Olioli Nakai a Koe ke he “Fakatufono a Iehova”?

‘Fiafia e tagata kua olioli ke he fakatufono a Iehova.’​—SALAMO 1:1, 2.

1. Ko e ha kua fiafia a tautolu ko e tau fekafekau ha Iehova?

KUA lalago mo e fakamonuina e Iehova a tautolu ko e tau fekafekau mahani fakamoli hana. Moli, kua fehagai a tautolu mo e tau kamatamata loga. Pete he pihia, kua olioli foki e tautolu e fiafia moli. Kua nakai lata ke ofo ke he mena nei, ha kua fekafekau a tautolu ke he ‘Atua fiafia,’ mo e agaga tapu hana kua fakatupu i loto he tau loto ha tautolu e olioli. (1 Timoteo 1:11; Kalatia 5:22) Ko e olioli, ko e tuaga fiafia moli ne fua mai he amaamanakiaga po ke he moua e tau mena mitaki. Mo e foaki moli he ha tautolu a Matua he lagi ki a tautolu e tau mena mitaki oti kua foaki noa. (Iakopo 1:17) Ti ko e kakano haia ne kua fiafia ai a tautolu!

2. Ko e heigoa e tau salamo ka fakatutala a tautolu ki ai?

² Ko e fiafia kua fakamaama fakalahi mai he tohi he tau Salamo. Ke tuga anei, kua kitia moli ai ke he tau Salamo 1 mo e 2 (fakatatai NW.). Ko e tau tutaki fakamua atu ha Iesu Keriso ne fakahagaao atu e salamo ke uaaki ke he patuiki ha Isaraela ko Tavita. (Gahua 4:25, 26) Ko e tagata nakai fakahigoa ne fati e salamo fakamua ne kamata hana lologo omoi agaga aki e tau kupu: ‘Fiafia e tagata kua nakai fano ke he pulega he tau tagata mahani kelea.’ (Salamo 1:1) I loto he vala tala nei mo e ka mui mai, to kitia e tautolu e puhala ne foaki he tau Salamo 1 mo e 2 ki a tautolu e kakano ke olioli.

Ko e Mena Galo he Fiafia

3. Hagaao ki a Salamo 1:1, ko e heigoa e falu kakano ne fiafia ai e tagata mahani Atua?

³ Ne fakakite he Salamo 1 e kakano ne fiafia ai e tagata mahani Atua. He foaki mai e falu kakano ma e fiafia pihia, ne lologo e salamo: ‘Fiafia e tagata kua nakai fano ke he pulega he tau tagata mahani kelea, kua nakai tu foki a ia ke he puhala he tau tagata hala, kua nakai nofo foki ke he nofoaga he tau tagata fa va.’​—Salamo 1:1.

4. Ko e heigoa e fakafifitakiaga mitaki ne tutuli e Sakaria mo Elisapeta?

⁴ Ke fiafia moli, kua lata ia tautolu ke fakatatai atu ke he tau manako tututonu a Iehova. Ko Sakaria mo Elisapeta, ne moua e lilifu fiafia lahi he eke mo tau matua ha Ioane ko e Papatiso, ‘kua tututonu foki a laua tokoua ki mua he Atua, kua oma e laua e tau poaki mo e tau fakatufono oti ha Iehova, kua nakai talahaua kelea a laua.’ (Luka 1:5, 6) Maeke ia tautolu ke fiafia kaeke tutuli e tautolu e puhala taha ia ni mo e fakamao ke fakaheu ke ‘nakai fano ke he pulega he tagata mahani kelea’ po ke takitaki he tomatomaaga nakai mahani Atua ha lautolu.

5. Ko e heigoa ka lagomatai a tautolu ke kalo mai he “puhala he tau tagata hala”?

⁵ Kaeke fakaheu e tautolu e manamanatuaga he tau tagata mahani kelea, to nakai ‘tutu a tautolu ke he puhala he tau tagata hala.’ Ko e moli, to nakai moua a tautolu ke he tau mena ne fa o a lautolu ki ai​—tau kavi fakafiafia po ke talahaua  kelea. Ka e kua ka kamatamata a tautolu ke fakalataha mo e tau tagata hala ke he tau mahani nakai faka-Tohi Tapu ha lautolu? Mogoia ka liogi a tautolu ma e lagomatai he Atua ke fakafelauaki mo e tau kupu he aposetolo ko Paulo: “Aua neke hahamo a mutolu mo e nakai tatai fakalataha mo lautolu kua nakai tua; ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli?” (2 Korinito 6:14) Kaeke falanaki a tautolu ke he Atua mo e kua “loto mea,” to fakaheu e tautolu e agaga mo e puhala moui he tau tagata hala mo e to moua e tau manatu mo e tau manako mea, katoa mo e “tua fakamoli.”​—Mataio 5:8; 1 Timoteo 1:5.

6. Ko e ha kua lata ia tautolu ke fakaeneene hagaao ke he tau tagata fa va?

⁶ Ke fakafiafia a Iehova, kua lata moli ia tautolu ke ‘nakai nonofo ke he nofoaga he tau tagata fa va.’ Falu ne va e lautolu e mahani Atua, ka e he “tau aho fakamui” nei, ne eke e tau Kerisiano fakamua mo tau tagata tiaki taofiaga ne fa mahani mau ke mua atu e fakavihia ke he tau va ha lautolu. Ne hataki he aposetolo ko Peteru e tau katofia talitonu: “Ko e tau fakahelehele na e, . . . kua iloa fakamua e mena nai, to o mai ke he tau aho fakamui e tau tagata va, kua mahani fakalata ke he tau manako lahi ha lautolu; kua pehe mai foki a lautolu, Ko fe e kupu talahaua ai ke haele mai a ia? ha ko e mena tali mai he momohe e tau matua, kua tumau agaia e tau mena oti tali mai he fakatoka eke.” (2 Peteru 3:1-4) Kaeke ke nakai nonofo a tautolu he ‘nofoaga he tau tagata va,’ to puipui mai a tautolu he matematekelea ka hoko moli ki a lautolu.​—Tau Fakatai 1:22-27.

7. Ko e ha kua lata ia tautolu ke uta e tau kupu he Salamo 1:1 ke he loto?

⁷ Ato uta e tautolu e tau kupu hafagi he Salamo 1 ke he loto, to liga galo ia tautolu e tuaga fakaagaga ne moua e tautolu he puhala he fakaako ke he tau Tohiaga Tapu. Ko e moli, kua maeke ia tautolu ke fakaauatu foki e kelea. Ko e mokulu hifo ha tautolu to liga kamata kaeke muitua a tautolu ke he fakatonuaga he tagata mahani kelea. Ti liga fio tumau a tautolu mo lautolu. Fai magaaho, liga eke foki a tautolu mo tau tagata tiaki taofiaga nakai tua mo e va. Kitia maali ai, ko e fakakapitiga mo e tau tagata mahani kelea ka feaki e agaga nakai mahani Atua i loto ia tautolu ti maeke ke moumou e fakafetuiaga ha tautolu mo Iehova ko e Atua. (1 Korinito 15:33; Iakopo 4:4) Kia nakai fakaata e tautolu e mena ia ke tupu ki a tautolu!

8. Ko e heigoa ka lagomatai a tautolu ke fakatumau e tau loto manamanatu ha tautolu ke he tau mena fakaagaga?

⁸ To lagomatai he liogi a tautolu ke fakatumau e tau loto manamanatu ha tautolu ke he tau mena fakaagaga mo e ke kalo mai he  faihoani mo e tau tagata mahani kelea. “Aua neke fakaatukehe a mutolu ke he taha mena taha,” he tohia e Paulo, “ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” Ne fakamalolo he aposetolo e tau mena ne kua moli, kua gali, kua tonu, kua mea, kua fulufuluola, kua talahaua mitaki, ko e mahani mitaki, mo e kua nava. (Filipi 4:6-8) Kia felauaki e tau gahua ha tautolu mo e fakatonuaga ha Paulo mo e nakai fakakoku hifo ke he tuaga he tau tagata mahani kelea.

9. Pete kua kalo mai a tautolu he tau gahua kelea, puhala fe kua lali a tautolu ke lagomatai e tau vahega tagata oti kana?

⁹ Pete he fakaheu e tautolu e tau gahua kelea, kua foaki e tautolu e fakamatala iloilo ke he falu, ke tuga ne vagahau pihia e aposetolo ko Paulo ke he Iki Roma ko Feliki hagaao “ke he tututonu, mo e nakai matagaoi, mo e fakafiliaga ne tatali.” (Gahua 24:24, 25; Kolose 4:6) Kua fakamatala e tautolu e tala mitaki he Kautu ke he tau vahega tagata oti kana, mo e fakafehagai totonu atu a tautolu ki a lautolu. Kua mauokafua a tautolu ko lautolu “ne kotofa ke he moui tukulagi” to eke mo tau tagata talitonu mo e olioli ke he fakatufono he Atua.​—Gahua 13:48.

Ne Olioli a Ia ke he Fakatufono a Iehova

10. Ko e heigoa ka lagomatai ke toka tumau ke he manamanatuaga mo e loto ha tautolu he magahala he fakaako fakatagata?

¹⁰ Hagaao ke he tagata fiafia, ne talahau foki e salamo: ‘Ko e fakatufono a Iehova kua olioli ai a ia, ti manamanatu a ia ke he tau fakatufono hana ke he aho katoa mo e po.’ (Salamo 1:2) Ko e tau fekafekau he Atua, ‘kua olioli a tautolu ke he fakatufono a Iehova.’ He magaaho ka maeke, he tau magahala fakaako fakatagata mo e manamanatu hokulo, liga totou a tautolu “ti manamanatu,” he fakaleo e tau kupu. He taute pehenei he magaaho ka totou ha vala he tau Tohiaga Tapu ka lagomatai ke toka tumau ke he manamanatuaga mo e loto ha tautolu.

11. Ko e ha kua lata ia tautolu ke totou e Tohi Tapu ke he “aho katoa mo e po”?

¹¹ Ko e “fekafekau fakamoli mo e loto matala” kua fakamalolo mai ki a tautolu ke totou e Tohi Tapu ke he tau aho oti. (Mataio 24:45) Ha ko e manako moli ke iloa mitaki e fekau ha Iehova ma e tau tagata, kua lata ia tautolu ke totou e Tohi Tapu ke he “aho katoa mo e po”​—e, pihia foki ka nakai maeke ia tautolu ke momohe ha ko e falu kakano. Ne fakatonu e Peteru a tautolu: “Kia manako lahi a mutolu, tuga e tau tama mukemuke kito fanau, ke he puke huhu he kupu nakai fakavai, kia tutupu ai a mutolu [“ke he fakamouiaga,” NW].” (1 Peteru 2:1, 2) Kua olioli nakai a koe he totou e Tohi Tapu ke he tau aho oti mo e manamanatu fakahokulo ke he Kupu he Atua mo e tau finagalo he po? Ne taute pihia he salamo.​—Salamo 63:6.

12. Ko e heigoa ka taute e tautolu kaeke olioli a tautolu ke he fakatufono a Iehova?

¹² Ko e fiafia tukulagi ha tautolu kua falanaki ke he ha tautolu a olioli ke he fakatufono he Atua. Kua mitaki katoatoa mo e tututonu ai, ti ha ha ai e palepale lahi ka taofi mau ki ai. (Salamo 19:7-11) Ne tohia he tutaki ko Iakopo: “Ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, kua nakai fanogonogo fakanimonimo e tagata ia, ka kua eke e ia e gahua, to monuina e ia ke he hana omaoma.” (Iakopo 1:25) Kaeke olioli moli a tautolu ke he fakatufono a Iehova, to nakai fai aho ka mole mo e nakai manamanatu ke he tau mena fakaagaga. Moli, to omoomoi a tautolu ke ‘kumi hifo ke he tau mena hokulo he Atua’ mo e ke tuku fakamua e tau mena he Kautu he moui.​—1 Korinito 2:10-13; Mataio 6:33.

Ne Eke a Ia ke Tuga e Akau

13-15. Ko e heigoa e kakano ne kua maeke ia tautolu ke tuga e akau ne tupu he tapa he vai puke lahi?

¹³ He fakamaama e tagata tututonu, ne talahau e salamo: ‘To tuga a ia mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to kautu foki a ia ke he tau mena oti kana ke eke e ia.’ (Salamo 1:3) Tuga falu tagata nakai mitaki katoatoa oti kana, ko tautolu  ne fekafekau ki a Iehova kua fakafita atu ke he tau mena uka he moui. (Iopu 14:1) Liga matematekelea a tautolu ke he favaleaga mo e falu kamatamata kehekehe ne matutaki ke he tua ha tautolu. (Mataio 5:10-12) Pete ni ia, mo e lagomatai he Atua kua maeke ia tautolu ke fakauka mo e kautu ke he tau kamatamata nei, ke tuga ni e akau moui olaola mo e malolo lahi ne fahia atu ke he tau matagi malolo pihia.

¹⁴ Ko e akau ne tupu mau he tapa he puke vai kua nakai magomago he vaha vela po ke magahala to la. Kaeke ko tautolu ko e tau tagata matakutaku Atua, kua moua mai e malolo ha tautolu he Punaaga tukulagi​—ko Iehova ko e Atua. Ne kumi a Paulo ke he Atua ma e lagomatai ati maeke ke talahau: “Kua maeke ia au e tau mena oti kana ke he fakamalolo mai a Keriso kia au.” (Filipi 4:13) He magaaho ka takitaki mo e fakamalolo fakaagaga he agaga tapu ha Iehova a tautolu, kua nakai magomago a tautolu ke nakai fai fua po ke mate fakaagaga. Kua fua loga a tautolu he fekafekauaga he Atua mo e fakakite foki e tau fua he agaga hana.​—Ieremia 17:7, 8; Kalatia 5:22, 23.

¹⁵ He fakaaoga e vahega kupu Heperu ne pehe ‘tuga,’ ne fakaaoga he salamo e simeli (tala fakataitai ku). Ne fakatatai e ia ua e mena kehekehe, pete kua tatai e foliga ha laua. Ko e tau tagata mo e tau akau kua kehekehe, ka ko e moui olaola he akau ne tupu he tapa he vai puke lahi ne fakamanatu moli ke he salamo e mahuiga fakaagaga ha lautolu ne ‘olioli ke he fakatufono a Iehova.’ Kaeke olioli a tautolu ke he fakatufono he Atua, ko e tau aho ha tautolu to tuga a ia he akau. Ko e moli, kua maeke ia tautolu ke moui tukulagi.​—Ioane 17:3.

16. Ko e ha mo e puhala fe ne ‘kua kautu e tau mena oti ne eke e tautolu’?

¹⁶ He tutuli e tautolu e puhala tututonu, kua lagomatai e Iehova a tautolu ke fahia ke he peehiaga he tau kamatamata mo e tau mena uka. Kua olioli a tautolu mo e fua loga ke he fekafekauaga he Atua. (Mataio 13:23; Luka 8:15) ‘Kua kautu e tau mena oti ne eke e tautolu’ ha ko e matapatu foliaga ha tautolu ke taute e finagalo a Iehova. Ha kua kautu tumau e tau finagalo hana mo e olioli a tautolu ke he tau poakiaga hana, kua monuina fakaagaga a tautolu. (Kenese 39:23; Iosua 1:7, 8; Isaia 55:11) Kua pihia foki e mena nei he magaaho ka fehagai a tautolu ke he tau matematekelea.​—Salamo 112:1-3; 3 Ioane 2.

Hihiga ke Monuina e Tagata Mahani Kelea

17, 18. (a) Ko e heigoa ne fakatatai he salamo e tau tagata mahani kelea ki ai? (e) Pete ni ka maukoloa e tau tagata mahani kelea, ko e ha kua nakai ha ha ia lautolu e haohao mitaki tukulagi?

¹⁷ Kua kehe ha ia e moui he tagata mahani kelea mai he tagata tututonu! Kua liga hihiga a lautolu ne mahani kelea ke fai magaaho ne maukoloa ai, ka e kua nakai monuina fakaagaga a lautolu. Kua kitia moli ai ke he tau kupu foki he salamo: ‘Nakai pihia e tau tagata mahani kelea; ka e tuga a lautolu mo e otaota he tau saito kua havilia he matagi. Ko e mena ia nakai tutu ai e tau tagata mahani kelea ke he fakafiliaga, nakai tutu foki e tau tagata hala ke he fakapotopotoaga he tau tagata tututonu.’ (Salamo 1:4, 5) Mailoga ne talahau he salamo, “nakai pihia e tau tagata mahani kelea.” Hana kakano kua nakai tatai a lautolu tuga e tau tagata mahani Atua, ne kua fita e fakatatai ke he tau akau fua loga mo e moui loloa.

¹⁸ Pete ni ka maukoloa e tau tagata mahani kelea, kua nakai ha ha ia lautolu e haohao mitaki tukulagi. (Salamo 37:16; 73:3, 12) Kua tatai a lautolu mo e tagata maukoloa ne totoku e Iesu i loto he fakataiaga he magaaho ne huhu ke fifili ke he matafekau hagaao ke he tufaaga. Ne tala age a Iesu ki a lautolu ne ha ha ai: “A mutolu, kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.” Ne fakataitai e Iesu e manatu nei he talahau ko e fonua he taha tagata maukoloa kua fua loga ati pulega a ia ke ulu e tau fale saito mo e ta fakalalahi ke tanaki aki e tau koloa oti hana. Ko e tagata mogoia ne pulega a ia ke kai, inu, mo e fiafia a ia. Ka e tala age e Atua: “Ko e goagoa na e, to ahi atu hau a moui mai ia koe ke he po a magaaho; to eke ma hai e tau mena ia ne taute e koe?” Ke peehi e manatu hana, ne lafi e Iesu: “Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.”​—Luka 12:13-21.

19, 20. (a) Fakamaama e puhala he taholiaga mo e fakameaaga saito he vaha i tuai. (e) Ko e ha kua fakatatai e tau tagata mahani kelea ke he tau otaota he saito?

 ¹⁹ Ko e tagata mahani kelea kua “nakai maukoloa a ia ke he Atua.” Ko e mena ia, kua nakai ha ha ia lautolu e haohao mitaki mo e mauokafua ke tuga e tau otaota he saito, ko e kili aleale he tega saito. He mole e helehele e saito he tau vaha i tuai, ne uta ai ke he taholiaga saito, ko e kelekele lautatai ne haia he fuga matiketike. I ai ko e tau peleo ne toka i lalo e maka matila po ke tau nifo lapatoa ne toho he tau manu huifa i luga he tau fua saito ke fakamaihiihi mo e fakavalavala aki e tau ka ke mokulu mai ki fafo e tau tega he tau otaota he saito. Oti mogoia, ti fakaaoga e aku fakamea ke lagaki hake aki e tau ka saito mo e tolo ki luga ke agi he matagi. (Isaia 30:24) Ne mokulu hifo e tau tega ki kelekele he taholiaga saito, ka e puhi he matagi e tau ka ke he taha fahi mo e uulo ke he vao e tau otaota he saito. (Ruta 3:2) He mole e tuku e tau fua saito i loto he hakahaka ke utakehe e tau teputepu po ke tau kiva pihia, kua mau tuai ke tanaki po ke ke holo. (Luka 22:31) Ka e kua galo e tau otaota saito.

²⁰ Ti tuga ni e tau tega ne mokulu ke he kelekele ti fakaputuputu ka e uulo ke he vao e tau otaota he saito, to toe hifo pihia e tau tagata tututonu mo e utakehe e tau tagata mahani kelea. Moli, mogoia, kua fiafia a tautolu to nakai leva ti galo tukulagi e tau tagata taute mena kelea. Ha kua nakai ha ha ai a lautolu, ko e tau tagata ne olioli ke he fakatufono a Iehova to fakamonuina lahi. Moli, ko e tau tagata omaoma to fakahiku ke moua e mena fakaalofa he Atua ko e moui tukulagi.​—Mataio 25:34-46; Roma 6:23.

Ko e ‘Puhala Monuina he Tau Tagata Tututonu’

21. Ko e heigoa e kakano kua ‘fioia e Iehova e tau tagata tututonu’?

²¹ Ko e salamo fakamua ne fakahiku aki e tau kupu nei: “Kua fioia e Iehova e puhala he tau tagata tututonu; ka e moumou ai e puhala he tau tagata mahani kelea.” (Salamo 1:6) Kua ‘fioia fefe he Atua e tau tagata tututonu’? Pehenei, kaeke kua tutuli e tautolu e puhala tututonu, kua lata ke iloa moli e tautolu kua mailoga he ha tautolu a Matua he lagi ha tautolu a puhala moui mahani Atua mo e fioia ki a tautolu ko e tau fekafekau talia hana. Ko e mena ia, kua lata ia tautolu ke tuku atu ki a ia e tau fakaatukehe ha tautolu he talitonu na leveki moli mai e ia a tautolu.​—Esekielu 34:11; 1 Peteru 5:6, 7.

22, 23. Ko e heigoa ka tutupu ke he tau tagata mahani kelea mo e ke he tau tagata tututonu?

²² Ko e “puhala he tau tagata tututonu” to tumau tukulagi, ka e ko e tau tagata mahani kelea tumau to galo ha ko e fakafiliaga kaka ha Iehova. Mo e ha lautolu a “puhala,” po ke tuaga he moui, to fakaoti ni mo lautolu. Kua lata ia tautolu ke mauokafua ke he tau kupu ha Tavita: “Toe tote, ti nakai ha i ai e tagata mahani kelea; ka manamanatu foki a koe ke he mena hana ne nofo ai, nakai ha i ai a ia. Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi. To eke ni e motu ma e tau tagata tututonu, to nonofo muatua ai a lautolu.”​—Salamo 37:10, 11, 29.

²³ Ko e fiafia ha ia ka fakafita a tautolu ki ai kaeke monuina a tautolu ke moui he lalolagi parataiso he magaaho ka nakai ha ha ai e tau tagata mahani kelea! Ko e tau tagata mahani molu mo e tututonu to olioli mogoia e mafola moli ha ko e mena to moua tumau e lautolu e ‘olioli ke he fakatufono a Iehova.’ Ka e, fakamua to hoko e magaaho ia, ko e ‘poakiaga a Iehova’ kua latatonu ni ke fakagahuahua. (Salamo 2:7a) Ko e vala tala ka mui mai ka lagomatai a tautolu ke kitia ko e heigoa e fakatufono ia mo e heigoa la e kakano ma tautolu mo e ma e magafaoa katoa he tagata.

To Tali Fefe e Koe?

• Ko e ha ne fiafia ai e tagata mahani Atua?

• Fakakite he heigoa kua olioli a tautolu ke he fakatufono a Iehova?

• Maeke fefe e tagata ke tuga e akau ne fakamalu tumau?

• Kehe fefe e puhala he tau tagata tututonu mai he puhala he tau tagata mahani kelea?

[Tau Huhu he Fakaakoaga]

[Fakatino he lau 9]

To lagomatai he liogi a tautolu ke puipui mai he fio mo e tau tagata mahani kelea