‘Kia O Atu mo e Taute Tutaki’

‘Kua tuku mai kia au e pule oti kana ke he lagi mo e lalolagi. Hanei, kia o atu a mo e taute tutaki.’​—MATAIO 28:18, 19.

1, 2. (a) Ko e heigoa e kotofaaga ne age e Iesu ke he tau tutaki hana? (e) Ko e heigoa e tau huhu hagaao ke he poaki ha Iesu ka fakatutala ki ai?

KO E aho tau tupu i Isaraela he 33 V.N., ne fakapotopoto e tau tutaki ha Iesu ke he mouga i Kalilaia. Ko e Iki ha lautolu ne liu tu mai kua teitei hake ke he lagi, ka e fakamua ne fai mena aoga a ia ke tala age ki a lautolu. Ne fai kotofaaga a Iesu ma lautolu. Ko e heigoa e matagahua? Tali fefe e tau tutaki hana ki ai? Ti gahuahua fefe e kotofaaga ia ki a tautolu he vaha nei?

² Ko e talahauaga ha Iesu ne fakamau ai he Mataio 28:18-20: ‘Kua tuku mai kia au e pule oti kana ke he lagi mo e lalolagi. Hanei, kia o atu a a mutolu ke taute e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e agaga tapu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.’ Ne tutala a Iesu ke he “pule oti kana,” “tau motu oti kana,” “tau mena oti,” mo e “tau aho oti.” Ko e tau poaki hana ne putoia katoatoa ai e tau talahauaga fa kua mafuta hake e falu huhu aoga lahi, ne maeke ke fakahiku ke he tau kupu ko e ha? i fe? ko e heigoa? mo e magaaho fe? Kia kitekite a tautolu ke he taha e huhu he magaaho. *

“Kua Tuku Mai kia Au e Pule Oti Kana”

3. Ko e ha kua lata ia tautolu ke omaoma ke he poaki ke taute tutaki?

³ Fakamua, ko e ha kua lata ia tautolu ke omaoma ke he poaki ke taute tutaki? Ne talahau e Iesu: ‘Kua tuku mai kia au e pule oti kana ke he lagi mo e lalolagi. Hanei kia o atu a a mutolu ke taute tutaki.’ Ko e kupu “hanei” kua tuhi ke he kakano lahi mahaki ne kua lata ia tautolu ke omaoma e poaki nei. Kakano ha ko Iesu, ko ia ne tuku mai e poaki, kua ha ha e “pule oti kana.” Kua laulahi fefe e pule hana?

4. (a) Laulahi fefe e pule ha Iesu? (e) Kua lata fefe e maamaaga ha tautolu ke he pule ha Iesu ke fakaohooho e onoonoaga ha tautolu ke he poaki ke taute tutaki?

⁴ Kua pule a Iesu ke he hana fakapotopotoaga, ti tali mai he 1914 ne pule a ia ke he Kautu fou he Atua ne kua fakatu. (Kolose 1:13; Fakakiteaga 11:15) Ko ia ko e agelu ne mua ti ko ia kua poaki e kautau he lagi ne totou teau miliona e tau agelu. (1 Tesalonia 4:16; 1 Peteru 3:22; Fakakiteaga 19:14-16) Kua foaki age he Matua hana e pule ke fakaotioti e “tau iki ne mua oti kana, mo lautolu gotoa ne pule, mo lautolu kua malolo” ne totoko e tau matapatu fakaakoaga tututonu. (1 Korinito 15:24-26; Efeso 1:20-23) Ko e pule a Iesu kua nakai fakamahao ni ki a lautolu ne momoui. Ko ia foki e “fakafili ke he tau tagata momoui mo e tau tagata mamate” mo e ha ha ai e malolo ne age he Atua ke fakaliu tutu mai a lautolu kua momohe ke he mate. (Gahua 10:42; Ioane 5:26-28) Moli ai ko e poaki ne tuku mai he Taha ne toka ai e pule lahi mahaki pihia kua lata ke onoono ki ai kua aoga mua ue atu. Ko e mena ia, kia fakalilifu mo e omaoma fakamakai e tautolu e poaki ha Keriso ke ‘o atu mo e taute tutaki.’

5. (a) Omaoma fefe a Peteru ke he tau kupu a Iesu? (e) Ko e heigoa e monuina ne moua e Peteru he omaoma ke he tau fakaakoaga ha Iesu?

⁵ Ke he kamataaga he fekafekauaga hana he lalolagi, ne fakaako e Iesu e tau tutaki hana ke he puhala ofoofogia ko e mailoga e pule hana mo e omaoma e tau poaki hana ka takitaki atu ke he tau monuina. Ne lagataha e tala age e ia ki a Peteru, ko e tagata takafaga ika: “Ati ueue atu a ke he mena hokulo, mo e tuku hifo ai ha mutolu a tau kupega ke moua ai e falu a ika.” Ne iloa tonuhia e Peteru ne nakai fai ika i ai, ti tala age a ia ki a Iesu: “Ko e Iki na e, ne tukumate a mautolu ne po, ati ahogia, ka e nakai moua ha mena.” Pete ia, ne talahau fakatokolalo a Peteru: “Ka ko e hau a kupu to tuku hifo ai e au e kupega.” He mole e omaoma a Peteru ke he poaki he Keriso, ne futi e ia “e tau ika loga  lahi.” He ofoofogia, ko Peteru ne “fakaveli ai a ia ke he na tulive a Iesu, kua pehe age, Ko e Iki na e, kia haele kehe a koe ia au, ha ko au ko e tagata hala.” Ka e tali e Iesu: “Ua matakutaku a koe, ke kamata he vaha nai ke moua ai e koe e tau tagata.” (Luka 5:1-10; Mataio 4:18) Ko e heigoa ha tautolu ne ako mai he tala ia?

6. (a) Ko e heigoa ne fakakite he tala ke he tau ika ne futi fakamana hagaao ke he vahega omaoma ne manako a Iesu ki ai? (e) Maeke fefe ia tautolu ke fifitaki a Iesu?

⁶ Ne age e Iesu ki a Peteru, Aneterea, mo e falu aposetolo e kotofaaga ke ‘eke mo takafaga ke he tau tagata,’ nakai he mogo fakamua, ka e he mole e ofoofogia nei he loga e ika ne futi. (Mareko 1:16, 17) Maali ai, ne nakai manako a Iesu ke he omaoma pouli. Ne tala age a ia ke he tau tagata tane e kakano mauokafua ne lata ia lautolu ke omaoma ki a ia. Ke tuga ni he omaoma e poaki ha Iesu ke tuku hifo ha lautolu a tau kupega ne moua e tau fua ofoofogia, ti ko e omaoma ke he poaki ha Iesu ke ‘takafaga tagata’ ka takitaki atu ke he tau monuina lalahi mamahaki. Mo e tua katoatoa, ne tali atu e tau aposetolo. Kua fakahiku e tala: “Kua hiki hake ha lautolu a tau foulua ki uta, ati toka ai e lautolu e tau mena oti, ka e mumui atu kia ia.” (Luka 5:11) Ke he vaha nei, he fakamalolo e tautolu e falu ke fakalataha ke he gahua taute tutaki, kua fifitaki a tautolu ki a Iesu. Nakai manako a tautolu ke taute he tau tagata e tau mena ha kua tala age e tautolu, ka e he tala age e tautolu e tau kakano mauokafua ke omaoma ke he poaki he Keriso.

Tau Kakano Omoomoi mo e Tau Manatu Hako

7, 8. (a) Ko e heigoa falu kakano faka-Tohiaga Tapu ma e fakamatala he Kautu mo e taute tutaki? (e) Ko e heigoa e kupu tohi pauaki kua omoomoi a koe ke matutaki e gahua fakamatala? (Kikite foki e matahui tala.)

⁷ Ha kua mailoga e tautolu e pule he Keriso, kua fai vala a tautolu he gahua fakamatala he Kautu mo e taute tutaki. Ko e heigoa falu kakano faka-Tohiaga Tapu ma e tauteaga he gahua ia kua maeke ia tautolu ke age ki a lautolu kua manako a tautolu ke omoi ke he tau gahua mitaki? Manamanatu ke he tau onoonoaga nei ne talahau he falu Fakamoli tua fakamoli mai he tau motu kehekehe, mo e mailoga e puhala ne lalago he tau kupu tohi ne fatiaki i ai e tau talahauaga ha lautolu.

 ⁸ Ko Roy, ne papatiso he 1951: “Magaaho ne tukulele au ki a Iehova, ne mavehe au to fekafekau tumau au ki a ia. Manako au ke taofi mau ke he maveheaga haku.” (Salamo 50:14; Mataio 5:37) Ko Heather, ne papatiso he 1962: “Ka manamanatu au ke he tau mena oti ne taute e Iehova ma haku, kua manako au ke fakakite ki a ia e loto fakaaue haku he fekafekau tua fakamoli katoatoa ki a ia.” (Salamo 9:1, 9-11; Kolose 3:15) Ko Hannelore, ne papatiso he 1954: “He tau magaaho oti ka o atu a tautolu he fekafekauaga, kua lalago he tau agelu a tautolu​—ko e lilifu ha ia!” (Gahua 10:30-33; Fakakiteaga 14:6, 7) Ko Honor, ne papatiso he 1969: “Magaaho ka hoko mai e fakafiliaga ha Iehova, nakai manako au he ha katofia kaina haku ke tukumale a Iehova mo e hana Tau Fakamoli he fakateaga mo e pehe, ‘Ne nakai moua e au e hatakiaga!’” (Esekielu 2:5; 3:17-19; Roma 10:16, 18) Ko Claudio, ne papatiso he 1974: “Magaaho ka fakamatala a tautolu, kua ha ha a tautolu ‘i mua he Atua’ mo e ‘ha ha ia Keriso.’ Manamanatu la! Kaeke ko tautolu ha ha he fekafekauaga, kua olioli a tautolu he faihoani he tau Kapitiga uho ha tautolu.”​—2 Korinito 2:17. *

9. (a) Ko e heigoa he tala takafaga ika ne iloa e Peteru mo e falu aposetolo ne fakakite hagaao ke he manatu hako ma e omaoma ke he Keriso? (e) Ko e heigoa e manatu hako ma e omaoma ke he Atua mo e Keriso he vaha nei, mo e ko e ha?

⁹ Ko e tala hagaao ke he ofoofogia he tau ika ne futi kua fakakite foki e aoga he manatu hako ma e omaoma ke he Keriso​—ko e fakaalofa. Magaaho ne pehe a Peteru, “Kia haele kehe a koe ia au, ha ko au ko e tagata hala,” ne nakai haele kehe a Iesu, po kua fakatikai e ia a Peteru he ha agahala. (Luka 5:8) Ne nakai tuhituhi foki e Iesu a Peteru he ole ki a ia ke fano kehe. Ka e, ne tali totonu a Iesu: “Ua matakutaku a koe.” Ko e matakutaku hopoate ko e manatu hepe ke omaoma ke he Keriso. Pete ia, ne tala age a Iesu ki a Peteru mo e tau hoa hana to eke mo tau tagata aoga he takafaga tagata. He vaha nei, kua nakai fakaaoga foki e tautolu e fakamatakutaku po ke ha logonaaga pihia, tuga e logonaaga hehe mo e fakama, ke peehi falu ke omaoma ke he Keriso. Ko e omaoma solu katoatoa ni hokoia ne fakave ke he fakaalofa ke he Atua mo Keriso ka fakafiafia e loto ha Iehova.​—Mataio 22:37.

‘Taute Tutaki he Tau Tagata he Tau Motu Oti Kana’

10. (a) Ko e heigoa e fakamatafeiga hagaao ke he poaki ha Iesu ke taute tutaki ne kua paleko ke he tau tutaki hana? (e) Tali atu fefe e tau tutaki ke he poaki ha Iesu?

¹⁰ Ko e huhu ke uaaki ne mafuta mai kua matutaki mo e poaki he Keriso ko e, I Fe kua lata ke taute e gahua taute tutaki nei? Ne tala age a Iesu ke he tau tutaki hana: ‘Taute tutaki he tau tagata he tau motu oti kana.’ Ato hoko e magaaho he fekafekauaga ha Iesu, ko e tau tagata he tau motu ne fakaata kaeke o mai ki Isaraela ke fekafekau ki a Iehova. (1 Patuiki 8:41-43) Ne laulahi a Iesu ke fakamatala ke he tau Iutaia he tino, ka ko e mogonei kua tala age a ia ke he tau tutaki hana ke o atu ke he tau tagata he tau motu oti kana. Moli ai, ko e luo ika, po ke matakavi fakamatala, he tau tutaki hana kua fakamahao ni ke he “tama loloto”​—ko e tau Iutaia he tino—​ka e nakai leva ti putoia katoatoa e “tahi” he tau tagata. Pete kua paleko e hikiaga nei ke he tau tutaki, ne omaoma tuli a lautolu ke he tau fakamaamaaga ha Iesu. Nakaila 30 e tau tau he mole e mate ha Iesu, ne maeke he aposetolo ko Paulo ke tohi kua  fakamatala e tala mitaki nakai ke he tau Iutaia hokoia ni ka e “ke he tau tagata oti ke he lalolagi.”​—Kolose 1:23.

11. Ko e heigoa e fakalaulahiaga he ‘tau luo ika’ ne kua hane fakaaoga ai tali mai he mataulu he senetenari 20 aki?

¹¹ He nakaila leva ia, kua kitia e tatai he fakalaulahi atu he matakavi fakamatala. Ke he kamataaga he senetenari ke 20 aki, ko e ‘tau luo ika’ kua fakakaupa ni ke he falu motu gahoa. Ka e, ko e tau tutaki he Keriso he vaha ia ne mumuitua ke he fakafifitakiaga he tau Kerisiano he senetenari fakamua mo e fakalahi atu fakamakai e matakavi ne fakamatala a lautolu i ai. (Roma 15:20) He mataulu he tau atu tau 1930, ne taute tutaki a lautolu ke he kavi taha e teau he tau motu. He vaha nei, ko e ‘tau luo ika’ ha tautolu kua fakalaulahi atu ke he 235 e motu.​—Mareko 13:10.

“He Tau Vagahau Oti”

12. Ko e heigoa e paleko ne peehi mai he perofetaaga he Sakaria 8:23?

¹² Ke taute tutaki he tau motu oti ko e paleko he nakai ni ke he lahi he fonua ka e pihia foki e vagahau. Puhala mai he perofeta ko Sakaria, ne talahau tuai e Iehova: “Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ha ia mutolu e Atua.” (Sakaria 8:23) Ke he fakamoliaga lahi he perofetaaga nei, ko e “tagata Iuta” kua hukui e tau Kerisiano fakauku kua toe, ka e ko e “tau tagata tokohogofulu” kua hukui e “moto tagata tokologa.” * (Fakakiteaga 7:9, 10; Kalatia 6:16) Ko e moto tagata tokologa nei he tau tutaki he Keriso kua ha ha he tau motu loga, ti tuga ne talahau e Sakaria, to vagahau a lautolu ke he tau vagahau kehekehe. Kua fakakite nakai he fakamauaga tala he vaha fou nei he tau tagata he Atua e vala ia he taute tutaki? E, kua pihia.

13. (a) Ko e heigoa e fakalaulahiaga hagaao ke he tau vagahau ne kua fakatu ma e tau tagata he Atua he vaha fou? (e) Puhala fe kua tali atu e vahega fekafekau fakamoli ke he manako kua tupu lahi ma e tau mena kai fakaagaga he tau vagahau kehekehe? (Putoia e puha “Tau Tohi ma e Tau Matapouli.”)

¹³ He 1950 kua kavi ke he tolu mai he lima e Tau Fakamoli a Iehova he lalolagi katoa ne fakaaoga e vagahau ne fanau mai ki ai ko e vagahau faka-Peritania. He 1980 ne hiki e numera ia ke he ua mai he lima, mo e he vaha nei ko e vagahau motu kua taha maka ni mai he lima e Tau Fakamoli ne vagahau faka-Peritania. Tali atu fefe e vahega fekafekau fakamoli mo e loto matala ke he hikiaga nei he tau vagahau? He foaki e tau mena kai fakaagaga ke he loga atu e tau vagahau. (Mataio 24:45) Ma e fakatai, he 1950 ko e tau tohi ha tautolu ne lolomi ai ke he 90 e vagahau, ka e he vaha nei kua malikiti e numera ia ke he kavi ke 400. Kua fai fua mai nakai he malikiti nei he hagaaki ke he tau tagata he tau matakau vagahau kehekehe? E! Ko e avelesi he kavi ke he 5,000 tagata ‘mai he tau vagahau oti’ kua eke mo tau tutaki he Keriso he tau fahitapu  takitaha he tau! (Fakakiteaga 7:9) Mo e matutaki ke malikiti. Ke he falu motu ko e “tau kupega” kua hane futi mai e tau ika loga!​—Luka 5:6; Ioane 21:6.

Ko e Fekafekauaga Taui Mitaki​—Maeke Nakai ia Koe ke Fakalataha ki Ai?

14. Maeke fefe ia tautolu ke lagomatai a lautolu he matakavi ha tautolu ne vagahau e vagahau kehe? (Putoia e puha “Vagahau Matalima mo e Taute Tutaki.”)

¹⁴ Ke he loga e tau motu he Fahi Lalo, ko e o mai he tau tagata paea kua fakatupu e paleko he taute tutaki ke he tau tagata he ‘tau vagahau kehekehe’ ke he tau matakavi tata ne nonofo ai a tautolu. (Fakakiteaga 14:6) Maeke fefe ia tautolu ke lagomatai a lautolu he matakavi ha tautolu ne nakai tatai e vagahau mo tautolu? (1 Timoteo 2:4) Ke vagahau fakatai, maeke ia tautolu ke fakaaoga e tau koloa hako he takafaga ika. Foaki ke he tau tagata pehenei e tau tohi he vagahau ha lautolu. Ka maeke, fakatokatoka mo e taha Fakamoli ne vagahau e vagahau ia ke ahi atu ki a lautolu. (Gahua 22:2) Ko e taute he tau fakatokatokaaga nei kua mukamuka he mogonei, ha kua tokologa e Tau Fakamoli kua ako e taha vagahau kehe mai he vagahau ha lautolu ke maeke ke lagomatai e tau tagata motu kehe ke eke mo tau tutaki he Keriso. Kua fakakite mai he tau hokotaki ko e lagomatai ke he puhala nei kua logona ai e taui mitaki.

15, 16. (a) Ko e heigoa e tau fakafifitakiaga kua fakakite na taui mitaki ke lagomatai a lautolu kua vagahau e vagahau kehe? (e) Ko e heigoa e tau huhu hagaao ke he fekafekauaga he fonua vagahau kehe ka liga manamanatu a tautolu ki ai?

¹⁵ Kitekite ke he ua e fakataiaga mai i Netelani, ne ha ha ai e fakaholoaga kua fakatoka ma e fakamatala he Kautu ke he 34 e vagahau. Ne foaki noa e hoa Fakamoli ke o atu mo e taute tutaki ke he tau tagata paea ne vagahau Polani. Ne lahi mahaki e tali ke he ha laua a tau laliaga ati omoomoi ai e logonaaga he tane ke fakatote e gahua tupe hana ke moua foki taha e aho he fahitapu ke fakaako e Tohi Tapu mo lautolu ne fakakite e fiafia. Ne nakai leva, kua taute he hoa molea e 20 e fakaakoaga Tohi Tapu he tau fahi tapu takitaha. Ne talahau e laua: “Kua fakafiafia lahi he fekafekauaga ha maua a maua.” Kua logona he tau tagata taute tutaki e fiafia pauaki ka logona e lautolu ne fiafia e kupu moli he Tohi Tapu ke he vagahau ni ha lautolu mo e omoomoi ke talahau e loto fakaaue. Ma e fakatai, he feleveiaaga ne taute ke he vagahau Vieteneme, ne tu hake e tagata tane motua mo e ole ma e fakaataaga ke vagahau. Mo e tau hihina mata ke he tau mata hana, ne tala age a ia ke he Tau Fakamoli: “Fakaaue ke he tau laliaga kua taute e mutolu ke ako e vagahau uka haku. Kua fakaaue lahi au ke ako e tau mena loga homo ue atu mai he Tohi Tapu he tau tau motua haku.”

¹⁶ Nakai ofo ai mogoia, ko lautolu ne fekafekau he tau fakapotopotoaga vagahau kehe kua logona e taui lahi mahaki. Ko e hoa mai i Peritania ne pehe: “Ko e fekafekauaga ke he fonua vagahau kehe ko e taha he tau mena fiafia lahi ne kua logona e maua he ha maua a 40 e tau he fekafekau he Kautu.” Maeke nakai ia koe ke hikihiki e tau tutuaga hau ke fakalataha ke he fekafekauaga fakalagalaga nei? Kaeke fano agaia a koe he aoga, maeke nakai ia koe ke fakaako e vagahau kehe he tauteute ma e taha vahega fekafekauaga nei? He taute pihia ka maeke ke hafagi e gutuhala ke he puhala moui fiafia ne kua pukeina he tau monuina. (Tau Fakatai 10:22) Ko e ha he fakatutala e mena nei mo e tau mamatua hau?

Fakakehekehe ha Tautolu a Tau Puhala

17. Maeke fefe ia tautolu ke hohoko atu ke he loga he tau tagata he fonua he fakapotopotoaga ha tautolu?

¹⁷ Maama ai, kua nakai fakaata he tau tutuaga e laulahi ia tautolu ke tuku atu e “tau kupega” ha tautolu ke he tau matakavi vagahau kehe. Pete ia, liga maeke ia tautolu ke hoko ke he loga atu e tagata mai he mena kua fa taute e tautolu mogonei ke he fonua he fakapotopotoaga ha tautolu ni. Taute fefe? He fakakehekehe, nakai ko e fekau ha tautolu, ka e ko e tau puhala ha tautolu. Ke he loga he tau matakavi kua lahi atu fakahaga e numera he tau tagata ne nonofo he tau fale kua kikili e puipuiaga. Tokologa e falu ne nakai haia he tau kaina ka o atu a tautolu he fekafekauaga ke he taha fale mo e taha fale. Ti liga lata ia tautolu ke tuku e “tau kupega” ha tautolu he tau magaaho kehekehe mo e ke he tau matakavi kehekehe. Ti kua fifitaki e tautolu a Iesu. Ne kumi puhala a ia ke tutala ke he tau tagata he tau tutuaga kehekehe.​—Mataio 9:9; Luka 19:1-10; Ioane 4:6-15.

18. Puhala fe he fakamatala he tau tutuaga kehekehe kua lauia mitaki moli? (Putoia e puha “Taute Tutaki he Tau Tagata Pisinisi.”)

¹⁸ Ke he falu vala he lalolagi, ko e fakamatala ke he ha mena ne ha ha ai e tau tagata ko e puhala aoga lahi he taute tutaki. Ko e tau tagata kua makai  he taute tutaki kua hane malikiti hake e onoonoaga ke fakamatala ke he tau matakavi kehekehe. Ke lafi ke he fakalataha he fekafekauaga he taha fale ke he taha fale, ko e tau tagata fakamatala he mogonei kua fakamatala he tau male vakalele, he tau ofisa, he tau fale koloa, he tau paakaaga motoka, he tau tuaga pasi, he tau puhalatu, he tau paaka, he tau mataafaga, mo e ha matakavi ni. Ne tokologa e Tau Fakamoli ne papatiso fou i Hauai ne kua moua fakamua ke he tau matakavi pehenei. Ko e fakakehekehe he tau puhala ha tautolu kua lagomatai a tautolu ke taute katoatoa e poaki ha Iesu ke taute tutaki.​—1 Korinito 9:22, 23.

19. Ko e heigoa e tau mena he poakiaga ha Iesu ki a tautolu ka fakatutala ki ai he vala tala ka mui mai?

¹⁹ Ko e kotofaaga ha Iesu ke taute tutaki kua putoia e tau matafeiga nakai ni hagaao ke he ko e ha mo e i fe kua lata ia tautolu ke taute e gahua ia ka e pihia foki ko e heigoa kua lata ia tautolu ke fakamatala mo e matutaki a tautolu ke taute ato hoko e magaaho fe. Ko e tau mena ua nei he poakiaga ha Iesu ki a tautolu ka fakatutala ki ai he vala tala ka mui mai.

[Tau Matahui Tala]

Manatu Nakai e Koe?

• Ma e tau kakano fe mo e ko e heigoa e manatu ati fakalataha ai a tautolu ke he fakamatala he Kautu mo e taute tutaki?

• Laulahi fefe e gahua he tau fekafekau ha Iehova he vaha nei he taute e poakiaga ha Iesu ke taute tutaki he tau tagata he tau motu oti?

• Maeke fefe ia tautolu ke fakakehekehe e ‘tau puhala takafaga ika’ ha tautolu, mo e ko e ha kua lata ia tautolu ke taute pihia?

[Tau Huhu he Fakaakoaga]

[Puha/Tau Fakatino he lau 20]

Tau Tohi ma e Tau Matapouli

Ko Albert ko e motua Kerisiano mo e fekafekau gahua mau ne nofo he Tau Fahi Kaufakalataha. Kua matapouli a ia. Kua lagomatai ke lahi atu e lauia mitaki hana he fakaaoga e tau tohi faka-Tohi Tapu Paraile ke he hana fekafekauaga, putoia ke he tau gahua hana ko e leveki fekafekau. Maeke fefe ia ia ke taute e tau kotofaaga hana he fakapotopotoaga?

“Ne nakaila fai leveki fekafekau lauia mitaki ia a mautolu he fakapotopotoaga ke tuga a Albert,” he talahau e James, ko e leveki fakapotopotoaga. Ko Albert ko e taha tagata mai he tau tagata matapouli ne kavi 5,000 he Tau Fahi Kaufakalataha, ke he tau tau loga, ne moua e tau tohi faka-Tohi Tapu Paraile faka-Peritania mo e faka-Sepania. Ko e mena ia, tali mai he 1912 ki mua, ko e vahega fekafekau fakamoli kua foaki mai molea e taha teau he tau tohi Paraile kehekehe. He fakaaoga e tau puhala fou, ko e tau lolomiaga tohi he Tau Fakamoli a Iehova he mogonei kua talaga miliona e tau lau tohi Paraile he tau tau takitaha ke he molea e hogofulu e vagahau mo e tufatufa ai ke molea e 70 e motu. Fai tagata nakai a koe ne iloa ka aoga mai he tau tohi faka-Tohi Tapu ne taute ma e tau tagata matapouli?

[Puha/Fakatino he lau 21]

Vagahau Matalima mo e Taute Tutaki

Totou afe e Tau Fakamoli he lalolagi katoa, putoia e tokologa he tau fuata makutu, nukua ako e vagahau matalima ke lagomatai e tau tagata teligatuli ke eke mo tau tutaki he Keriso. Ko e fua, i Parasili hokoia, 63 e tagata teligatuli ne papatiso he taha e tau nakaila leva ia mo e 35 e Tau Fakamoli teligatuli i ai hane gahua evagelia fekafekau mau. Ke he lalolagi katoa, kua molea e 1,200 e fakapotopotoaga mo e matakau vagahau matalima. Ko e takaiaga vagahau matalima i Rusia, ko e fonua lahi, ko e takaiaga kua mua e lahi ke he lalolagi, putoia a Rusia katoa!

[Puha he lau 22]

Taute Tutaki he Tau Tagata Pisinisi

He ahiahi ke he tau tagata pisinisi he tau ofisa ne gahua ai a lautolu, ko e Fakamoli i Hauai ne feleveia mo e takitaki lahi he kamupani puhala o peleoafi. Pete he lavelave, ne talia he tagata tane ke fakaako e Tohi Tapu ke he 30 e minuti he fahitapu ke he ofisa hana. He tau pogipogi Lotu oti, ne tala age a ia ke he tau tagata gahua hana ke taofi e tau hea telefoni oti hana ti tuku hana manamanatuaga katoatoa ke he fakaakoaga. Taha Fakamoli i Hauai ne fakaako e Tohi Tapu lagataha he fahitapu mo e pule he fale koloa fakafou tevae. Ne taute e fakaakoaga he fuga lapa he fale koloa. Ka hau e tagata fakatau, ne uneune e Fakamoli ke he fahi. Ka mole e tagata fakatau, ne matutaki e fakaako ha laua.

Ne moua tokoua e takitaki lahi mo e pule ke he fale koloa ha kua maeke he Tau Fakamoli ke tuku ha lautolu a “tau kupega” he tau matakavi kehekehe. Maeke nakai ia koe ke manamanatu ke he tau matakavi he fakapotopotoaga hau ne liga maeke ia koe ke moua e tau tagata ne uka ke moua he tau kaina?