Tau Fifine Kerisiano Tua Fakamoli​—Tau Tagata Tapuaki Uho he Atua

“Ko e fulufuluola ko e fakavai haia, ko e tino mitaki ko e mena fakateaga haia; ka ko e fifine kua matakutaku kia Iehova, to fakaheke atu ni kia ia.”—TAU FAKATAI 31:30.

1. Fefe e onoonoaga ha Iehova ke he fulufuluola he fakatatai ke he onoonoaga he lalolagi?

KUA aoga lahi ke he lalolagi e foliga he tino, mua atu ke he tau fifine. Ka ko Iehova kua matapatu e fiafia ke he tagata i loto, kua mahomo atu e fulufuluola lahi he motua fakahaga e tagata. (Tau Fakatai 16:31) Ti, kua tomatoma he Tohi Tapu ke he tau fifine: “Aua neke eke ha lautolu a tauteaga ke he tino, ko e fili he lauulu ia, mo e taute ke he auro, mo e fakatapulu ke he tau tapulu; ka ko e tagata galo he loto, kia taute a ia ke he mena nakai tuai popo, ko e loto mahani molu mo e mafola, ko e koloa uho haia ki mua he Atua.”—1 Peteru 3:3, 4.

2, 3. Fakalaulahi atu fefe he tau fifine e tala mitaki he senetenari fakamua, ti talahau tuai fefe e mena nei?

² Ko e aga nava-fakaheke a ia ne fakakite he tokologa he tau fifine ne talahau he Tohi Tapu. He senetenari fakamua, falu ia lautolu nei ne monuina ke talahau hagaao ki a Iesu mo e hana tau aposetolo. (Luka 8:1-3) Fakamui, ne eke e tau fifine Kerisiano mo tau tagata fakamatala makai; kua foaki he falu e lalago aoga ke he tau tagata tane Kerisiano ne takitaki, putoia ai e aposetolo ko Paulo; ti fakakite he falu e mahani fakamokoi mitaki lahi, he fakaata foki ha lautolu a tau kaina ma e tau feleveiaaga he fakapotopotoaga.

³ Ko e mena ia na fakaaoga e Iehova e tau fifine ke he puhala malolo he fakagahua hana finagalo ne talahau tuai he tau Tohiaga Tapu. Tuga anei, ia Ioelu 2:28, 29 ne talahau tuai mai ko e tau tagata tane mo e fifine, ikiiki mo e fuakau, ka moua e agaga tapu mo e folafola e tala mitaki he Kautu. Kua kamata e perofetaaga ia ke fakamoli he Penetekoso 33 V.N. (Gahua 2:1-4, 16-18) Ko e falu he tau fifine ne fakauku he agaga ne foaki fakamana e tau mena fakaalofa ki ai, tuga e mena fakaalofa he perofetaaga. (Gahua 21:8, 9) Ha ko e ha lautolu a makai he fekafekauaga, ko e kautau fakaagaga makimaki nei he tau matakainaga fifine tua fakamoli ne lafi ke he tupu lahi he faka-Kerisiano he senetenari fakamua. Moli, kavi ke he 60 V.N., ne tohi he aposetolo ko Paulo ko e tala mitaki ne “fakamatala atu ke he tau tagata oti ke he lalolagi.”—Kolose 1:23.

 Nava ma e ha Lautolu a Malolo, Makai, mo e Fakamokoi

4. Ko e ha ne ha ha ia Paulo e kakano mitaki ke nava ke he falu fifine he fakapotopotoaga Kerisiano he senetenari fakamua?

⁴ Ko e aposetolo ko Paulo, ma e fakatai, ne loto fakaaue ke he fekafekauaga ne taute he falu fifine pauaki—tuga ni e tau leveki Kerisiano he vaha nei ne aoga ke he fekafekauaga ne taute he tau fifine fakamakai. Ha ha i ai e tau fifine ne tokutoku e Paulo ke he tau higoa ko “Tufaina, mo Tufosa, ko e na fifine kua gahua ke he gahua he Iki,” mo “Peresita kua fakahele, ko ia ne gahua fakalahi ke he gahua he Iki.” (Roma 16:12) Ko Evotia mo Sunetuke, ne tohi e Paulo, nukua “fakamakamaka fakalataha mo [ia] ke he tala mitaki.” (Filipi 4:2, 3) Ko Pisila, fakalataha mo e tane hana, ko Akula, ne fekafekau fakalataha mo Paulo. Ko ia mo Akula, “ne tuku hifo ha laua a na ua ke hukui aki” foki a Paulo, ati omoi a ia ke tohi: “Nakai ko au hokoau kua fakaaue atu kia laua, ka e katoa foki mo e tau ekalesia oti kana ke he tau motu kehe.”—Roma 16:3, 4; Gahua 18:2.

5, 6. Ko e heigoa e tau puhala ne fakatoka e Pisila e fakafifitakiaga mitaki ma e tau matakainaga fifine he vaha nei?

⁵ Ko e heigoa ne lafi ke he makai mo e fakamalolo ha Pisila? Ko e lagomataiaga kua moua ia Gahua 18:24-26, ne totou e tautolu kua lalago e ia hana tane he lagomatai a Apolo, ko e tagata lauga lotomatala, ne fakakite fou e kupu moli ki ai. Moli ai, ko Pisila ko e tagata fakaako mitaki he Kupu he Atua mo e he fakaakoaga he tau aposetolo. Ti ko e fua, ne feaki e ia e tau mahani mitaki lahi ne taute a ia ke uho ke he Atua mo e ke he hana tane mo e ko e tagata aoga he fakapotopotoaga fakamua ia. Kua tatai e aoga ki a lautolu e tau matakainaga fifine Kerisiano gahua malolo tokologa he vaha nei ne fakaako fakamakai e Tohi Tapu mo e uta foki e tau mena kai fakaagaga ne foaki e Iehova kua puhala mai he “fekafekau pule.”—Luka 12:42.

⁶ Kua kehe ue atu e mahani fakamokoi ha Akula mo Pisila. Ne nofo a Paulo he kaina ha laua he magaaho ne gahua a ia mo laua he taute e pisinisi fale ie i Korinito. (Gahua 18:1-3) He o atu e hoa mau ki Efeso mo e ki Roma he magaaho fakamui, ne matutaki a laua ke fakakite e mahani fakamokoi Kerisiano, ti fakaata foki e kaina ha laua ma e tau feleveiaaga he fakapotopotoaga. (Gahua 18:18, 19; 1 Korinito 16:8, 19) Ko Numefa mo Maria ko e matua fifine ha Ioane Mareko ne hafagi pihia e tau kaina ha laua ma e tau feleveiaaga he fakapotopotoaga.—Gahua 12:12; Kolose 4:15.

Ko e Koloa Uho he Vaha Nei

7, 8. Ko e heigoa e fakamauaga nava lahi he gahua tapu ne ha ha ke he tau fifine Kerisiano he vaha nei, ti ko e heigoa kua talahau ke iloa e lautolu?

⁷ Ke tuga he senetenari fakamua, ne lahi e matagahua he tau fifine Kerisiano tua fakamoli he vaha nei he taute e finagalo he Atua, mua atu ke he gahua fakamatala. Ti ko e fakamauaga mitaki ha ia kua moua he tau matakainaga fifine nei! Manamanatu la ke he fakafifitakiaga ha Gwen, ne fekafekau tua fakamoli ki a Iehova ke molea e 50 e tau ato hoko hana mate he 2002. “Ko e makai ha Gwen ko e tagata fakamatala ne kua talahaua lahi ke he taone ha mautolu,” he talahau he tane hana. “Ki a ia, ko e tau tagata takitaha kua maeke ke moua e fakaalofa mo e tau maveheaga ha Iehova. Ko e mahani fakamoli hana ke he Atua, fakapotopotoaga hana, mo e ke he magafaoa ha mautolu—lafi ki ai foki hana fakamaloloaga fakaalofa ka lolelole a mautolu—kua eke mo lalagoaga lahi ki a au mo e ke he fanau ha maua ke he moui katoa mo e palepale mitaki ha maua. Kua galo lahi mahaki e mautolu a ia.” Ne mau a Gwen mo e tane hana ke he 61 e tau.

⁸ Totou hogofulu afe e tau fifine Kerisiano, nofo tokotaha mo e ne mau, ne eke mo tau fekafekau paionia mo e misionare, ne makona ke he tau mouaaga he moui he folafola e lautolu e fekau he Kautu ke he tau matakavi he kamata mai he tau taone lavelave ke he tau matakavi tutu mamao. (Gahua 1:8) Tokologa ne nakai fai kaina po ke nakai fanafanau ke maeke ke fekafekau katoatoa ki a Iehova. Ha ha i ai a lautolu kua lalago fakamoli ke he tau tane kua fekafekau ko e tau leveki faifano, ka e totou afe e tau matakainaga fifine ne gahua he tau kaina Peteli he lalolagi katoa. Nakai fakauaua ai, ko e tau fifine foaki ne lautolu a lautolu nei ko e “tau mena kua manako ki ai e tau motu oti” nukua fakapuke aki e fale ha Iehova ke he lilifu.—Hakai 2:7.

9, 10. Fakakite fefe he falu tagata he magafaoa e loto fakaaue ma e fakafifitakiaga mitaki ne fakatoka he tau hoana Kerisiano mo e tau matua fifine?

 ⁹ Moli, tokologa e tau fifine Kerisiano ne ha ha ai e tau matagahua fakamagafaoa ke leveki; ka e, tuku fakamua e lautolu e tau mena he Kautu. (Mataio 6:33) Ne tohi he paionia fifine nofo tokotaha: “Ko e matua fifine haku, ha ko e hana nakai maueue he tua mo e fakafifitakiaga mitaki, ne lahi e matagahua ke hoko au ke he haku a paionia tumau. Moli, ko ia taha he tau hoa paionia mitaki lahi haku.” Pehe e tane hagaao ke he hoana hana, ko e matua fifine he fanau fifine tokolima kua lalahi: “Kua mea mo e maopoopo tumau e kaina ha mautolu. Kua fakamukamuka mo e fakamaopoopo e Bonnie e kaina ke maeke he magafaoa ha mautolu ke hagaaki ke he tau puhala fakaagaga. Ko e lafiaga hana ke he levekiaga mitaki he tau tupe ha mautolu kua maeke ia au ke gahua vala magaaho ke 32 e tau, he taute au ke foaki fakalahi e magaaho haku ke he magafaoa ha maua mo e ke he tau mena fakaagaga. Ko e hoana haku ne fakaako foki e fanau ke he aoga he gahua fakamalolo. Kua latatonu ni au ke fakaheke ki a ia.” He vaha nei ko e tane mo e hoana kua gahua ke he matapatu he Tau Fakamoli a Iehova he lalolagi katoa.

¹⁰ Kua tohi he tane hagaao ke he hoana hana, ko e matua fifine he fanau kua lalahi: “Ko e tau mahani kua nava lahi au ki a Susan ko e fakaalofa lahi hana ma e Atua mo e tau tagata, ti pihia foki ke he hana maama, fakaalofa lahi, mo e mahani fakamoli. Ha ha tumau ia ia e onoonoaga kua latatonu a Iehova mo e mitaki lahi mahaki nukua foaki e tautolu ki a ia—ko e matapatu fakaakoaga kua fakaaoga e ia ki a ia fakalataha mo e ko e fekafekau he Atua mo e ko e matua fifine.” Fakalataha mo e lalago he hoana hana, kua maeke he tane ke talia e falu kotofaaga fakaagaga, he eke foki mo motua, paionia, leveki takaiaga falu magaaho, mo e taha he Komiti Matutaki Fale Gagao. Ko e uho ha ia he tau fifine pihia ke he tau tane ha lautolu, ke he tau matakainaga Kerisiano, mo e mua atu ki a Iehova!—Tau Fakatai 31:28, 30.

Tau Fifine kua Uho ne Nakai Fai Tane

11. (a) Fakakite fefe e Iehova e manamanatuaga hana ke he tau fifine tua fakamoli, mahomo atu ke he tau takape? (e) Ko e tau takape Kerisiano mo e falu matakainaga fifine tua fakamoli ne nakai fai tane kua liga ke iloa e heigoa?

¹¹ Ne fa talahau e Iehova hana manamanatuaga ma e moui he tau takape. (Teutaronome 27:19; Salamo 68:5; Isaia 10:1, 2) Ne nakai la hiki ia a ia. Ne matutaki a ia ke manamanatu hokulo nakai ni ke he tau takape ka e pihia foki ke he tau matua fifine tokotaha ti pihia ke he tau fifine ne nonofo takitokotaha ha ko e fifiliaga po ke nakai moua ha tane Kerisiano kua lautonu. (Malaki 3:6; Iakopo 1:27) Kaeke ko koe taha i ai hane fekafekau tua fakamoli ki a Iehova ka e nakai fai hoa Kerisiano, maeke ia koe ke iloa mitaki kua uho a koe ke he fofoga he Atua.

12. (a) Fakatata fefe he falu matakainaga fifine Kerisiano e mahani fakamoli ha lautolu ki a Iehova? (e) Ko e heigoa e tau logonaaga ne fahia e falu matakainaga fifine ha tautolu ki ai?

¹² Tuga anei, ko e fakafifitakiaga, he ha tautolu a tau matakainaga fifine Kerisiano ne nakai fai tokoua ha kua omaoma fakamoli a lautolu ke he hatakiaga ha Iehova ke mau “kia lata mo e Iki.” (1 Korinito 7:39; Tau Fakatai 3:1) Kua fakamalolo mai he Kupu he Atua ki a lautolu: ‘Kua mahani fakamoli a Iehova kia ia kua fakamoli.’ (2 Samuela 22:26) Ka e, ma e tokologa ia lautolu, ko e nonofo takitokotaha nukua paleko. Kua talahau he taha matakainaga fifine: “Kua fifili au ke mau ni ke he Iki, ka e loga e tau hihina mata  haku ne mokulu he kitekite au ke he tau kapitiga haku kua mau e tau tagata tane Kerisiano fulufuluola, ka e nofo tokotaha agaia au.” He talahau he taha matakainaga fifine: “Kua fekafekau au ki a Iehova ke 25 e tau. Kua fifili au ke mahani fakamoli tumau ki a ia, ka ko e tau logonaaga he matimati kua fa fakamomoko aki au.” Kua lafi e ia: “Ko e tau matakainaga fifine tuga au kua manako lahi ma e fakamaloloaga.” Lagomatai fefe e tautolu a lautolu ia ne fakamoli?

13. (a) Ko e heigoa kua ako e tautolu mai he fakafifitakiaga ne fakatoka e lautolu ne o atu ke he tama fifine ha Iefeta? (e) Ko e heigoa e falu puhala kua maeke ia tautolu ke fakakite e manamanatuaga ma e tau matakainaga fifine nofo tokotaha he fakapotopotoaga ha tautolu?

¹³ Ko e taha puhala kua kitia ke he fakafifitakiaga i tuai. He magaaho ne tuku kehe he tama fifine ha Iefeta e magaaho ke fai tane ai, kua mailoga he tau tagata ko e poa a ia ne taute e ia. Ko e heigoa ne taute ke fakamalolo aki a ia? “Ke he taha tau mo e taha tau ke o ai e tau tamafine a Isaraela ke fakaheke ke he tamafine a Iefeta ko e tama a Kiliata ke taki fa e aho ke he tau.” (Tau Fakafili 11:30-40) Tuga a ia, kua lata ia tautolu ke nava mai he loto e tau matakainaga fifine nonofo takitokotaha nukua omaoma fakamoli ke he fakatufono he Atua. * Ko e heigoa taha puhala kua maeke ia tautolu ke fakakite e manamanatuaga ha tautolu? He tau liogi ha tautolu kua lata ia tautolu ke ole ki a Iehova ke lalago e tau matakainaga fifine fakahele tua fakamoli pihia ke matutaki e mahani fakamoli ke he ha lautolu a fekafekauaga. Kua lata ia lautolu ke talahau ki a lautolu kua fakaalofa fakamafana mo e loto fakaaue hokulo ki a lautolu mai ia Iehova mo e fakapotopotoaga Kerisiano katoa.—Salamo 37:28.

Puhala ne Kautu e Tau Matua Tokotaha

14, 15. (a) Ko e ha kua lata he tau Kerisiano ne matua fifine tokotaha ke ui lagomatai atu ki a Iehova? (e) Gahua fakatatau fefe e tau matua tokotaha ke he tau liogi ha lautolu?

¹⁴ Ko e tau fifine Kerisiano ne matua tokotaha foki kua fehagai mo e tau paleko loga. Pete ia, maeke ia lautolu ke hahaga atu ki a Iehova ma e lagomatai he feaki e tau fanau fakatatau mo e tau matapatu fakaakoaga he Tohi Tapu. Moli, kaeke ko koe ko e matua tokotaha, nakai maeke ia koe ke matua fifine ti matua tane ke he tau mena oti. Moha ia, to lagomatai e Iehova a koe ke leveki ma e tau matagahua loga hau kaeke ke ui atu a koe ki a ia he tua. Ke fakatai: Manamanatu ha ha ia koe e kato mamafa he tau mena fakatau ke toto hake ke he fale luga ke hoko ke he poko hau. To taufetului kia a koe ke hake he tau sitepe ka e tata mai e lifi? Nakai pihia! Tatai foki, nakai lali a koe ke fua tokotaha e tau kavega mamafa he manamanatuaga ka e maeke ia koe ke ole ki a Iehova ke lagomatai a koe. Moli, kua uiina e ia a koe ke ui atu ki a ia. He talahau he Salamo 68:19: “Kia fakaaue ke he Iki ke he taha aho mo e taha aho; kua tuku e tau kavega ki luga ia tautolu.” Tatai ni, kua uiina he 1 Peteru 5:7 a koe ke tuku atu e tau fakaatukehe ki a Iehova “ha ko e mena kua manatu e ia a mutolu.”  Ti ka pehia a koe he tau lekua mo e tau fakaatukehe, kia tuku atu ke he hau a Matua he lagi, he taute “nakai noa.”—1 Tesalonia 5:17; Salamo 18:6; 55:22.

¹⁵ Ma e fakatai, kaeke ko koe ko e matua fifine, kua nakai fakauaua a koe ke kapaletu ke he tau fakaohoohoaga he tau kapitiga ke he tau fanau hau he aoga po ke tau kamatamata he mahani fakamoli ka fakafehagai mo lautolu. (1 Korinito 15:33) Ko e tau kapaletu aoga anei. Ka ko e tau matakupu foki ke liogi ki ai. Moli, ko e ha he liogi hagaao ke he tau mena ia mo e fanau hau ato o a lautolu he aoga, liga ka oti e taute auloa e kupu ma e aho? Kua maeke he tau liogi fakahako mai he loto ke tumau malolo ke he tau manamanatuaga he tau fanau. Ki luga he tau mena oti ia, uiina e koe e fakamonuina ha Iehova kaeke ke tutuli fakauka a koe ke feaki hana Kupu ke he tau loto he fanau hau. (Teutaronome 6:6, 7; Tau Fakatai 22:6) Manatu, “ha kua hagao e na fofoga he Iki ke he tau tagata tututonu, kua fanogonogo mai foki hana tau teliga ke he tau liogi ha lautolu.”—1 Peteru 3:12; Filipi 4:6, 7.

16, 17. (a) Ko e heigoa ne talahau he taha tama tane hagaao ke he fakaalofa ne fakakite he matua fifine hana? (e) Lauia fefe e fanau he onoonoaga fakaagaga he matua fifine?

¹⁶ Manamanatu ke he fakafifitakiaga ha Olivia, ko e matua fifine ne tokoono e fanau. Ne toka he tane nakai tua hana e magafaoa he fanau laia e tama fakahiku, ka e mautali a ia he taute e matagahua ke fakaako e fanau hana ke he tau puhala he Atua. Ko e tama tane ha Olivia, ko Darren, ne 31 e tau mogonei ne eke mo motua Kerisiano mo e ko e paionia, ne lima laia e tau he magahala ia. Lafi ke he tau tupetupe ha Olivia, ne moua a Darren he gagao lahi mahaki ke he tino ne fakamatematekelea agaia aki a ia. He liu manatu ke he hana vaha tama, kua tohi e Darren: “Manatu agaia e au he nofo ke he mohega fale gagao mo e amaamanaki lahi he leo ki a Mami. Kua nofo a ia he tapa haku mo e totou e Tohi Tapu ki a au he tau aho takitaha. Ti uhu mogoia e ia e lologo he Kautu ‘Kua Fakaheke a Mautolu ki a Koe, Iehova.’ * Ke hoko mai ke he aho nei, kua fiafia lahi au ke he lologo ia he Kautu.”

¹⁷ Ko e falanaki mo e fakaalofa ha Olivia ma Iehova ne lafi ke he hana kautuaga ko e matua fifine tokotaha. (Tau Fakatai 3:5, 6) Ko e aga mitaki hana ne fakaata e tau foliaga ne fakatoka e ia i mua he hana fanau. “Ne fakamalolo tumau e Mami a mautolu ke tutuli e foliaga he fekafekauaga mau,” he talahau e Darren. “Ti ko e fua, tokofa e mahakitaga haku mo au ne taute e fekafekauaga mau. Ka e, nakai palau a Mami ke he falu hagaao ke he tau mena nei. Kua lali fakalahi au ke fifitaki e tau mahani homo ue atu hana.” Moli, nakai tutupu hake oti e tau fanau ke fekafekau ke he Atua tuga nei ha Olivia. Ka e ka gahua fakamalolo e matua fifine ke moui ke he  tau matapatu fakaakoaga he Tohi Tapu, kia iloa tonuhia kua ha ha i ai e takitakiaga mo e lalagoaga fakaalofa ha Iehova.—Salamo 32:8.

18. Maeke fefe ia tautolu ke fakakite e loto fakaaue ha tautolu ke he foakiaga ha Iehova ke he fakapotopotoaga Kerisiano?

¹⁸ Ko e lalagoaga lahi he Atua ne puhala mai he fakapotopotoaga Kerisiano, fakalataha mo e fakaholoaga fagai fakaagaga tumau, fakamatakainaga Kerisiano, mo e tau motua fakaagaga ko e “tau mena fakaalofa ke he tau tagata.” (Efeso 4:8) Gahua malolo e tau motua tua fakamoli ke atihake e tau tagata oti he fakapotopotoaga, hagaaki pauaki ke he tau manako he “tau tagata kua mamate e tau matua, mo e tau fifine takape ke he ha lautolu a matematekelea.” (Iakopo 1:27) Ti nonofo fakatata ke he tau tagata he Atua, he aua neke vevehe kehe a koe.—Tau Fakatai 18:1; Roma 14:7.

Ko e Fulufuluola he Omaoma

19. Ko e ha ne nakai kakano nukua lolelole e omaoma fakahoana, ti ko e heigoa e fakafifitakiaga he Tohi Tapu kua lalago e mena nei?

¹⁹ Ne tufugatia e Iehova e fifine ko e lagomatai he tagata tane. (Kenese 2:18) Ti, ko e hoana ne omaoma ke he hana tane kua nakai kakano nukua lolelole. Ka e, kua fakalilifu e fifine, he fakaata a ia ke fakaaoga hana tau mena fakaalofa mo e tau taleni loga ke fakatatau mo e finagalo he Atua. Kua fakamaama he Tau Fakatai veveheaga 31 e fakatokaaga lahi he tau gahua he hoana mitaki i Isaraela i tuai. Ne lagomatai e ia a lautolu kua mativa, to e tau uluvine, mo e fakatau e tau kelekele. E, “kua tua kia ia e loto he hana tane; [ne] nakai nofogati a ia ke he tau koloa.”—Tau kupu 11, 16, 20.

20. (a) Kua lata fefe e fifine Kerisiano ke onoono ke he hana tau lotomatala, po ke tau mena fakaalofa ne foaki he Atua? (e) Ko e heigoa e tau mahani mitaki ne fakatata e Eseta, ti maeke fefe a Iehova ke fakaaoga a ia ke he fakahikuaga?

²⁰ Ko e fifine totonu mo e matakutaku Atua ne nakai foli fakatokoluga ne ia a ia po ke fetoko mo e hana tane. (Tau Fakatai 16:18) Ne nakai tutuli e ia e aoga fakatagata ki a ia ni he puhala he tau koloa he lalolagi ka e fakaaoga e ia e tau mena fakaalofa ne foaki he Atua matapatu ke lagomatai aki e falu—hana magafaoa, tau matakainaga Kerisiano, tau katofia, mo e i luga he tau mena oti, ko Iehova. (Kalatia 6:10; Tito 2:3-5) Manamanatu ke he fakafifitakiaga he Tohi Tapu ko e Patuiki Fifine ko Eseta. Pete ni he fulufuluola e tino, ne totonu mo e omaoma a ia. (Eseta 2:13, 15) He mau, ne fakakite e ia e fakalilifu hokulo ke he hana tane, ko e Patuiki ko Ahasueru, ne nakai tatai ke he hoana fakamua he patuiki, ko Vasati. (Eseta 1:10-12; 2:16, 17) Ne tuku atu fakalilifu e Eseta ki a Moretikai, ko e kasini hana ne fakamua ia ia, e tau matakupu aoga—pihia foki he mole e eke a ia mo patuiki fifine. Ka e nakai lolelole a ia! Ne fakatapakupaku fakamalolo e ia a Hamanu, ko e tagata tane malolo mo e vale ne pulega ke tamate e tau Iutaia. Ne fakaaoga fakalahi e Iehova a Eseta ma e fakahaoaga he hana tau tagata.—Eseta 3:8–4:17; 7:1-10; 9:13.

21. Maeke fefe he fifine Kerisiano ke mahomo atu e uho ki a Iehova?

²¹ Maama ai, ke he vaha i tuai mo e vaha nei, ne fakakite he tau fifine mahani Atua e fakamoli katoatoa ha lautolu ki a Iehova mo e hana tapuakiaga. Ko e mena ia, ko e tau fifine matakutaku Atua kua uho ke he fofoga ha Iehova. Ko e tau matakainaga fifine Kerisiano, ne fakaata e Iehova e hana agaga ke tauteute a koe ke holo ki mua ke eke mo “kapiniu” mitaki, ko ia haia nukua “taute m[a] e tau gahua mitaki oti.” (2 Timoteo 2:21; Roma 12:2) Hagaao ke he tau tagata tapuaki uho pihia, kua pehe e Kupu he Atua: “Kia ta age kia ia e tau fua he hana tau lima; ko e hana tau gahua foki ke fakaheke atu kia ia ke he tau gutuhala.” (Tau Fakatai 31:31) Kia eke e mena ia ke moli ki a mutolu takitokotaha.

[Tau Matahui Tala]

Manatu Nakai e Koe?

• Kua uho fefe falu fifine Kerisiano he senetenari fakamua ke he fofoga ha Iehova?

• Kua foaki fefe he tau matakainaga fifine tokologa he vaha ha tautolu a lautolu ke uho ke he Atua?

• Ko e heigoa e tau puhala kua lalago e Iehova e tau matua fifine tokotaha mo e tau matakainaga fifine kua nakai fai tane?

• Maeke fefe he fifine ke fakakite e fakalilifu mai he loto ma e fakatokatokaaga ulu pule?

[Tau Huhu he Fakaakoaga]

[Puha he lau 27]

TAU FAKAFIFITAKIAGA KE MANAMANATU KI AI

To manako kia a koe ke manamanatu ke he falu fakafifitakiaga foki he tau fifine tua fakamoli ne talahau he Tohi Tapu? Ka pihia, fakamolemole totou e tau kupu tohi ne tutu i lalo. He manamanatu hokulo a koe ke he tau tagata kehekehe ne tohi ai, lali ke manamanatu ke he tau matapatu fakaakoaga kua maeke ia koe ke fakaaoga fakalaulahi ke he moui hau.—Roma 15:4.

◆ Sara: Kenese 12:1, 5; 13:18a; 21:9-12; 1 Peteru 3:5, 6.

◆ Tau fifine fakamokoi i Isaraela: Esoto 35:5, 22, 25, 26; 36:3-7; Luka 21:1-4.

◆ Tapora: Tau Fakafili 4:1–5:31.

◆ Ruta: Ruta 1:4, 5, 16, 17; 2:2, 3, 11-13; 4:15.

◆ Fifine i Sunema: 2 Tau Patuiki 4:8-37.

◆ Fifine Kanana: Mataio 15:22-28.

◆ Mareta mo Maria: Mareko 14:3-9; Luka 10:38-42; Ioane 11:17-29; 12:1-8.

◆ Tapita: Gahua 9:36-41.

◆ Tau tama fifine tokofa ha Filipo: Gahua 21:9.

◆ Fipe: Roma 16:1, 2.

[Fakatino he lau 25]

Kua nava nakai a koe ke he tau matakainaga fifine nakai mau nukua omaoma fakamoli ke he fakatufono he Atua?

[Fakatino he lau 26]

Ko e heigoa e tau ole pauaki kua maeke ke tokutoku he liogi ato o e fanau he aoga?