Mauokafua ke he Agaga he Atua he Fehagai mo e Tau Hikihikiaga he Moui

“Kia lalilali atu a koe kia eke a koe mo tagata kua fiafia ki ai e Atua.”​—2 TIMOTEO 2:15.

1. Ko e heigoa e tau hikihikifano kua paleko ke he tuaga fakaagaga ha tautolu?

KUA hikihikifano tumau e lalolagi ne viko takai ia tautolu. Kua kitia e tautolu e tau mena fakasaiene mo e tau holoaga mafiti fulufuluola he tau matini he vaha fou nei ne fakataufata mo e malolo hifo lahi he tau mahani kua aoga. He tutala a tautolu he vala tala fakamua, kua lata e tau Kerisiano ke totoko e agaga he lalolagi ne nakai mai he Atua. He hiki e lalolagi, mogoia, kua hiki foki a tautolu ke he tau puhala loga. Kua tutupu hake a tautolu mai he vaha tama ke he vaha motua. Liga to moua po ke galo ia tautolu e muhukoloa, tino malolo, mo lautolu e tau fakahele. Ko e loga he tau hikihikiaga pihia kua molea atu he taofiaga ha tautolu, ti maeke ke fakakite e tau paleko fou mo e matakutakuina ke he tuaga fakaagaga ha tautolu.

2. Fefe e moui ha Tavita he tutupu e tau hikihikiaga?

² Tokogahoa e tagata ne moua e tau hikihikiaga lalahi mamahaki pihia he tau momoui ha lautolu tuga a Tavita, ko e tama tane a Iese. Ne tupu hake mafiti a Tavita ko e  tama tane leveki mamoe ke talahaua ko e toa he motu. He magaaho fakamui ne eke a ia mo tagata hola fano, ha kua tatao he patuiki mahekeheke a ia tuga e manu. He mole e mena ia, ne eke a Tavita mo patuiki mo e tagata kua kautu. Ne fakauka a ia ke he tau fua mamahi he agahala kelea lahi mahaki. Ne mamahi matematekelea a ia mo e mavehevehe fano e magafaoa hana. Ne muhukoloa a ia, ti fuakau, mo e moua e tau matulituli he motua e tino. Pete ne tau hikihikiaga loga he moui hana, ne fakatata e Tavita e mauokafua mo e falanaki tumau ki a Iehova mo e Hana agaga. Ne lalilali a ia ke eke mo tagata “kua fiafia ki ai e Atua,” ti fakamonuina he Atua a ia. (2 Timoteo 2:15) Pete ni kua kehe e tau tutuaga ha tautolu mai ia Tavita, kua maeke ia tautolu ke ako mai e puhala ne taute aki hana moui. Kua lagomatai he fakafifitakiaga hana a tautolu ke maama e puhala kua maeke ia tautolu ke fakatumau ke moua e lagomatai he agaga he Atua he fehagai a tautolu mo e tau hikihikiaga he tau momoui ha tautolu.

Fakatokolalo ha Tavita​—Ko e Fakafifitakiaga Mitaki

3, 4. Tu hake fefe a Tavita mai he tama tane leveki mamoe ke talahaua ke he motu?

³ Ko Tavita ko e tama tane nakai talahaua ki loto foki he magafaoa ni hana. He magaaho ne hau e perofeta ko Samuela ki Petelehema, ne foaki he matua tane ha Tavita e tokofitu he hana tau tama tane tokovalu. Ko Tavita, ko e tama tane fakahiku, ne toka ke leveki e tau mamoe. Ka e, na fifili e Iehova a Tavita ke eke mo patuiki ha Isaraela ki mui. Ne hea atu ki a Tavita ke hau he fonua. Holo atu e Tohi Tapu ke talahau: “Ti toto ai e Samuela e lupo hoe manu ne toka ai e puke lolo, ti fakauku e ia a ia ki mua hana tau matakainaga; ti hoko ai e [a]gaga a Iehova kia Tavita, ne kamata mai he aho ia ni.” (1 Samuela 16:12, 13) Ne mauokafua a Tavita ke he agaga ia he moui katoa hana.

⁴ Nakai leva ne tu hake e tama tane leveki mamoe nei ke talahaua ke he motu. Ne ui atu ki a ia ke fina atu ke he patuiki mo e ta leo fakatagitagi ma hana. Ne keli e ia e toa ko Koliato, ko e tupua vale lahi ne kua matakutaku foki e tau kautau makaka ha Isaraela ke fakafehagai mo ia. Ne kotofa ki luga he tau tagata tane he tau, ne kautu a Tavita he fehagai tau mo e tau Filisitia. Ne ofania he tau tagata a ia. Ne fati e lautolu e tau lologo fakaheke ki a ia. Ke he kamataaga, ne fakamaama atu he taha ke he Patuiki ko Saulo ne nakai ni ko Tavita kua ‘iloilo he ta’ e kitara ka e “ko e tagata malolo a ia, to toa, mo e pulotu a ia he vagahau, ko e tagata tino mitaki a ia.”​—1 Samuela 16:18; 17:23, 24, 45-51; 18:5-7.

5. Ko e heigoa ke taute a Tavita ke fakaikaluga, ti iloa fefe e tautolu kua nakai pihia a ia?

 ⁵ Ko e talahaua, mata mitaki, fuata, vagahau fakalotomatala, iloilo ta leo fakatagitagi, makaka fakakautau, talia faka-Atua​—ne moua oti ai e Tavita e tau mena ia. Maeke he taha he tau mena oti nei ke taute a ia ke fakaikaluga, ka e nakai fai ne taute a ia ke pihia. Mailoga e tali ha Tavita ke he Patuiki ko Saulo, ne age e tama fifine hana mo hoana ha Tavita. Mo e fakatokolalo moli, ne pehe a Tavita: “Ko hai kia au? ko e heigoa foki haku a moui, mo e magafaoa he haku a matua ia Isaraela, kia eke ai au mo figona he patuiki?” (1 Samuela 18:18) He talahau e manatu ke he kupu nei, ne tohi he taha tagata fakaako tokoluga: “Ne kakano a Tavita, nakai ko e tau pulotu fakatagata, po ke talahauaga he hana tuaga he kaufakalatahaaga tagata, po ke ha ko e hana matohiaga, maeke ia ia ke fakatupua fakatote ke he lilifu he eke mo figona he patuiki.”

6. Ko e ha kua lata ia tautolu ke feaki e fakatokolalo?

⁶ Ne fakave e fakatokolalo ha Tavita ke he mailogaaga kua mahomo hake a Iehova ke he tau tagata nakai mitaki katoatoa he tau puhala oti. Ne ofogia a Tavita ha kua mailoga foki he Atua e tagata. (Salamo 144:3) Ne iloa foki e Tavita ko e ha mua ue atu ne liga moua e ia kakano ni ha kua fakakite e Iehova e fakatokolalo, he tukutuku hifo a ia ke fakatumau, puipui, mo e leveki a ia. (Salamo 18:35) Ko e fakaakoaga fulufuluola ha ia ma tautolu! Ko e tau taleni ha tautolu, tau mouaaga ha tautolu, mo e tau kotofaaga ha tautolu kua lata ke nakai taute a tautolu ke fakatokoluga. “Ko e heigoa foki e mena ha ha ia koe kua nakai foaki atu ai?” he tohi he aposetolo ko Paulo. “Kaeke foki kua foaki atu kia koe, ti ko e heigoa e mena kua hula ai a koe tuga e mena kua nakai foaki atu ni?” (1 Korinito 4:7) Ke moua e agaga tapu he Atua mo e ke olioli hana taliaaga, kua lata ia tautolu ke feaki mo e fakatumau e fakatokolalo.​—Iakopo 4:6.

“Aua Neke Taui Atu e Mutolu”

7. Ko e heigoa e magaaho ke tamate e Patuiki ko Saulo ne tuku age ki a Tavita?

⁷ He nakai fakalagalaga he talahaua ha Tavita ha fakatokoluga he hana loto, ne tupu mai e mahekeheke kelipopo he Patuiki ko Saulo, ne nakai ha i ai e agaga he Atua. He nakai fai mena kelea ne taute e Tavita, ne hola a ia ma e moui hana ti nofo ai ke he tutakale. Ke he taha magaaho, he tutuli tumau ki a Tavita, ne fina atu e Patuiki ko Saulo ke he ana, mo e nakai iloa kua fakamumuli a Tavita mo e hana kau i loto. Ne fakamakamaka e tau tagata ha Tavita ki a ia ke fakaaoga e magaaho na ne tuga na age he Atua ke tamate a Saulo. Liga fakatino noa e tautolu a lautolu he pouli, hane fanafana ki a Tavita: “Kitiala, ko e aho hanai, ne pehe mai ai a Iehova hau a Atua kia koe, Kitiala, to tuku atu e au ke he lima hāu a ia ne fai fi kia koe, ti eke e koe kia ia e tau mena kua loto a koe ki ai.”​—1 Samuela 24:2-6.

8. Ko e ha ne fakamamao e Tavita a ia mai he taui atu?

⁸ Ne nakai talia a Tavita ke fakamamahi a Saulo. He fakagahuahua e tua mo e fakauka, ne fiafia a ia ke toka atu ni ki a Iehova. He toka he patuiki e ana, ne hea atu a Tavita ki a ia mo e pehe: “Kia fakafili e Iehova kia taua mo koe, mo e taui atu e Iehova kia koe ha ko au; ka ko e lima haku, nakai hoko ia kia koe.” (1 Samuela 24:12) Pete ni he iloa e ia na hepe  a Saulo, ne nakai taui atu e Tavita; po ke vagahau kelea a ia ki a Saulo po ke hagaao ki a ia. Ke he falu magaaho foki, ne fakamamao mai e Tavita a ia he eke mo tagata taui. Kehe ai, ne mauokafua a ia ki a Iehova ke fakahakohako e mena ne tupu.​—1 Samuela 25:32-34; 26:10, 11.

9. Ko e ha kua nakai lata ke taui atu a tautolu kaeke ke moua e tautolu e totokoaga po ke favaleaga?

⁹ Tuga a Tavita, to moua e koe e tau tutuaga kamatamata. Liga totoko po ke favale ki a koe e tau kapitiga aoga, tau tagata gahua auloa, tau tagata he magafaoa, po ke falu ne nakai fakalataha mo koe ke he tua hau. Kia nakai taui atu. Fakatali ki a Iehova, he ole ki a ia ma e hana agaga tapu ke lagomatai a koe. Liga ko lautolu ne nakai talitonu ka fiafia ha ko e mahani mitaki hau mo e to eke foki a lautolu mo tau tagata talitonu. (1 Peteru 3:1) Ko e ha mena ni kua tupu, kia nakai fakauaua ko e mena kitia e Iehova e tuaga hau mo e to taute e ia taha mena ke he magaaho ni hana. Ne tohi he aposetolo ko Paulo: ‘Ko e tau fakahelehele na e, aua neke taui atu e mutolu, ka kia fakatokatoka atu ke he ita; ha kua tohi mai, Kua pehe mai a Iehova, Ha ha ia au ke taui atu, to taui atu e au ni.’​—Roma 12:19.

‘Fanogonogo ke he Akonakiaga’

10. Veli fefe a Tavita ke he agahala, ti lali fefe a ia ke ufiufi ai?

¹⁰ Mole atu e tau tau. Ne eke a Tavita mo patuiki fakahele kua talahaua lahi mahaki. Ko e puhala moui hana he tua fakamoli kua kehe lahi, fakalataha mo e tau salamo fulufuluola ne tohi e ia ke fakaheke a Iehova, kua liga mukamuka ke foaki e kitiaaga ko e tagata hanei ka nakai veli ke he agahala kelea lahi mahaki. Ka e, veli a ia. Taha aho, ne onoono hifo e patuiki he tuafale hana ke he fifine fulufuluola hane koukou a ia. Ne huhu atu a ia. He iloa ko Patesepa e fifine mo e ko e tane hana, ko Uria, kua fano he tau, ne fakafano atu e Tavita ke tamai a Patesepa mo e momohe mo ia. Fakamui, ne iloa e Tavita kua fatu tuai a ia. Ko e mena fakalialia ha ia hanei ka holofa fano kaeke ke iloa ai! I lalo he Fakatufono faka-Mose, ko e mahani faivao ko e matahavala makimaki. Ne manatu moli e patuiki to ufiufi ai e agahala. Ti fakafano atu e ia e kupu ke he takitaki kau, he poaki ke liu mai a Uria ki Ierusalema. Ne amanaki a Tavita to momohe a Uria he po mo Patesepa, ka e nakai hoko e mena ia. He tupetupe lahi mogonei, ne liu a Tavita fakafano a Uria ke he tau mo e tohi ki a Ioapo, ko e takitaki kau. Ne hagaaki e tohi ke tuku a Uria ke he tuaga he male tau ne maeke ke tamate a ia. Ne omaoma a Ioapo, ti tamate a Uria. Ki a Patesepa, he magaaho ne mole atu e mahaniaga he magahala fakatutuku, ne uta e Tavita a ia mo hoana hana.​—2 Samuela 11:1-27.

11. Ko e heigoa e tuaga ne tala age e Natano ki a Tavita, ti tali atu fefe a ia ki ai?

¹¹ Ne tuga kua gahua e lagatau, ka e na lata ia Tavita ke iloa kua iloa katoa e Iehova e mena ne tupu. (Heperu 4:13) Fai mahina he mole, ti fanau e tama. Ti, ke he takitakiaga he Atua, ne fano e perofeta ko Natano ki a Tavita. Ne tala age he perofeta e tuaga ke he patuiki ko e tagata tane muhukoloa ne loga e tau mamoe hana ne uta mo e tamate e mamoe taha maka  he tagata nofogati. Ne fakalagalaga he tala e manamanatuaga fakafili tonu ha Tavita ka e nakai fai tuaha ai ke he ha kakano galo. Ne mafiti a Tavita ke fakafili e tagata mautu. He ita lahi, ne tala age a ia ki a Natano: “To mate ni e tagata kua eke e mena ia.”​—2 Samuela 12:1-6.

12. Ko e heigoa e fakafiliaga ne foaki e Iehova ki a Tavita?

¹² “Ko koe ni ko e tagata ia,” he tali he perofeta. Ne fakafili ni e Tavita a ia. Nakai fakauaua ai, ne tupu mafiti e ita lahi ha Tavita he fakama lahi mahaki mo e momoko hokulo. Ofomate ai, ne fanogonogo a ia ki a Natano he foaki e fakafiliaga nakai fai fakahaoaga ha Iehova. Nakai fai kupu fakamafanatia po ke fakatotoka. Ne tiaki e Tavita e kupu ha Iehova he taute e mena ne kelea. Nakai kia tamate e ia a Uria aki e pelu he fi? To nakai utakehe e pelu mai he fale a Tavita. Nakai kia uta fufu e ia e hoana ha Uria? Ko e kelea pihia to hoko ki luga hana, nakai fufu, ka e fakakitia ai.​—2 Samuela 12:7-12.

13. Tali atu fefe a Tavita ke he akonakiaga ha Iehova?

¹³ Ke he hehe ha Tavita, ne nakai fakatikai e ia hana agahala. Ne nakai ita a ia ke he perofeta ko Natano. Ne nakai tukupau e ia e falu po ke fai mena ke piu ai ke he tau mena ne taute e ia. He fehagai mo e tau agahala hana, ne talia e Tavita e matagahua ia, he pehe: “Kua hala tuai au kia Iehova.” (2 Samuela 12:13) Ne fakakite he Salamo 51 e ita he hana agahala mo e hokulo he hana fakatokihalaaga. Ne ole a ia ki a Iehova: “Aua neke tiaki e koe au i mua hāu; aua foki neke uta kehe hāu a [a]gaga [t]apu ia au.” Ne talitonu a ia ko Iehova, he hana fakaalofa noa, to nakai tiaki “e loto malipilipi mo e pehia” ke he agahala. (Salamo 51:11, 17) Ne matutaki a Tavita ke mauokafua ke he agaga he Atua. He nakai ufiufi e Iehova a Tavita mai he tau fua kelea he agahala hana, ne fakamagalo e Ia a ia.

14. Kua lata ke tali atu fefe a tautolu ke he akonakiaga ha Iehova?

¹⁴ Nakai mitaki katoatoa oti a tautolu, ti agahala oti a tautolu. (Roma 3:23) Falu magaaho kua mokulu a tautolu ke he agahala kelea lahi mahaki, tuga a Tavita. Tuga ni e matua tane fakaalofa kua akonaki hana fanau, ti fakatonu e Iehova a lautolu ne kumi ke fekafekau ki a ia. Pete ni he aoga e akonaki, kua nakai mukamuka ai ke talia. Ke he falu magaaho kua “momoko ai.” (Heperu 12:6, 11) Ka e, kaeke ke ‘fanogonogo a tautolu ke he akonakiaga,’ to maeke a tautolu ke fakafeilo ki a Iehova. (Tau Fakatai 8:33) Ke olioli e monuina tumau he agaga ha Iehova, kua lata ia tautolu ke talia e fakatonuaga mo e gahua ke talia he Atua.

Aua Neke Amaamanaki ke he Tau Koloa Nakai Tumau

15. (a) Ke he tau puhala fe ne fakaaoga he falu tagata ha lautolu a muhukoloa? (e) Manako fefe a Tavita ke fakaaoga hana muhukoloa?

¹⁵ Nakai fai fakakiteaga kua hau a Tavita he feakiaga talahaua po ke kua muhukoloa e magafaoa hana. He magahala ne patuiki a ia, ne muhukoloa lahi mahaki a Tavita. He iloa e koe, na tokologa ne tatanaki ha lautolu a tau koloa, he tutuli lotokai ke fakatupu atu ki mua, po ke fakatau lotokai ai. Kua fakaaoga he falu e tau tupe ha lautolu ke fakamatalahi aki ni a lautolu. (Mataio 6:2) Kehe e puhala ne fakaaoga e Tavita hana muhukoloa. Ne manako lahi a ia ke fakalilifu a Iehova. Ki a Natano, ne talahau e Tavita hana manako ke talaga e faituga ki a Iehova ke tuku ai e puha he maveheaga, ne toka ai i Ierusalema mogoia, ne “ha i ai i loto he tau ie puipui.” Ne fakaaue a Iehova ke he tau foliaga ha Tavita ka e tala age ki a ia he puhala ia Natano na to talaga e Solomona ko e tama tane ha Tavita e faituga.​—2 Samuela 7:1, 2, 12, 13.

16. Ko e heigoa e tau tauteuteaga ne taute e Tavita ma e talagaaga he faituga?

¹⁶ Ne fakapotopoto e Tavita e tau koloa ke fakaaoga ke he gahua talaga makimaki nei. Ki a Solomona, ne pehe a Tavita: ‘Kua tauteute e au ma e fale a Iehova taha e teau afe taleni auro, mo e taha e afe taleni ario, mo e apakula mo e lapatoa nakai fafati he lahi ni; kua taute foki e au e tau akau mo e tau maka; ti lafilafi foki e koe ki ai.’ Mai he monuina fakatagata hana, ne foaki e ia 3,000 e tau taleni ario mo e 7,000 taleni auro. * (1 Nofoaga he  Tau Patuiki 22:14; 29:3, 4) Ko e foaki fakamokoi ha Tavita, ne nakai fia kitia, ka ko e fakakiteaga he tua mo e fakamoliaga ki a Iehova ko e Atua. He mailoga e Punaaga he hana tau monuina, ne pehe a ia ki a Iehova: “Ko e mena mai ia koe e tau mena oti ni; ko e tau mena hau foki kua ta atu ai e mautolu kia koe.” (1 Nofoaga he Tau Patuiki 29:14) Ko e loto fakamokoi ha Tavita ne omoi a ia ke taute e tau mena oti kua maeke ia ia ke fakatolomaki e tapuakiaga mea.

17. Fakagahua fefe e hatakiaga ia 1 Timoteo 6:17-19 ki a lautolu ne maukoloa mo e nonofogati?

¹⁷ Tatai ai, kia fakaaoga e tautolu e tau koloa fakatino ha tautolu ke taute e mitaki. He nakai tutuli e puhala velevelekoloa fakatino he moui, kua mitaki ke tutuli e taliaaga he Atua​—ko e puhala a ia he pulotu mo e fiafia lahi. Ne tohi e Paulo: “Kia tala age ke he tau maukoloa he mouiaga nai, aua neke fakatokoluga a lautolu, aua foki neke tua ke he koloa nakai tumau, ka ko e Atua moui kua foaki fakalahi mai e tau mena oti ke fiafia ai; kia mahani mitaki atu a lautolu, kia maukoloa a lautolu ke he tau gahua mitaki, kia fakamokoi, mo e ta atu noa e lautolu ha lautolu a tau mena. Kia tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.” (1 Timoteo 6:17-19) Pete ni e tuaga fakatupe ha tautolu, kia mauokafua a tautolu ke he agaga he Atua mo e tutuli e puhala he moui ka taute a tautolu ke ‘maukoloa ke he Atua.’ (Luka 12:21) Nakai fai mena ne mua e uho ka ko e tuaga talia ke he ha tautolu a Matua fakaalofa he lagi.

Eke a Koe mo Tagata kua Fakafiafia e Atua

18. Ke he puhala fe ne fakatoka e Tavita e fakafifitakiaga mitaki ma e tau Kerisiano?

¹⁸ He moui katoa hana, ne kumi e Tavita e taliaaga ha Iehova. He lologo, ne kalaga a ia: “Ko e Atua na e, kia fakaalofa mai a koe kia au, kia fakaalofa mai a koe kia au; ha kua tua ni au kia koe.” (Salamo 57:1) Kua nakai teao e falanaki hana ki a Iehova. Kua motua tuai a Tavita ‘ne makona hana moui.’ (1 Nofoaga he Tau Patuiki 23:1) Pete ni e taute e Tavita e tau hehe kelea lahi mahaki, ne manatu agaia ki a ia ko e taha he tau fakamoli tokologa he Atua ne fakatata e tua kehe lahi mahaki.​—Heperu 11:32.

19. Maeke fefe a tautolu ke fakakite mo tau tagata kua fiafia ki ai e Atua?

¹⁹ He fehagaaoaki a koe mo e tau tutuaga hikihikifano he moui, manatu tuga ni he fakatumau, fakamalolo, mo e fakatonu e Iehova a Tavita, ko e mena taha ia ka maeke ia Ia ke taute ma hau. Ko e aposetolo ko Paulo, tuga a Tavita, ne fehagai mo e loga he tau hikihikiaga he moui. Ka e, fakatumau foki a ia ke tua fakamoli he mauokafua ke he agaga he Atua. Ne tohi e ia: ‘Kua maeke ia au e tau mena oti kana ke he fakamalolo mai he Atua kia au.’ (Filipi 4:12, 13) Kaeke ke mauokafua a tautolu ki a Iehova, to lagomatai e ia a tautolu ke kautu. Kua manako a ia ke kautu a tautolu. Kaeke ke fanogonogo a tautolu ki a ia mo e fakatata ki a ia, to foaki e ia ki a tautolu e malolo ke taute hana finagalo. Mo e kaeke ke fakatumau a tautolu ke mauokafua ke he agaga he Atua, to maeke ia tautolu ke ‘eke a tautolu mo tau tagata kua fiafia ki ai e Atua’ he magaaho nei ke hoko ke he tukumalagi.​—2 Timoteo 2:15.

[Matahui Tala]

To Tali Fefe e Koe?

• Liga puipui fefe a tautolu mai he fakatokoluga?

• Ko e ha kua nakai lata ia tautolu ke taui atu ni e tautolu?

• Ko e heigoa e onoonoaga he akonakiaga kua lata ke ha ha ia tautolu?

• Ko e ha ne falanaki ke he Atua ka e nakai ke he tau monuina?

[Tau Huhu he Fakaakoaga]

[Fakatino he lau 28, 29]

Ne mauokafua a Tavita ke he agaga he Atua mo e tutuli hana taliaaga. Kua taute pihia nakai e koe?

[Fakatino he lau 30]

“Ko e mena mai ia koe e tau mena oti ni; ko e tau mena hau foki kua ta atu ai e mautolu kia koe”