“Kia Mahani Foki a Mutolu ke Fakaaue”
“Kia Mahani Foki a Mutolu ke Fakaaue”
“Kia pule foki e mafola mai he [“Keriso,” NW] ke he tau loto ha mutolu, . . . kia mahani foki a mutolu ke fakaaue.”—KOLOSE 3:15.
1. Ko e heigoa e kehekeheaga kua kitia e tautolu ke he vahaloto he fakapotopotoaga Kerisiano mo e lalolagi i lalo he pule ha Satani?
KE HE 94,600 he tau fakapotopotoaga he Tau Fakamoli a Iehova he lalolagi katoa, kua moua e tautolu e aga fakaaue. Igatia e feleveiaaga mo e kamata mo e fakaoti aki e liogi nukua putoia e tau talahauaga he fakaaue ki a Iehova. Kua fa logona e tautolu “fakaaue lahi,” “oue tulou,” po ke tau talahauaga pihia he tau laugutu ha lautolu ne ikiiki mo e momotua ti pihia mo lautolu e Tau Fakamoli kua fou mo e leva lahi he fakalataha a lautolu ke tapuaki mo e feoaki fiafia. (Salamo 133:1) Ko e keheaga hanei ke he lotokai nukua tupu ke he tokologa ‘kua nakai iloa a Iehova, mo lautolu kua nakai omaoma ke he vagahau mitaki’! (2 Tesalonia 1:8) Kua nonofo a tautolu he lalolagi nakai fai fakaaue. Ti nakai ofo ai ka manamanatu a tautolu ki a ia ko e atua he lalolagi nei—ko Satani ko e Tiapolo, ko e lalago lahi mahaki he manamanatu na ia ki a ia, nukua aga fakatokoluga mo e totoko kua hufia ke he fakatokaaga fakalatahaaga tagata!—Ioane 8:44; 2 Korinito 4:4; 1 Ioane 5:19.
2. Ko e heigoa e hatakiaga kua lata ke muitua a tautolu ki ai, ti ko e heigoa e tau huhu ka manamanatu a tautolu ki ai?
2 He viko takai he lalolagi ha Satani, kua lata ia tautolu ke fakagahuahua e mataala ke nakai fakakelea he tau aga ia. He senetenari fakamua, kua fakamanatu he aposetolo ko Paulo ke he tau Kerisiano i Efeso: “Ne o fano ai a mutolu ke he vaha i tuai, ke lata mo e mahani he lalolagi nai, ke lata mo e takitaki ha lautolu kua pule ha he pulagi, ko e agaga haia kua gahua ai ni ainei kia lautolu kua faliuliu; ha i ai foki a tautolu, ne mahani fakalataha a tautolu oti kana mo lautolu ke he vaha i tuai he nonofo ai ke he tau manako lahi he tau tino ha tautolu, mo e eke foki e tautolu e tau mena kua loto ki ai e tino katoa mo e tau manatu, ne fanau mai foki a tautolu mo fanauaga he ita, tuga foki a lautolu kua toe.” (Efeso 2:2, 3) Moli foki e mena ia ke he tokologa he vaha nei. Ti, maeke fefe mogoia, ke fakatumau e tautolu e aga fakaaue? Ko e heigoa e lagomatai kua foaki e Iehova? Ko e heigoa e tau puhala aoga kua maeke ia tautolu ke fakatata kua fakaaue moli a tautolu?
Tau Kakano ne Fakaaue Ai
3. Ko e heigoa kua fakaaue a tautolu ki a Iehova?
3 Ko Iehova ko e Atua, ko e ha tautolu a Tufuga mo e Foaki Moui, kua foaki ki ai e tautolu e fakaaue ha tautolu, mua atu he manamanatu a tautolu ke he falu he tau mena fakaalofa loga ne foaki mai e ia ki luga ha tautolu. (Iakopo 1:17) He tau aho takitaha, kua fakaaue a tautolu ki a Iehova kua momoui a tautolu. (Salamo 36:9) Viko takai ia tautolu, kua kitia e tautolu e fakamoliaga loga he tau gahua ha Iehova, tuga e la, mahina, mo e tau fetu. Ko e tanakiaga lahi he tau maka uho foaki moui he palaneta ha tautolu, ko e matagi fiofio lagotatai mitaki he tau kese aoga, mo e tau fakatokaaga halavihu he tufugatia kua fakakite oti ke he kaitalofa ha tautolu ke he ha tautolu a Matua fakaalofa he lagi. “Iehova na e, haku Atua, kua loga e tau mena kua eke e koe,” he lologo he Patuiki ko Tavita, “ko e hau a tau mana mo e hau a tau manatu kia mautolu, nakai maeke ke talahau atu kia koe; kua fia fakailoa atu e au mo e vagahau ki ai, ka e loga ni, ai maeke he totou.”—Salamo 40:5.
4. Ko e ha kua lata ia tautolu ke fakaaue ki a Iehova ma e feoakiaga fiafia kua olioli e tautolu he tau fakapotopotoaga ha tautolu?
4 Pete he nakai nonofo he parataiso fakatino, kua nonofo olioli e tau fekafekau ha Iehova he vaha nei he parataiso fakaagaga. He ha tautolu a tau Fale he Kautu mo e ke he tau fonoaga mo e tau toloaga, kua iloa e tautolu e tau fua he agaga he Atua kua gahuahua ke he tau matakainaga talitonu ha tautolu. Moli, ka fakamatala ke he tau tagata kua tote po ke nakai fai feaki fakalotu, kua hagaao falu he Tau Fakamoli ke he mena ne fakamaama e Paulo he tohi hana ke he tau Kalatia. Kua hagaaki fakamua a lautolu ke he “tau gahua he tino” mo e huhu ke he tau tagata fanogonogo ha lautolu ke he mena kua kitia e lautolu. (Kalatia 5:19-23) He talia fiafia moli kua fakakite he tau mena nei e fakalatahaaga tagata he vaha nei. Ka fakakite e talahauaga he fua he agaga he Atua mo e ki luga he uiina ke he Fale he Kautu he matakavi ke kitia e fakamoliaga he mena nei ma lautolu, kua tokologa ne mafiti ke talahau: “Ko e moli ha ha ia mutolu e Atua.” (1 Korinito 14:25) Ti nakai fakakaupa ni e mena nei ke he Fale he Kautu he matakavi. Ko e ha matakavi ne fenoga a koe ki ai, ka feleveia a koe mo e taha he Tau Fakamoli a Iehova ne molea e ono miliona, nukua moua e koe e aga fiafia mo e olioli pihia. Moli, ko e feoakiaga atihake pehenei kua kakano ke foaki e fakaaue ki a Iehova, ko ia ne foaki hana agaga ati maeke ai.—Sefanaia 3:9; Efeso 3:20, 21.
5, 6. Maeke fefe ia tautolu ke mahani fakaaue ma e mena fakaalofa lahi mahaki he Atua, ko e lukutoto?
5 Ko e mena fakaalofa lahi mahaki, ko e foakiaga mitaki katoatoa ne mai e Iehova, ko e hana Tama, ko Iesu, nukua foaki ai e poa lukutoto. “Kaeke kua pihia e fakaalofa mai e Atua kia tautolu,” ne tohi he aposetolo ko Ioane, kua “lata ni ke feofanaki a tautolu.” (1 Ioane 4:11) E, kua fakakite e tautolu a tautolu ke fakaaue ma e lukutoto he nakai ni he fakakite e fakaalofa mo e loto fakaaue ki a Iehova ka e pihia foki he momoui a tautolu ke he puhala nukua fakakite e fakaalofa ke he falu.—Mataio 22:37-39.
6 Kua maeke ia tautolu ke ako fakalahi hagaao ke he loto fakaaue he manamanatu ke he puhala ne fehagai a Iehova mo Isaraela i tuai. He puhala he Fakatufono, ne foaki atu e ia ke he motu he puhala ia Mose, ne fakaako e Iehova e tau tagata aki e tau fakaakoaga loga. He puhala he “tino he maama mo e kupu moli ha ha he [F]akatufono,” ati maeke ia tautolu ke ako fakalahi ke lagomatai a tautolu ke muitua e hatakiaga ha Paulo: “Kia mahani foki a mutolu ke fakaaue.”—Roma 2:20; Kolose 3:15.
Tolu e Fakaakoaga Mai he Fakatufono Faka-Mose
7. Maeke fefe he fakatokaaga mena ne hogofulu aki ke foaki ke he tau Isaraela e magaaho ke fakakite e fakaaue lahi ha lautolu ki a Iehova?
7 He Fakatufono Faka-Mose, ne foaki e Iehova tolu e puhala kua maeke he tau Isaraela ke fakakite e loto fakaaue moli ha lautolu ma e mahani mitaki hana. Fakamua, ko e mena ne hogofulu aki. Ko e mena ne hogofulu aki he tau fua he fonua, fakalataha mo e “mena foki ne hogofulu aki he tau manu oti, ko e tau povi, katoa mo e tau mamoe,” ne eke mo mena “tapu ni kia Iehova.” (Levitika 27:30-32) He omaoma e tau Isaraela, ne fakamonuina fakaloga e Iehova a lautolu. “Kia ta mai e mutolu e tau mena ke hogofulu aki ha mutolu a tau mena oti kana ke he fale kua tatanaki ai e tau mena; kia ha i ai e tau mena kai ke he haku a fale; mo e kamatamata mai ai e mutolu au ke he tau mena na, kua pihia mai a Iehova Sapaota; po ke hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.”—Malaki 3:10.
8. Ko e heigoa ne kehe e tau foakiaga foaki noa mai he mena ne hogofulu aki?
8 Uaaki, he lafi ke he fakatokaaga mena ne hogofulu aki, ne fakatoka e Iehova ma e tau Isaraela ke taute e tau foakiaga foaki noa. Ne fakaako e ia a Mose ke tala age ke he tau Isaraela: “Ka hohoko atu a mutolu ke he motu ke fakahoko atu e au a mutolu ki ai. Ka kai e mutolu e tau mena kai he motu ti ta mai ai e mutolu e poa nikiti kia Iehova.” Ko e falu he tau fua fakamua ha lautolu he “falaoa pukupuku he lakuaga falaoa” ne foaki ko e “poa nikiti kia Iehova” ke he tau atuhau katoa ha lautolu. Mailoga kua nakai fai fafatiaga pauaki ke he tau fua fakamua nei ne manako ki ai. (Numera 15:18-21) Ka ko e magaaho ne taute he tau Isaraela e poa he fakaaueaga, ne iloa moli e lautolu e monuina mai ia Iehova. Ko e fakatokaaga pihia ne kitia he matutaki mo e faituga he fakakiteaga ha Esekielu. Kua totou e tautolu: “Ko e tau fua uluaki oti fakamua he tau mena oti, mo e tau poa oti he tau mena oti, he ha mutolu a tau poa oti, to eke ia ma e tau ekepoa; to ta age foki e mutolu e lakuaga falaoa fakamua ke he ekepoa, kia fakamau ai e monuina ke he hāu a magafaoa.”—Esekielu 44:30.
9. Ko e heigoa ne fakaako e Iehova he fakatokaaga ke oko?
9 Toluaki, ne fakatoka e Iehova e matagahua ke oko. “Ka helehele foki e mutolu e tau saito he fonua ha mutolu,” he fakaako he Atua, “aua neke helehele e koe ke oti e tau kalakala he kaina hau, aua neke oko foki e koe e tau fua saito kua mokulu ke he kelekele. Aua neke faki foki e tau venevene he tau vine he hau a uluvine, ti ua oko e koe e tau fua kua mokulu he hau a uluvine; ka e toka ia ma e tagata nofogati, mo e tagata kehe; ko au ko Iehova ko e ha mutolu a Atua.” (Levitika 19:9, 10) Liu foki, nakai fai fafatiaga pauaki ne manako ki ai. Igatia e tau Isaraela takitaha ke fifili e lahi he mena ke toka ma lautolu ne nonofogati. Ne fakamaama fakatonu he patuiki pulotu ko Solomona: “Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e tau mena ne ta age kia ia.” (Tau Fakatai 19:17) Ti fakaako e Iehova e fakaalofa hofihofi mo e manamanatuaga ma lautolu ne nakai monuina.
10. Ko e heigoa e tau fua ma e tau tagata ha Isaraela he magaaho ne kaumahala a lautolu ke fakakite e lautolu e fakaaue?
10 Ne fakamonuina e Iehova e tau Isaraela he magaaho ne omaoma a lautolu he tamai e tau mena ne hogofulu aki, foaki e tau foakiaga noa, mo e taute e tau foakiaga ma lautolu kua nonofogati. Ka ko e magaaho ne kaumahala e tau tagata ha Isaraela ke fakakite e lautolu e fakaaue, ne galo ia lautolu e fiafia ha Iehova. Ne takitaki atu e mena nei ke he matematekelea mo e fakahiku fakapaea. (2 Nofoaga he Tau Patuiki 36:17-21) Ti, ko e heigoa, mogoia, e tau fakaakoaga ma tautolu?
Ha Tautolu a Tau Fakakiteaga he Fakaaue Lahi
11. Ko e heigoa e matapatu puhala kua maeke ke fakakite e tautolu ha tautolu a fakaaue lahi ki a Iehova?
11 Ko e matapatu puhala kua maeke ia tautolu ke fakaheke ki a Iehova mo e fakakite e fakaaue lahi ha tautolu tuga ia kua putoia e “poa.” Moli, ko tautolu ko e tau Kerisiano kua nakai ha i lalo he Fakatufono faka-Mose, ne fakalago ke foaki e tau poa he tau manu po ke tau fua he fonua. (Kolose 2:14) Moha ia, ne fakamalolo he aposetolo ko Paulo e tau Kerisiano Heperu: “Kia uta mau e tautolu e poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.” (Heperu 13:15) He fakaaoga e tau lotomatala mo e tau koloa ha tautolu ke foaki e poa he fakaheke ki a Iehova, he fekafekauaga ke he tau tagata po ke “ki mua he fakapotopotoaga” he tau matakainaga Kerisiano, kua maeke ia tautolu ke fakakite e tau fakaaue mai he loto ke he ha tautolu a Matua fakaalofa he lagi, ko Iehova ko e Atua. (Salamo 26:12) He taute pihia, ko e heigoa kua ako e tautolu mai he tau puhala ne fakakite he tau Isaraela ha lautolu a fakaaue lahi ki a Iehova?
12. Ke lata mo e matagahua Kerisiano ha tautolu, ko e heigoa kua ako e tautolu mai he fakatokaaga mena ne hogofulu aki?
12 Fakamua aki, he kitia e tautolu, ko e fakatokaaga mena ne hogofulu aki ne nakai fifili ni he tagata; igatia e Isaraela mo e kotofaaga ke he mena nei. Ko e tau Kerisiano, ha ha ia tautolu e matagahua he fai vala ke he fekafekauaga mo e o atu ke he tau feleveiaaga Kerisiano. Nakai fifili ni he tagata e tau matagahua nei. He hana perofetaaga lahi hagaao ke he magaaho he fakaotiaga, ne talahau fakahako e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14; 28:19, 20) Hagaao ke he tau feleveiaaga Kerisiano, ne omoomoi he agaga e aposetolo ko Paulo ke tohi: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) Fakakite e tautolu e fakaaue lahi ha tautolu ki a Iehova ka talia fiafia e tautolu e matagahua ke fakamatala mo e ke fakaako atu ti pihia ke matutaki tumau mo e tau matakainaga ha tautolu ke he tau feleveiaaga he fakapotopotoaga, he onoono ki ai ko e monuina mo e lilifu.
13. Ko e heigoa e fakaakoaga kua moua he tau fakatokaaga ma e tau foakiaga foaki noa mo e oko?
13 He lafi ki ai, moua e tautolu e lagomataiaga mai he manamanatu ke he ua foki he tau foakiaga ne fakakite he tau Isaraela ha lautolu a loto fakaaue—ko e tau foakiaga foaki noa mo e oko. Kehe mai he mena ne hogofulu aki, ko e poakiaga ne kitia maaliali, ko e tau foakiaga foaki noa mo e fakatokaaga oko ne nakai fai fafatiaga pauaki ne manako ki ai. Ka e, kua fakaata e lautolu e hokulo he loto fakaaue ne ha ha he loto he fekafekau ha Iehova ke fakamafiti aki a ia ke gahua. Ke he puhala pihia, pete he loto fakaaue a tautolu ke he fakalatahaaga he fekafekauaga mo e o atu ke he tau feleveiaaga Kerisiano ko e matapatu matagahua he tau fekafekau takitaha ha Iehova, kua fakalataha loto katoa nakai a tautolu ki ai mo e aga makai? Onoono nakai a tautolu ki ai ko e magaaho ke fakakite mai he loto e fakaaueaga ha tautolu ma e tau mena oti ne taute e Iehova ma tautolu? Kua fai vala katoatoa nakai a tautolu ke he tau gahua nei, ke he fahia ne kua fakaata he tau tutuaga ha tautolu? Po ke onoono a tautolu ke he tau mena oti nei ko e matagahua noa ni anei kua lata ia tautolu ke taute? Ko e moli, ko e tau huhu anei kua lata ke tali takitokotaha e tautolu. Kua tuku ai he aposetolo ko Paulo ke he puhala nei: “Kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”—Kalatia 6:4.
14. Ko e heigoa kua amanaki a Iehova ki a tautolu mai he fekafekauaga ha tautolu ki a ia?
14 Kua iloa mitaki e Iehova ko e Atua e tau tutuaga ha tautolu. Kua mailoga e ia e tau kukuaga ha tautolu. Kua uho ki a ia e tau poa, lalahi mo e ikiiki, nukua foaki makai he hana tau fekafekau. Nakai amanaki a ia ke tatai e tau mena ne foaki e tautolu, po ke maeke ia tautolu ke taute pihia. Ka fakatutala ke he vala tala nei, ne tala age e aposetolo ko Paulo ke he tau Kerisiano i Korinito: “Ko e mena ka ha i ai e loto fakamakai, ti talia fakamitaki e tagata, kua fakalata ke he tau mena ha ha ia ia, ka e nakai fakalata ke he tau mena nakai ha ha ia ia.” (2 Korinito 8:12) Kua hagaao e matapatu fakaakoaga nei tatai tonu ke he fekafekauaga ha tautolu ke he Atua. Ko e mena kua taute e fekafekauaga ha tautolu ke talia ki a Iehova kua falanaki, nakai ha ko e lahi he mena kua taute e tautolu, ka e ko e puhala kua taute ai e tautolu—he fiafia mo e loto katoa.—Salamo 100:1-5; Kolose 3:23.
Feaki mo e Fakatumau e Aga Paionia
15, 16. (a) Ko e heigoa e matutakiaga he vahaloto he fekafekauaga paionia mo e fakaaue lahi? (e) Maeke fefe a lautolu ne nakai maeke ke paionia ke fakakite e aga paionia?
15 Ko e puhala taui lahi ke fakakite e tautolu e fakaaue lahi ki a Iehova ko e huhu atu ke he fekafekauaga mau. He fakalagalaga he fakaalofa ki a Iehova mo e loto fakaaue ma e hana totonu lahi, tokologa he tau fekafekau tukulele ne taute e tau hikiaga lalahi he tau momoui ha lautolu ke fakaata fakalahi e magaaho ke fekafekau ki a Iehova. Falu ne maeke ke fekafekau ko e tau paionia mau, fakaaoga ke avelesi ke 70 e tula he tau mahina takitaha ke fakamatala e tala mitaki mo e fakaako e kupu moli ke he tau tagata. Ko e falu, kua kaupa ni ha ko e tau tutuaga kehekehe, he falu a magaaho ne pulega ke foaki 50 e tula he mahina he fakamatala ko e tau paionia fakaku.
16 Ka e kua e tokologa he tau fekafekau ha Iehova kua nakai fekafekau ko e tau paionia tumau po ke fakaku? Maeke ia lautolu ke fakakite e fakaaue lahi he feaki mo e fakatumau e aga paionia. Fefe? He fakamalolo a lautolu kua paionia, he to ke he tau fanau ha lautolu e manako ke tutuli e feua fekafekau mau, mo e fakalataha fakamatafeiga ke fakamatala felauaki ni ke he tau tutuaga ha lautolu. Ko e mena kua foaki e tautolu he fekafekauaga ha tautolu kua falanaki fakalahi ke he hokulo he loto fakaaue he tau loto ha tautolu ma e tau mena ne taute, hane taute, mo e to taute e Iehova ma tautolu.
Fakatata e Fakaaue Lahi Aki e “Tau Koloa” ha Tautolu
17, 18. (a) Fakatata fefe e tautolu e fakaaue lahi aki e “tau koloa” ha tautolu? (e) Ko e heigoa e hakahakaaga ke he mena ne foaki he takape ne taute e Iesu, mo e ko e ha?
17 “Kia fakalilifu atu a koe kia Iehova mo e hāu a tau koloa,” he talahau he Tau Fakatai 3:9, “mo e tau fua uluaki foki he hāu a tau mena oti ne tutupu mai he kelekele.” Kua nakai tuai lata e tau fekafekau ha Iehova ke taute e mena ne hogofulu aki. Ka e, ne tohi e Paulo ke he fakapotopotoaga Korinito: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7) He taute e tau foakiaga foaki noa ke lalago e gahua fakamatala he Kautu he lalolagi katoa kua fakatata foki e fakaaue lahi ha tautolu. Ko e loto fakaaue mai he loto kua fakalagalaga a tautolu ke taute tumau e mena nei, liga he fakatoka kehe taha mena he tau fahitapu oti, tuga ne taute he tau Kerisiano fakamua.—1 Korinito 16:1, 2.
18 Nakai ko e lahi he mena ne foaki e tautolu kua fakakite e loto fakaaue ha tautolu ki a Iehova. Ka e, ko e aga ne foaki aki e tautolu. Ko e mena hanei ne mailoga e Iesu he onoono a ia ke he tau tagata ne tuku e tau mena fakaalofa ke he puha tupe he faituga. He magaaho ne kitia e Iesu e takape mativa ne tolo e ia ki loto “ua e tupe ikiiki,” ne pehe a ia: “Ko e moli, ke tala atu e au kia mutolu, ko e tau mena he fifine takape nofogati na kua tolo ki ai, kua mua ia ke he tau mena ha lautolu oti. Ha ko e mena tolo e lautolu oti e falu a mena mai he tau mena loga ha lautolu ke he tau poa he Atua; ka ko ia kua nofogati kua tolo e ia ki ai hana tau mena oti ne moui ai a ia.”—Luka 21:1-4.
19. Ko e ha kua mitaki ke liu fokifoki e tau puhala kua fakakite e tautolu e loto fakaaue ha tautolu?
19 Kia eke e fakaakoaga nei ke he puhala ke fakakite e tautolu e fakaaue ha tautolu ke fakamafiti a tautolu ke liu fokifoki e tau puhala ne fakakite e tautolu e loto fakaaue. Liga maeke nakai ia tautolu ke fakalahi e poa he fakaheke ki a Iehova ti pihia ke he ha tautolu a lalago ke he gahua he lalolagi katoa ke he puhala fakatino? Ka lahi e mena ne taute e tautolu, kua maeke ia tautolu ke iloa moli ko e Matua fakaalofa loto fakamokoi ha tautolu, ko Iehova, ka fiafia lahi he foaki e tautolu e fakaaue.
Manatu Nakai e Koe?
• Ko e heigoa e tau kakano kua lata ia tautolu ke fakaaue ki a Iehova?
• Ko e heigoa e tau fakaakoaga kua ako e tautolu mai he mena ne hogofulu aki, tau foakiaga foaki noa, mo e oko?
• Feaki fefe e tautolu e aga paionia?
• Fakaaoga fefe e tautolu e “tau koloa” ha tautolu ke fakaaue ki a Iehova?
[Tau Huhu he Fakaakoaga]
[Tau Fakatino he lau 30]
Ko e heigoa e tau fakaakoaga tolu mai he Fakatufono kua fakakite he mena nei?