Fai Tagata Nakai ka Falanaki ki Ai?
Fai Tagata Nakai ka Falanaki ki Ai?
HE MOLE e malolo hifo e Kaupa a Berlin he 1989, ne loga e tau mena galo ne kitia ai. Ma e fakatai, ne moua e Lydia * he fakatufono Socialist i Sihamani Uta, ko e Stasi, po ke State Security Service, ne ha ha ai e fakamauaga ke he tau matagahua he moui fakatagata hana. Pete kua ofo a Lydia ke logona e fakamauaga, ne ofomate a ia ke iloa e tagata ne foaki ke he Stasi e tau vala tala—ko e tane hana. Kua afokau he taha tagata a ia nukua ha ha ia ia e falanaki katoatoa ki ai.
Ko Robert e fuakau tane totonu ne onoono ke he ekekafo hana mo e “fakalilifu, nava mo e falanaki lahi mahaki,” he hokotaki he The Times i London. Ne talahau hagaao ke he ekekafo kua “totonu mo e mahani fakaalofa.” Ti mate fakaofo a Robert. Ko e oho e ate po ke stroke kia? Nakai. Kua talahau fakahiku he tau pule ko e mena ahi atu e ekekafo ki a Robert he kaina hana ti, huki mate e ia a ia ka e nakai iloa e Robert mo e magafaoa hana. Ne kelipopo ai a Robert he tagata ne falanaki katoatoa a ia ki ai.
Ne matematekelea tokoua a Lydia mo Robert ha ko e mafenu he falanaki, ne fakahiku ke he hagahagakelea makimaki. Ke he falu mena tutupu kua nakai hagahagakelea lahi. Moha ia, he fakahogohogomanava he tagata kua falanaki a tautolu ki ai ko e mena nakai kehe. Ko e hokotaki ne fakailoa he takitaki Sihamani ne fakatokatoka tohi vili, ko Allensbacher Jahrbuch der Demoskopie 1998-2002, ne fakakite he taha kumikumiaga ko e 86 e pasene ha lautolu ne talitonu na fakatolalo he taha tagata kua falanaki a lautolu ki ai. Liga fai mena pihia ne tupu ki a koe. Ko e mena ia, kia nakai ofo a tautolu ke he mena ne hokotaki he nusipepa Swiss ko e Neue Zürcher Zeitung he 2002 “ke he tau motu pisinisi he Fahi Uta, ko e tau fakafetuiaga he fefalanakiaki nukua leva vaha kehe e galo.”
Feaki Fakatekiteki, Mafiti ke Malona
Ko e heigoa e falanaki? Hagaao ke he taha tohi fakamaama kupu, ke falanaki ke he falu kua kakano ke “talitonu kua falanaki mo e fakamoli a lautolu mo e to nakai taute pauaki e lautolu ha mena ke fakamamahi aki a koe.” Ko e falanaki kua feaki fakatekiteki ka e maeke ke mafiti e galo. Mo e tokologa ne maama kua taute fakakelea e falanaki ha lautolu, ti kua ofo kia kua fakauaua e tau tagata ke falanaki ke he falu? Hagaao ke he kumikumiaga ne tohi fakailoa i Sihamani he 2002, “tokogahoa e 1 mai he 3 e fuata ne fai fakaveaga he falanaki ke he falu tagata.”
Liga huhu hifo ni ki a tautolu: ‘Maeke moli nakai ia tautolu ke falanaki ha tagata? Kua uho kia ke falanaki a tautolu ke he taha tagata ne tuga kua maeke ke fakatolalo a tautolu?’
[Matahui Tala]
^ para. 2 Hiki tuai e tau higoa.
[Blurb he lau 3]
Ne fakakite he taha kumikumiaga ko e 86 e pasene ha lautolu ne talitonu na fakatolalo he taha tagata ne kua falanaki a lautolu ki ai