666​—Nakai Ni ko e Mena Galo

‘Nakai maeke foki ia taha ke fakafua mai po ke fakafua atu, ka ko lautolu hoko lautolu ha ha i ai e fakamailoga, po ke higoa he manu favale, po ke totouaga he hana higoa. Ko e mena hanai ha ha i ai e iloilo. Ko ia ha i ai e loto matala kia totou ne ia e numera he manu favale, ha ko e numera ia he tagata; ko e hana numera foki ko e ono e teau ti ono e hogofulu ma ono.’​—Fakakiteaga 13:17, 18.

NE FAKALAGA he tau matakupu gahoa he Tohi Tapu e fakaofoofo mo e manamanatu lahi mahaki ke he perofetaaga hagaao ke he fakamailoga, po ke higoa galo he “manu favale”​—ko e numera 666. He televisoni mo e he Internet, ti pihia ke he tau kifaga, tau tohi, mo e tau mekasini, kua eke e fakamailoga he manu mo matakupu tuaha ne nakai fai fakaotiaga.

Kua talitonu e falu ko e 666 ko e fakamailoga he anetikeriso faka-Tohi Tapu. Kua pehe falu na fakakite falu puhala he kitiaaga tumau, tuga e ta tatau po ke tuku fakalataha e microchip mo e numera fakamailoga ne kua fakakite e tagata ko e fekafekau he manu. Talitonu agaia falu ko e 666 ko e fakamailoga he pule pope Katolika. He hukui he tau numera e tau matatohi he puhala ke he matahigoa moli he pope, ko Vicarius Filii Dei (Akoako he Tama he Atua), mo e hikihikifano fakatote e tau numera, ne fakahiku ai a lautolu ke he 666. Ne totoku foki ko e numera taha ia kua maeke ke totou mai he higoa Latini he Pule Atu Motu Roma ko Diocletian mo e talahauaga Heperu he higoa Nero Caesar. *

Ka ko e tau fakakakanoaga fuluola mo e pulega noa anei, kua kehekehe lahi mai he mena ne talahau he Tohi Tapu hagaao ke he fakamailoga he manu, ka kitia e tautolu he vala tala ka mui mai. Kua fakakite moli mai he Tohi Tapu ko lautolu ne ha ha ai e fakamailoga ka moua e ita lahi he Atua he magaaho ka tamai e ia e fakaotiaga ke he fakatokaaga nei. (Fakakiteaga 14:9-11; 19:20) Ke maama e kakano he 666, mogoia, kua lahi atu mai he fai tali ke he taha mena galo fuluola lahi. Fiafia ai, ko Iehova ko e Atua, ko e fakataiaga lahi he fakaalofa mo e ko e Punaaga he maama fakaagaga, ne nakai toka hana tau fekafekau he pouli ke he mena aoga nei.​—2 Timoteo 3:16; 1 Ioane 1:5; 4:8.

[Matahui Tala]