“Kia Taute Katoatoa Hau a Fekafekauaga”

“Kia taute katoatoa hau a fekafekauaga.”​—2 TIMOTEO 4:5, NW.

1, 2. Pete ko e tau Kerisiano oti ko e tau tagata fakamatala, ko e heigoa kua lata faka-Tohiaga Tapu ma e tau motua?

KO KOE kia ko e tagata fakapuloa he Kautu? Kaeke pihia, fakaaue a ki a Iehova ko e Atua ma e kotofaaga homo ue atu nei. Ko koe kia ko e motua he fakapotopotoaga? Ko e kotofaaga lafi ki luga a ia mai ia Iehova. Ka e kia nakai lata ia tautolu ke nimo kua nakai maeke he fakaakoaga fakalalolagi po ke lotomatala ke vagahau pulotu ke taute taha ia tautolu ke lata ma e fekafekauaga po ke ma e leveki he fakapotopotoaga. Ko Iehova ne kotofa a tautolu ma e fekafekauaga, mo e ha kua feleveia falu tagata tane ia tautolu mo e tau poakiaga faka-Tohiaga Tapu pauaki ati moua e lautolu e kotofa ke eke mo tau leveki.​—2 Korinito 3:5, 6; 1 Timoteo 3:1-7.

² Ko e tau Kerisiano tukulele oti kana kua taute e gahua he tau tagata fakamatala, ka e mahomo ke he tau leveki, po ke tau motua, kua lata ke fakatoka e fakafifitakiaga mitaki ke he fekafekauaga. Ko e tau motua “kua gahua ke he kupu katoa mo e fakaako atu” kua mailoga he Atua mo Keriso, pihia foki he tau katofia Fakamoli ha Iehova. (1 Timoteo 5:17; Efeso 5:23; Heperu 6:10-12) I lalo he tau tutuaga oti, ko e fakaakoaga he motua kua lata ke malolo fakaagaga, ha kua tala age e aposetolo ko Paulo ke he leveki ko Timoteo: “Ha ko e mena to hoko mai e vaha nakai maeke ai ia lautolu ke talia e kupu tonu ka e lata ni mo e tau manako lahi ha lautolu, ke fakapotopoto ai e tau akoako ma lautolu, ha kua magiho a tau teliga ha lautolu; to mafoki kehe foki ha lautolu a tau teliga mai he kupu moli, ka e hagao atu ke he tau tala tuai. Ka ko koe, kia nofo fakalatalata a koe ke he tau mena oti, kia fakauka ke he tau mena ke mamahi ai, kia eke e gahua he tagata fakamatala vagahau mitaki, [“kia taute katoatoa hau a fekafekauaga,” NW].”​—2 Timoteo 4:3-5.

3. Ko e heigoa kua lata ke taute ke nakai fakaohooho kelea he tau fakaakoaga fakavai e tuaga fakaagaga he fakapotopotoaga?

³ Ke iloa moli kua nakai fakaohooho kelea mai e tau fakaakoaga fakavai ke he tuaga fakaagaga he fakapotopotoaga, kua lata he leveki ke fakatatai atu ke he fakatonuaga ha Paulo: ‘Kia taofi hau a mataala ke he tau mena oti, kia taute katoatoa hau a fekafekauaga.’ (2 Timoteo 4:5) E, ko e motua kua lata ke ‘fakakatoatoa hana fekafekauaga.’ Kua lata ke taute ai ke he tau puhala katoatoa, po ke ke he tau fahi oti. Ko e motua ne taute katoa e fekafekauaga hana kua mamata fakamitaki atu ke he tau kotofaaga oti hana, ti nakai fai mena ne fakaheu po ke taute mahafahafa ni. Ko e tagata tane pihia kua tua fakamoli foki ke he tau mena ikiiki.​—Luka 12:48; 16:10.

4. Ko e heigoa ka lagomatai a tautolu ke fakakatoatoa e fekafekauaga?

⁴ Ke taute katoatoa e fekafekauaga ha tautolu kua nakai lata tumau ke moua e magaaho lahi, ka kua latatonu ke fakaaoga fakamitaki e magaaho. Ko e fakaholoaga ne lagotatai kua maeke ke lagomatai e tau Kerisiano oti ke fakakatoatoa e tau gahua he fekafekauaga. Ke fakalahi atu e magaaho ka fakaaoga ke he fekafekau he fonua, ko e motua kua lata ke taute e fakatokatokaaga fakatagata mitaki ke fakalagotatai aki e setulu hana mo e ke iloa ko e heigoa ka tufa ke he falu mo e puhala ke taute ai. (Heperu 13:17) Maali ai, ko e motua fakalilifu kua taute foki e vala hana, ke tuga a Nehemia, ne putoia fakatagata a ia he liu ati e tau kaupa i Ierusalema. (Nehemia 5:16) Ti ko e tau fekafekau oti ha Iehova kua lata ke fakalataha tumau ke he gahua fakamatala he Kautu.​—1 Korinito 9:16-18.

5. Lata ke fefe e logonaaga ha tautolu ke he fekafekauaga?

⁵ Ko e poakiaga fiafia ha ia ne moua e tautolu ko e tau tagata fakapuloa he Kautu ne fakatu i luga  he lagi! Moli lahi hane tokiofa e tautolu e kotofaaga ha tautolu he fakalataha ke he fakamatalaaga he tala mitaki ke he lalolagi katoa ato hoko e fakahikuaga. (Mataio 24:14) Pete he nakai mitaki katoatoa a tautolu kua lata ia tautolu ke fakamalolo he tau kupu ha Paulo: “Ka e ha ha ia mautolu e koloa nai [he fekafekauaga] ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.” (2 Korinito 4:7) E, maeke ia tautolu ke foaki e fekafekau mitaki lahi​—ka e maeke ni ha ko e malolo mo e pulotu mai he Atua.​—1 Korinito 1:26-31.

Fakaata e Lilifu he Atua

6. Ko e heigoa e fakatataiaga ne ha ha he vahaloto ha Isaraela moli mo e tau Isaraela fakaagaga?

⁶ Hagaao ke he tau Kerisiano fakauku, ne talahau e Paulo, ko e Atua ‘kua taute a tautolu kia lata ke eke mo tau fekafekau ke he maveheaga fou.’ Ne fakatatai he aposetolo e maveheaga fou ne taute mo Isaraela fakaagaga he puhala ia Iesu Keriso mo e Fakatufono tuai ne mavehe mo e tau Isaraela moli he puhala ia Mose. Ne lafi e Paulo ko e magaaho ne hifo mai a Mose he Mouga ko Sinai mo e tau lapa maka ne tohi ai e Tau Fakatufono Hogofulu, ne kikila lahi e fofoga hana ti nakai maeke e tau Isaraela ke onoono fakahako atu ki ai. Fai magaaho, mogoia, ne fai mena lahi atu foki ne tupu ha kua “fakapouligia ha lautolu a tau manatu” ti ufiufi ai e tau loto ha lautolu. Ka e, ka liliu ke haga atu ki a Iehova he loto fakamoli katoatoa, ti utakehe e ufiufi. Hagaao mogonei ke he fekafekauaga ne foaki ki a lautolu he maveheaga fou, ne pehe a Paulo: ‘Ko tautolu oti, kua kitekite ke he fakaata mo e mata nakai ufia ke he lilifu ha Iehova.’ (2 Korinito 3:6-8, 14-18; Esoto 34:29-35) Ko e “mamoe kehe” ha Iesu he vaha nei kua monuina foki ke fakaata e lilifu ha Iehova.​—Ioane 10:16.

7. Maeke fefe he tau tagata ke fakaata e lilifu he Atua?

⁷ Maeke fefe he tau tagata agahala ke fakaata e lilifu he Atua, ka e nakai maeke he ha tagata ke moui ka kitia e fofoga hana? (Esoto 33:20) Taha mena foki, ke lafi ke he lilifu fakaperesona ha Iehova, kua ha ha ai foki e finagalo lilifu ue atu hana ke fakatokoluga hana pule katoatoa he puhala he hana Kautu. Ko e kupu moli ne matutaki ke he Kautu nukua fakatu e taha vala he “tau mena mahomo ue atu he Atua” ne kamata ke fakapuloa e lautolu ne liligi hifo ki ai e agaga tapu he Penetekoso 33 V.N. (Gahua 2:11, NW) Mo e takitakiaga he agaga, kua maeke ia lautolu ke taute katoatoa e fekafekauaga ne kotofa ki a lautolu.​—Gahua 1:8.

8. He hagaao ke he fekafekauaga, ko e heigoa ne fakamalolo a Paulo ke taute?

⁸ Ne fakamalolo a Paulo ke nakai fakatauhele he taha mena a ia mai he fakakatoatoa e fekafekauaga hana. Ne tohia e ia: “Ko e mena ia kua nakai fakalolelole ai a mautolu ha ha ia mautolu e [“fekafekauaga,” NW] nai, ha kua ofania a mautolu. Ka kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua; ka kua fakailoa a mautolu ke he tau loto manamanatu he tau tagata oti ki mua he Atua he fakakite atu e mautolu e kupu moli.” (2 Korinito 4:1, 2) Ke he mena ne ui e Paulo ko e “fekafekauaga nai,” nukua fakakite ai e kupu moli mo e folafola e maama fakaagaga ke he lalolagi katoa.

9, 10. Maeke fefe ke fakaata e lilifu ha Iehova?

⁹ Hagaao ke he Punaaga he maama fakatino mo e fakaagaga, ne tohia e Paulo: “Ko e Atua, ko ia ne tala age kia kikila mai e maama he pouli,  kua fakakikila mai a ia ke he tau loto ha mautolu, ko e maama ke iloa ai e lilifu he Atua ke he fofoga a Iesu Keriso.” (2 Korinito 4:6; Kenese 1:2-5) Ha kua foaki ki a tautolu e kotofaaga mitaki lahi nei ke eke mo tau fekafekau he Atua, kia fakatumau a tautolu ke mea ke tatai a tautolu mo e tau fakaata ne fakakikila e lilifu ha Iehova.

¹⁰ Ko e tau tagata he pouligia fakaagaga kua nakai maeke ke kitia e lilifu ha Iehova po ke fakaata ia mai ia Iesu Keriso, ko Mose ne Mua. Ka e ko e tau fekafekau ha Iehova, kua moua e tautolu e maama mitaki lahi mai he tau Tohiaga Tapu mo e fakaata atu ai ke he falu. Kaeke ke hao mai a lautolu ia mogonei ne pouligia fakaagaga he fakaotiaga, kua lata ia lautolu ke moua e maama mai he Atua. Mo e olioli lahi mo e fakamakutu, mogoia, kua omaoma a tautolu ke he poaki faka-Atua ke toka e maama ke kikila mai he pouligia ke he lilifu ha Iehova.

Fakakikila e Maama ha Mutolu he Tau Fakaakoaga Tohi Tapu he Kaina

11. Ko e heigoa ne talahau e Iesu hagaao ke fakakikila e maama ha tautolu, mo e heigoa taha puhala ke taute e mena nei ke he fekafekauaga ha tautolu?

¹¹ Ne tala age a Iesu ke he tau tutaki hana: “Ko mutolu, ko e maama he lalolagi a mutolu. Nakai maeke ke galo e māga kua fakatu i luga he mouga. Nakai tugi foki e lautolu e lamepa ti toka ai i lalo he kumete, ka e toka ki luga he tokaaga lamepa, ke kikila atu ai kia lautolu oti ha ha he fale. Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.” (Mataio 5:14-16) Ko e mahani mitaki ha tautolu ka fakaohooho e falu ke foaki e lilifu ke he Atua. (1 Peteru 2:12) Ti ko e tau puhala kehekehe he gahua fakamatala ha tautolu kua foaki ki a tautolu e tau magaaho loga ke fakakikila e maama ha tautolu. Taha foliaga ne mua ha tautolu ke fakaata e maama fakaagaga mai he Kupu he Atua he takitaki e tau fakaakoaga Tohi Tapu he kaina ne kua lauia mitaki. Ko e puhala aoga lahi ainei ke fakakatoatoa e fekafekauaga ha tautolu. Ko e heigoa e tau pulega ka lagomatai a tautolu ke takitaki e tau fakaakoaga Tohi Tapu nukua aamotia e tau loto ha lautolu hane kumi e kupu moli?

12. Matutaki fefe e liogi ke he gahua he takitaki e tau fakaakoaga Tohi Tapu he kaina?

¹² Ko e liogi ki a Iehova hagaao ke he mena nei ka fakatata e fakamakai lahi ha tautolu ke takitaki e tau fakaakoaga Tohi Tapu. Fakakite foki kua kitia e tautolu e aoga he lagomatai falu ke moua e iloilo he Atua. (Esekielu 33:7-9) To tali moli e Iehova e tau liogi ha tautolu mo e fakamonuina e tau laliaga fakamakutu ha tautolu ke he fekafekauaga. (1 Ioane 5:14, 15) Ka e nakai liogi hokoia a tautolu ke moua taha tagata ke takitaki mo ia e fakaakoaga Tohi Tapu he kaina. He mole he fakatu e tautolu e fakaakoaga, ko e liogi mo e manamanatu hokulo hagaao ke he tau manako pauaki he tagata fakaako Tohi Tapu ka lagomatai a tautolu ke takitaki e tau fakaakoaga takitaha ke he puhala kua lauia mitaki.​—Roma 12:12.

13. Ko e heigoa ka lagomatai a tautolu ke takitaki e tau fakaakoaga Tohi Tapu he kaina ne lauia mitaki?

¹³ Ke takitaki e tau fakaakoaga Tohi Tapu he kaina ne lauia mitaki, kua lata ia tautolu ke tauteute fakamua ma e tau fakaakoaga takitaha. Kaeke ke logona e tautolu e maimaina, liga kua lagomatai lahi ke kitekite ke he puhala ne takitaki he leveki Fakaakoaga Tohi he Fakapotopotoaga e tau fakaakoaga he tau vahatapu takitaha. Ke he falu magaaho, liga maeke ia tautolu ke hoa mo e tau tagata fakamatala he Kautu ne moua e tau fua mitaki he takitaki e tau fakaakoaga Tohi Tapu he kaina. Moli ai, ko e aga mo e tau puhala fakaako ha Iesu Keriso kua latatonu ke manamanatu a tautolu ki ai.

14. Maeke fefe ia tautolu ke hokotia ke he loto he tagata fakaako Tohi Tapu?

¹⁴ Ne fiafia lahi a Iesu ke taute e finagalo he Matua hana he lagi mo e tutala ke he falu hagaao ke he Atua. (Salamo 40:8) Kua loto molu a ia mo e kautu he hokotia ke he tau loto ha lautolu ne fanogonogo ki a ia. (Mataio 11:28-30) Kia lali mogoia a tautolu ke hokotia ke he tau loto he tau tagata fakaako Tohi Tapu ha tautolu. Kaeke ke taute pihia e tautolu, lata ia tautolu ke mautauteute ma e tau fakaakoaga takitaha mo e manamanatu ke he tau tutuaga pauaki he tagata fakaako. Ke tuga anei, kaeke hau a ia he aga fakamotu ne nakai fai feakiaga ke he Tohi Tapu, liga lata ia tautolu ke fakakite ki a ia na moli e Tohi  Tapu. Ko e mena ia kua latatonu ia tautolu ke totou mo e fakamaama e tau kupu tohi loga.

Lagomatai e Tau Tagata Fakaako ke Maama e Tau Fakataitaiaga

15, 16. (a) Liga maeke fefe ia tautolu ke lagomatai e tagata fakaako ne nakai maama e fakataiaga ne fakaaoga i loto he Tohi Tapu? (e) Ko e heigoa kua maeke ia tautolu ke taute kaeke fakaaoga he taha tohi ha tautolu e fakataiaga ne uka ma e taha tagata fakaako Tohi Tapu ke maama?

¹⁵ Liga nakai mahani e tagata fakaako Tohi Tapu mo e falu a fakataitaiaga ne fakaaoga i loto he tau Tohiaga Tapu. Ke fakatai ki ai, liga nakai maama e ia e kakano ha Iesu he magaaho ne vagahau a ia ke tuku e lamepa i luga he tokaaga lamepa. (Mareko 4:21, 22) Ne hagaao a Iesu ke he lamepa i tuai mo e kave vavae ke tugi aki. Ko e lamepa pihia kua tuku he tuaga pauaki ti kikila ke he fahi ia he fale. Ke kumikumi ke he tau mataulu “Lamepa” mo e “Tokaaga Lamepa” i loto he tau tohi tuga e Insight on the Scriptures ne kua lata ke fakamahino aki e fakataitaiaga ha Iesu. * Ka e ko e palepale mitaki ha ia ke hau ke he fakaakoaga Tohi Tapu mo e fakamaamaaga ne kua maama mo e loto fakaaue ki ai e tagata fakaako!

¹⁶ Liga fakaaoga e tohi lagomatai ke he Tohi Tapu e fakataiaga ne kua uka ma e tagata fakaako ke maama. Kia fakamaama fakatekiteki ai, po ke fakaaoga taha fakataiaga ne fakakite e manatu taha ia. Kau kua peehi he tohi ko e hoa mitaki mo e tau laliaga kaufakalataha kua aoga lahi ke he fakamauaga. Ke fakatai e mena nei, liga fakaaoga e tagata ne fakamagega mai he geka tokoluga, ti fakatoka ai, he falanaki ke he taha tagata he taha fahi ke hapo a ia. Taha puhala foki, ko e lata ma e hoa mitaki mo e tau laliaga kaufakalataha ka fakataitai he puhala ne kauauloa e tau tagata gahua ke fakaoloolo e tau puha he magaaho ka aau e toga.

17. Ko e heigoa kua lata ke ako e tautolu hagaao ke he tau fakataitaiaga ha Iesu?

¹⁷ He fakaaoga taha fakataiaga foki kua lata ke mautauteute tuai. Ka e, ko e taha puhala a ia ke fakakite e fiafia fakatagata ha tautolu ke he tagata fakaako Tohi Tapu. Fakaaoga e Iesu e tau fakataitaiaga mukamuka ke fakamahino aki e tau matakupu uka. Ko e hana Lauga he Mouga ne foaki e fakafifitakiaga ke he mena nei, mo e fakakite he Tohi Tapu ko e fakaakoaga hana kua lauia mitaki ke he hana tau tagata fanogonogo. (Mataio 5:1–7:29) Ne fakamaama fakatekiteki e Iesu e tau mena ha ko e hana a fiafia lahi ke he falu.​—Mataio 16:5-12.

18. Ko e heigoa kua lata ke taute hagaao ke he tau kupu tohi ne tohia noa i loto he tau tohi?

¹⁸ Ko e fiafia ha tautolu ke he falu ka omoi a tautolu ke ‘vagavagahau mai he tau Tohiaga Tapu.’ (Gahua 17:2, 3) Kua lata ai ke fakaako mo e liogi he fakaaoga fakapulotu e tau tohi ne moua he puhala he “fekafekau pule.” (Luka 12:42-44) Ke tuga anei, ko e tohi Iloilo ne Takitaki Atu ke he Moui Tukulagi ne fatiaki loga e tau kupu tohi. * Ha ko e kaupaaga he tau lau tohi, ne tohia noa ni falu. He magahala he fakaakoaga Tohi Tapu, kua aoga ke totou mo e fakamaama falu he tau kupu tohi nei ne tohia noa. Ha ko e mena, ko e fakaakoaga ha tautolu nukua fakave ke he Kupu he Atua, ti ha ha i ai e malolo ne mua. (Heperu 4:12) Hagaao atu ke he Tohi Tapu he fakaakoaga katoa, he fakaaoga tumau e tau kupu tohi ne moua i loto he tau paratafa. Lagomatai e tagata fakaako ke kitia e mena ne talahau he Tohi Tapu hagaao ke he taha matakupu po ke puhala taute mena. Eketaha ke fakakite  ki a ia e puhala ka aoga a ia mai he omaoma ke he Atua.​—Isaia 48:17, 18.

Huhu e Tau Huhu ne Fakalagalaga Manamanatu

19, 20. (a) Ko e ha kua fakaaoga e tau huhu fakalagalaga ka takitaki e fakaakoaga Tohi Tapu he kaina? (e) Ko e heigoa ka taute kaeke lata ke fakatutala fakalaulahi atu ke he taha matakupu?

¹⁹ Ko e fakaaoga makaka ha Iesu he tau huhu nukua lagomatai e tau tagata ke manamanatu. (Mataio 17:24-27) Kaeke huhu e tautolu e huhu fakalagalaga ne nakai fakama e tagata fakaako Tohi Tapu, liga fakakite he hana tau tali e manatu hana hagaao ke he taha matakupu. Liga iloa ai e tautolu hane kuku agaia a ia ke he tau manatu nakai mai he Tohi Tapu. Ke tuga anei, liga talitonu a ia ke he Tolu Taha. He veveheaga 3, ne fakakite he tohi Iloilo kua nakai moua e kupu “Tolu Taha” i loto he Tohi Tapu. Ne fatiaki mo e tohia he tohi e tau kupu tohi ne fakakite na kehe a Iehova mai ia Iesu mo e agaga tapu ko e malolo gahuahua he Atua, nakai ko e tagata. He totou mo e fakatutala ke he tau kupu Tohi Tapu nei nukua latatonu ni. Ka e kua ka manako ke fai lagomatai foki? Liga ka oti e fakaakoaga ka hau, lata ke fakaaoga taha magaaho ke fakatutala fakamitaki ke he matakupu nei ne ha ha he taha tohi he Tau Fakamoli a Iehova, tuga e porosua Should You Believe in the Trinity? Oti mogoia, ti tutaki atu ha tautolu a fakaakoaga he fakaaoga e tohi Iloilo.

²⁰ Liga ko e tali fakalata he tagata fakaako ke he huhu fakalagalaga kua ofogia po ke fakalolelole foki. Kaeke ko e ula, po ke falu matakupu fakaeneene ne putoia ki ai, liga tala age e tautolu ke fakaholo atu e fakaakoaga ka e fakatutala ke he matakupu he magaaho fakamui. He iloa hane ula agaia e tagata fakaako ka taute a tautolu ke kumi e vala tala nukua lomi ke lagomatai e tagata fakaako ke taute e tolomaki fakaagaga. He eketaha a tautolu ke hokotia ke he loto he tagata fakaako, lata ia tautolu ke liogi ki a Iehova ke lagomatai a ia ke tupu fakaagaga.

21. Ko e heigoa ka tupu ka hikihiki e tautolu e tau puhala fakaako ha tautolu ke lata mo e tau manako pauaki he tagata fakaako Tohi Tapu?

²¹ Fakalataha e mautauteute mitaki mo e lagomatai ha Iehova, to maeke moli a tautolu ke hikihiki e tau puhala fakaako ha tautolu ke lata mo e manako pauaki he tagata fakaako Tohi Tapu. He fai magaaho ka mole, maeke ia tautolu ke lagomatai a ia ke feaki e fakaalofa ma e Atua. Liga kautu foki a tautolu he atihake e fakalilifu mo e loto fakaaue ma e fakatokatokaaga ha Iehova. Mo e mafanatia ha ia ka talahau he tagata fakaako Tohi Tapu ‘ko e moli ha ha ia tautolu e Atua’! (1 Korinito 14:24, 25) Kia takitaki ai e tautolu mogoia e tau fakaakoaga Tohi Tapu lauia mitaki mo e taute e tau mena kua fahia ki ai a tautolu ke lagomatai falu ke eke mo tau tutaki ha Iesu.

Ko e Koloa Lata ke Tokiofa

22, 23. Ko e heigoa kua lata kaeke ke fakakatoatoa e fekafekauaga ha tautolu?

²² Ke fakakatoatoa e fekafekauaga ha tautolu, kua lata ia tautolu ke falanaki ke he malolo ne foaki he Atua. Hagaao ke he fekafekauaga, ne tohia a Paulo ke he tau Kerisiano fakauku: “Ha ha ia mautolu e koloa nai ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.”​—2 Korinito 4:7.

²³ Pete ko e tau tagata fakauku po ke he “mamoe kehe,” kua tatai mo e tau kapiniu kelekele lolelole a tautolu. (Ioane 10:16) Pete ia, maeke ia Iehova ke foaki ki a tautolu e malolo ne kua lata ke fakakatoatoa aki e tau kotofaaga ha tautolu pete ko e tau pehiaaga ne tutupu ki a tautolu. (Ioane 16:13; Filipi 4:13) Kia falanaki katoatoa ai a tautolu ki a Iehova, tokiofa e koloa he fekafekauaga ha tautolu, mo e taute katoatoa e fekafekauaga ha tautolu.

[Tau Matahui Tala]

To Tali Fefe e Koe?

• Ko e heigoa he tau motua kua lata ke taute ke fakakatoatoa e fekafekauaga ha lautolu?

• Maeke fefe ia tautolu ke fakaholo ki mua e lauia mitaki he ha tautolu a tau fakaakoaga Tohi Tapu he kaina?

• Ko e heigoa hau ka taute kaeke nakai maama he tagata fakaako Tohi Tapu e fakataiaga po ke lata ke moua atu foki falu vala tala ke he matakupu pauaki?

[Tau Huhu he Fakaakoaga]

[Fakatino he lau 14]

Kua fakaako e tau motua Kerisiano i loto he fakapotopotoaga mo e lagomatai ke fakamahani e tau katofia talitonu ke he fekafekauaga

[Fakatino he lau 16]

Takitaki e tau fakaakoaga Tohi Tapu he kaina ko e taha puhala ke fakakikila e maama ha tautolu