Taofi Kia he Tu Uho e Fakaalofa Kerisiano?

HE EKE mo Kerisiano kua lahi atu e mena ne putoia ke he totou e Tohi Tapu, liogi, mo e uhu e tau lologo tapu he tau Aho Tapu. Kua lauia ai e taute he tau mena ke lata mo e Atua mo e tau tagata. Pehe e Tohi Tapu: “Aua neke fakaalofa a tautolu ke he kupu po ke alelo, ka ko e mahani mo e fakamoli.” (1 Ioane 3:18) Ne manamanatu fakamoli a Iesu ke he falu, ti manako e tau Kerisiano ke fifitaki a ia. Ne fakamalolo he aposetolo ko Paulo e tau matakainaga fakahele ke fakatumau he “fakamakai nakai noa ke he gahua he Iki.” (1 Korinito 15:58) Ka e ko e heigoa e gahua he Iki? Lauia kia e lali ke hiki e fakaveaga he fakatufono ma e aoga he tau tagata nonofogati mo lautolu ne pehia? Ko e mena ia kia ne taute e Iesu?

Pete ne fakamalolo ki a Iesu ke taute ke fai vala ke he tau mena fakapolitika po ke kau ki ai,  ne fakaheu e ia ke taute pihia. Ne nakai talia e ia e pule ne age e Satani ke he tau kautu oti he lalolagi, ne fakaheu e ia ke putoia he taufetoko ke he totogiaga he tau tukuhau, ti nakai fai vala a ia he magaaho ne taute e pulega talahaua he manako ke eke a ia mo patuiki. (Mataio 4:8-10; 22:17-21; Ioane 6:15) Ka e nakai taofi he tu uho hana a ia mai he gahua ma e aoga he falu.

Ne hagaaki a Iesu ke he mena ka tamai e mitaki tukulagi ke he falu. He fagai e ia e tokolima e afe mo e fakamaulu a lautolu ne gagao ne totoka fakaku ai e tokogahoa, ko e fakaakoaga hana ne taute ai e tau monuina tukulagi ma e tau tagata oti kana. Ne iloa a Iesu, nakai ko e tagata fakatokatoka he tau matagahua lagomatai, ka e ‘ko e Faiaoga.’ (Mataio 26:18; Mareko 5:35; Ioane 11:28) Ne pehe a ia: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli.”​—Ioane 18:37.

Fakamatala e Mena kua Mahomo Atu he Tau Mena Politika

Ko e kupu moli ne fakaako e Iesu kua nakai ko e fakaakoaga fakapolitika. Ka e, kua matapatu ke he Kautu ka eke a ia mo Patuiki. (Luka 4:43) Ko e Kautu nei ko e fakatufono he lagi, mo e to hukui e tau fakatokatokaaga oti he tau tagata mo e tamai e mafola tukulagi ke he tau tagata. (Isaia 9:6, 7; 11:9; Tanielu 2:44) Ti ko e mena ia, ko e amaamanakiaga moli hokoia ma e tau tagata. Nakai kia kua fakaalofa lahi ke fakapuloa e amaamanakiaga moli ma e vaha anoiha ke fakamalolo e tau tagata ke falanaki ke he tau tagata ke foaki e vaha anoiha kua haohao mitaki? Kua pehe e Tohi Tapu: “Aua neke tua a mutolu ke he tau iki, po ke fanau he tau tagata, nakai ha i ai ha fakamouiaga. Kua fina atu hana agaga, kua liu a ia ke he kelekele ne eke aki a ia, ko e aho ia ni kua mate ai hana tau manatu. Uhoaki e tagata ha i ai e Atua a Iakopo mo lagomatai hana; ko e hana amaamanaki ha i ai ia kia Iehova ko e hana Atua.” (Salamo 146:3-5) Ti he nakai fakafano e tau tutaki hana ke fakamatala e puhala mitaki he tau fakatufono ne fakatokatoka, ne fakaako e Iesu a lautolu ke fakamatala e “tala mitaki nai he kautu.”​—Mataio 10:6, 7; 24:14.

Ko e “gahua he Iki” anei kua poaki ke he tau tagata fakamatala Kerisiano ke taute. Ha ko e tau tagata he Kautu he Atua kua lata ke fefakaalofaaki, to maeke he Kautu ke utakehe e mativa he tufatufa e tau koloa ke he tau tagata ke he puhala lagotatai. (Salamo 72:8, 12, 13) Ko e tala mitaki anei ti kua latatonu moli ke fakamatala.

He vaha nei, ko e Tau Fakamoli a Iehova kua fakapotopoto anei ma e “gahua he Iki” ke he 235 e motu. Ke felauaki mo e poakiaga ha Iesu, kua fakalilifu a lautolu ke he tau fakatufono oti. (Mataio 22:21) Ka kua mailoga foki e lautolu e tau kupu nei ke he tau tutaki hana: “Nakai ko e tau tagata he lalolagi a mutolu ka kua fifili e au a mutolu mai he lalolagi.”​—Ioane 15:19.

Falu ne fakamatala hagaao ke he tau mena politika ne kua hiki he mole e fakaako fakamatafeiga ke he Tohi Tapu. Ko e tagata politika Italia ko e tagata he Catholic Action, ko e fakatokatokaaga ne pule he lotu, ne pehe: “Ne putoia au ke he tau mena politika, he logona hifo kua lata e tagata ke gahua fakamalolo ke he tau tupuaga fakapolitika mo e fakalatahaaga he tau tagata.” He mole e fakaoti mai he eke mo takitaki he maaga ke maeke ke fakamatala e Kautu he Atua ko e taha he Tau Fakamoli a Iehova, ne fakamaama e ia e tau kakano ne kaumahala  e tau laliaga he tau tagata fakamoli ke he tau mena politika. “Pihia e tuaga he lalolagi, nakai kakano ha kua nakai lali e tau tagata mahani mitaki ke fakamitaki e tau tutuaga fakalatahaaga, ka kua kakano ha ko e tau laliaga fakamoli he tokogahoa kua maluia he mahani kelea he tokologa.”

Ko e nofo kehe mai he tau mena politika ke maeke ke fakamatala e amaamanakiaga moli hokoia ma e tau tagata kua nakai taofi e tau Kerisiano moli mai he lagomatai e falu ke he tau puhala aoga. Ko lautolu ne lagomatai e lautolu ke eke mo tau tagata he Kautu he Atua kua ako ke hiki e tau aga moumou, ke fakalilifu ke he tau pule, ke fakatolomaki e tau moui fakamagafaoa, mo e ke moua e onoonoaga lagotatai ke he maukoloa fakatino. Mua atu e aoga, kua lagomatai he Tau Fakamoli a Iehova e tau tagata ke olioli e fakafetuiaga tata mo e Atua.

Ko e tau tagata fakamatala he Kautu he Atua kua aoga ke he kaufakalatahaaga ne nonofo ai a lautolu. Ka e mua atu ke he mena ia, kua takitaki e lautolu e tau tagata ke mauokafua ke he fakatufono kua moli mo e to tamai e mafola tukulagi ki a lautolu oti kua fakaalofa ke he Atua. Ti ko e fua he ha lautolu a tu uho, mogoia, kua ataina mai e tau Kerisiano nei ke foaki e lagomatai fakauka mo e aoga lahi he vaha nei.

[Puha/Fakatino he lau 7]

Mai he Tau Mena Politika ke he Fakamatala he Kautu he Atua

Ko e tama tane, ko Átila ne ako e fioloti he fakatokanoaaga mai he tau akoako he taone ha Belém, i Parasili. Ne fiafia a ia he logona kua fakahiku e tau tagata ke tokanoa mai he pehiaaga mo e putoia ai ke he gahua malolo he maaga, ne ako e ia ke fakatokatoka e tau foleni totoko mo e taute e tau matagahua liuliu.

Ka e fiafia foki a Átila he fakaako e tau fanau he maaga, he fakaaoga e tohi ne foaki age ki a ia, ko e Listening to the Great Teacher. * Ne tutala ai hagaao ke he mahani mitaki mo e omaoma ke he tau pule. Kua taute he mena nei a Átila ke manamanatu ke he kakano ne nakai muitua e lautolu ne lalago e fioloti he fakatokanoaaga e tau poakiaga ha Iesu ke he tau mahani tokoluga mo e kakano ne nimo he falu e tau tagata ne pehia he magaaho ne moua e lautolu e pule. Ne tu kehe mai a ia he tau matagahua fakamaaga. Fakamui, ne nokonoko he Tau Fakamoli a Iehova e gutuhala hana mo e tutala ki a ia hagaao ke he Kautu he Atua. Nakai leva ti fakaako a ia ke he Tohi Tapu mo e ako hagaao ke he tuluiaga moli ma e pehiaaga he tau tagata.

Kavi ke he magaaho ia, ne fano a Átila ke he fakaakoaga Katolika he tua mo e tau mena politika. “Kua ua e fahi he mena nei ke he taha e mena ne tupu,” he fakamaama he tau faiaoga. Ne fano foki a ia ke he feleveiaaga ke he Fale he Kautu. Ko e kehe lahi ha ia! Taha e mena, kua nakai ha ha ai ha ula, inu, po ke tau vaiga kiva. Ne fifili a ia ke fakalataha mo lautolu ke he gahua fakamatala ha lautolu, mo e nakai leva ti papatiso a ia. Mogonei kua kitia e ia e kakano he fioloti he fakatokanoaaga nakai ko e tuluiaga moli ke he tau lekua he tau tagata nonofogati.

[Matahui Tala]

[Tau Fakatino he lau 6]

Ko e tu uho he tau fekafekau Kerisiano kua nakai taofi a lautolu mai he lagomatai e falu