Ko e Tala ne Omoi e Tua mo e Fakamanavalahi​—Tau Fakamoli a Iehova i Ukaraine

TUGA he fakafita e tau Kerisiano he senetenari fakamua ke he favaleaga, kua pihia foki e tau tagata he Atua he vaha nei. (Mataio 10:22; Ioane 15:20) Kua nakai loga e motu ne mahomo atu e hololoa po ke mua atu e favaleaga ke tuga i Ukaraine, matakavi ne pa ai e gahua fakamatala he Kautu ke 52 e tau tau.

Kua talahau mai he 2002 Yearbook of Jehovah’s Witnesses e tala hagaao ke he tau tagata he Atua he motu ia. Ko e tala hagaao ke he tua, fakamanavalahi, mo e fakamalolo ki mua he matematekelea velagia. Mui mai ko e falu talahauaga nava lahi ne moua ke he la ofisa he Tau Fakamoli a Iehova i Ukaraine:

“Kua oti tuai e 2002 Yearbook he totou e au. Kua eke ni au ke tagi he totou au hagaao ke he tau gahua ha mutolu i Ukaraine. Ti manako au ke talaatu ki a mutolu e mafanatia lahi ne moua e au mai he ha mutolu a fakafifitakiaga makai mo e tua malolo. Kua matalahi au he eke mo tagata he magafaoa fakaagaga taha ia ni tuga ha mutolu. Kia fakaaue tulutulou atu mai he haku a loto katoa!”—Andrée, Falani.

“Nakai fai kupu ke fakamaama e lahi he oue tulou haku ki a mutolu mo e ki a Iehova ma e 2002 Yearbook. Kua tafe hifo e tau hihina mata he fofoga haku he totou e au e tau fakafitaaga loga he tau matakainaga, ne fakaaoga e tau tau mitaki lahi ha lautolu i loto he tau fale puipui mo e tau kemuaga pagota. Nava lahi ai au ke he ha lautolu a fakamanavalahi. Pete ni ko e Fakamoli au ke he 27 e tau tau, kua lata agaia au ke ako mai he tau matakainaga ia. Kua fakamalolo e lautolu e tua haku ke he ha tautolu a Matua he lagi, ko Iehova.”​—Vera, Iukosalavia fakamua.

“Hane tohitohi atu au mo e fiafia ha ko e fakafifitakiaga mitaki ha mutolu ke he fakauka mo e tua fakamoli, he magahala he tau tau loga ia he totokoaga. Kia foaki ki a mutolu e lilifu ha ko e ha mutolu a mauokafua katoatoa ki a Iehova mo e ha mutolu a fifiliaga ke fakatumau ke tua fakamoli. Ke lafi ki ai, ko e ha mutolu a loto fakatokolalo ki mua he tau kamatamata kua fakamalolo e talitonu haku na nakai tiaki e Iehova e tau tagata hana. Ha ko e fakafifitakiaga mitaki ha mutolu ke he fakamanavalahi, tu mauoka, mo e fakamakamaka, kua mukamuka ai ia mautolu ke talia e tau tama lekua ikiiki ha mautolu.”​—Tuteirihia, Falani Polenisia.

“He oti katoa e Yearbook he totou, kua eke ni au ke tohi atu ki a mutolu. Kua aamotia lahi au he tau fakafitaaga mafanatia oti. Ti logona e au e matalahi he eke mo tagata he fakatokatokaaga fakamoli mo e kaufakalataha pihia, ne kua takitaki he Matua mokoina mo e leveki mai, ko ia ne foaki ki a tautolu e malolo he magaaho tonu. Ti momoko au he kua tokologa e tau fekafekau fulufuluola ha Iehova ne lahi e matematekelea mo e kua galo foki ha lautolu a tau momoui. Ka kua logona foki e au e fiafia ha ko e fakamanavalahi mo e makai ha lautolu, ti tokologa e tau tagata ne ako e kupu moli mo e o mai ke iloa e Matua fakaalofa ha tautolu.”—Colette, Netelani.

“Kua manako lahi e hoana haku mo au ke tohi atu ki a mutolu ke talaatu kua aamotia e tau loto ha maua he totou e maua e fakamauaga hagaao ki Ukaraine i loto he Yearbook. Kua fakatoka hifo e mutolu ma tau matakainaga tua fakamoli e fakafifitakiaga mahinohino he fakauka i lalo he tuaga uka mo e hololoa. Ti he fakatatai  mo e tau kupu ia Tau Fakatai 27:11, ko e fiafia ha ia ha Iehova ke iloa kua tokologa e tau matakainaga tua fakamoli mai i Ukaraine ne fakatumau e mahani fakamoli mauniva pete ko e tau gahua kelea loga he Tiapolo.”—Alan, Ausetalia.

“Kua ha ha ai e tau hihinamata he fofoga haku he magaaho ne totou au hagaao ke he tau matakainaga i Ukaraine. Kua fakauka a lautolu ke he tau mena loga—ko e tau tau loga he tau fale puipui, tau fakakikiveka, ekefakakelea, mo e mavehevehe mai he magafaoa. Kua manako au ke tala age ke he tau matakainaga ne fekafekau agaia i loto he ha mutolu a fakapotopotoaga kua ofania mo e fakalilifu lahi au ki a lautolu. Kua fiafia lahi ni au ke he fakamanavalahi mo e tu mauoka ha lautolu. Ti iloa e au e punaaga he ha lautolu a malolo, ko e agaga a Iehova. Kua tata mai a Iehova ki a tautolu, mo e manako a ia ke lagomatai a tautolu.”—Sergei, Rusia.

“Ne totou e au e 2002 Yearbook, ti tagi au. Kua tokologa e tau matakainaga i loto he fakapotopotoaga ha mautolu ne tutala hagaao ki a mutolu. Ko e tau koloa tokiofa moli a mutolu. Kua fiafia lahi au ke eke mo vala he magafaoa fakaagaga lahi pihia.”—Yeunhee, Korea Toga.

“Kua omoi lahi au he ha mutolu a fakamauaga he tua, fakauka, mo e fakaalofa ue atu ma Iehova mo e hana Kautu. Falu magaaho kua pokia ia mautolu ke loto fakaaue ke he tokanoaaga ne moua e mautolu mo e tau mena kai fakaagaga loga ne foaki e Iehova ma mautolu. Pete ia, kua nakai pihia a mutolu. Kua lagomatai he fakafifitakiaga ha mutolu a mautolu ke mailoga kaeke tata e fakafetuiaga ha tautolu mo e Atua, to foaki mai e ia e malolo ki a tautolu ke fehagai mo e tau kamatamata loga.”—Paulo, Parasili.

“Kua monuina au ke totou hagaao ke he tau fakafitaaga ha mutolu i loto he 2002 Yearbook. Kua omoi lahi he tau fakafitaaga ia a au, mua atu ke he fakafitaaga aamotia he Matakainaga Fifine ko Lydia Kurdas. Ne logona e au e tata he fakaveaga mo e matakainaga nei.”—Nidia, Costa Rica.

“He aho nei kua oti e 2002 Yearbook he totou e au. He totou ai e au, kua fakamalolo e tua haku ki a Iehova. Ti taha e mena ka nakai nimo e au ko e fakamauaga ke he magaaho ne to e tau tega he fakauaua hagaao ki a lautolu ne takitaki. Kua fakaako mai ki a au ke nakai fakauaua ke he tau matakainaga tane ne takitaki. Kia fakaaue lahi mahaki! Ko e mena kai fakaagaga nei kua mitaki lahi ma e loto mo e tauteute a tautolu ma e magaaho ka liga tuku e tua ha tautolu ke he kamatamata.”—Leticia, Tau Fahi Kaufakalataha.

“Kua fakaaue tulutulou a mautolu ma e Yearbook mitaki lahi. Kua tokologa e tau tagata fakailoa ne totou laia hagaao ke he gahua he tau matakainaga ha tautolu i Ukaraine. Kua fakamalolo ai e tau matakainaga hinei. Ati tokologa ai, mahomo ke he tau fuata, ne kua fakamalikiti hake e tau gahua fekafekau ha lautolu. Ko e falu kua kamata ke fekafekau ko e tau paionia gahua mau po ke fakaku. Kua fakamafana a lautolu oti he tau tala he tau matakainaga ne fekafekau ki a Iehova he magahala ne pa e gahua fakamatala.”—Ko e taha komiti fekafekau he fakapotopotoaga i Ukaraine.

Ko e tua fakamoli he tau matakainaga ha tautolu i Ukaraine kua eke moli mo punaaga he mafanatia ke he tau tagata ha Iehova he lalolagi katoa. Ko e moli, he totou tumau e tau fakamauaga fakamafana loto ne kitia i loto he Yearbook he tau tau takitaha ko e puhala mitaki ke fakamalolo aki ha tautolu a tua ke he tau magaaho uhouho nei.—Heperu 12:1.