Ko e Heigoa ne Finagalo Mai a Iehova ki a Tautolu?
Ko e Heigoa ne Finagalo Mai a Iehova ki a Tautolu?
‘Ko e heigoa foki e mena kua finagalo ai a Iehova kia koe, nakai kia ko e tau mena nai, ke eke ai e fakafili tonu, ke fiafia ke he fakaalofa, mo e feoaki mo e hau a Atua mo e loto holoilalo?’—MIKA 6:8.
1, 2. Ko e ha ka liga fakalolelole ai e falu fekafekau ha Iehova, ka ko e heigoa kua lata ke eke mo lagomatai?
KO VERA ko e Kerisiano tua fakamoli ne kavi ke 75 e tau tau he moui mo e matulituli e malolo tino. “He falu magaaho,” he talahau e ia, “ne onoono au ki fafo he pu fakamaama mo e kitia e tau matakainaga Kerisiano hane fakamatala ke he taha fale mo e taha fale. Ti hihina e tau mata haku he manako au ke fakalataha mo lautolu, ka kua fakakaupa he gagao haku a fekafekauaga ki a Iehova.”
2 Kua moua nakai e koe e logonaaga pihia? Moli, ko lautolu oti ne ofania a Iehova kua manako ke feoaki ke he hana higoa mo e taute e tau poakiaga hana. Ka e kua kaeke nakai malolo mitaki a tautolu, kua momotua, po ke fai fakalagoaga fakamagafaoa? Liga kua momoko a tautolu ha kua liga nakai fakaata he tau tutuaga ia a tautolu ke taute e tau mena ne manako ki ai he fekafekauaga he Atua. Kaeke ko e tuaga ha tautolu anei, ko e onoonoaga ki a Mika tau veveheaga 6 mo e 7 ka liga fakamafanatia moli mai. Kua fakakite he tau veveheaga nei kua kakano mo e maeke ke moua e tau poakiaga a Iehova.
Puhala ne Fehagai e Atua mo e Tau Tagata Hana
3. Fehagai fefe a Iehova ke he tau Isaraela fakafualoto?
3 Kia onoono fakamua a tautolu ki a Mika 6:3-5 mo e mailoga e puhala ne fehagai a Iehova mo e tau tagata hana. Kia manatu na fakafualoto e tau Isaraela he vaha ha Mika. Pete he pihia, ne hagaaki hofihofi a Iehova ki a lautolu mo e tau kupu, “Haku motu na e.” Ne ole age a ia: “Haku motu na e, kia manatu a.” He nakai akonaki kelea a lautolu, ne lali a ia ke hokotia ke he tau loto ha lautolu he huhu, “Ko e heigoa kia e mena kua eke e au kia koe?” Ne fakamalolo foki e ia a lautolu ke “kia talahau mai kia” ia.
4. Kua lata ke fefe e lauia he fakafifitakiaga he Atua ke he fakaalofa hofihofi ki a tautolu?
4 Ko e taha fakafifitakiaga ni haia ne fakatoka mai he Atua ma tautolu oti! Ne ui fakaalofa hofihofi foki e ia e tau tagata fakafualoto ha Isaraela mo Iuta he vaha ha Mika ko e “haku motu” mo e olelalo ki a lautolu. Moli ai, mogoia, kua lata ia tautolu ke fakakite e fakaalofa hofihofi mo e mahani totonu ke he tau fakafetuiaga ha tautolu mo lautolu ne ha ha he fakapotopotoaga. Moli, ko e falu kua nakai mukamuka ke fakafetui ki ai, po kua lolelole fakaagaga a lautolu. Ka e, kaeke fakaalofa a lautolu ki a Iehova, kua manako a tautolu ke lagomatai a lautolu mo e fakakite ki a lautolu e fakaalofa hofihofi.
5. Ko e heigoa e matapatu manatu ne ha ha ia Mika 6:6, 7?
5 Kia fufuke atu a tautolu ki a Mika 6:6, 7. Ne huhu e Mika e tau huhu loga, he talahau: “Ko e heigoa kia e mena ke uta ai e au ke fina atu au ki mua a Iehova, ko e heigoa e mena ke ta atu e au ke hufeilo aki au ke he Atua tokoluga? To fina atu kia au ki mua hana mo e tau poa huhunu, mo e tau punua povi tau taha? To fiafia kia a Iehova ke he tau mamoe tane afe mo afe, mo e tau hogofulu e afe he tau mena po ke tau vailele kua tafe ai e puke lolo? To foaki atu kia e au haku a tama uluaki ke taui aki haku a tau holifono, ko e fanau he haku a tino ke taui aki e tau hala he haku agaaga?” Nakai, kua ai maeke ke fakafiafia a Iehova aki e “tau mamoe tane afe mo afe, mo e tau hogofulu e afe he tau mena po ke tau vailele kua tafe ai e puke lolo?” Ka e ha ha ai e mena ke fakafiafia a ia. Ko e heigoa la e mena ia?
Lata ke Fakagahuahua e Tautolu e Fakafili Tonu
6. Ko e heigoa e tau poakiaga faka-Atua tolu ne fakatoka mai ia Mika 6:8?
6 Ia Mika 6:8, ne ako e tautolu e tau mena ne finagalo mai a Iehova ki a tautolu. Ne huhu a Mika: “Ko e heigoa foki e mena kua finagalo ai a Iehova kia koe, nakai kia ko e tau mena nai, ke eke ai e [“fakafili tonu,” NW], ke fiafia ke he fakaalofa, mo e feoaki mo e hau a Atua mo e loto holoilalo?” Kua putoia ke he tau poakiaga tolu nei e logonaaga, manamanatuaga, mo e gahuahuaaga ha tautolu. Kua lata ia tautolu ke fakahihiga ke fakakite e tau fua nei, manamanatu ke he puhala ka fakakite ai, mo e gahuahua ke fakatata ai. Kia o mai a tautolu ke kikite takitaha ke he tau poakiaga tolu nei.
7, 8. (a) Ko e heigoa e kakano ke ‘taute e mena hako’? (e) Ko e heigoa e tau nakai fakafili tonu ne holofa he vaha ha Mika?
7 ‘Ke taute e mena hako’ ko e kakano ke fakagahuahua e fakafili tonu. Ko e puhala taute mena he Atua ko e puhala a ia he fakafili tonu. Ka e, ko e atuhau ha Mika kua nakai fakagahuahua e fakafili tonu, ka e ko e nakai fakafili tonu. Ke he tau puhala fe? Kikite ki a Mika 6:10. He matahiku he kupu ia, kua fakakite e tau tagata fakafua koloa ke fakaaoga e “efa fakavai,” ko e efa ne tote lahi. Mo e lafi mai he Mika 6 kupu 11 ne fakaaoga e lautolu e “tau maka fakavai.” Mo e hagaao ke he Mika 6 kupu 12, ‘ko e tau alelo ha lautolu kua fakavai.’ Ti, kua holofa e tau efa fakavai, tau maka fakavai, mo e tau vagahau fakavai he lalolagi fakafua koloa he vaha ha Mika.
8 Kua nakai fakakaupa e tau gahua nakai tonu ke he makete. Kua tutupu mau foki e tau mena ia i loto he fale fakafili. Ne fakakite e Mika 7:3, “kua ole palepale he iki katoa mo e fakafili.” Kua foaki e tau taui ke he tau fakafili ke nakai fakafili tonu atu a lautolu ke he tau tagata nakai agahala. Ko e “tagata lahi,” po ke tagata mua atu e talahaua, kua holifono foki a ia. Ko e mena ia, ne talahau e Mika ko e iki, ko e fakafili, mo e tagata lahi “kua fakakeukeu,” po ke fakatokatoka, e tau mahani kelea ha lautolu.
9. Kua lauia fefe a Iuta mo Isaraela he tau nakai fakafili tonu ne taute he tau tagata mahani kelea?
9 Ko e tau nakai fakafili tonu ne taute he tau takitaki mahani kelea kua lauia katoa ai a Iuta mo Isaraela. Ne fakakite ia Mika 7:5 kua takitaki atu e nakai fakafili tonu ke he nakai fai falanakiaga he vahaloto he tau hoa, tau kapitiga uho, mo e pihia foki ke he tau hoa mau. Ti fakakite he Mika 7 kupu 6 kua takitaki atu e mena nei ke he tuaga fakavihia i loto ni he magafaoa tata ke tuga e tau tama tane mo e tau matua tane, tau tama fifine mo e tau matua fifine.
10. He tau tutuaga he nakai fakafili tonu he vaha fou nei, kua takitaki fefe he tau Kerisiano a lautolu?
10 Ka e kua e vaha nei? Nakai kia kua kitia e tautolu e tau tutuaga tatai pihia ni? Ke tuga a Mika, kua viko takai ia tautolu e nakai fakafili tonu, ko e matagi nakai fai falanaki, mo e malolo hifo he kaufakalatahaaga mo e he moui fakamagafaoa. Ka e, ko e tau fekafekau he Atua ne ha ha i loto he lalolagi nakai tututonu nei, kua nakai fakaata e tautolu e agaga he nakai fakafili tonu he lalolagi nei ke hu ki loto he fakapotopotoaga Kerisiano. Ka e, kua ukufakina a tautolu ke fakatokoluga e tau matapatu fakaakoaga he mahani mitaki mo e fakamoli, ti fakatata ai e tau mena nei ke he tau momoui ha tautolu he tau aho oti. Moli ni, kua ‘mahani mitaki a tautolu ke he tau mena oti kana.’ (Heperu 13:18) Ti nakai kia talitonu a koe he fakagahuahua e tautolu e fakafili tonu, kua olioli e tautolu e tau monuina loga ne fua mai he fefakamatakainagaaki ne fakakite he falanakiaga moli?
Fanogonogo Fefe e Tau Tagata ke he “Leo a Iehova”?
11. Kua fakamoli fefe a Mika 7:12?
11 Ne perofeta mai e Mika ko e pete ni ko e tau tutuaga he nakai fakafili tonu, to hokotia ni e fakafili tonu ke he tau faga tagata oti kana. Ne talahau tuai he perofeta to fakapotopoto e tau tagata “mai he taha tahi ke hoko atu ke he taha tahi, mai he taha mouga ke hoko atu ke he taha mouga” ke eke mo tau tagata tapuaki ha Iehova. (Mika 7:12) He vaha nei, he fakamoliaga fakahiku he perofetaaga nei, kua nakai ni taha e motu, ka e ko e tau tagata takitokotaha he tau motu oti kua hane lagomatai he fakafili tonu nakai fakamailoga tagata he Atua. (Isaia 42:1) Kua fakakite fefe e mena nei ke moli?
12. Kua fanogonogo fefe ke he “leo a Iehova” he vaha nei?
12 Ma e tali, kia kikite ke he tau kupu fakamua atu ha Mika. Ne tohi ia Mika 6:9: ‘Kua ui mai e leo a Iehova ke he maga, ko e tagata kua iloilo to iloa e ia haku a higoa.’ Maeke fefe e tau tagata he tau motu oti ke fanogonogo ke he “leo a Iehova,” mo e matutaki fefe e mena nei ke he fakagahuahua ha tautolu he fakafili tonu? E, kua nakai logona moli he tau tagata he vaha nei e leo he Atua. Ka e, he puhala he gahua fakamatala ha tautolu ke he lalolagi katoa, kua logona he tau tagata takitokotaha mai he tau lanu oti mo e tau feakiaga oti e leo a Iehova. Ti ko e fua, ko lautolu ne fanogonogo ‘kua iloa hana higoa’ mo e tokoluga e fakalilifu ki ai. Kua taute moli e tautolu e puhala he fakafili tonu mo e fakaalofa he fekafekau ko e tau tagata fakapuloa makutu he Kautu. He fakailoa e higoa he Atua ke he tau tagata oti mo e nakai fakamailoga tagata, kua ‘fakagahuahua [e tautolu] e fakafili tonu.’
Lata ia Tautolu ke Fiafia ke he Fakaalofa
13. Ko e heigoa e kehekehe he vahaloto he fakaalofa-totonu mo e fakaalofa?
13 Kia fakatutala atu foki a tautolu ke he poakiaga ke uaaki ne totoku ia Mika 6:8. Kua finagalo mai a Iehova ki a tautolu ke “fiafia ke he fakaalofa.” Ko e kupu Heperu ne fakaliliu “fakaalofa” kua tohi foki ko e “fakaalofa-totonu,” po ke “fakaalofa fakamoli.” Ke fakaalofa-totonu ko e fakamatalahi atu ke he falu, ko e manamanatuaga hofihofi ma lautolu. Kua kehe e fakaalofa-totonu mai he fua he fakaalofa. Puhala fe? Ko e fakaalofa kua laulahi e kakano, ti kua kaputia ai e tau mena mo e tau manatu. Ke tuga anei, ne vagahau e Tohiaga Tapu hagaao ke he tagata ne ‘fakaalofa ke he tau mena ha ha he lalolagi.’ (1 Ioane 2:15) Ke he taha fahi, kua hagaao tumau e fakaalofa-totonu ke he tau tagata, mahomo ki a lautolu ne fekafekau ke he Atua. Ati vagahau ai a Mika 7:20 ke he “fakaalofa-totonu ki a Aperahamo,” (NW)—ko e tagata ne fekafekau ki a Iehova ko e Atua.
14, 15. Kua fakakite fefe e fakaalofa-totonu, ti ko e heigoa e moli ne totoku hagaao ki ai?
14 Hagaao ki a Mika 7:18, ne talahau he perofeta kua “fiafia lahi e Atua ke he fakaalofa-totonu.” (NW) Ne talamai a Mika 6:8 ki a tautolu ke nakai fakakite teao e fakaalofa-totonu ka e ke hokulo a fakaalofa ki ai. Ko e heigoa kua ako e tautolu mai he tau Tohiaga Tapu nei? Ko e fakaalofa-totonu kua fakakite fakamakai mo e fakamoli ai ha kua manako a tautolu ke fakakite ai. Ke tuga a Iehova, kua moua e tautolu e mitaki, po ke fiafia lahi, he fakakite e fakaalofa-totonu ki a lautolu ne manako lahi.
15 He vaha nei, ko e fakaalofa-totonu pihia ko e fakamailoga a ia he tau tagata he Atua. Kia kikite la ke he taha fakafifitakiaga. Ia Iuni he 2001, ne fakatupu he afa mahaki e fakapukeaga lahi i Texas, U.S.A., ti moumou e tau afe he tau kaina, fakalataha mo e tau kaina he Tau Fakamoli a Iehova. Ke lagomatai e tau matakainaga Kerisiano ha lautolu ne matematekelea, ne foaki fakamakai mo e loto mokoina he Tau Fakamoli kavi ke he 10,000 he tau magaaho mo e tau malolo ha lautolu. He molea e hafa tau, ne gahua mo e nakai mategugu a lautolu ne o mai noa ke lagomatai, he fakaaoga e tau aho, tau po, mo e tau matahiku fahitapu ha lautolu ke liu ati hake valu e Fale he Kautu mo e molea e 700 he tau kaina ma e tau matakainaga Kerisiano ha lautolu. Ko lautolu ne nakai fahia ke he gahua ia kua foaki e tau mena kai, tau koloa, mo e tau tupe. Ko e ha ne o mai e totou afe nei he Tau Fakamoli ke lagomatai e tau matakainaga ha lautolu? Ha kua “fiafia [a lautolu] ke he fakaalofa.” Ti kua mafanatia ha ia ke iloa ko e tau gahua pihia he fakaalofa-totonu kua fakakite ai he tau matakainaga ha tautolu he lalolagi katoa! E, ke feleveia e poakiaga ke “fiafia ke he fakaalofa,” kua nakai mamafa, ka ko e mena ke olioli ki ai!
Kia Loto Holoilalo he Feoaki mo e Atua
16. Ko e heigoa e fakataitaiaga ka lagomatai ke peehi e lata ke loto holoilalo he feoaki mo e Atua?
16 Ko e poakiaga ke toluaki ne moua ia Mika 6:8 ke “feoaki mo e hau a Atua mo e loto holoilalo.” Kakano e mena nei ke mailoga e tau kuku ha tautolu mo e ke falanaki ke he Atua. Ke fakatai: Kia manamanatu la ke he tama fifine tote ne kuku mau ke he lima he matua tane hana he o a laua he afa. Kua iloa lahi he tama fifine kua tote e malolo hana, ka e ha ha ia ia e mauokafua ke he hana matua. Kua lata foki ia tautolu ke iloa e tau kuku ha tautolu ka e mauokafua ke he ha tautolu a Matua he lagi. Maeke fefe ia tautolu ke kuku mau e mauokafua nei? Taha e puhala, he mauloto ko e ha ne pulotu ai ke fakatata tumau ke he Atua. Ne fakamanatu mai e Mika ki a tautolu e tau kakano tolu: ko Iehova ha tautolu a Laveaki, ha tautolu a Takitaki, mo e ha tautolu a Puipui.
17. Ko e puhala fe ne laveaki, takitaki, mo e puipui e Iehova e tau tagata hana he vaha i tuai?
17 Hagaao ki a Mika 6:4, 5, ne talahau e Atua: “Ko e mena ta hake e au a koe mai he motu ko Aikupito.” E, ko Iehova e Laveaki ha Isaraela. Ne talahau foki e Iehova: “Ne fakafano atu foki e au ki mua hau a Mose, mo Arona, mo Miriama.” Kua fakaaoga a Mose mo Arona ke takitaki e motu, mo e takitaki e Miriama e tau fifine a Isaraela ke he koli he kautuaga. (Esoto 7:1, 2; 15:1, 19-21; Teutaronome 34:10) Ne foaki e Iehova e takitakiaga he puhala he tau fekafekau hana. He Mika 6 kupu 5, ne fakamanatu e Iehova e motu a Isaraela na puipui e ia a lautolu mai ia Palako mo Palaamo mo e fakalavetiia e tau Isaraela he magahala fakamui he o fenoga ha lautolu mai i Sitima ha Moapi ki Kilikala he Motu he Maveheaga.
18. Kua eke fefe e Atua mo Laveaki, Takitaki, mo e Puipui ha tautolu he vaha nei?
18 He feoaki a tautolu mo e Atua, kua laveaki e ia a tautolu mai he lalolagi ha Satani, takitaki a tautolu he kakano he hana Kupu mo e hana fakatokatokaaga, mo e puipui a tautolu ko e matakau he magaaho ka ha ha i lalo he favale ha lautolu ne totoko mai. Kua ha ha ai ia tautolu e tau kakano loga ke kuku mau e lima he ha tautolu a Matua he lagi he feoaki a tautolu mo ia he magahala vale lahi he fenoga a tautolu ke he taha mena ne mua atu ke he Motu he Maveheaga i tuai—ko e lalolagi tututonu fou he Atua.
19. Ko e puhala fe ne matutaki e loto holoilalo ke he tau kuku ha tautolu?
19 Ha kua loto holoilalo he feoaki mo e Atua kua lagomatai a tautolu ke moua e onoonoaga mitaki ke he tau tutuaga ha tautolu. Kua pihia e mena nei ha kua kaputia e fakatata he loto holoilalo mo e mataala ke he tau kuku ha tautolu. Ko e momotua he tau tau he moui po ke matulituli e malolo tino ka liga fakakaupa e tau gahua ha tautolu ke he fekafekauaga a Iehova. Ti, he nakai toka e tau mena nei ke fakalolelole aki a tautolu, kua lata ia tautolu ke manatu na talia he Atua e tau laliaga mo e tau poa ha tautolu he ‘fakalata ke he tau mena ha ha ia tautolu, nakai fakalata ke he tau mena nakai ha ha ia tautolu.’ (2 Korinito 8:12) Moli, kua finagalo a Iehova ki a tautolu ke fekafekau ki a ia mo e solu katoatoa, he taute e tau mena ne fakaata he tau tutuaga ha tautolu. (Kolose 3:23) He magaaho ka fakamoli mo e fakamakamaka a tautolu ke taute e tau mena kua fahia ki ai a tautolu he fekafekauaga hana, kua fakamonuina fakalahi he Atua a tautolu.—Tau Fakatai 10:22.
Tamai he Amaamanakiaga e Tau Monuina
20. He mataala ke he heigoa ne kua lata ke lagomatai a tautolu ke fakatata e amaamanakiaga tuga ha Mika?
20 Ha kua ha ha ia tautolu e monuina ha Iehova ati omoi ai a tautolu ke fifitaki e agaga ha Mika. Ne fakapuloa e ia: “To amaamanaki au ke he Atua he haku a fakamouiaga.” (Mika 7:7) Matutaki fefe e tau kupu nei ke he feoaki loto holoilalo ha tautolu mo e Atua? He moua e amaamanakiaga, po ke fakauka, ka lagomatai a tautolu ke kalo mai he fakalolelole he nakaila hoko mai e aho a Iehova. (Tau Fakatai 13:12) Moli ni, kua manako lahi a tautolu ke fakaotioti e lalolagi kelea nei. Ka e, ke he tau fahitapu oti kua totou afe e tau tagata ne hane kamata laia ke feoaki mo e Atua. He iloa e mena ia kua foaki ki a tautolu e kakano ke fakakite e amaamanakiaga. Ne talahau he taha Fakamoli ne kua leva hagaao ke he mena nei: “He liu onoono ki tua ke molea e 55 e tau tau he gahua fakamatala, ne mauokafua lahi au kua nakai galo ha mena haku he amaamanaki au ki a Iehova. Ke he taha fahi, kua tokanoa mai au he tau mamahi loga.” Kua moua nakai e koe taha logonaaga pihia?
21, 22. Puhala fe ne hane fakamoli a Mika 7:14 he vaha ha tautolu?
21 He feoaki mo Iehova kua aoga moli ai ma tautolu. He totou e tautolu ia Mika 7:14, ne fakatatai e Mika e tau tagata he Atua ke he tau mamoe ne nonofo haohao mitaki mo e tau leveki ha lautolu. Ke he fakamoliaga lahi he perofetaaga ia he vaha nei, kua moua e lautolu ne toe he Isaraela fakaagaga ti pihia foki he ‘tau mamoe kehe’ e haohao mitaki mo e ha lautolu a Leveki fakamoli, ko Iehova. Ne nonofo na lautolu “hoko lautolu ke he vao,” he vevehe fakaagaga mai he lalolagi ne tupu ki mua e matematekelea mo e hagahagakelea nei.—Ioane 10:16; Teutaronome 33:28; Ieremia 49:31; Kalatia 6:16.
22 Ne olioli he tau tagata ha Iehova e mahuiga, tuga ne talahau tuai foki ia Mika 7:14. He vagahau hagaao ke he tau mamoe, po ke tau tagata, ha Iehova, ne talahau e Mika: “Kia fagai ai a lautolu i Vasana mo Kiliata.” Ke tuga e tau mamoe i Vasana mo Kiliata ne fagai ke he tau fonua talumelie mo e hagahaga mitaki, ti ko e tau tagata he Atua he vaha nei kua olioli ke he mahuiga fakaagaga—ko e taha fakamonuinaaga a ia ma lautolu ne feoaki loto holoilalo mo e Atua.—Numera 32:1; Teutaronome 32:14.
23. Ko e heigoa ka ako mai e tautolu he kikite atu ki a Mika 7:18, 19?
23 Ia Mika 7:18, 19, ne fakakite he perofeta e manako a Iehova ke fakamagalo a lautolu ne tokihala. Ne talahau he Mika 7 kupu 18 hane “fakamagalo [e Iehova] e tau mahani kelea” mo e “nakai manatu ke he tau holifono.” Hagaao ke he Mika 7 kupu 19, “to liti foki e ia e tau hala oti ha lautolu ke he tau mena hokulo he tahi.” Ko e heigoa taha fakaakoaga ka futia mai e tautolu he mena nei? Liga ke huhu hifo a tautolu kua fifitaki nakai e tautolu a Iehova ke he puhala nei. Kua fakamagalo nakai e tautolu e tau mahani kelea ne liga taute he falu ki a tautolu? Ka tokihala a lautolu pihia mo e kumi ke taute e mafola, kua lata moli ni ia tautolu ke fakaata e fakamakai ha Iehova ke fakamagalo katoatoa mo e tukulagi.
24. Puhala fe ne kua aoga mai a koe he perofetaaga ha Mika?
24 Kua moua fefe e tautolu e aoga mai he kikiteaga nei ke he perofetaaga ha Mika? Kua fakamanatu mai ki a tautolu na foaki e Iehova e amaamanakiaga moli ki a lautolu ne futiaki ki a ia. (Mika 2:1-13) Kua fakamafana ki a tautolu ke taute e tau mena ne fahia ki ai ke fakatolomaki e tapuaki moli ke maeke ia tautolu ke feoaki tukulagi ke he higoa he Atua. (Mika 4:1-5) Ti kua fakamafana ki a tautolu kua maeke ia tautolu ke fakafeleveia e tau poakiaga a Iehova pete ko e heigoa ni e tau tutuaga ha tautolu. E, kua fakamalolo moli he perofetaaga ha Mika a tautolu ke feoaki ke he higoa a Iehova.
To Tali Fefe e Koe?
• Hagaao ki a Mika 6:8, ko e heigoa ne finagalo mai a Iehova ki a tautolu?
• Ko e heigoa kua lata kaeke ke ‘taute [e tautolu] e mena hako’?
• Maeke fefe ia tautolu ke fakakite kua “fiafia [a tautolu] ke he fakaalofa”?
• Kua kaputia ke he heigoa e ‘feoaki mo e Atua mo e loto holoilalo’?
[Tau Huhu he Fakaakoaga]
[Tau Fakatino he lau 15]
Pete ni ko e tau tutuaga he vaha hana, ne moui fakatatai a Mika ke he tau poakiaga a Iehova. Ti maeke foki ia koe
[Fakatino he lau 17]
Fakagahuahua e fakafili tonu he fakamatala ke he tau tagata he tau feakiaga oti he moui
[Tau Fakatino he lau 17]
Kia fakakite e fiafia ke he fakaalofa he fakafeleveia e tau manako he falu
[Fakatino he lau 17]
Taute e tau mena ne fahia a koe ki ai he mailoga e tau kukuaga hau