ke tapu, ko e heigoa kua lata ia tautolu ke taute?

⁶ Ke tapu, kua lata ia tautolu ke fakatumau ke mea ke he tino, manamanatuaga, mahani, mo e fakaagaga. Kua mautauteute nakai a tautolu ma e “aho he Atua” he fakatumau a tautolu ke tapu ko e tau tagata ne hahamo e higoa ha Iehova? Kua nakai mukamuka ke fakatumau ke meateka pihia ha ko e tau tutuaga he tau mahani he lalolagi nei hane malolo hifo. (1 Korinito 7:31; 2 Timoteo 3:13) Kua kitia kia e tautolu hane lahi fakahaga e veha he vahaloto he tau tutuaga he tau mahani ha tautolu mo e he lalolagi? Kaeke nakai, kua lata lahi a tautolu ke manamanatu. Kua pihia kia ha ko e tau tutuaga fakatagata ha tautolu, pete ni he tokoluga ke he lalolagi, hane matafi kehe? Kaeke pihia, kua lata ia tautolu ke taute e tau gahua kua lata ke fakahakohako e tau tutuaga ke fakafiafia e Atua.

7, 8. (a) Liga to pokia fefe ia tautolu e aoga lahi ke fakagahuahua e “tau mahani tapu”? (e) Ko e heigoa e tau fuafuaaga hako ne kua lata?

⁷ Mo e tamataaga he tau fakatino telefua he Internet mo e ha kua fakagalogalo ke he kitiaaga he falu, ko lautolu fakamua ne nakai fai puhala ke he tau mena kelea pihia hane mogonei kua moua e “tau puhala loga he tau mahani fakatane mo e fifine,” he talahau he taha toketa fakaekekafo. Kaeke ke kumikumi atu a tautolu ke he tau fahi kiva pihia he Internet, kua fakaheu tuai e tautolu e poakiaga he Tohi Tapu ke “aua pipiki atu a mutolu ke he mena kelea.” (Isaia 52:11) Kua ‘foli moli atu kia a tautolu ke he aho he Atua’? Po ke liga kua fakatolomaki e tautolu e aho ia, he manamanatu ka takiva e tautolu e tau loto ha tautolu aki e tau mena fakateteki, na fai magaaho agaia ke fakamea ne tautolu a tautolu? Ka fakataupa a tautolu mo e lekua he tau puhala nei, ko e uhouho ha ia ke ole fakamakamaka ki a Iehova ke ‘fakamafoki kehe ha tautolu a tau mata neke kitekite ke he tau mena nakai aoga mo e kia fakamalolo a tautolu ke he hana puhala’!—Salamo 119:37.

⁸ Kua tokologa lahi e Tau Fakamoli a Iehova, ko e tau fuata ikiiki mo e tau fuakau, hane pipiki mau ke he tau tutuaga he tau mahani tokoluga he Atua ti kua kalo mai he tau fakaohooho kelea he lalolagi nei. He mataala ke he uhouho he vaha ha tautolu mo e ke he hatakiaga ha Peteru “to hau e aho he Iki tuga ne kaiha he po,” kua matutaki atu a lautolu ke fakagahuahua e “tau mahani tapu.” (2 Peteru 3:10) Kua fakakite he tau gahua ha lautolu hane “fakatalitali mo e foli atu [a lautolu] kia hoko mai e aho he Atua.” *

 Kia Amaamanaki mo e “Tau Mahani Atua”

9. Ko e heigoa kua lata he mahani Atua ke omoi a tautolu ke taute?

⁹ Kua aoga foki e “tau mahani Atua” kaeke ke tokaloto e tautolu e aho ha Iehova. Kua putoia ke he “tau mahani Atua” e fakalilifu ma e Atua ne omoi aki a tautolu ke taute e tau mena ne fiafia ai a ia. Ko e piki fakamoli atu ki a Iehova, ko e malolo haia i tua he tau mahani Atua pihia. Ko e finagalo hana ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) Nukua “nakai finagalo [e Atua] ke malaia taha, ka kia hohoko oti kana ke he tokihala.” (2 Peteru 3:9) Ti, kua nakai kia lata, mogoia, he ha tautolu a mahani Atua ke fakalagalaga a tautolu ke fakahokulo e tau laliaga ha tautolu ke lagomatai e tau tagata ke fakaako hagaao ki a Iehova mo e ke fifitaki a ia?—Efeso 5:1.

10. Ko e ha kua lata ia tautolu ke puipui mai he “fakavai he koloa”?

¹⁰ To puke e tau momoui ha tautolu he tau mahani Atua kaeke kumi fakamua e tautolu e Kautu he Atua. (Mataio 6:33) Ti putoia ai ke he mena nei e onoonoaga lautatai ha tautolu ke he tau koloa tino. Ne hataki e Iesu: “A mutolu, kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.” (Luka 12:15) Ti pete ni kua liga uka ke manamanatu hifo kua fakamatapouli he fakaalofa ke he tupe a tautolu, kua lata ia tautolu ke mailoga “ko e fakaatukehe ke he tau mena he lalolagi nai, mo e fakavai he koloa” kua maeke ke “apitia ai e kupu” he Atua. (Mataio 13:22) Liga kua nakai mukamuka ke moua e levekiaga ke he moui. Ke he falu fahi he lalolagi, kua tokologa ne manamanatu ke moua ai e moui mitaki kua lata ia lautolu ke fenoga ke he taha motu mahuiga, ti liga toka hifo e magafaoa ke fai tau ka mole. Kua pihia foki e manatu he falu tagata he Atua ke he puhala nei. He fenoga atu ke he taha motu, liga to maeke ia lautolu ke foaki ke he magafaoa ha lautolu e tau koloa fou. Pete ia, ko e heigoa la ka tupu ke he tuaga fakaagaga he tau fakahele ha lautolu ne nonofo hifo he motu? He kua nakai fakagahuahua e tuaga hako he ulu pule he loto kaina, to moua nakai e lautolu e tau fua fakaagaga ne kua lata ke maeke ke hao mai he aho ha Iehova?

11. Fakatata fefe he taha tagata gahua fakaku kua mua atu e aoga he mahani Atua ke he tau koloa?

¹¹ Ne iloa he tagata gahua fakaku mai i Filipaina e kupu moli he Tohi Tapu mai he Tau Fakamoli a Iehova i Sapani. He fakaako hagaao ke he tau matagahua he ulu pule ne mai he Tohiaga Tapu, ne mailoga e ia kua lata ia ia ke lagomatai e magafaoa hana ke eke mo tau tagata tapuaki ha Iehova. (1 Korinito 11:3) Ne totoko lahi e hoana hana i Filipaina ke he tua moua fou hana, mo e manako ni ke matutaki a ia ke fakafano age e tupe ka e nakai liu mai ki kaina ke fakaako ke he magafaoa e tau taofiaga hana ne fakave ke he Tohi Tapu. Ka e, kua omoomoi he uhouho he vaha mo e kua tupetupe lahi ke he tau fakahele hana, ne liu a ia ki kaina. Ko e fakauka hana he fakafehagai takitokotaha ki a lautolu he magafaoa kua taui mitaki. Fai magaaho, ne fakalataha auloa e magafaoa hana ke he tapuakiaga moli, ti hu atu e hoana hana ke he fekafekauaga mau.

12. Ko e ha kua lata ia tautolu ke tuku fakamua e tau mena fakaagaga he moui?

¹² Liga fakatatai e tuaga ha tautolu ke he tau tagata i loto he fale hane vela. Kua pulotu kia ke tafeoho fano ke fakahao e tau koloa tino mai he fale vela ne amanaki ke malolo hifo? Ka e nakai  kia kua mua e aoga ke fakahao e tau momoui—ha tautolu ni mo e ha lautolu he magafaoa ha tautolu mo e falu foki ne nonofo he fale? Moli, hane mafiti lahi e fakatokaaga kelea nei ke malolo hifo, ti kua hagahaga kelea lahi e tau momoui. He mailoga e mena nei, kua lata ni ia tautolu ke tuku fakamua e tau mena fakaagaga mo e tukumoeulu ke he gahua fakamoui ne fakamatala he Kautu.—1 Timoteo 4:16.

Lata a Tautolu ke “Nakai Fai Ila”

13. Ko e heigoa e tuaga kua manako a tautolu ke ha ha i ai he magaaho ka fakalutukia mai e aho ha Iehova?

¹³ He peehi mai e aoga he fakatumau ke amaamanaki, ne talahau e Peteru: ‘Ko e tau fakahelehele na e, ha ha ne fakatalitali ke he tau mena ia, kia lalilali atu a mutolu, kia moua he Atua a mutolu kua nakai fai ila mo e nakai talahaua kelea mo e kua [“mafola,” NW].’ (2 Peteru 3:14) He lafi atu ke he hana tomatomaaga ke taute e tau mahani tapu mo e tau mahani Atua, ne peehi e Peteru e aoga ka moua ai e Iehova he magaaho fakamui ko e tau tagata kua fakamea he toto uho ha Iesu. (Fakakiteaga 7:9, 14) Kua pehe e mena nei, ke fakagahuahua he tagata e tua ke he poa ha Iesu mo e eke mo fekafekau tukulele mo e papatiso ha Iehova.

14. Ko e heigoa kua putoia ke he “nakai fai ila”?

¹⁴ Ne fakamafana e Peteru a tautolu ke lalilali atu kia moua ai kua “nakai fai ila.” Kua fakaeneene nakai a tautolu ke he tau tapulu Kerisiano mo e tau aga fakatagata ha tautolu ke nakai fai ila, ke nakai takiva he lalolagi? Ka e he magaaho ka kitia e tautolu e ila he tau tapulu ha tautolu, ne fakamafiti a tautolu ke utakehe ai. Kaeke ke putoia ai e tapulu uho, kua matatetotonu lahi a tautolu ke holoholo kehe e ila. Kua pihia nakai e logonaaga ha tautolu kaeke ke ilaila e tau tapulu faka-Kerisiano ha tautolu, ke fakatai, ha ko e falu hepehepe he aga fakatagata po ke mahani ha tautolu?

15. (a) Ko e ha ne kua lata e tau Isaraela ke taute e tau mena fakahafehafe ke he tau matapotu he ha lautolu a tau tapulu? (e) Ko e ha ne tutu kehe e tau fekafekau ha Iehova he vaha fou nei?

¹⁵ Kua lata e tau Isaraela ke taute e “tau mena fakahafehafe ke he tau matapotu he ha lautolu a tau tapulu” mo e ke “tuku foki e lautolu e afo uli ki luga he tau mena fakahafehafe ke he kala tapulu.” Ko e ha? Ke maeke ia lautolu ke manatu e tau poakiaga ha Iehova, ke omaoma ki ai, mo e ke “tapu foki” ke he Atua ha lautolu. (Numera 15:38-40) Ko e tau fekafekau ha Iehova he vaha fou nei, kua tutu kehe mai a tautolu he lalolagi ha kua omaoma a tautolu ke he tau fakatufono mo e tau matapatu fakaakoaga faka-Atua. Ke tuga anei, kua fakatumau a tautolu ke mea e tau mahani, kua fakalilifu e tautolu e fakatapuaga he toto, mo e kalo mai a tautolu he tau tapuaki tupua oti kana. (Gahua 15:28, 29) Kua fakalilifu he tokologa a tautolu ma e fifiliaga mauokafua ha tautolu ke leveki ne tautolu a tautolu neke kelea.—Iakopo 1:27.

Lata a Tautolu ke “Nakai Talahaua Kelea”

16. Kua putoia ke he heigoa e fakatumau ha tautolu ke “nakai talahaua kelea”?

¹⁶ Ne talahau foki e Peteru kua lata a tautolu ke moua kua “nakai talahaua kelea.” Maeke fefe e mena ia? Ko e ila na maeke ke fufulu po ke holoholo kehe, ka e ke “talahaua kelea” kua talahau taha mena kehe. Kua pehe ai na fai mena he loto ne kelea, kua hehe. Ne tomatoma e aposetolo ko Paulo ke he tau katofia Kerisiano i Filipi: “Kia eke e mutolu e tau mena oti kana mo e nakai loma, mo e nakai mahalohalo noa; kia uta a mutolu mo tau tagata nakai totoku kua kelea, to totonu, ko e fanau he Atua, nakai fai ila i mua  he hau fakakeukeu mo e faliuliu, kua kitia e lautolu ha mutolu a mahani tuga ne tau mena kua fakamaama aki e lalolagi.” (Filipi 2:14, 15) Kaeke muitua a tautolu ke he tomatoma ia, to kalo mai a tautolu he loma mo e mahalohalo noa mo e to fekafekau ai ke he Atua mai he loto meateka. To omoi he fakaalofa ma Iehova mo e ma e tau tuuta kaina a tautolu he fakamatala e tautolu e “tala mitaki nai he kautu.” (Mataio 22:35-40; 24:14) Mua atu foki, to matutaki a tautolu ke fakapuloa e tala mitaki pete ni he nakai maama he tau tagata tokologa ko e ha ne foaki noa e tautolu e magaaho ha tautolu he lali ke lagomatai falu ke fakaako hagaao ke he Atua mo e hana Kupu, ko e Tohi Tapu.

17. Kua lata ke fefe e tau manako ha tautolu he magaaho ka foli atu ke he tau kotofaaga i loto he fakapotopotoaga Kerisiano?

¹⁷ He loto lahi ke moua kua “nakai talahaua kelea,” kua lata ia tautolu ke faala ha tautolu a tau manatu ke he tau tutuliaga oti ha tautolu. Kua toka hifo e tautolu e puhala taute mena fulukovi he lalolagi, tuga e ukufakina ke moua e tau koloa po ke malolo ke pule. Kaeke foli atu a tautolu ma e tau kotofaaga i loto he fakapotopotoaga Kerisiano, kia lata ke mea e tau manako ha tautolu mo e kia tumau a tautolu ke omoi e fakaalofa ma Iehova mo e ma e falu. Kua hauhau lahi ke kitia e tau tagata fakaagaga hane ‘foli ke he feua he epikopo’ katoa mo e loto fiafia mo e manako fakatokolalo ke fekafekau ma Iehova mo e tau katofia talitonu ha lautolu. (1 Timoteo 3:1; 2 Korinito 1:24) Haia moli, ko lautolu kua latatonu ke fekafekau ko e tau motua ‘kia leveki e fuifui mamoe he Atua mo e fakamakai, aua neke eke mo e fia eke koloa, ka ko e loto fiafia. Aua neke tuga he tau tagata kua fia iki ke he kaina he Atua, ka kia eke a mutolu mo tau fakafifitaki ke he fuifui mamoe.’—1 Peteru 5:1-4.

Lata a Tautolu ke “Mafola”

18. Ko e heigoa e tau mahani ne talahaua ai e Tau Fakamoli a Iehova?

¹⁸ Fakahiku, ne talamai a Peteru ki a tautolu ke moua kua “mafola.” Ti ke moui ke he fakatufono nei, kua lata ia tautolu ke moua e mafola mo Iehova mo e tau tuuta kaina ha tautolu. Ne peehi e Peteru e aoga he moua e “fakaalofa lahi ko e taha kia taha” mo e he taofi mau e mafola mo e tau katofia Kerisiano ha tautolu. (1 Peteru 2:17; 3:10, 11; 4:8; 2 Peteru 1:5-7) Ke taofi mau e mafola ha tautolu, kua lata ke fefakaalofaaki a tautolu. (Ioane 13:34, 35; Efeso 4:1, 2) Kua kitia lahi e fakaalofa mo e mafola ha tautolu he magaaho ka hoko e tau fonoaga he lalolagi katoa. He fonoaga i Costa Rica he 1999, ne nakai fiafia e tagata fakafua koloa he male vakalele, he fakaalaia puleheu he Tau Fakamoli he matakavi ia e fale koloa hana he fakafeleveia mai e tau tagata o fono. Ka e, he aho ke uaaki, ne kitia e ia e fakaalofa mo e mafola ne fakatata he fakafeleveia fiafia ne moua e lautolu ne o mai, pete ni kua nakai iloa fakatagata he Tau Fakamoli he matakavi ia a lautolu. He aho fakahiku, ne fakalataha atu e tagata fakafua  koloa ke he fakafeleveiaaga ia mo e ole ke moua e fakaako Tohi Tapu.

19. Ko e ha kua aoga lahi ai ke tutuli e mafola mo e tau katofia talitonu?

¹⁹ Ko e mahani fakamoli ha tautolu he tutuli e mafola mo e ha tautolu a tau matakainaga fakaagaga kua fakakite mai e fakamakai lahi ha tautolu he fakatalitali a tautolu ke he aho ha Iehova mo e lalolagi fou hana ne mavehe mai. (Salamo 37:11; 2 Peteru 3:13) Kau kua uka ia tautolu ke fakatumau e mafola mo e taha katofia talitonu. Maeke nakai ia tautolu ke fakatino a tautolu hane nonofo mafola mo ia he Parataiso? Kaeke fakafualoto e matakainaga ki a tautolu, kua lata ia tautolu ke fakamafiti ke ‘fakafeilo fakamua mo ia.’ (Mataio 5:23, 24) Kua aoga lahi he taute pihia kaeke ke mafola a tautolu mo Iehova.—Salamo 35:27; 1 Ioane 4:20.

20. Kua lata ke fakakite ke he tau puhala fe e “amaamanaki”?

²⁰ Kua igatia fakatagata nakai a tautolu ke “fakatalitali mo e foli atu kia hoko mai e aho he Atua”? Ko e manako fakamakutu ha tautolu ke kitia e fakaotiaga ke he mahani kelea kua fakakite mai he fakatumau a tautolu ke tapu i loto he lalolagi kelea nei. Mua atu, ko e ha tautolu a manako fakatepetepe ke he hauaga he aho ha Iehova mo e ma e moui i lalo he pule Kautu, nukua fakakite moli ai he ha tautolu a mahani Atua. Mo e ha tautolu a talifaki ke moui he lalolagi mafola fou, kua fakaata mai he ha tautolu a tutuli he mafola mo e ha tautolu a tau katofia tapuaki he mogonei. He tau puhala ia, kua fakakite e tautolu kua ha ha ia tautolu e “amaamanaki” ti kua “fakatalitali mo e foli atu kia hoko mai e aho he Atua.”

[Matahui Tala]

Manatu Nakai e Koe?

• Ko e heigoa e kakano ke “foli atu kia hoko mai e aho he Atua”?

• Puhala fe ne fakatata ai e “amaamanaki” he hagaao ke he mahani ha tautolu?

• Ko e ha kua latatonu ai e “tau mahani Atua”?

• Ko e heigoa kua lata ia tautolu ke taute ke moua e Iehova kua ‘nakai fai ila mo e nakai talahaua kelea mo e kua mafola’?

[Tau Huhu he Fakaakoaga]

[Fakatino he lau 9]

Kua fakaata mai e “amaamanaki” he tau mahani tapu

[Tau Fakatino he lau 10]

Kua fakamoui e gahua fakamatala he Kautu

[Fakatino he lau 12]

He fakatalitali a tautolu ke he aho ha Iehova, kia tutuli e tautolu e mafola mo e falu