Fakalava Faka-Atua​—Ko e Heigoa ka Amanaki a Tautolu ki Ai?

HE SENETENARI valu aki F.V.N., ko e Patuiki ko Hesekia i Iuta ne 39 e tau he moui ne iloa kua moua e ia e gagao ke he mate. Ne tupetupe lahi ha ko e tala ia, ne kumi atu a Hesekia ke he Atua he liogi ke fakamaulu a ia. Ne tali atu e Atua puhala he perofeta hana: “Kua fanogonogo atu au ke he hau a liogi, kua kitia e au hau a tau hihina mata; kitiala, to lafilafi atu e au ke he tau aho he moui hau hogofulu ma lima e tau.”—Isaia 38:1-5.

Ko e ha ne fakalava mai e Atua ke he magaaho pauaki? He tau senetenari fakamua atu, ne mavehe e Atua ke he patuiki tututonu ko Tavita: “To fakamau e au e magafaoa hau mo e hau a kautu ke tukulagi ki mua hau; to tumau tukulagi hau a nofoaiki.” Ne fakakite foki he Atua  ko e Mesia ka fanau mai he mataohi ha Tavita. (2 Samuela 7:16; Salamo 89:20, 26-29; Isaia 11:1) He magaaho ne gagao ai a Hesekia, ne nakai la fai tama tane ia a ia. Ti, fakahagahagakelea ai e mataohi patuiki faka-Tavita neke galo. Ko e fakalava mai faka-Atua ke he mena ne tupu ki a Hesekia ne eke mo kakano pauaki he fakahao e mataohi kua takitaki atu ke he Mesia.

Ke fakamoli e tau maveheaga hana, ne omoomoi a Iehova ke fakalava mai ke lata mo e tau tagata hana ke he loga he tau magaaho ke he vaha fakamua ato vaha Kerisiano. Ne fakapuloa e Mose hagaao ke he fakahaoaga ha Isaraela mai he tupaaga i Aikupito: “Ko e fakaalofa ni a Iehova kia mutolu, mo e hana taofi foki ke he omonuo ne omonuo ai a ia ke he ha mutolu a tau matua, kua ta mai ai e Iehova a mutolu mo e lima malolo.”—Teutaronome 7:8.

He senetenari fakamua, ko e fakalava faka-Atua ne taute ai foki ke fakalaulahi e tau amaamanakiaga he Atua. Ma e fakatai, ke he puhala tu ki Tamaseko, ko e Iutaia ne higoa ko Saulo ne moua e fakakiteaga fakamana ke taofi a ia mai he favale ke he tau tutaki he Keriso. Ko e liliuaga he tagata nei, he eke ko e aposetolo ko Paulo, ne taute e gahua aoga he fakapuloa atu e tala mitaki ke he tau motu oti.—Gahua 9:1-16; Roma 11:13.

Fa Mahani Kia e Fakalava Mai?

Ko e fakalava faka-Atua kia ko e mena pauaki po ke mena talia noa? Kua fakakite fakamahino he tau Tohiaga Tapu nakai ko e mena fa mahani. Pete he fakahao he Atua e tau fuata Heperu tokotolu mai he tamateaga i loto he gutuumu puho he afi mo e ko e perofeta ko Tanielu mai he ana leona, ne nakai fai mena ne taute e ia ke fakahao aki e falu perofeta mai he mamate. (2 Nofoaga he Tau Patuiki 24:20, 21; Tanielu 3:21-27;  6:16-22; Heperu 11:37) Kua fakahao fakamana a Peteru mai he fale pouli ne fakahala ai e Herota Akeripa I a ia. Ka e, ko e patuiki taha nei ne fakahoko foki e tamate ke he aposetolo ko Iakopo, ti nakai fakalava mai e Atua ke taofi e kolokolovao nei. (Gahua 12:1-11) He foaki he Atua ke he tau aposetolo e malolo ke fakamaulu e tau tagata gagao mo e fakaliu tu mai e tau tagata mamate, ne nakai amanaki a ia ke utakehe e “mena mahukihuki ke he tino” ne fakamamahi e aposetolo ko Paulo, na kua eke mo gagao he tino.—2 Korinito 12:7-9; Gahua 9:32-41; 1 Korinito 12:28.

Ne nakai fakalava mai e Atua ke puipui e tau favaleaga ne hoko ke he tau tutaki he Keriso mai he Pule Atu Motu Roma ko Nero. Ne fakakikiveka e tau Kerisiano, tugi moui, mo e tolo ke he tau manu vale. Pete ia, ko e totokoaga nei ne nakai ofo e tau Kerisiano fakamua, ti nakai fakalolelole moli e tua ha lautolu na fai Atua. Mole ia, ne hataki e Iesu hana tau tutaki to uta a lautolu ke tutu ki mua he tau fakafiliaga ti kua lata ia lautolu ke mau amaamanaki ke matematekelea mo e ke mamate foki ha ko e tua ha lautolu.—Mataio 10:17-22.

Tuga ni he taute e ia i tuai, he vaha nei kua maeke moli he Atua ke fakahao hana tau fekafekau mai he tau tutuaga hagahagakelea, mo lautolu ne logona nukua aoga hana puipuiaga ki a lautolu, ne nakai tuhituhi ki ai. Pete ia, kua uka ke talahau katoatoa ko e mena maeke po ke nakai maeke he Atua ke fakalava mai ke he tau mena tutupu pihia. Tokologa e tau fekafekau tua fakamoli ha Iehova ne pakia ha ko e tafukefuke i Toulouse, ti totou afe e tau Kerisiano tua fakamoli ne mamate he tau kemuaga pagota Kominisi mo e Nasi po ke i lalo he falu tutuaga kelea ka e nakai fakalava mai e Atua ke taofi ai. Ko e ha ne nakai fakalava fakapapahi e Atua ke lata mo lautolu oti kua ha ha ai e taliaaga hana?—Tanielu 3:17, 18.

“Vaha mo e Tau Mena Tutupu”

Ka tupu ai e matematekelea, maeke he ha tagata ke lauia ai, ti ko e tua fakamoli ke he Atua ko e omoomoiaga he fakahikuaga haia. He tafukefuke i Toulouse, ne hao ai a Alain mo Liliane, ne 30 e tagata ne mamate mo e totou teau ne pakia, pete ni nakai ko e hepe ha lautolu. Ke he fakatokaaga lahi, totou hogofulu afe e tau tagata ne lauia noa he kolokolovao, fakaholo fakahanoa, po ke tau felakutaki, ti nakai lago ke he Atua e matematekelea nei kua tupu ki a lautolu. Kua fakamanatu mai he Tohi Tapu ki a tautolu ko e “vaha mo e tau mena ke tutupu ai kua hoko” ke he tau tagata oti.—Fakamatalaaga 9:11.

Mua atu foki, kua lauia e tau tagata he gagao, fuakau, mo e mate. Pete he manamanatu foki e falu na fakahao fakamana he Atua e tau momoui ha lautolu po ke fakalilifu ki a ia ha ko e malolo fakalutukia mai he tau tatalu ha lautolu ne fakahiku ni ke mamate. Ko e utakehe he gagao mo e mate mo e ‘holoholo kehe he tau hihina mata oti’ mai he tau mata he tau tagata kua fakatoka mai agaia i mua.—Fakakiteaga 21:1-4.

Ma e mena ia ke tupu, ha i ai e taha mena kua mua atu mo e malolo he fakalava mai ke he tau magaaho kua lata. Kua tutala e Tohi Tapu ke he magaaho ne fakahigoa “[ko] e aho lahi a Iehova.” (Sefanaia 1:14) Ke he fakalavaaga laulahi nei, to utakehe he Atua e tau mena kelea oti kana. To foaki ke he tau tagata e magaaho ke momoui tukulagi ke he tau tutuaga mitaki katoatoa, nukua “nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17) To liuaki mai foki e tau tagata mamate ke he moui, ti utakehe e tau matematekelea oti kana mua ue atu he tau tagata. (Ioane 5:28, 29) He fakaalofa mo e mahani mitaki katoatoa he Atua ka maeke ke fakamafola tukumalagi mogoia e tau lekua he tagata.

Puhala ne Fakalava Mai e Atua he Vaha Nei

Nakai kakano e mena nei, kua kehe e onoonoaga he Atua mogonei ka e hane mamahi e  tufugatiaaga. He vaha nei, kua fakatoka mai he Atua ke he tau tagata oti kana, pete ni ha lautolu a tupu maiaga fakamatakau po ke fakalatahaaga, ko e magaaho ke iloa fakahaga a ia mo e he feaki e fakafetuiaga fakatagata mo ia. (1 Timoteo 2:3, 4) Ne fakamaama e Iesu e fakatokaaga nei ke he tau kupu nei: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Kua futia he Atua e tau tagata loto fakamoli ki a ia he puhala he fekau he Kautu ne fakailoa he tau fekafekau hana he lalolagi katoa.

Lafi ki ai, kua fai mena ne taute pauaki he Atua ke he tau momoui ha lautolu kua makai ke takitaki e ia. Mai he agaga tapu hana, kua ‘vevete he Atua ha lautolu a tau loto’ ke maama hana finagalo mo e fakagahua e mena kua manako a ia ki ai. (Gahua 16:14) E, he foaki e magaaho ke iloa fakahaga a ia, hana Kupu, mo e hana tau finagalo, kua foaki he Atua e fakamoliaga he hana fakaalofa moli ke he tau tagata takitaha mo tautolu oti.—Ioane 17:3.

Fakahiku ai, kua lagomatai he Atua hana tau fekafekau he vaha nei, nakai he fakahao fakamana a lautolu, ka e foaki ki a lautolu e agaga tapu mo e “lahi ue atu he malolo” ke fahia mai he ha tuaga kua fehagai mo lautolu. (2 Korinito 4:7) Ne tohi he aposetolo ko Paulo: “Kua maeke ia au e tau mena oti kana ke he fakamalolo mai a [Iehova ko e Atua] kia au.”—Filipi 4:13.

Ha ha ia tautolu e tau kakano oti ke fakaaue ke he Atua he tau aho takitaha ma e moui mo e ma e amaamanakiaga kua foaki e ia ki a tautolu he momoui tukulagi ke he lalolagi nakai fai matematekelea. “Ko [e] heigoa taha mena ke taui aki e au a Iehova he hana mahani mitaki mai oti kana kia au[?]” he huhu he salamo. “To toto hake e au e kapiniu he fakamouiaga, mo e ui atu au ke he higoa a Iehova.” (Salamo 116:12, 13) Ko e totou tumau he mekasini nei ka lagomatai a koe ke maama e mena kua taute, hane taute, mo e to taute he Atua nukua maeke ke tamai ki a koe e fiafia lahi mogonei mo e amaamanakiaga mauokafua ma e vaha anoiha.—1 Timoteo 4:8.

[Blurb he lau 6]

“Nakai tuai manatu ke he tau mena fakamua, ti nakai hake ai ke he loto e tau mena ia.”—Isaia 65:17

[Tau Fakatino he lau 5]

Ke he tau vaha faka-Tohi Tapu, ne nakai puipui e Iehova a Sakaria he pini maka . . .

po ke tamate e Herota e tau tagata noa

[Fakatino he lau 7]

Kua tata mai e magaaho ke nakai liu fai matematekelea; mo e to liu momoui e tau tagata mamate