Lotu Fe kua Lata ia Koe ke Fifili?

‘KO E tau lotu kehekehe kua kehekehe e tau puhala ne takitaki atu ke he taha e foliaga. Ko e moli, kua ha ha i ai taha ni e Atua, pihia nakai?’ Ko e manatu ia ne auloa e tokologa ki ai kua logona hifo pete kua aoga e fakalatahaaga fakalotu, nakai ko e mena kelea ke fifili noa ni ha lotu ke muitua ki ai.

He manamanatu fakamua, kua tuga ke tonu e manatu nei, ha kua moli ko e mena tokotaha ni e Atua, ko e Mua Ue Atu. (Isaia 44:6; Ioane 17:3; 1 Korinito 8:5, 6) Pete ia, kua nakai maeke ia tautolu ke fakaheu e tau kehekeheaga maaliali​—pihia mo e tau fakatikai—​he tau matakau fakalotu ne talahau ke fekafekau ke he Atua moli. Ne kehekehe lahi a lautolu ke he tau gahua ha lautolu, tau taofiaga ha lautolu, tau fakaakoaga ha lautolu, mo e tau poakiaga ha lautolu. Kua lahi mahaki e kehekehe ti ko lautolu ne fakalataha ke he taha e lotu po ke matakau kua uka ke maama po ke talia e mena ne fakaako po ke talitonu he falu.

He taha fahi, ne pehe a Iesu: “Ko e Atua ko e [A]gaga ni a ia; ko lautolu foki ne tapuaki kia ia, kua lata ke tapuaki atu ki ai mo e agaga mo e fakamoli.” (Ioane 4:24) Ko e tapuaki kia ke he Atua mo e fakamoli kua fakaata ma e loga he tau manatu kehekehe hagaao ko hai e Atua, ko e heigoa hana tau finagalo, mo e fefe e manako hana ke tapuaki atu ki a ia? Kua tonu kia ke talitonu ko e mena nakai aoga lahi ke he Atua Mua Ue Atu e puhala ke tapuaki a tautolu ki a ia?

Tau Kerisiano Moli he Vaha Ia mo e Mogonei

Ko e tau Kerisiano he senetenari fakamua he falu magaaho ne kehekehe e tau manatu hagaao ke he manatu. Ma e fakatai, he tutala hagaao ki a lautolu i Korinito, ne pehe e aposetolo ko Paulo: “Ko e mena kua fakailoa mai a mutolu, haku a tau matakainaga na e, kia au he falu he faoa a Kaloe, ha ha ia mutolu e taufetoko. Ko e haku a kupu hanai, kua takitokotaha a mutolu mo e pehe, Ko au ha Paulo, Ko au ha Apolo, Ko au ha Kefa, Ko au ha Keriso.”​—1 Korinito 1:11, 12.

Onoono kia a Paulo ke he tau fekehekeheaki nei ko e mena fakateaga? Ne igatia kia e tau tagata takitokotaha mo e mui he puhala ni hana ke he fakamouiaga? Mamao mai ai! Ne tomatoma e Paulo: “Ko e tau matakainaga na e, kua ole atu au kia mutolu ke he higoa he Iki ha tautolu ko Iesu Keriso, kia taha ha mutolu a tau kupu oti kana, neke tupu ai e tau veveheaga kia mutolu; ka kia fakalataha a mutolu ke he loto taha mo e manatu taha.”​—1 Korinito 1:10.

Moli, ko e fakalataha ke he taofiaga kua nakai kautu ha ko e fakaohooho. Kua moua ni ka kumikumi fakamitaki he tau tagata e tau manatu mo e hokotia ki ai ti talia e fakaotiaga fetataiaki. Ti, ko e fakaakoaga fakatagata he Kupu he Atua mo e manako moli ke fakaaoga e mena ne ako ko e tau lakaaga kua latatonu ke fiafia e vahega fakalatahaaga ne vagahau ki ai a Paulo.  Maeke nakai e fakalatahaaga pihia ke moua? He fita e kitia e tautolu, ne kua leva e fehagai e Atua mo e hana tau tagata ko e matakau. Maeke nakai ke kitia e matakau ia he vaha nei?

Ko e Tau Aoga he Feoakiaga Hako

Ne huhu e salamo ko Tavita he taha magahala: “Iehova na e, ko hai kia ke nofo ke he hāu a fale uta fano? Ko hai kia ke nofo mau ke he hāu a mouga tapu?” Ko e huhu fakalagalaga manatu moli a ia. Ne foaki e Tavita e tali: “Ko ia kua fano mo e mahani hako, mo e tututonu, kua vagahau foki mo e moli ke he hana loto.” (Salamo 15:1, 2) Ko e maama tonu he Tohi Tapu ka fakamalolo e taha ke kitia e lotu kua fetataiaki mo e tau poakiaga faka-Atua pihia. Ti, he fakalataha mo e matakau ia, to fiafia a ia ke feoaki atihake mo e tau tagata kua tapuaki ke he Atua he kaufakalataha “mo e agaga mo e fakamoli.”

Ne fakatata he Tau Fakamoli a Iehova na maeke ke moua e fakalatahaaga he taofiaga mo e gahua pete ni he lalolagi mavehevehe he vaha nei. Ha ha i ai a lautolu ko e tau tagata fakamua he loga he tau lotu kehekehe mo e tau matakau fakamotu. Ko e falu Fakamoli ne nakai talitonu ko e fai Atua po ke tau tagata ne fakatikai mena fai Atua ke he vaha fakamua. Fai foki ne nakai manamanatu fakahokulo ke he lotu. Mai he kehekeheaga he tau lotu, tau aga fakamotu, mo e tau iloilo ne o mai ai e tau tagata takitokotaha hane olioli mogonei e fakalatahaaga fakalotu ne nakai kitia ai ke he lalolagi he vaha nei.

Ko e fakaveaga ma e fakalatahaaga pihia ko e Kupu he Atua, ko e Tohi Tapu. Moli, kua mailoga he Tau Fakamoli a Iehova kua nakai maeke ia lautolu ke peehi ke he tau tagata e mena ke taute. Ka e loto fakaaue a lautolu ke he kotofaaga he fakamalolo e falu ke ako mai he Tohi Tapu ke maeke ke fakave e fifiliaga ha lautolu ke he tau manatu he tapuaki ki luga he fakaveaga malolo ia. He puhala nei, maeke he tokologa foki ke fai vala he tau fua mitaki he tapuaki ke he Atua “mo e agaga mo e fakamoli.”

He vaha nei, ko e hagahagakelea ha ko e matematekelea he tau fakaohoohoaga mo e tau lagatau kua lahi ai. Kua latatonu ke fifili e feoakiaga hako. Kua mailoga he Tohi Tapu ko “ia kua feoaki mo e tau tagata iloilo, kua iloilo ni a ia” mo e ko e “feoaki mo lautolu kua mahani kelea kua kelea ai e tau mahani mitaki.” (Tau Fakatai 13:20; 1 Korinito 15:33) He feoaki mo lautolu e tau tagata tapuaki moli he Atua ko e puipuiaga. Ko e mena ia, ne fakamanatu he Tohi Tapu ki a tautolu: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) Ko e monuina ha ia ka lagomatai fakaalofa he tau kapitiga moli, tau matakainaga tane mo e tau fifine fakaagaga e falu ke taute e tau matagahua ha lautolu ki mua he Atua.

Ne fakamoli e Ottmar e onoonoaga nei. He feaki hake he magafaoa Katolika i Sihamani, ne nakai liu a ia fano tapu. Kua fakamaama e ia: “He magaaho ka fano au he tapu, ne hu mai au ki fafo mo e gatigati e logonaaga tuga ni he fano au ki loto.” Ne fakatumau agaia e ia hana tua ke he Atua. Ti hoko mai a ia ke matutaki mo e Tau Fakamoli a Iehova mo e mafoki ai ko lautolu ko e tau fekafekau moli he Atua. Ne kitia e ia e lata ke feoaki mo lautolu. Ne pehe a ia mogonei: “He ha ha ai he fakatokatokaaga gahuahua he lalolagi katoa, ne olioli e au e mafola he manamanatuaga mo e loto. Ne lagomatai fakalahi ai ki a au ke moua lahi e iloilo tonu ke he Tohi Tapu. Ko e mena haia kua aoga lahi ki a au fakatagata.”

Ko e Uiina ki a Lautolu Hane Kumi

Ko e tau tagata ne tatai e tau manamanatuaga ne gahua fetataaki ko e matakau kua maeke ke fakakatoatoa lauia mitaki lahi e gahua mai he igatia gahua ni e tau tagata. Ma e fakatai, ne talahau e Iesu e tau fakaakoaga ke he tau tutaki hana: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e [a]gaga [t]apu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Maeke fefe  e gahua pihia ke fakakatoatoa mitaki kaeke ke nakai fai takitakiaga po ke fakatokatokaaga? Maeke fefe he taha ke omaoma e poakiaga faka-Tohiaga Tapu nei kaeke ke lali a ia ke fekafekau tokotaha mai he Atua?

He tau kua mole, ne tufatufa he Tau Fakamoli a Iehova he lalolagi katoa 91,933,280 e tau tohi fakave ke he Tohi Tapu, tau tohi ikiiki, mo e tau porosua faka-Tohi Tapu, lafi ke he 697,603,247 e tau mekasini, ne maeke ke hokotia ke he tau tagata totou miliona he 235 e motu aki e fekau mai he Kupu he Atua. Ko e fakamoliaga ue atu ha ia he laliaga he matakau ne fakatokatoka mitaki nukua fakakatoatoa atu mai he laliaga fakatagata ne nakai fai lagomatai!

He lafi ke he tufatufaaga he tau tohi faka-Tohi Tapu, ne taute he Tau Fakamoli a Iehova e tau aoga Tohi Tapu ne nakai totogi ke lagomatai e tau tagata ke moua e maama hokulo ke he mena kua manako e Atua. He tau kua mole, ke he avelesi, ko e 5,726,509 e tau fakaakoaga Tohi Tapu pihia ne taute he tau fahi tapu takitaha mo e tau tagata po ke tau matakau. Ko e fakaakoaga Tohi Tapu nei kua lagomatai e tau miliona tagata ke moua e fakaveaga malolo ke maeke ke taute e fifiliaga ke he tau mena he tapuakiaga. Kua uiina ki a koe ke ako e tau poakiaga faka-Atua ne fakatoka mai he Tohi Tapu. Ti maeke mogoia ia koe ke taute e fifiliaga.​—Efeso 4:13; Filipi 1:9; 1 Timoteo 6:20; 2 Peteru 3:18.

Ka manako a koe ke fakafiafia e Atua, ko e fakalatahaaga fakalotu kua aoga​—ka e nakai ke he ha matakau po ke fakatokaaga fakalotu. Kua lata ia koe ke fakave e fifiliaga hau he lotu ke he iloilo tonu he Tohi Tapu, nakai ke he tau fakatokaaga tali manatu po ke tala fakaholo. (Tau Fakatai 16:25) Fakaako e tau poakiaga ma e lotu moli. Fakatatai ai mo e tau taofiaga ni hau. Ti fifili fakatatau ki ai.​—Teutaronome 30:19.

[Tau Fakatino he lau 7]

Ko e Tau Fakamoli a Iehova kua fiafia e fakalatahaaga he lalolagi mavehevehe