Totoko e Agaga he Lalolagi Hikihikifano

‘Kua moua e tautolu nakai ko e agaga he lalolagi nai, ka ko e agaga mai he Atua.’​—1 KORINITO 2:12.

1. Ko e heigoa e tau puhala ne fakavaia a Eva?

‘NE FAKAVAIA mai he gata au.’ (Kenese 3:13) Ke he tau kupu gahoa ia, ko e fifine fakamua, ko Eva, ne lali ke fakamaama e kakano ne totoko a ia ki a Iehova ko e Atua. Kua moli e mena ne talahau e ia, ka e nakai eke e mena ia mo fakamagalo aki hana mahani kelea. Ne omoomoi fakamui e aposetolo ko Paulo ke tohi: ‘Kua fakavaia a Eva.’ (1 Timoteo 2:14) Ne fakavaia a ia ke talitonu ko e mahani pikopiko​—he kai e fua akau fakatapu—​ka aoga ki a ia, he taute a ia ke tuga e Atua. Ne fakavaia foki a Eva hagaao ki a ia ne fakahehe a ia. He nakai iloa e ia ko e gata ko e gutu vagahau noa ma Satani ko e Tiapolo.​—Kenese 3:1-6.

2. (a) Fakahehe fefe e Satani e tau tagata he vaha nei? (e) Ko e heigoa e “agaga he lalolagi,” ti ko e heigoa e tau huhu ka manamanatu a tautolu ki ai mogonei?

² Tali mai he magaaho ha Atamu mo Eva, ne fakatumau a Satani ke fakavaia e tau tagata. Ko ia moli ne “fakahehe e lalolagi oti.” (Fakakiteaga 12:9) Ne nakai la hiki ia e tau lagatau hana. Pete ni he nakai liu fakaaoga e ia e gata moli, kua fakatumau ni a ia ke ufiufi a ia. Ke he tau fahi he fakafiafiaaga, ko e uta tala, mo e ke he falu puhala, ne fakahehe e Satani e tau tagata ke talitonu kua nakai lata po ke nakai aoga a lautolu mai he puhala fakaalofa he Atua. Ko e puhala fakavaia he Tiapolo ne fakatupu ke he tau tagata he tau matakavi oti e aga he totoko e tau fakatufono mo e tau matapatu fakaakoaga he Tohi Tapu. Kua ui he Tohi Tapu e mena nei ko e “agaga he lalolagi.” (1 Korinito 2:12) Ne fakaohooho malolo he agaga nei e tau taofiaga, tau aga, mo e mahani ha lautolu kua nakai iloa e Atua. Kitia fefe e agaga ia, ti totoko fefe e tautolu e fakaohoohoaga matahavala ia? O mai la ke kikite ki ai.

Hane Malolo Hifo e Tau Mahani kua Uho

3. Ko e ha e “agaga he lalolagi” kua kitia lahi mahaki he vaha fou nei?

³ He vaha fou nei, ko e “agaga he lalolagi” kua kitia lahi mahaki. (2 Timoteo 3:1-5) Liga kua mailoga e koe e tau mahani kua uho hane tupu lahi e kelea. Fakamaama he tau Tohiaga Tapu e kakano ne pehenei ai. Mui mai he fakatuaga he Kautu he Atua he tau 1914, ne hoko e felakutaki ke he lagi.  Ko Satani mo e hana tau agelu temoni ne kaumahala ti tolo hifo ke he lalolagi. He ita lahi, ne fakalaulahi atu e Satani hana laliaga ke fakavaia e lalolagi katoa. (Fakakiteaga 12:1-9, 12, 17) Ke he tau puhala kua maeke ia ia, ne lali a ia ‘ke fakahehe a lautolu ni kua fifili, kaeke ke maeke ai.’ (Mataio 24:24) Ha ko e tau tagata he Atua, ko tautolu e matapatu tatao hana. Kua tutuli a ia ke moumou e tuaga fakaagaga ha tautolu ke maeke ke galo ia tautolu e taliaaga ha Iehova mo e amaamanakiaga he moui tukulagi.

4. Fefe e onoonoaga he tau fekafekau ha Iehova ke he Tohi Tapu, ti fefe e onoonoaga he lalolagi ki ai?

⁴ Ne lali a Satani ke ekefakakelea e Tohi Tapu, ko e tohi uho kua fakaako a tautolu hagaao ke he Tufuga fakaalofa ha tautolu. Kua ofania mo e tokiofa he tau fekafekau ha Iehova e Tohi Tapu. Kua iloa e tautolu ko e Kupu mai he agaga he Atua, nakai ko e kupu he tagata. (1 Tesalonia 2:13; 2 Timoteo 3:16) Ka ko e lalolagi ha Satani ne manako ke nakai manamanatu pihia a tautolu. Ma e fakatai, ko e tau kupu hafagi he tohi ne totoko e Tohi Tapu kua pehe: “Nakai fai mena ne ‘tapu’ hagaao ke he Tohi Tapu, po ke ‘ko e kupu he Atua.’ Nakai tohia he tau tagata tapu ne mai he agaga he Atua, ka e mai he tau ekepoa kumi pule.” Ko lautolu ne takitaki ke talitonu e tau talahauaga pihia kua maeke ke mukamuka ke mokulu ke he tau manatu fakahehe nukua tokanoa a lautolu ke tapuaki e Atua ke he ha puhala ne fiafia a lautolu ki ai​—po ke nakai tapuaki atu ki a ia.​—Tau Fakatai 14:12.

5. (a) Ko e heigoa ne talahau he taha tagata tohia hagaao ke he tau lotu ne matutaki mo e Tohi Tapu? (e) Fakatatai fefe he falu e tau manatu fakalalolagi fa mahani mo e mena ne talahau he Tohi Tapu? (Putoia e puha i luga.)

⁵ Ko e tau ekefakakelea fakahako mo e nakai fakahako ke he Tohi Tapu, fakalataha mo e fakatupua fakalotu ha lautolu kua totoku ke lalago ai, ne fua mai he nakai talia fakahaga he lotu, kua putoia e lotu ne matutaki mo e Tohi Tapu. Ke he vala tala uta fano mo e tau tuaga iloilo tokoluga, kua fakakelea tuai e lotu. Taha e tagata tohia ne talahau: “Ko e onoonoaga faka-Iutaia mo e faka-Kerisiano kua hufia e aga fakamotu talahaua nukua kelea. Ke he mitaki lahi kua kitia ki a lautolu ko e fulufuluola; he kelea muikau, ko e tuga e tau manatu kua tuai ne fakaalaia e hohoko he lotomatala mo e tauhele e tupuaga ki mua fakasaiene. He tau tau nei laia kua tupu atu e vihiatia ke he va mo e hafagi ke he faitaua.” Ko e faitaua nei kua fa tupu mai ia lautolu kua fakatikai ko e mena fai Atua mo e kua “fakagoagoa a lautolu ke he tau mahalohaloaga ha lautolu.”​—Roma 1:20-22.

6. Ko e heigoa e onoonoaga he lalolagi ke he tau gahua mahani fakatane mo e fifine ne vihiatia he Atua?

⁶ Nakai ofo ai, mogoia, kua tafea mamao atu e tau tagata mai he tau poakiaga he Atua ke he mahani. Ma e fakatai, kua fakamaama he Tohi Tapu e tau matutakiaga fakasotoma ko e “mena ke ma.” (Roma 1:26, 27) Kua talahau foki ko lautolu ne taute e mahani feuaki mo e faivao ka nakai hohoko ke he Kautu he Atua. (1 Korinito 6:9) Ka e, ke he tau motu loga ne nakai ni ko e tau gahua mahani fakatane mo e fifine kua talia ka kua fakafulufuluola a lautolu mai ke he tau tohi, tau mekasini, tau lologo, tau kifaga, mo e tau fakatataaga he televisoni. Ko lautolu ne vagahau totoko ke he tau gahua pihia kua onoono ki ai ko e mena manamanatu fakateaga, mo e nakai fakatatau mo e manamanatuaga iloilo. He nakai kitia e tau poakiaga he Atua ko e tau talahauaga he  manamanatu fakaalofa, kua onoono e lalolagi ki ai ko e tau fakatauhele ke he tokanoaaga mo e mouaaga fakatagata.​—Tau Fakatai 17:15; Iuta 4.

7. Ko e heigoa e tau huhu kua lata ia tautolu ke huhu hifo ni ki a tautolu?

⁷ Ha kua tupu hokulo ai he lalolagi e totokoaga ke he Atua, to pulotu ma tautolu ke onoono ke he aga mo e tau aogaaga ni ma tautolu. Kua lata tumau a tautolu ke kumikumi hifo he puhala ke he liogi mo e mahani fakamoli ke kitia moli kua nakai tafea fakahaga a tautolu mai he manamanatuaga mo e tau poakiaga ha Iehova. Ma e fakatai, liga huhu hifo ni a tautolu ki a tautolu: ‘Kua manamanatu lahi nakai au ke he matakupu ne fakamamao mai ai au i ai he falu tau kua mole? Kua fakauka lahi nakai au ke he tau gahua ne vihiatia he Atua? Kua hihiga nakai au ke onoono fakateaga lahi ke he tau mena fakaagaga ne nakai pihia au fakamua? Fakakite nakai he puhala ne moui e au kua tuku fakamua e au e tau mena he Kautu he moui haku?’ (Mataio 6:33) To lagomatai he tau fakaata pihia a tautolu ke totoko e agaga he lalolagi.

‘Aua Neke Tafea Kehe’

8. Liga maeke fefe he taha ke tafea kehe mai ia Iehova?

⁸ Ke he tau matakainaga Kerisiano, ne tohi he aposetolo ko Paulo: ‘Kua lata ai ke au atu ai he manamanatu a tautolu ke he tau mena kua fanogonogo a tautolu ki ai, aua neke tafea kehe ai a tautolu a taha aho.’ (Heperu 2:1) Ko e toga ne tafea kua nakai hokotia ke he mena ne fano ki ai. Ka nakai kikite e ikivaka ke he matagi mo e tafe, to mukamuka e toga hana ke tafea kehe mai he uaafo haohao mitaki mo e hili i luga he mataafaga muhu patuo. Pihia foki, kaeke ke nakai kikite a tautolu ke he tau kupu uho moli he Kupu he Atua, to liga mukamuka lahi a tautolu ke tafea kehe mai ia Iehova mo e tukia moumou fakaagaga. Ke matematekelea he galo ia, to nakai amanaki a tautolu ti tiaki e kupu moli. Ko e moli, kua nakai tokologa ne amanaki ni mo e taute pauaki he tiaki a Iehova. Mahani mau ai, na putoia fakahaga a lautolu ke he mena ne fakatauhele a lautolu mai he fanogonogo ke he Kupu he Atua. Nakai mailoga ai, kua tafea a lautolu ke he agahala. Tuga e ikivaka ne mohe, kua nakai aala a lautolu ia ato tomui lahi.

9. Ke he tau puhala fe ne fakamonuina e Iehova a Solomona?

⁹ Manamanatu la ke he puhala moui ha Solomona. Ne tuku age e Iehova ki a ia e tuaga patuiki ki Isaraela oti. Ne fakaata he Atua a Solomona ke talaga e faituga mo e tala age ki a ia ke tohi e tau vala he Tohi Tapu. Ne ua e magaaho ne vagahau a Iehova ki a ia mo e foaki age ki a ia e muhukoloa, talahaua, mo e pule mafola. Mua atu, ne fakamonuina e Iehova a Solomona aki e pulotu ne mua. Kua pehe e Tohi Tapu: “Kua foaki mai he Atua kia Solomona e iloilo mo e pulotu lahi mahaki ni, mo e loto ke hoko ke he tau mena loga, ke tuga ne oneone ke he mataafaga. Kua mua ni e iloilo a Solomona ke he iloilo he tau tagata oti ke he fahi uta, mo e iloilo oti a Aikupito.” (1 Tau Patuiki 4:21, 29, 30; 11:9) Moli, liga manamanatu e taha, liga ka fai tagata ke fakatumau ke tua fakamoli ke he Atua, ko Solomona ni. Ka e, na tafea atu a Solomona ke he tiaki taofiaga. Tupu fefe e mena ia?

10. Ko e heigoa e hatakiaga ne kaumahala a Solomona ke omaoma, ti ko e heigoa e fakahikuaga?

¹⁰ Ne iloa mo e maama mahinohino e Solomona e Fakatufono he Atua. Ne nakai fakauaua moli ai kua fiafia pauaki a ia ke he tau hatakiaga  ne fakatoka ma lautolu ne eke mo tau patuiki i Isaraela. Mai he tau hatakiaga ia ne pehe e taha: “Aua neke fakaloga ai foki [he patuiki] e tau hoana māna, neke liliu kehe ai e lautolu hana loto.” (Teutaronome 17:14, 17) Pete ni e hatakiaga mahinohino ia, ne moua e Solomona fitu e teau he tau hoana mo e tolu e teau he tau hoana fakahoa. Tokologa he tau fifine nei ne tapuaki ke he tau atua kehe. Nakai iloa e tautolu e kakano ne loga lahi e hoana ha Solomona, po ke iloa e tautolu e puhala ne maeke ia ia ke taute pihia. Ko e mena ne iloa e tautolu kua kaumahala a ia ke omaoma ke he hatakiaga mahinohino he Atua. Ne lautonu e fakahikuaga he hatakiaga ha Iehova ke he mena ka tupu. Ne totou e tautolu: ‘Ha ha ia Solomona e tau hoana ti fakaliu kehe he tau hoana hana loto ke mumui atu ke he tau atua kehe.’ (1 Tau Patuiki 11:3, 4) Fakahiku ai​—ka e moli—​ne galo e pulotu mahani Atua hana. Ne tafea kehe a ia. Fai magaaho ai, ko e manako ha Solomona ke fakafiafia hana tau hoana pouliuli kua utakehe hana manako ke omaoma mo e fakafiafia e Atua. Ko e matematekelea ha ia, ha ko Solomona ne tohia he magaaho fakamua e tau kupu: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au”!​—Tau Fakatai 27:11.

Malolo Lahi e Agaga he Lalolagi

11. Maeke fefe he tau mena ne uta e tautolu ke he tau manamanatuaga ha tautolu ke lauia e tau manamanatuaga ha tautolu?

¹¹ Kua fakaako mai he fakafifitakiaga ha Solomona a tautolu na hagahagakelea ke fakakakano ha kua iloa e tautolu e kupu moli, to nakai lahi e lauiaaga fakalalolagi ke he tau manamanatuaga ha tautolu. Tuga ni he lauia e tau tino ha tautolu ke he tau mena kai fakatino, ko e tau mena foki ne uta e tautolu ke he manamanatuaga ha tautolu ka lauia e tau manamanatuaga ha tautolu. Ko e tau mena ne fagai aki e tautolu e tau manamanatuaga ha tautolu ka fakaohooho aki e tau manamanatuaga mo e tau aga ha tautolu. He mailoga e mena nei, ne fakamole he tau fakafua koloa e tau tupe loga he tau tau takitaha ke fakainaina aki e tau koloa ha lautolu. Ko e tau fakainaina kua kautu ne fakaaoga e tau kupu mo e tau fakatino fulufuluola ke fakaohooho e tau manako mo e tau loto he tau tagata fakatau. Kua iloa foki he tau tagata fakainaina ko e lagataha po ke lagaua e kitia he fakainaina ia ka nakai fakalagalaga e tau tagata ke hou mo e fakatau e koloa. Ko e fakakite lagaloga mogoia, kua fa fakatupu e tau tagata fakatau ke onoono mo e manako ke he koloa ia. Kua lata ke kautu e fakainaina​—ka nakai, ti nakai fai tagata ka fakatau ai. Kua foaki ai e fakaohoohoaga malolo ke he manamanatuaga mo e tau aga he tau tagata.

12. (a) Fakaohooho fefe e Satani e tau manamanatuaga he tau tagata? (e) Ko e heigoa ne fakakite kua maeke e tau Kerisiano ke fakaohooho foki?

¹² Tuga e tagata fakainaina, ne fakatupu e Satani e tau manatu hana he tuku ki ai e tau fakamanaiaaga, he iloa to nakai leva ti maeke ia ia ke liliuina e tau tagata ke he hana puhala manamanatu. Mai he fahi fakafiafiaaga mo e falu puhala, ne fakavaia e Satani e tau tagata ke talitonu kua mitaki e kelea ti kelea e mitaki. (Isaia 5:20) Kua mokulu foki e tau Kerisiano moli ke he matahele he tau vala tala pikopiko ha Satani. Kua hataki he Tohi Tapu: “Ka kua talahau fakatonu mai he [a]gaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni; ha ko e fakavai he tau tagata vagahau pikopiko, ko lautolu kua fakavela e tau loto manamanatu hifo ha lautolu ni ke he lapatoa kaka.”​—1 Timoteo 4:1, 2; Ieremia 6:15.

13. Ko e heigoa e tau feoakiaga kelea, ti lauia fefe a tautolu ha ko e ha tautolu a tau feoakiaga?

¹³ Nakai fai a tautolu ne hao mai he agaga he lalolagi. Ko e tau fakaohoohoaga mo e tau pehiaaga he fakatokaaga ha Satani kua malolo lahi. Kua tomatoma fakapulotu he Tohi Tapu a tautolu: “Aua neke fakahehe ai a mutolu, Ko e feoaki mo lautolu kua mahani kelea kua kelea ai e tau mahani mitaki.” (1 Korinito 15:33) Kua maeke he tau feoakiaga kelea ke lauia e ha mena po ke ha tagata​—pihia ki loto he fakapotopotoaga—​ne fakaata e agaga he lalolagi. Ka fakamaama e tautolu kua nakai fakamamahi he tau feoakiaga kelea a tautolu, nakai kia fakahiku mogoia e tautolu kua nakai maeke he tau feoakiaga mitaki ke lagomatai a tautolu? Ko e hepe ha ia he mena ia! Kua tuku fakamahino he Tohi Tapu e manatu he pehe: “Ko ia kua feoaki mo e tau tagata iloilo, kua iloilo ni a ia; ka ko ia kua  kapitiga mo e tau tagata goagoa, to matematekelea ai a ia.”​—Tau Fakatai 13:20.

14. Ko e heigoa e tau puhala kua maeke ke totoko e tautolu e agaga he lalolagi?

¹⁴ Ke totoko e agaga he lalolagi, kua lata ia tautolu ke feoaki mo e tau tagata pulotu​—ko lautolu ne fekafekau ki a Iehova. Kua lata ia tautolu ke fakapuke e tau manamanatuaga ha tautolu aki e tau mena kua atihake e tua ha tautolu. Ne tohi he aposetolo ko Paulo: “Ko e tau matakainaga na e, ko e kupu hanai kua toe; ko e tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.” (Filipi 4:8) Ha ko e tau tagata ataina ke fifili, kua maeke ia tautolu ke fifili e tau mena kua manamanatu a tautolu ki ai. Kia fifili tumau a tautolu ke manamanatu ke he tau mena ka fakatata lahi atu a tautolu ki a Iehova.

Malolo Lahi Mahaki e Agaga he Atua

15. Kehe fefe e tau Kerisiano i Korinito i tuai mo e falu tagata he maaga ia?

¹⁵ Nakai tatai ki a lautolu kua fakahehe he agaga he lalolagi, kua takitaki he agaga tapu he Atua e tau Kerisiano moli. Ne tohi atu e Paulo ke he fakapotopotoaga i Korinito: “Kua moua e tautolu nakai ko e agaga he lalolagi nai, ka ko e [a]gaga mai he Atua, kia iloa ai e tautolu e tau mena kua foaki noa mai he Atua kia tautolu.” (1 Korinito 2:12) Ne viko takai e taone ko Korinito i tuai he agaga he lalolagi. Ne kelea muitui e laulahi he tau tagata i ai ati puna mai e talahauaga “ke mahani faka-Korinito” ne kakano “ke taute e mahani feuaki.” Ne fakapouli e Satani e tau manamanatuaga he tau tagata. Fakahiku ai, ne maama tote po ke nakai maama e lautolu hagaao ke he Atua moli. (2 Korinito 4:4) Ka e, mai he agaga tapu hana, ne hafagi e Iehova e tau mata he falu he tau tagata Korinito, he fakamalolo a lautolu ke moua e iloilo he kupu moli. Ne omoi mo e takitaki he agaga hana a lautolu ke taute e tau hikihikiaga lalahi he tau momoui ha lautolu ke maeke ia lautolu ke moua hana taliaaga mo e monuina. (1 Korinito 6:9-11) Pete he malolo e agaga he lalolagi, kua malolo lahi e agaga ha Iehova.

16. Moua mo e taofi mau fefe e tautolu e agaga he Atua?

¹⁶ Ko e mena taha ia ni he vaha nei. Ko e agaga tapu ha Iehova kua malolo lahi mahaki he lalolagi mo e lagi katoatoa, ti foaki noa mo e fakamakai e ia ki a lautolu kua ole ki ai ke he tua. (Luka 11:13) Ke ha ha ai e agaga he Atua, mogoia, kua lata ia tautolu ke lahi atu e mena ka taute he totoko ke he agaga he lalolagi. Kua lata foki ia tautolu ke fakaako tumau mo e fakaaoga e Kupu he Atua ke he tau momoui ha tautolu ke maeke he tau agaga ha tautolu​—tau tuaga he manamanatuaga ha tautolu—​ke fakamahani ke he hana manamanatuaga. Ka taute e tautolu e mena ia, to fakamalolo e Iehova a tautolu ke tumauokafua ke he ha lagatau ha Satani kua fakaaoga ke moumou aki e tuaga fakaagaga ha tautolu.

17. Ke he tau puhala fe he mena ne tupu ki a Lota kua eke mo fakamafanatia ki a tautolu?

¹⁷ Pete he nakai fai vala e tau Kerisiano he lalolagi, kua nonofo a lautolu he lalolagi. (Ioane 17:11, 16) Nakai fai ia tautolu ke fakamamao katoatoa mai he agaga he lalolagi, ha ko e mena gahua po ke nonofo a tautolu mo lautolu ne nakai fai fakaalofa ma e Atua po ke hana tau puhala. Kua  logona hifo nakai a tautolu tuga a Lota, ne kua “oti e manava,” mo e mamahi lahi foki, ke he tau gahua kolokolovao he tau tagata ha Sotoma, ne nofo ai a ia? (2 Peteru 2:7, 8) Kaeke ke pihia, maeke ia tautolu ke moua e mafanatia. Ne puipui mo e laveaki e Iehova a Lota, ti taute pihia foki e ia ma tautolu. Kua kitia mo e iloa he Matua fakaalofa ha tautolu e tau tutuaga ha tautolu, ti maeke ia ia ke foaki mai ki a tautolu e lagomatai mo e malolo kua lata mo tautolu ke maeke ke fakatumau a tautolu fakaagaga. (Salamo 33:18, 19) Ka mauokafua a tautolu ki a ia, falanaki ki a ia, mo e ui ki a ia, to lagomatai e ia a tautolu ke totoko e agaga he lalolagi, pete ni kua matauka e tuaga ha tautolu.​—Isaia 41:10.

18. Ko e ha kua lata ia tautolu ke tokiofa e fakafetuiaga ha tautolu mo Iehova?

¹⁸ He lalolagi ne o kehe mai he Atua mo e fakavaia e Satani, kua fakamonuina a tautolu ko e tau tagata ha Iehova aki e iloilo he kupu moli. Kua moua e tautolu e olioli mo e mafola ne nakai ha ha he lalolagi. (Isaia 57:20, 21; Kalatia 5:22) Kua tokiofa e tautolu e amaamanakiaga mua ue atu he moui tukulagi ke he Parataiso, ka nakai liu ha ha i ai e agaga he lalolagi mate nei. Kia tokiofa mogoia e tautolu e fakafetuiaga uho ha tautolu mo e Atua mo e mataala ke fakahako ha manamanatuaga kua tafea fakaagaga. Kia fakatata fakalahi atu a tautolu ki a Iehova, mo e to lagomatai e ia tautolu ke totoko e agaga he lalolagi.​—Iakopo 4:7, 8.

Maeke Nakai a Koe ke Fakamaama?

• Ke he tau puhala fe ne fakavaia mo e fakahehe e Satani e tau tagata?

• Maeke fefe ia tautolu ke fakamamao mai he tafea kehe ia Iehova?

• Ko e heigoa kua fakakite kua malolo lahi e agaga he lalolagi?

• Maeke fefe ke moua mo e kuku mau e tautolu e agaga ne mai he Atua?

[Tau Huhu he Fakaakoaga]

[Fakafonua he lau 23]

PULOTU FAKALALOLAGI NE TOTOKO KE HE PULOTU MAHANI ATUA

Nakai katoatoa e kupu moli​—kua taute ni e tautolu e kupu moli ha lautolu.

‘Ko e kupu he Atua ko e kupu moli haia.’​—Ioane 17:17.

Ke fifili e hako mai he hepe, falanaki ke he tau logonaaga ni hau.

“Kua mua ke he tau mena oti e loto he fakavai, ti gagao lahi ni a ia.”​—Ieremia 17:9.

Taute e mena ne loto a koe ki ai.

“Nakai ha ha he tagata kua fano ke fakatonu e mena ke fano a ia ki ai.”​—Ieremia 10:23.

Ko e muhukoloa e kei ke he fiafia lahi.

“Ko e loto lahi ke he tau tupe, ko e vaka haia he tau mena kelea oti kana.”​—1 Timoteo 6:10.

[Fakatino he lau 24]

Ne tafea kehe a Solomona mai he tapuakiaga moli mo e haga atu ke he tau atua fakavai

[Fakatino he lau 26]

Tuga e tagata fakainaina, ne fakatupu e Satani e agaga he lalolagi. Totoko nakai a koe ki ai?