Fakamonuina a Lautolu ne Foaki e Lilifu ke he Atua

‘To hufeilo a lautolu ki ho mua, ma Iehova na e, mo e fakalilifu e lautolu hāu a higoa.’​—SALAMO 86:9.

1. Ko e ha kua maeke ia tautolu ke ta atu e lilifu ke he Atua ke he tau puhala kua mua atu ke he mena kua taute he tau tufugatia nakai momoui?

KUA lata a Iehova mo e fakalilifu mai he tau mena oti ne tufugatia e ia. He ta atu nakai fai leo he tau tufugatia nakai momoui ki a ia e lilifu, kua ha ha he tau tagata e lotomatala ke fakakakano, ke maama, ke loto fakaaue, mo e ke tapuaki. Ki a tautolu, mogoia, kua pehe e salamo: “Ko mutolu ko e lalolagi oti kana, kia kalaga atu ā ke he Atua. Kia lologo atu a mutolu ke he hana higoa lilifu; kia fakalilifu a mutolu ke he hana fakahekeaga.”​—Salamo 66:1, 2.

2. Ko hai ne tali atu ke he poakiaga ke foaki e lilifu ke he higoa he Atua, mo e ko e ha?

² Ko e laulahi he tau tagata kua fakaheu ke talia e Atua po ke ke foaki ki a ia e lilifu. Pete ia, he tau motu ne 235, molea e ono e miliona he Tau Fakamoli a Iehova kua fakatata mena kitia e lautolu e ‘hana tau mahani kua nakai kitia’ ke he tau mena ne taute e ia ti “logona” e lautolu e fakamatala nakai fai leo he tufugatia. (Roma 1:20; Salamo 19:2, 3) He fakaako e Tohi Tapu, kua maeke foki ia lautolu ke iloa mo e fakaalofa ki a Iehova. Ne talahau tuai mai he Salamo 86:9, 10: ‘Ko e tau motu oti ne eke e koe, to o mai a lautolu mo e hufeilo a lautolu ki ho mua, ma Iehova na e; mo e fakalilifu e lautolu hāu a higoa. Ha kua homo ni a koe, kua eke e koe e tau mana, ko koe hoko koe ni ko e Atua.’

3. Foaki fefe he “moto tagata tokologa” e ‘fekafekau ke he aho mo e po’?

³ Ne fakamaama pihia he Fakakiteaga 7:9, 15 “e moto tagata tokologa” he tau tagata tapuaki kua “fekafekau [ke he Atua] ke he aho mo e po ke he faituga hana.” Kua nakai poaki malolo e Atua ke fakalilifu nakai fai fakamaoki moli mai he hana tau fekafekau, ka ko e tau tagata tapuaki hana ko e fakatokatokaaga he lalolagi katoa. Ti ka pouli e falu motu, ko e tau fekafekau he Atua he taha fahi he lalolagi kua lavelave he fakamatala. Ti maeke ke talahau ne nakai tumau e aho ki a lautolu kua fakalilifu ki a Iehova. Nakai leva to malagaki hake e leo he “tau mena oti kana kua fafagu” ke fakaheke ki a Iehova. (Salamo 150:6) Ato hoko e magaaho ia, ko e heigoa ha tautolu takitokotaha ka taute ke foaki e lilifu ke he Atua? Ko e heigoa e tau paleko kua liga fehagai mo tautolu? Ti ko e heigoa e tau monuina kua tatali ma lautolu kua foaki e lilifu ke he Atua? Ke tali, o mai la tautolu ke manamanatu ke he fakamauaga he Tohi Tapu hagaao ke he magafaoa Isaraela ha Kato.

Paleko he Vaha i Tuai

4. Ko e heigoa e paleko ne fehagai he magafaoa ha Kato?

⁴ Ato huhu atu ke he Motu he Maveheaga, ko e tau tagata he magafaoa Kato i Isaraela ne ole ke fakaata a lautolu ke nonofo he motu he fahi uta ha Ioritana ne kua latatonu mo e tau fuifui manu. (Numera 32:1-5) Ko e nonofo i ai ka kakano ke fahia ke he tau paleko hagahagakelea. Ko e tau magafaoa ke he fahi lalo kua puipui ha ko e Pahua ha Ioritana​—ko e kaupaaga pauaki ke he keliaga fakakautau. (Iosua 3:13-17) Pete ia, hagaao ke he motu he fahi uta ha Ioritana, The Historical Geography of the Holy Land, ha George Adam Smith ne pehe: “Kua lautatai lahi a [lautolu], ti teitei nakai fai fakakaupaaga, ki luga he kelekele lautatai a Arapi. Fakahiku ai ne fita e fakatapakupaku he kelekele ke he moumouaga he tau nomaea hoge, ko e falu ia lautolu kua feoho ki luga ha lautolu he tau lotopa he tau tau takitaha.”

5. Fakamalolo fefe e Iakopo e tau magafaoa ha Kato ke tali atu he magaaho ka vale mai?

⁵ To fahia fefe e magafaoa ha Kato i lalo he pehiaaga malolo pihia? He tau senetenari fakamua, he perofetaaga hana i luga he mohega mate, ko e tupuna fakamua ha lautolu ko Iakopo ne talahau tuai: “Ko Kato, to kautu e kau kia ia; ka e fakamui to kautu a ia.” (Kenese 49:19) He fakahela atu fakamua ke he tau kupu ia kua tuga ke fakalolelole.  Pete ia, kua hagaao a lautolu ke he poakiaga ma e tau Kato ke taui atu. Kua fakamafana e Iakopo a lautolu kaeke ke taute pihia e lautolu, to liliu mai e tau tagata moumou mo e kautu ki ai, fakalataha mo e tau Kato hane taui fakalahi atu ai.

Tau Paleko ke he Tapuakiaga ha Tautolu he Vaha Nei

6, 7. Maeke fefe e tuaga he tau Kerisiano he vaha nei ke tatai ke he magafaoa ha Kato?

⁶ Tuga e magafaoa ha Kato, ko e tau Kerisiano he vaha nei kua fakatapakupaku ke he tau pehiaaga mo e tau kavega he fakatokatokaaga ha Satani; nakai fai puipuiaga fakamana kua fakahao a tautolu mai he taufetului ki ai. (Iopu 1:10-12) Tokologa ia tautolu kua lata ke fahia ke he tau pehiaaga he o atu he aoga, gahua ke lata mo e moui, mo e feaki he tau fanau. Ti ha ha ai foki e tau pehiaaga fakatagata po ke he loto. Kua lata ke fakauka e falu ke he “mahukihuki ke he tino” ha ko e hagahagakelea he kulikuli po ke matulituli. (2 Korinito 12:7-10) Kua lauia e falu ha ko e tau logonaaga he tote e aoga fakatagata. Ko e “tau aho kelea” he fuakau kua fakaalaia e tau Kerisiano momotua mai he fekafekau hakahakau ki a Iehova tuga ne taute e lautolu he taha vaha.​—Fakamatalaaga 12:1.

⁷ Kua fakamanatu foki he aposetolo ko Paulo ki a tautolu ko e “mena nakai tau a tautolu ke he . . . tau agaga kelea ke he tau mena ha he lagi.” (Efeso 6:12) Kua fakatapakupaku tumau a tautolu “ke he agaga he lalolagi,” ko e agaga totoko mo e mahani kolokolovao ne fakatupu ki mua e Satani mo e hana tau temoni. (1 Korinito 2:12; Efeso 2:2, 3) Tuga a Lota ne matakutaku Atua, kua liga tupetupe a tautolu he vaha nei ha ko e tau mena kelea kua talahau mo e taute he tau tagata ne viko takai ia tautolu. (2 Peteru 2:7) Kua fakatapakupaku foki a tautolu ke he tau favale fakahako ha Satani. Kua tau a Satani ki a lautolu ne fakauku ne toe, nukua “omaoma ke he tau poaki he Atua, mo e taofi e talahauaga kia Iesu.” (Fakakiteaga 12:17) Ko e ‘tau mamoe kehe’ foki ha Iesu kua moua foki e tau valeaga ha Satani ke he puhala he tau paaga mo e tau favaleaga.​—Ioane 10:16.

Mahala po ke Tau Atu?

8. Kua lata ke tali atu fefe ke he vale ha Satani, mo e ko e ha?

⁸ Ko e heigoa e tali kua lata ha tautolu ke he tau valeaga ha Satani? Tuga e magafaoa i tuai ha Kato, kua lata ia tautolu ke malolo fakaagaga mo e tau atu he fakatatau ke he tau takitakiaga he Atua. Momoko ke talahau, kua kamata e falu ke mokulu ke he tau pehiaaga he moui, he fakaheu ha lautolu a tau matagahua fakaagaga. (Mataio 13:20-22) Taha e Fakamoli ne talahau e mena nei hagaao ke he o atu he feleveiaaga he hana fakapotopotoaga kua tokolalo: “Kua lolelole ni e tau matakainaga. Kua lolelole lahi mahaki a lautolu oti.” Moli ai, kua loga e tau kakano ke lolelole ai e tau tagata he vaha nei. Ko e mena ia, kua mukamuka ke onoono ke he tapuakiaga he Atua ko e taha pehiaaga, ko e matagahua mamafa. Ka kua mitaki​—po ke hako—​kia e onoonoaga ia?

9. Takitaki atu fefe he uta e lakau hahamo ha Keriso ke he fakahauhauaga?

⁹ Mailoga e mena ne talahau e Iesu ke he tau toloaga he vaha hana ne kua lolelole pihia foki he tau pehiaaga he moui: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.” Kua pehe kia a Iesu ko e okiokiaga to hau he fakatote hifo e fekafekauaga ke he Atua? Nakai pihia, ne pehe a Iesu: “Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu.” Ko e lakau ko e fakatokaaga akau po ke lapatoa kua fakaata e tagata po ke manu ke hahamo e kavega mamafa. Ko e ha, mogoia, ka manako ha tagata ke hahamo e lakau ia? Nakai kia fita a tautolu he “pehia”? E, ka e liga totou foki e kupu Heleni: “Hu i lalo he lakau hahamo haku mo au.” Manamanatu la: Kua foaki a Iesu ke lagomatai a tautolu he toho e kavega ha tautolu! Nakai taute e tautolu ke he ha tautolu ni a malolo.​—Mataio 9:36; 11:28, 29, matahui tala NW; 2 Korinito 4:7.

10. Ko e heigoa e tau fua mai he tau laliaga ha tautolu ke fakalilifu ke he Atua?

¹⁰ He magaaho ka uta e tautolu e lakau hahamo he tuaga tutaki, kua tau atu a tautolu ki a Satani. “Kia totoko atu a mutolu ke he tiapolo, ti hola kehe ai a ia ia mutolu,” he mavehe mai he Iakopo 4:7. Nakai pehe e mena nei ko e taute pihia kua mukamuka. Ko e fekafekau ke he Atua kua lata mo e laliaga lahi. (Luka 13:24) Ka kua taute he Tohi Tapu e maveheaga nei ia Salamo 126:5: “Ko lautolu kua gana saito mo e tau hihina mata, to helehele e lautolu mo e kalaga fiafia.” E, kua nakai tapuaki  a tautolu ke he Atua nakai fakaaue. “Ko ia foki kua taui mai a lautolu kua kumi fakamakutu kia ia,” ti fakamonuina e ia a lautolu kua fakalilifu ki a ia.​—Heperu 11:6.

Fakalilifu e Atua ko e Tau Tagata Fakamatala he Kautu

11. Maeke fefe he fekafekauaga he fonua ke eke mo puipuiaga ke he tau valeaga ha Satani?

¹¹ Ne poaki a Iesu: “Hanei, kia o atu a a mutolu ke eke e tau motu oti kana mo tutaki.” Ko e matapatu puhala he gahua fakamatala ke foaki ke he Atua e “poa fakaheke.” (Mataio 28:19; Heperu 13:15) Maeke he ha tautolu a “tau aloalohui ke he tauteaga he vagahau mitaki ke mafola ai” mo vala aoga he ha tautolu a “tau tapulu tau katoa”​—ko e puipuiaga ha tautolu ke he tau valeaga ha Satani. (Efeso 6:11-15) He fakalilifu e Atua he fekafekauaga he fonua ko e puhala mitaki ke feaki e tua ha tautolu. (2 Korinito 4:13) Kua lagomatai a tautolu ke fakamamao e tau manamanatuaga ha tautolu mai he tau manatu kelea. (Filipi 4:8) He fakalataha ke he fekafekauaga he fonua kua fakaata a tautolu ke olioli e feoakiaga atihake mo e tau matakainaga tapuaki.

12, 13. Maeke fefe he fakalataha tumau ke he fekafekauaga he fonua ke aoga ke he tau magafaoa? Fakatai.

¹² Ko e gahua fakamatala kua maeke foki ke eke mo gahua fakamagafaoa kua atihake. Moli ai, ko lautolu ne fuata ikiiki kua lata mo e tau fakafiafiaaga lagotatai. Pete ia, ko e magaaho ne fakaaoga he magafaoa ke he fekafekauaga he fonua kua nakai ko e mena uka. Maeke he tau mamatua ke taute ai ke olioli he fakamahani e tau fanau ha lautolu ke lauia mitaki he fekafekauaga. Nakai kia hihiga a lautolu e tau fuata ikiiki ke olioli e tau mena kua iloa mitaki a lautolu ke taute? He fakakite e lagotatai, nakai peehi e tau fanau ke he tau mena ne nakai fahia a lautolu, kua maeke he tau mamatua ke lagomatai a lautolu ke moua e olioli ke he fekafekauaga.​—Kenese 33:13, 14.

¹³ Lafi ki ai, ko e magafaoa ne fakalilifu fakalataha e Atua kua fakamalolo e fakafetuiaga. Manamanatu ke he taha matakainaga fifine ne tiaki he tane nakai talitonu hana a ia mo e hana fanau tokolima. Ne fehagai a ia mo e paleko he fina atu ke he gahuaaga mo e leveki fakatino hana fanau. Kua tupetupe lahi kia a ia ti fakaheu e tau tuaga fakaagaga he fanau hana? Ne manatu e ia: “Ne fakaako fakamakutu e au e Tohi Tapu mo e tau tohi faka-Tohi Tapu ti lali au ke fakagahua e mena ne totou e au. Ne uta tumau e au e tau fanau ke he tau feleveiaaga mo e ke he fekafekauaga  he taha gutuhala ke he taha gutuhala. Ko e tau fua he haku a tau laliaga? Papatiso oti e tau fanau tokolima.” Ko e fakalataha katoatoa ke he fekafekauaga kua maeke pihia ke lagomatai a koe he hau a tau laliaga ke feaki e tau fanau hau ‘ke he tau kupu akonaki mo e tau kupu fakamafana ha Iehova.’​—Efeso 6:4.

14. (a) Maeke fefe a lautolu ne fuata ikiiki ke foaki e fakalilifu ke he Atua he aoga? (e) Ko e heigoa ka lagomatai e tau fuata ke nakai “ma . . . ke he tala mitaki”?

¹⁴ Mutolu ne ikiiki, kaeke ke nonofo a mutolu he tau motu ne fakaata he fakatufono, kua foaki kia e mutolu e lilifu ke he Atua he fakamatala he aoga, po ke fakaata e mutolu e matakutaku tagata ke taofi a mutolu? (Tau Fakatai 29:25) Kua tohi he Fakamoli ne 13 e tau he moui i Pueto Riko: “Ne nakai ma au ke fakamatala he aoga ha kua iloa e au ko e kupu moli anei. He vahega ne tuku hake tumau e au e lima haku mo e tala age e tau mena ne ako e au mai he Tohi Tapu. Ka fai magaaho ata au, ne fano au ke he fale toka tohi mo e totou e tohi Young People Ask.” * Kua fakamonuina kia e Iehova hana tau laliaga? Kua hokotaki e ia: “Falu magaaho ne huhu e tau kapitiga aoga haku ki a au ti ole foki ma e lagaki he tohi.” Kaeke ke taofi mai a koe he mena nei, liga lata ia koe ke fakamoli ki a koe “e finagalo he Atua, ko e mena mitaki, kia talia foki mo e fiafia, ti kua katoatoa” he fakaako fakamakutu fakatagata. (Roma 12:2) Ka talitonu a koe ke he mena kua ako e koe ko e kupu moli, to “nakai ma [koe] ke he tala mitaki.”​—Roma 1:16.

Ko e ‘Gutuhala Hafagi’ he Fekafekauaga

15, 16. Ko e heigoa e ‘gutuhala kua lahi mo e aoga lahi ne takitaki atu ke he gahua’ ne huhu atu e falu Kerisiano ki ai, ti ko e heigoa e tau monuina ne fua mai?

¹⁵ Ne tohi he aposetolo ko Paulo kua hafagi ki a ia e ‘gutuhala kua lahi mo e aoga lahi ne takitaki atu ke he gahua.’ (1 Korinito 16:9) Liga fakaata kia he tau tutuaga hau a koe ke hu atu he gutuhala ke he gahua? He fakalataha ke he fekafekauaga paionia tumau po ke fakaku, ma e fakatai, kua putoia e tau tula 70 po ke 50 he mahina ke he gahua fakamatala. Pauaki ai, kua loto fakaaue e tau matakainaga Kerisiano ma e tau paionia ha ko e ha lautolu a fekafekauaga tua fakamoli. Ka ko e moli kua fakaaoga e lautolu lahi e magaaho ke he fekafekauaga kua nakai taute a lautolu ke mua hake e logonaaga ke he ha lautolu a tau matakainaga tane mo e fifine. Ka e, kua feaki e lautolu e aga kua fakamalolo e Iesu: “Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.”​—Luka 17:10.

¹⁶ Kua lata e gahua paionia mo e akonaki ni e ia a ia, maopoopo fakatagata, mo e makai ke taute e tau foakiaga. Ko e tau monuina mogoia kua aoga lahi ai. “Ke maeke ke fakatokatoka fakahako e kupu moli he Kupu he Atua ko e monuina moli,” he talahau he paionia fuata tote ne higoa ko Tamika. “Ka paionia a koe, kua fakaaoga lahi e koe e Tohi Tapu. Mogonei he fano au ke he taha gutuhala ke he taha gutuhala, maeke ia au ke manamanatu ke he kupu tohi kua latatonu ma e tau tagata takitaha.” (2 Timoteo 2:15) He talahau he paionia ne higoa ko Mica: “He kitia e puhala he kupu moli kua lauia e tau momoui he tau tagata ko e taha monuina ofoofogia.” Ko e fuata ne higoa ko Matthew ne tutala pihia ke he olioli he “kitia e taha kua hau ke he kupu moli. Nakai fai olioli foki kua maeke ke hukui e mena nei.”

17. Maeke fefe he taha Kerisiano ke kautu mai he tau logonaaga fuafuakelea hagaao ke he gahua paionia?

¹⁷ Maeke nakai ia koe ke hu atu ke he gutuhala ke paionia? Liga manako a koe ke taute ka e fuafuakelea e logonaaga. “Ha ha ia au e tau logonaaga nakai tonu hagaao ke he gahua paionia,” he talahau he matakainaga fifine tote ne higoa ko Kenyatte. “Nakai logona kua maeke ia au. Nakai iloa e au e puhala ke tauteute e tau kamataaga po ke fakakakano mai he tau Tohiaga Tapu.” Pete ia, ne fifili he tau motua e matakainaga fifine paionia ne motua ke gahua mo ia. “Kua fuluola he gahua mo ia,” he talahau e Kenyatte. “Ko e mena ia ne taute au ke manako ke paionia.” Fakalataha mo e fakamaloloaga mo e fakamahaniaga, liga maeke foki ia koe ke manako ke paionia.

18. Ko e heigoa e tau monuina ka moua e lautolu kua huhu atu ke he gahua misionare?

¹⁸ Liga hafagi he paionia e gutuhala ke he falu matagahua he fekafekauaga. Ma e fakatai, falu he tau hoa mau kua lata ma e fakamahaniaga misionare ke fakafano atu ke fakamatala ke he tau motu kehe. Kua lata e tau misionare ke hiki ke he  puhala he motu fou, liga ko e vagahau fou, ko e aga fakamotu fou, mo e tau mena kai fou. Ka ko e tau monuina kua taute e tau mena ia ke nakai aoga lahi. Ko Mildred, ko e misionare lotomatala i Mesiko, ne pehe: “Ne nakai tokihala au ke he fifiliaga haku ke eke mo misionare. Ko e mena kua leva e manako haku tali mai he tama fifine tote au.” Ko e heigoa e tau monuina ne olioli e ia? “He motu ni haku, ko e kumi fakaakoaga Tohi Tapu ne uka lahi. I hinei, ha ha ia au ke hokotia ke he tokofa e tagata fakaako he magaaho ne kamata ke fano he gahua he fonua!”

19, 20. Tamai fefe he fekafekauaga he Peteli, fekafekau he tau motu kehe, mo e Aoga Fakaako Fekafekau e tau monuina ke he tokologa?

¹⁹ Kua hau foki e tau monuina loga ki a lautolu he fekafekauaga he Peteli ke he tau la ofisa he Tau Fakamoli a Iehova. Ko Sven, ko e matakainaga tane fuata tote ne fekafekau i Sihamani, ne talahau hagaao ke he gahua hana he Peteli: “Ne logona e au kua taute e au e mena kua toka ai e aoga tukulagi. Na kua maeke ia au ke fakaaoga e tau lotomatala haku ke he lalolagi. Ka e tuga ko e tanaki he tupe ki loto he pege ne amanaki ke tomo.” Moli, ko e fekafekau nakai totogi kua putoia e foakiaga. Ka e pehe a Sven: “Ka fano a koe ki kaina, iloa e koe ko e tau mena oti ne taute e koe he aho ia ma Iehova ia. Ti atu ki a koe e logonaaga ‘homo ue atu.’ ”

²⁰ Ne olioli he falu matakainaga tane e fekafekauaga he lalolagi katoa, he gahua ke talaga e la he tau motu kehe. Taha e hoa mau ne fekafekau ke he valu e kotofaaga he tau motu ne tohi: “Ko e tau matakainaga i hinei kua to lahi e mitaki. Ko e mena ke malipilipi e loto ka mavehe​—ne laga valu ia e ‘malipilipi’ he tau loto ha maua. Ko e iloaaga fulufuluola ha ia ne moua e maua!” Ti ha ha i ai foki e Aoga Fakaako Fekafekau. Kua foaki mai e fakaakoaga fakaagaga ke lata mo e tau matakainaga tane takitokotaha. Ne tohi e ia kua kautu mai: “Kua uka ia au he lali ke kumi e puhala ke fakaaue ma e aoga mua atu ia. Fai fakatokatokaaga foki nakai ka foaki fakalahi e laliaga ke mai e fakaakoaga?”

21. Ko e heigoa e paleko ne fehagai oti e tau Kerisiano he ha lautolu a fekafekauaga ke he Atua?

²¹ E, loga e gutuhala he gahua hane hafagi. Moli, laulahi ia tautolu ne nakai maeke ke fekafekau ke he Peteli po ke he tau motu kehe. Kua talahau e Iesu ko e tau Kerisiano to kehekehe e lahi he “fua” ka moua mai ha kua kehekehe e tau tutuaga. (Mataio 13:23) Ko e paleko ha tautolu ko e tau Kerisiano, mogoia, ke fakaaoga fakalahi e tau tuaga ha tautolu​—ke fakalataha katoatoa ke he fekafekauaga ha Iehova ka maeke he tau tutuaga ha tautolu. Ka taute e tautolu e mena ia, kua foaki e tautolu e lilifu ki a Iehova, mo e maeke ia tautolu ke iloa kua fiafia lahi a ia. Mailoga a Ethel, ko e matakainaga fifine motua he kaina nosi. Ne fakamatala tumau a ia ke he tau tagata ne nonofo he kaina hana mo e fakalataha ke he fakamatala he telefoni. Pete ni e tau kukuaga hana, ne solu katoa a ia ke he fekafekauaga hana.​—Mataio 22:37.

22. (a) Ko e heigoa falu puhala lafi ki luga ke maeke ia tautolu ke tamai e lilifu ke he Atua? (e) Ko e heigoa e magaaho mua ue atu kua amanaki a tautolu ki ai?

²² Manatu, ko e gahua fakamatala ko e taha puhala ni a ia he fakalilifu ki a Iehova. He eke mo fakafifitakiaga he mahani mo e foliga ha tautolu ka eke ko tautolu he gahuaaga, he aoga, mo e he kaina, kua fakafiafia e tautolu e loto ha Iehova. (Tau Fakatai 27:11) Kua mavehe mai e Tau Fakatai 28:20: “Ko e tagata kua fakamoli, kua fai mena loga a ia ke monuina ai.” Kua lata mogoia ia tautolu ke ‘fakalahi e helehele’ he fekafekauaga ha tautolu ke he Atua, he iloa to helehele fakalahi e tautolu e tau monuina. (2 Korinito 9:6) Ko e taute pihia, to eke mo kotofaaga ha tautolu ke momoui ke he magahala ue atu ia ka eke e “tau mena oti kana kua fafagu” ke foaki e lilifu ki a Iehova nukua latatonu ke moua e ia!​—Salamo 150:6.

[Matahui Tala]

Manatu Nakai e Koe?

• Fekafekau fefe e tau tagata he Atua ki a Iehova “ke he aho mo e po”?

• Ko e heigoa e paleko ne fakafelau mo e tau Kato, ti ko e heigoa ne fakaako he mena ia ke he tau Kerisiano he vaha nei?

• Eke fefe e fekafekauaga he fonua mo puipuiaga ke he tau valeaga ha Satani?

• Ko e heigoa e ‘gutuhala hafagi’ ne huhu atu e falu, ti ko e heigoa e tau monuina ne olioli e lautolu?

[Tau Huhu he Fakaakoaga]

[Tau Fakatino he lau 30]

Maeke he gahua paionia ke hafagi e gutuhala ke he falu matagahua he fekafekauaga, putoia e:

1. Fekafekauaga he lalolagi katoa

2. Fekafekauaga he Peteli

3. Fekafekauaga misionare