Ne Fiafia a Ia ke he Fakaalofa
Ne Fiafia a Ia ke he Fakaalofa
KO MILTON G. HENSCHEL, ko e tagata kua leva he Kau Fakatufono he Tau Fakamoli a Iehova, ne fakahiku e moui hana he lalolagi he Aho Faiumu, Mati 22, 2003. Kua 82 e tau tau hana he moui.
He vaha fuata, ne matutaki atu a Milton Henschel ki a lautolu ne gahua he matapatuaga he Tau Fakamoli a Iehova mo e fekafekau tua fakamoli ke molea e 60 e tau tau. Kua talahaua mafiti a ia ha ko e hana lotomatala mo e fiafia moli ke he gahua fakamatala he Kautu. He 1939 ne eke a ia mo tohikupu ki a N. H. Knorr, ko e tagata leveki he magaaho ia he fahi gahua lomi i Brooklyn, he Tau Fakamoli a Iehova. He kamata e Matakainaga Knorr ke takitaki e Tau Fakamoli he lalolagi katoa he 1942, ne toka e ia e Matakainaga Henschel mo hagai hana. Ne mau a Matakainaga Henschel mo Lucille Bennett he 1956, mo e fakalataha tokoua a laua ke he tau fiafia mo e tau paleko he moui.
Ne gahua tokoua a Matakainaga Henschel mo Matakainaga Knorr ato mate a Knorr he 1977. He fakalataha tumau mo Matakainaga Knorr, ne fenoga a Matakainaga Henschel ke molea e 150 e motu, he ahiahi mo e fakamafana e Tau Fakamoli a Iehova he lalolagi, mua atu ke he tau misionare mo lautolu i loto he tau la ofisa. Ko e tau fenoga ia kua mategugu he falu magaaho, ti hagahagakelea foki. He 1963, he magaaho ne o ke he fonoaga i Liperia, ne matematekelea e Matakainaga Henschel ke he favale kelea lahi he nakai manako ke fakalataha ke he tau matagahua fakahakehake motu. * He nakai matakutaku, ne liu a Matakainaga Henschel ki Liperia he gahoa laia e tau mahina he mole ke feleveia mo e pelesiteni he motu mo e ole ke moua e tokanoaaga lahi ma e tapuakiaga he Tau Fakamoli a Iehova i ai.
He fakafehagai ke he tau lekua mo e tau paleko uka, ne kua talahaua lahi ai a Matakainaga Henschel ha kua loto lagomatai, mautali tumau, mo e lotomatala. Ne nava lahi he tau hoa gahua hana e hana maopoopo, hana mahani holoilalo, mo e aga feki hana. Ha kua moua e manamanatuaga mitaki lahi, ne fakafiafia e ia e tau misionare he lalolagi aki e iloilo mafiti hana ke iloa e tau higoa ha lautolu, taha po ke ua e alaga kupu he vagahau he motu, fakalataha mo e tau kupu fakafiafia—ne talahau e ia mo e mamali.
Ne fakamanatu mai a Mika 6:8 ki a tautolu kua manako a Iehova ko e Atua ke “fiafia [a tautolu] ke he fakaalofa.” Ti to manatu ai a Milton Henschel he fakatokatoka e fakafifitakiaga mitaki ke he puhala ia. Pete ko e matagahua mamafa hana, ne tumau a ia ke fiafia tagata, mahani molu, mo e totonu. Kua fiafia a ia ke talahau, “He magaaho ka fakauaua ai, kia manatu ko e mena totonu ko e mena hako a ia.” Pete kua momoko a tautolu ke he galo he matakainaga fakahelehele nei, kua olioli a tautolu he fakauka a ia ke he fakahikuaga, mauokafua ai ke moua e palepale hana, ko e “foufou he moui.”—Fakakiteaga 2:10.
[Matahui Tala]
^ para. 4 Kikite e 1977 Yearbook of Jehovah’s Witnesses, tau lau tohi 171-7.
[Fakatino he lau 20]
M. G. Henschel mo N. H. Knorr
[Fakatino he lau 20]
Mo e hoana hana, ko Lucille