Tau Fuata, Hane Ati Kia a Mutolu ma e Vaha Anoiha?
Tau Fuata, Hane Ati Kia a Mutolu ma e Vaha Anoiha?
‘Kua iloa e au e tau manatu kua manatu ai au kia mutolu, ko e tau manatu ke he mafola, ka e nakai ko e malaia, kua pihia mai a Iehova, ke foaki atu kia mutolu e vaha anoiha mo e amaamanaki.’—IEREMIA 29:11.
1, 2. Ko e heigoa e tau puhala kehekehe kua maeke he tau tau he vaha fuata ke onoono ki ai?
LAULAHI he tau tagata lalahi ne manamanatu ke he vaha fuata ko e magaaho homo ue atu he moui. Ne manatu e lautolu e malolo mo e hakahakau ne ha ha ia lautolu he magaaho ne fuata ikiiki a lautolu. Ne liu manatu fiafia e lautolu e magaaho ne gahoa lahi e tau matagahua ha lautolu, ko e magaaho ne moua e lautolu loga e tau mena fakafiafia mo e loga he tau magaaho ma e moui katoa ne fakatoka mai mua ha lautolu.
2 Ko mutolu e tau fuata ikiiki kua liga kehe e onoonoaga. Liga ha ha ia mutolu e tau lekua ke lata mo e tau hikihikiaga he manamanatuaga mo e fakatino he vaha fuata. Ke he aoga, kua liga fehagaaoaki a koe mo e peehiaga malolo he atu taha. Liga fakamalolo a koe ke he laliaga ne fifili ke totoko e fakaaoga hehe he tulaki, kava, mo e mahani kelea. Tokologa foki ia mutolu kua fehagaaoaki ke he matakupu tu uho po ke falu matakupu ne felauaki ke he tua hau. E, maeke e vaha fuata ke eke mo magaaho uka. Ka e, ko e magaaho mitaki a ia. Ko e huhu, Fakaaoga fefe e koe e tau magaaho ia?
Olioli e Vaha Fuata Hau
3. Ko e heigoa e fakatonuaga mo e ko e heigoa e hatakiaga ne foaki e Solomona ke he tau fuata?
3 To tala atu he tau tagata kua momotua ki a koe ko e mena ku e vaha fuata, ti hako a lautolu. He tau tau gahoa ni, to mole e vaha fuata hau. Ti olioli e vaha fuata hau he magaaho ne fuata agaia! Ko e fakatonuaga a ia he Patuiki ko Solomona, ne tohi: “Ko e fuata na e kia olioli a a koe ke he hāu a vaha tote, kia fiafia foki a koe ke he tau aho he hāu a vaha fuata, mo e fano a koe ke he tau puhala kua loto a koe ki ai, mo e tau mena kua kitekite ki ai hāu a tau mata.” Pete ia, ne hataki e Solomona e tau fuata: “Kia toka a e mamahi he hāu a loto, mo e tuku kehe atu e kelea he hāu a tino.” Holo atu ai, ne pehe a ia: “Ko e vaha tote mo e vaha fuata ko e mena fakateaga haia.”—Fakamatalaaga 11:9, 10.
4, 5. Ko e ha kua pulotu ma e tau fuata ikiiki ke mautauteute ma e vaha anoiha? Fakamaama.
4 Maama nakai e koe e kakano he manatu ha Solomona? Ke fakatai, manamanatu ke he fuata tote kua moua e mena fakaalofa lahi mahaki, liga ko e tufaaga. Ko e heigoa hana ka taute aki? Maeke ia ia ke fakaaoga fiafia ni ki a ia—tuga e tama moumou koloa he fakatai ha Iesu. (Luka 15:11-23) Ka ko e heigoa ka tupu ka oti e tau tupe hana? Moli to tokihala a ia ha ko e mahani goagoa! Ke he taha fahi, fakalata kua fakaaoga e ia e mena fakaalofa ke ati hake ma e vaha anoiha, liga ke fakaputu fakailoilo e vala lahi. To fakahiku ai, ka aoga a ia mai he tupe fakaputu hana, manatu kia a koe to tokihala a ia he nakai fakaaoga oti e tau tupe hana he fakafiafia aki ni a ia he hana vaha fuata? Nakai pihia!
5 Manamanatu ke he vaha fuata hau ko e mena fakaalofa mai he Atua, ne kua pihia moli ai. To fakaaoga fefe e koe a lautolu? Maeke ia koe ke moumou e malolo mo e hakahakau ki a koe ni, he fiafia tumau noa ni mo e nakai fai amaamanakiaga ma e vaha anoiha. Ka taute pihia e koe, mogoia, ke he tuaga hau he “vaha tote mo e vaha fuata” to fakamoli ai ke eke mo mena “fakateaga.” Kua mua atu ha ia ke fakaaoga e vaha fuata hau ke mautauteute ma e vaha anoiha!
6. (a) Ko e heigoa e fakatonuaga ha Solomona ne foaki e takitakiaga ma e tau fuata? (e) Ko e heigoa ha Iehova kua manako ke taute ma e tau fuata ikiiki, ti maeke fefe e fuata tote ke aoga mai he mena nei?
6 Ne talahau e Solomona e matapatu fakaakoaga kua maeke ke lagomatai a koe ke fakaaoga fakailoilo e vaha fuata hau. Ne pehe a ia: ‘Hanai, kia manatu a a koe ke he hāu a vaha fuata ke he Tufuga Homo Ue Atu hau.’ (Fakamatalaaga 12:1) Ko e kei a ia ke he kautuaga—he fanogonogo ki a Iehova mo e taute hana finagalo. Ne tala age e Iehova ke he tau Isaraela i tuai e tau mena ne manako a ia ke taute ma lautolu: ‘Kua iloa e au e tau manatu kua manatu ai au kia mutolu, ko e tau manatu ke he mafola, ka e nakai ko e malaia, ke foaki atu kia mutolu e vaha anoiha mo e amaamanaki.’ (Ieremia 29:11) To manako foki a Iehova ke foaki atu ki a koe e ‘vaha anoiha mo e amaamanaki.’ Ka manatu e koe a ia he hau a tau gahua, tau manatu, mo e tau fifiliaga, ko e vaha anoiha mo e amaamanaki ia to mitaki ai.—Fakakiteaga 7:16, 17; 21:3, 4.
‘Fakatata Atu ke he Atua’
7, 8. Maeke fefe he fuata tote ke fakatata atu ke he Atua?
7 Ne fakamalolo e Iakopo a tautolu ke manatu a Iehova he magaaho ne tomatoma e ia a tautolu: ‘Kia fakatata atu ke he Atua, ti fakatata mai ai a ia kia mutolu.’ (Iakopo 4:8) Ko Iehova e Tufuga, ko e Pule Katoatoa he lagi, kua latatonu ke tapuaki mo e fakaheke katoatoa atu ai. (Fakakiteaga 4:11) Ka e, kaeke ke fakatata atu a tautolu ki a ia, to fakatata a ia ki a tautolu. Nakai kia ko e fiafia fakaalofa pihia kua fakamafana e loto hau?—Mataio 22:37.
8 Kua fakatata a tautolu ki a Iehova ke he tau puhala loga. Ma e fakatai, kua pehe e aposetolo ko Paulo: “Kia fakamakamaka a mutolu ke he liogi, kia mataala ki ai mo e fakaaue.” (Kolose 4:2) Ke he falu kupu, feaki e aga liogi. Nakai makona ni ke he talahau noa amene he mole e liogi he matua tane hau po ke matakainaga Kerisiano ne kua hukui e fakapotopotoaga. Kua liligi nakai e loto hau ki a Iehova mo e tala age ki a ia e manatu hau, e mena ne matakutaku a koe, e tau paleko ne fehagai mo koe? Kua tala age nakai e koe ki a ia e tau mena ne ma a koe ke fakatutala mo e ha tagata? Ko e tau liogi mai he loto ne fakamoli kua tamai e manamanatuaga mafola. (Filipi 4:6, 7) Kua lagomatai a tautolu ke fakatata atu ki a Iehova mo e logona hifo kua fakatata a ia ki a tautolu.
9. Maeke fefe e fuata ke fanogonogo ki a Iehova?
9 Kitia e tautolu e taha puhala foki ke fakatata ki a Iehova mai he tau kupu nei he agaga: “Kia fanogonogo ā koe ke he tau mena kua fakatonu atu, mo e talia e fakaako atu; kia iloilo ai a koe ke he tau aho fakamui hau.” (Tau Fakatai 19:20) E, kaeke ke fanogonogo a koe ki a Iehova mo e omaoma ki a ia, kua hane ati a koe ma e vaha anoiha. Maeke fefe ia koe ke fakakite kua fanogonogo moli a koe ki a Iehova? Nakai fakauaua kua fano tumau a koe ke he tau feleveiaaga Kerisiano mo e fanogonogo ke he tau vala he polokalama. Pihia foki, kua “fakalilifu a koe ke he hau a matua tane, mo e hau a matua fifine” he fakalataha ke he fakaakoaga Tohi Tapu fakamagafaoa. (Efeso 6:1, 2; Heperu 10:24, 25) Mitaki a ia. Lafi ki ai, mogoia, kua ‘tutuli magaaho’ nakai a koe ke tauteute ma e tau feleveiaaga, ke totou tumau e Tohi Tapu, ke taute e kumikumiaga? Kua lali nakai a koe ke fakagahua e mena ne totou e koe, ke maeke ia koe ke fano tuga e “tagata iloilo”? (Efeso 5:15-17; Salamo 1:1-3) Ka taute e koe e mena ia, kua hane fakatata atu a koe ki a Iehova.
10, 11. Ko e heigoa e tau aoga ne mua kua moua he tau fuata ikiiki ka fanogonogo ki a Iehova?
10 He tau kupu hafagi he tohi he Tau Fakatai, ko e tagata tohia ne fakamaama e kakano he tohi ia he Tohi Tapu. Ko e mena ia, he talahau e ia, “kia iloa ai e iloilo mo e tau mena ne fakaako atu; kia logona ai e tau kupu ke pulotu ai; kia moua ai e fakaako atu ke he iloilo, mo e tututonu, mo e fakafiliaga, mo e mahani hakohako; kia uta ai e loto matala kia lautolu ne goagoa; ko e iloilo mo e loto manamanatu ke he tau fuata.” (Tau Fakatai 1:1-4) Ti, he totou mo e fakagahua e koe e tau kupu he Tau Fakatai—ti pihia mo e vala katoa he Tohi Tapu—to feaki e koe e mahani tututonu mo e mahani hakohako, mo e to fiafia a Iehova ke fakatata atu a koe ki a ia. (Salamo 15:1-5) Ko e lahi e feaki e koe e fakafiliaga, lotomatala, iloilo, mo e maama e manamanatu, to mitaki e tau fifiliaga hau.
11 Kua nakai tonu kia ke amanaki ke he fuata tote ke fakapulotu he puhala nei? Nakai, ha kua tokologa e tau fuata Kerisiano ne taute pihia. Ti ko e fua, kua fakalilifu he falu a lautolu mo e ‘nakai onoono hifo ke he vaha fuata ha lautolu.’ (1 Timoteo 4:12) Kua tonu e matalahi he ha lautolu a tau mamatua ki a lautolu, ti pehe a Iehova kua fakafiafia e lautolu e loto hana. (Tau Fakatai 27:11) Pete ni he ikiiki a lautolu, kua maeke ia lautolu ke mauokafua kua hagaao e tau kupu nei mai he agaga ki a lautolu: “Kia manamanatu kia ia kua mahani hakohako, mo e kitekite kia ia kua mahani tonu; ha ko e fakahikuaga he tagata ia ko e monuina haia.”—Salamo 37:37.
Taute e Tau Fifiliaga Mitaki
12. Ko e heigoa taha he tau fifiliaga aoga kua taute he tau fuata, ti ko e ha e fifiliaga ia kua ha ha ai e tau lauiaaga tukulagi?
12 Ko e vaha fuata e magaaho ke taute e tau fifiliaga, ko e falu kua ha ha ai e lauiaaga tukulagi. Ko e falu fifiliaga kua taute e koe mogonei ka lauia a koe ke he tau tau loga anoiha. Ko e tau fifiliaga pulotu kua lafi ke he moui fiafia, kua kautu. Ko e tau fifiliaga nakai pulotu kua maeke ke fakakelea aki e moui katoa. Manamanatu ke he puhala kua moli ke he ua e fifiliaga ne taute e koe. Fakamua: Ko hai ka fifili e koe ke feoaki mo koe? Ko e ha kua aoga ai? Kua pehe e fakatai he agaga: “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.” (Tau Fakatai 13:20) Ke he falu kupu, ati fakahiku to liga eke a tautolu ke tuga a lautolu kua feoaki mo tautolu—kua pulotu po ke goagoa. Manako a koe ke tuga e patu fe?
13, 14. (a) He nakai ni ko e matutaki fakahako mo e tau tagata, ko e heigoa ne putoia he feoakiaga? (e) Ko e heigoa e hepe kua lata ke fehola kehe mai e tau fuata ikiiki?
13 Ka manamanatu a koe ke he feoakiaga, to liga manatu a koe ke fakalataha mo e tau tagata. Kua hako e mena ia, ka e lahi atu e mena ne putoia ai. Ka kitekite a koe ke he polokalama televisoni, fanogonogo ke he leo kofe, totou pepa, po ke fano ke he kifaga, po ke fakaaoga e falu mena he Internet, ko e feoakiaga ia hau. Ka taute he feoakiaga ia e tau manatu favale mo e kelea po ke fakamalolo e fakaaoga hehe he tulaki, konahia, po ke ha mena kua totoko e tau matapatu fakaakoaga he Tohi Tapu, nukua fakalataha a koe a ia mo e “tagata goagoa,” kua mahani tuga ko e mena nakai ha ha i ai a Iehova.—Salamo 14:1.
14 Liga kua logona hifo a koe ha kua fakalataha a koe ke he tau feleveiaaga Kerisiano ti gahuahua lahi ke he fakapotopotoaga, kua malolo a koe ke nakai lauia ke he tau kifaga favale po ke tau leo kofe fakatagitagi ne mitaki e tau leo ka e nakai mitaki e tau kupu. Liga manatu a koe to nakai fai fua kelea kaeke ke fakahela atu ke he tau fahi Web telefua he Internet. Kua tala atu e aposetolo ko Paulo ki a koe kua hepe a koe! Pehe a ia: “Ko e feoaki mo lautolu kua mahani kelea kua kelea ai e tau mahani mitaki.” (1 Korinito 15:33) Momoko ai, kua tokologa e tau Kerisiano fuata ikiiki ne moumou e tau mahani mitaki ha lautolu aki e tau feoakiaga nakai pulotu. Kia fifili, mogoia, ke fehola kehe mai he tau feoakiaga pihia. Ka taute pihia e koe, to muitua e koe e fakatonuaga ha Paulo: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.”—Roma 12:2.
15. Ko e heigoa e fifiliaga ke uaaki kua lata he tau fuata ikiiki ke taute, ti ko e heigoa e tau pehiaaga kua lago ki a lautolu falu magaaho hagaao ke he mena nei?
15 Hanei e fifiliaga ke ua kua fehagai mo koe. To hoko mai e magaaho ka fifili e koe e mena kua manako a koe ke taute ka oti mai a koe he aoga. Ka nofo a koe he motu ne temotemoai e tau gahua, to liga logona e koe e pehiaaga ke talia noa ni ha gahua. Ka nofo a koe he motu monuina, to liga loga e tau fifiliaga, falu kua kamatamata lahi. Mo e tau manamanatuaga mitaki, liga fakaohooho he tau faiaoga hau po ke tau matua hau a koe ke tutuli e gahua ne hagahaga mitaki fakatupe, po ke liga monuina foki. Pete ia, ko e fakaakoaga ma e gahua ia kua liga fakakaupa e magaaho kua maeke ia koe ke fakaaoga ke fekafekau ki a Iehova.
16, 17. Fakamaama e puhala he tau kupu tohi kehekehe kua maeke ke lagomatai e fuata tote ke moua e onoonoaga lagotatai he gahua.
16 Manatu ke kumi lagomataiaga mai he Tohi Tapu to taute e fifiliaga. Kua fakamalolo he Tohi Tapu a tautolu ke gahua ke lata mo e moui, he fakakite kua fai fakalagoaga a tautolu ke leveki a tautolu ni. (2 Tesalonia 3:10-12) Moha ia, kua putoia ai falu mena foki. Kua fakamalolo e mautolu a koe ke totou e tau kupu tohi na ne mumui mai mo e manamanatu ke he puhala kua lagomatai e fuata tote ke lagotatai ke he tau puhala he fifili e gahua: Tau Fakatai 30:8, 9; Fakamatalaaga 7:11, 12; Mataio 6:33; 1 Korinito 7:31; 1 Timoteo 6:9, 10. He mole e totou e tau kupu tohi ia, kitia nakai e koe e onoonoaga ha Iehova ke he matakupu ia?
17 Kua nakai lata e gahua tupe ke aoga lahi ati tanumia e fekafekauaga ha tautolu ki a Iehova. Ka tokoluga e fakaakoaga hau ke hokotia ke moua e gahua mitaki, ko e mena mitaki a ia. Ka lata ia koe ke moua falu fakaakoaga lafi ki luga he mole e aoga tokoluga, ko e mena ia ke fakatutala mo e tau matua hau. Pete ia, kia nakai galo kehe e “tau mena ne mua atu e aoga lahi”—ko e tau mena fakaagaga. (Filipi 1:9, 10, NW) Kia nakai taute e hepe ne taute e Paruka, ko e tohikupu ha Ieremia. Ne galo e ia e loto fakaaue ma e kotofaaga he fekafekauaga mo e ‘kumi e tau mena lalahi ma hana.’ (Ieremia 45:5) Ne fai magaaho ne manimo e ia nakai fai ‘mena lahi’ he lalolagi nei ka tamai a ia fakatata lahi ki a Iehova po ke lagomatai a ia ke hao ke he moumouaga ha Ierusalema. Ko e mena pihia foki ni ka talahau hagaao ki a tautolu he vaha nei.
Loto Fakaaue ke he Tau Mena Fakaagaga
18, 19. (a) Ko e heigoa he laulahi he tau kavikavi kaina hau kua matematekelea i ai, ti kua lata ke fefe e logona hifo hau ki a lautolu? (e) Ko e ha e tokologa ne nakai logona hifo e hoge fakaagaga?
18 Kua kitia nakai e koe e tau fakatino he tau tohi tala he tau fanau he tau motu ne lauia he hoge? Ka kitia e koe, kua momoko moli a koe ki a lautolu. Kua momoko pihia nakai a koe ki a lautolu he kavikavi kaina hau? Kua pihia he ha? Ha kua laulahi ia lautolu kua hoge foki. Kua matematekelea a lautolu he hoge ne perofeta e Amosa: “Kua pehe mai e Iki ko Iehova, . . . to hohoko mai e tau aho ke tuku atu ai e au e hoge ke he motu; nakai ko e hoge he tau mena kai, to nakai ko e fia inu ke he magavai, ka ko e hoge ke he tau kupu a Iehova ke fanogonogo ki ai.”—Amosa 8:11.
19 Moli, laulahi ia lautolu ne matematekelea he hoge fakaagaga ne kua nakai “manamanatu ke he tau mena fakaagaga kua lata ma lautolu.” (Mataio 5:3, NW) Tokologa ne nakai logona hifo e hoge fakaagaga. Falu ne liga logona hifo kua makona mitaki a lautolu. Kaeke ke pihia a lautolu, kakano ni ha kua kai a lautolu ke he tau mena fakateaga he “iloilo he lalolagi nai,” nukua putoia e velevelekoloa, fuafuaaga fakasaiene, tau manatu hagaao ke he mahani, mo e falu mena foki. Kua logona hifo he falu ko e “iloilo” he vaha fou nei kua taute e tau fakaakoaga he Tohi Tapu ke tuai lahi. Pete ia, ‘ke he iloilo ha lautolu he lalolagi kua nakai iloa e Atua.’ Ko e iloilo he lalolagi to nakai lagomatai a koe ke fakatata atu ke he Atua. Nakai fai mena foki ka ko e “goagoa haia ki mua he Atua.”—1 Korinito 1:20, 21; 3:19.
20. Ko e ha ne nakai tonu ai ke manako ke fifitaki e tau tagata kua nakai tapuaki a Iehova?
20 Ka onoono a koe ke he tau fakatino ia he tau fanau ne hoge, kua manako nakai a koe ke tuga a lautolu? Moli kua nakai manako! Ka e, falu he tau fuata he tau magafaoa Kerisiano ne fakakite e manako ke tuga e tau tagata hoge fakaagaga ne takatakai ia lautolu. Liga, ko e tau fuata ikiiki pihia kua manamanatu ko e tau fuata he lalolagi kua moui fiafia pule he loto. Kua nimo e lautolu ko e tau fuata ia ne o kehe mai ia Iehova. (Efeso 4:17, 18) Kua nimo foki ia lautolu, e tau lauiaaga kelea he hoge fakaagaga. Ko e falu he tau mena nei ko e tau fatu noa he tau fuata ikiiki mo e tau lauiaaga fakatino mo e manamanatuaga he mahani kelea, ula, konahia, mo e fakaaoga hehe he tulaki. Kua fakatupu he hoge fakaagaga e aga totoko, ko e lekua nakai fai amaamanakiaga, mo e nakai fai takitakiaga he moui.
21. Maeke fefe ia tautolu ke puipui a tautolu mai he moua e tau aga hepe ha lautolu kua nakai tapuaki ki a Iehova?
21 Ko e mena ia, ka fano a koe he aoga ti fio mo lautolu ne nakai ko e tau tagata tapuaki ha Iehova, kia nakai tupetupe ha ko e tau aga ha lautolu. (2 Korinito 4:18) To vagahau fakakelea falu ke he tau mena fakaagaga. Lafi ki ai, to foaki he tohi tala e tau fakaakoaga fakavaia, he talahau kua mitaki ke taute e mahani kelea, ke konahia, po ke fakaaoga e tau vagahau kelea. Totoko e fakaohoohoaga ia. Fakatumau ke feoaki tumau mo e tau tagata kua ‘ha ha ai e tua mo e loto manamanatu hifo mitaki.’ Kia tumau e “fakamakai nakai noa ke he gahua he Iki.” (1 Timoteo 1:19; 1 Korinito 15:58) Kia fakatumau he gahua ke he Fale he Kautu mo e ke he gahua he fonua. Ke he magahala fano aoga hau, kia fai vala he paionia fakaku ke he falu magaaho. Fakamalolo e onoonoaga fakaagaga hau ke he puhala nei, to nakai galo e koe e lagotatai hau.—2 Timoteo 4:5.
22, 23. (a) Ko e ha e Kerisiano fuata kua fa taute e tau fifiliaga kua nakai maama he falu? (e) Ko e heigoa he tau fuata kua fakamalolo ke taute?
22 Ko e moua e onoonoaga fakaagaga ka liga takitaki a koe ke taute e tau fifiliaga kua nakai maama he falu. Ma e fakatai, taha e fuata tane Kerisiano ne taleni pauaki he tau lologo mo e ko e tama iloilo ke he tau vahega oti he aoga. He magaaho ne kautu mai a ia, ne fakalataha a ia mo e matua tane hana ke he pisinisi kana hio ke maeke ke tutuli e gahua ne fifili e ia ko e gahua fakamatala mau, po ke paionia. Ne nakai maama he tau faiaoga hana e tau kakano ma e fifiliaga hana, ka e kaeke fita e fakatata atu a koe ki a Iehova, iloa e mautolu kua maama ia koe e kakano.
23 He manamanatu a koe ke he puhala ke fakaaoga e tau koloa uho hau he fuata, ‘kia tauteute e koe e koloa ma hau ni ko e fakaveaga mitaki mo e tau aho ne tatali, kia toto atu e koe ke he moui tukulagi.’ (1 Timoteo 6:19) Kia fifili ke ‘manatu hau a Tufuga Ue Atu’ he vaha fuata hau—mo e ke he moui katoa hau. Ko e puhala ni a ia ke ati ma e vaha anoiha kua kautu, ko e vaha anoiha ka nakai fai fakaotiaga.
Ko e Heigoa Hau ka Fakahiku Aki?
• Ko e heigoa e fakatonuaga he agaga kua lagomatai e tau fuata ikiiki ke he ha lautolu a pulega ma e vaha anoiha?
• Ko e heigoa falu puhala kua maeke he fuata ke ‘fakatata atu ke he Atua’?
• Ko e heigoa falu fifiliaga kua taute he fuata tote ka lauia e vaha anoiha hana?
[Tau Huhu he Fakaakoaga]
[Fakatino he lau 26, 27]
Fakamaaliali tumau he tau Kerisiano fuata pulotu ha lautolu a onoonoaga fakaagaga