Lago Kia ke he Atua ha Tautolu a Tau Lekua?

HE MAGAAHO ne matematekelea e tama fifine lahi ha Marion he pakia kelea e uho niu, ne taute e Marion e taha mena ne tokologa ia tautolu ka taute. * Ne liogi a ia ke he Atua ma e lagomatai. “Ne nakai manatu e au ha magaaho kua logona e au e galo mo e matimati,” he talahau e Marion. Nakai leva, ko e tuaga he tama fifine hana kua kelea lahi mahaki, ti kamata a Marion ke fai huhu hagaao ke he Atua. “Ko e ha ne tupu ai e mena nei?” he huhu e ia. Ne nakai maama e ia ko e maeke fefe he Atua fakaalofa mo e leveki ke tiaki a ia.

Ko e mena ne tupu ki a Marion kua nakai ko e mena fou. Tokologa e tau tagata he lalolagi ne logona kua tiaki he Atua ke he tau magaaho ka manako lagomatai. “Ne taufetului agaia au ke he ‘tau huhu ko e ha e ATUA,’” he talahau e Lisa, he mole e kelipopo he hana mokopuna tane. “Nakai galo katoa haku a tua ke he Atua, ka e moli kua hiki tuai.” Tatai ai, he mole e lauia he matematekelea nakai fai fakatataiaga ne putoia e tama tane mukemuke hana, ne pehe taha fifine: “Ne nakai mai he Atua ha fakamafanatia ki a au ke he mena kua tupu. Ne nakai foaki mai e ia ha fakamailoga po ke ha fakaalofa hofihofi noa.” Ne lafi e ia: “To nakai fakamagalo e au e Atua.”

Ko e falu ne fakatupu e tau manamanatuaga mamahi ke he Atua he magaaho ne kitekite atu a lautolu ke he lalolagi ne viko takai ia lautolu. Ne kitia e lautolu e tau kaufakalatahaaga kua fakamamahi ha ko e mativa mo e hoge, tau tagata tupetupe ne fehola ha ko e tau felakutaki, numera lahi mahaki he tau fanau ikiiki kua nakai fai matua ha ko e AIDS, mo e miliona he tau tagata kua matematekelea he falu gagao. He fehagai mo e tau mena nei mo e tau lekua pihia, kua tokologa ne tuku aki e Atua he fuafua kua nakai lagomatai e ia.

Ka e, ko e moli, ke nakai tuku ke he Atua e tau lekua ne malaia ai e tau tagata. He mailoga, kua ha ha ai e tau kakano aoga lahi ke talitonu to nakai leva ti vevete he Atua e fakamamahi kua tamai ke he magafaoa tagata. Kua uiina e mautolu a koe ke fufuke ke he vala tala ka mui mai ke kitia kua leveki moli he Atua a tautolu.

[Matahui Tala]