Kakano ne O a Lautolu he Tapu

“KO E Repapiliki ha Korea mogonei kua teitei fakalahi fa e tokologa he tau Peresipateria ke tuga a Amerika.” Ko e talahauaga ia he mekasini Newsweek kua liga fakaofo e tau tagata totou tokologa, ha kua laulahi e tau tagata ne manamanatu ke he tau tagata Korea ko e kaufakalatahaaga Konofusia po ke faka-Puta. He vaha nei, ko e tagata ahiahi ka moua e tokologa he tau tapu “Kerisiano” i ai, ne fa kitia ke he tau satauro moli kula lupalupa. He tau Aho Tapu, kua aga mau ke kitia e tau tagata takitokoua mo e tokotolu, ne toto e tau Tohi Tapu he tau lima hane o he tapu. Hagaao ke he kumikumi he 1998, teitei 30 e pasene he tau tagata Korea kua o he tapu Katolika po ke Porotesano, kua mua atu e tokologa ki a lautolu ne talahau ko e tau Puta.

He vaha nei, kua fakaliga kehe ke kitia e pasene tokoluga pihia he tau tagata he ha matakavi kua o tumau he tapu. Nakai ni ko Korea ne tupu agaia e mena ia ki ai ka e pihia foki ke he falu motu Asia, ti pihia foki ki Aferika mo Amerika Latini. Ko e ha ne tokologa agaia ne talahau kua talitonu ke he Atua ka ko e nakai fai manamanatuaga mo e fekehekeheaki ke he lotu kua tuga ke tupu lahi ke he lalolagi? Ko e ha kua o a lautolu he tapu?

Ko e kumikumiaga Gallup ne fakakite kua molea e hafa he tau tagata o tapu Korea hane kumi ma e mafola he manamanatuaga; kavi ke tolu aki ne amaamanaki ma e moui tukulagi he mole e mate; mo e 1 mai he 10 ne kumi ma e malolo tino, tau monuina, mo e kautuaga.

Tokologa e tau tagata i Saina ne tafe atu ke he tau lotu he amaamanaki ke moua taha mena ke fakapuke aki e gatigati fakaagaga ne kua fua mai ha ko e utakehe fakahaga he kaufakalatahaaga fakatupe e manatu faka-Kominisi. He tau tau takitaha, totou miliona e tau lagaki he Tohi Tapu ne lolomi mo e tufatufa i Saina, ti tuga kua totou ai he tau tagata ke he puhala ne totou aki e lautolu e tohi kula tote ha Mao.

Falu Katolika i Parasili, mahomo atu ki a lautolu e atuhau fuata ikiiki, ne nakai makona ke he maveheaga he fiafia lahi he moui anoiha—ne manako a lautolu ke he fakamoliaga mogonei. Kua talahau he mekasini Tudo: “Kaeke ko e hikihikiaga fakalotu ne omoomoi e tau loto mo e manamanatuaga he atu tau 70, ko e taofiaga ke monuina ne  omoomoi e tau tagata he vaha nei.” Ne huhu e kumikumiaga i Peritania ke he tau tagata o tapu i ai ke talahau taha mena ne manako a lautolu ke he tapu ha lautolu. Kua laulahi ke talahau ko e feoakiaga.

Ko e tau mena oti nei ne fakakite pete he fai tagata agaia ne talitonu ke he Atua, laulahi hane kapaletu lahi hagaao ke he tau mena kua maeke ke moua e lautolu mogonei ka e nakai ke he vaha i mua—po ke hagaao ki a ia ko e Atua. Ko e heigoa he manatu e koe e kakano hako he talitonu ke he Atua? Ko e heigoa he Tohi Tapu kua talahau ke he manatu ia? To moua e koe e tali ke he vala tala ka mui mai.