Iehova, ha Tautolu a ‘Taue he Tau Vaha Matematekelea’
Iehova, ha Tautolu a ‘Taue he Tau Vaha Matematekelea’
“Mai ia Iehova e fakamouiaga he tau tagata tututonu; ko ia ni ko e taue ha lautolu ke he vaha matematekelea.”—SALAMO 37:39.
1, 2. (a) Ko e heigoa ne liogi a Iesu ki ai ke lata mo e tau tutaki hana? (e) Ko e heigoa e finagalo he Atua hagaao ke he tau tagata hana?
KUA mua ue atu a Iehova. Ha ha ia ia e malolo ke puipui e tau tagata tapuaki tua fakamoli hana ke he ha puhala ni ne manako e ia. Maeke foki ia ia ke vevehe moli mai e tau tagata hana he lalolagi katoa mo e tuku a lautolu he takatakaiaga haofia mitaki mo e mafola. Ka e, hagaao ke he tau tutaki hana, ne liogi a Iesu ke he hana Matua he lagi: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea.”—Ioane 17:15.
2 Nukua fifili e Iehova ke nakai “uta kehe [a tautolu] he lalolagi.” Ka e, ko e finagalo hana ke nonofo a tautolu mo e tau lanu tagata oti he lalolagi nei ke fakamatala e fekau hana he amaamanakiaga mo e mafanatia ke he falu. (Roma 10:13-15) Ka e, he tuga ne fakakite e Iesu he liogi hana, he nonofo he lalolagi nei, kua fakatapakupaku a tautolu ki a ‘lautolu ne mahani kelea.’ Ko e tau tagata faliuliu mo e tau agaga malolo kelea kua fakatupu e mamahi lahi mo e fakafualoto, ti kua nakai puipui mai e tau Kerisiano he fakaagitau.—1 Peteru 5:9.
3. Ko e tau tagata tapuaki tua fakamoli ha Iehova kua fakafehagai foki ke he heigoa, ka e ko e heigoa e mafanatia kua moua e tautolu i loto he Kupu he Atua?
3 I lalo he tau kamatamata pihia, ko e mena fa mahani ke fakafita atu ke he tau magahala he loto fakamamahi. (Tau Fakatai 24:10, fakatatai NW.) Ha ha he Tohi Tapu e tau fakamauaga loga he tau tagata tua fakamoli ne kua fakafita ke he matematekelea. “Loga e tau mena kelea ke hohoko ke he tagata tututonu,” he talahau he salamo, “ka e laveaki e Iehova a ia mai he tau mena oti ia.” (Salamo 34:19) Haia, kua tutupu foki e tau mena kelea ke he “tagata tututonu.” Ke tuga e salamo ko Tavita, he falu vaha to liga hokotia foki a tautolu ke he ‘ligoia mo e loto malipilipi lahi.’ (Salamo 38:8) Pete ia, kua mafanatia ke iloa “kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.”—Salamo 34:18; 94:19.
4, 5. (a) He felauaki mo e Tau Fakatai 18:10, ko e heigoa kua lata ia tautolu ke taute ke fakaata a tautolu ke moua e puipuiaga he Atua? (e) Ko e heigoa falu lakaaga pauaki kua lata ke uta e tautolu ke moua e lagomatai he Atua?
4 He felauaki mo e liogi a Iesu, hane onoono mai a Iehova ki a tautolu. Ko ia ko e “taue ha [t]autolu ke he vaha matematekelea.” (Salamo 37:39) Ko e tohi he Tau Fakatai ne fakaaoga e vagahau pihia he magaaho ne talahau: “Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.” (Tau Fakatai 18:10) Kua fakakite he tohi nei e kupu moli hagaao ke he leveki totonu ha Iehova ma e tau mena momoui hana. Kua foaki lahi he Atua e puipui ke he tau tagata tututonu ne kumi fakamakai ki a ia, ke tuga kua tafepoi a tautolu ki loto he kolo uka ma e laveakiaga.
5 He magaaho ka fehagai mo e tau lekua fakamatematekelea, maeke fefe ia tautolu ke tafepoi ki a Iehova ma e puipuiaga? Kia kikite a tautolu ke he tolu e lakaaga uho lahi ne kua lata ia tautolu ke uta ke moua e lagomatai a Iehova. Fakamua, lata ia tautolu ke fuluhi ke he ha tautolu a Matua he lagi he liogi. Ke uaaki, lata ia tautolu ke gahua ke felauaki mo e agaga tapu hana. Mo e toluaki, lata ia tautolu ke oma e fakaholoaga a Iehova he kumi e lafiaga mo e tau katofia Kerisiano, ko lautolu ka matuku hifo ai e tau matematekelea ha tautolu.
Ko e Malolo he Liogi
6. Fefe e mailogaaga he tau Kerisiano moli ke he liogi?
6 Falu pulotu he fahi malolo tino ne talahau e liogi ke eke mo tului ma e fakaagitau mo e loto tupetupe. Pete he moli kua eke e vaha mamanofua tuga e magahala liogi ke fakatu e loto tupetupe, kua liga pihia foki mai he falu leo pauaki po ke he mulumulu e tua. Kua nakai uta fakamama he tau Kerisiano moli e liogi he onoono noa ki ai ko e vai tului ke fakamitaki e logonaaga. Kua mailoga e tautolu e liogi ko e matutakiaga mua ue atu mo e Tufuga. Kua putoia ke he liogi ha tautolu e aga fakamoli mo e mauokafua ke he Atua. E, ko e liogi ko e vala he tapuakiaga ha tautolu.
7. Ko e heigoa e kakano ke liogi mo e mauokafua, mo e lagomatai fefe he tau liogi pihia a tautolu ke fahia ke he loto matematekelea?
7 Ko e liogi ha tautolu kua lata ke fakahoa he loto mauokafua, po ke falanaki, ki a Iehova. Ne tohia he aposetolo ko Ioane: “Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.” (1 Ioane 5:14) Ko Iehova, ko Ia ne Pule Tokoluga, ko e Atua moli mo e mua ue atu hokoia, kua foaki moli e onoonoaga pauaki ke he tau liogi fakamoli he tau tagata tapuaki hana. He iloa moli kua logona he Atua fakaalofa ha tautolu a tautolu he magaaho ka talahau e tautolu e tau tupetupe mo e tau lekua ha tautolu ki a ia, kua mafanatia lahi.—Filipi 4:6.
8. Ko e ha kua nakai lata e tau Kerisiano tua fakamoli ke logona e maimaina po ke nakai aoga ka o atu ki a Iehova he liogi?
8 Ko e tau Kerisiano tua fakamoli kua nakai lata ke logona e maimaina, nakai aoga, po ke nakai mauokafua he magaaho ka o atu ki a Iehova he liogi. Moli, ka logona e tautolu e kaumahala ha tautolu ni po kua lofia ke he tau lekua, liga nakai manako tumau a tautolu ke o atu ki a Iehova he liogi. He tau magaaho pihia kua lata ia tautolu ke manatu ‘kua fakaalofa a Iehova ke he hana tau tagata ne matematekelea’ mo e kua ‘fakamafana e ia e tau loto holoilalo.’ (Isaia 49:13; 2 Korinito 7:6) Mua atu he tau magahala ita lahi mo e matematekelea nukua lata ia tautolu ke fuluhi mauokafua atu ke he ha tautolu a Matua he lagi ko e ha tautolu a taue.
9. Ko e heigoa e matagahua he tua he liogi ha tautolu ke he Atua?
9 Ke aoga katoa mai he monuina he liogi, kua lata ia tautolu ke moua e tua moli. Kua talahau e Tohi Tapu “ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6) Kua putoia ke he tua moli e talitonu malolo ke he maeke mo e manako he Atua ke taui e puhala fanogonogo tumau ha tautolu ki a ia. “Kua hagao e na fofoga he Iki ke he tau tagata tututonu, kua fanogonogo mai foki hana tau teliga ke he tau liogi ha lautolu.” (1 Peteru 3:12) Ko e mataala tumau ke he manamanatu fakaalofa ha Iehova ma tautolu kua foaki mai e kakano uho ke he tau liogi ha tautolu.
10. Ko e heigoa kua lata ke moli ke he tau liogi ha tautolu kaeke ke moua e tautolu e malolo fakaagaga mai ia Iehova?
10 Kua fanogonogo a Iehova ke he tau liogi ha tautolu he magaaho ka foaki ai mo e loto katoatoa. Ne tohia he salamo: “Kua ui atu au kia koe mo e loto katoa; Iehova na e, kia fanogonogo mai a koe kia au.” (Salamo 119:145) Nakai tatai mo e tau liogi fakamau hifo he tau lotu loga, ko e tau liogi ha tautolu kua nakai talahau noa po ke talahau mo e loto fakauaua. He magaaho ka liogi a tautolu ki a Iehova mo e ha tautolu a “loto katoa,” ko e tau kupu ha tautolu kua puke he aoga mo e kakano. He mole e tau liogi fakamakai pihia, ne kamata a tautolu ke logona e totoka ne hau he tuku atu e tautolu “kia Iehova e tau mena ne fakaatukehe.” Tuga ne mavehe he Tohi Tapu, “ko ia ni ka fakamalolo” a tautolu.—Salamo 55:22; 1 Peteru 5:6, 7.
Agaga he Atua ko e ha Tautolu a Lagomatai
11. Ko e heigoa taha puhala ka tali mai a Iehova ki a tautolu he magaaho ka “ole atu” a tautolu ma e lagomatai hana?
11 Nakai ni ko Iehova ko e Fanogonogo he liogi ka ko e Tali foki. (Salamo 65:2) Ne tohia e Tavita: “Ko e aho ka matematekelea ai au, to ui atu ai au kia koe; ha kua fanogonogo mai a koe kia au.” (Salamo 86:7) Hagaao ki ai, ne fakamalolo e Iesu e tau tutaki hana ke “ole atu” ma e lagomatai a Iehova ha ko e ‘Matua he lagi’ to ‘foaki mai e agaga tapu kia lautolu ka ole atu ai kia ia.’ (Luka 11:9-13) E, kua eke e malolo gahuahua he Atua mo lagomatai, po ke fakamafanatia, ke he tau tagata hana.—Ioane 14:16.
12. Maeke fefe he agaga he Atua ke lagomatai a tautolu he magaaho tuga kua lofia lahi e tau lekua?
12 Pihia foki ka fehagai a tautolu mo e tau kamatamata, ko e agaga he Atua kua maeke ke tuku ia tautolu e “malolo kua mua ue atu ke he mena ne fa mahani ki ai.” (2 Korinito 4:7, NW) Ko e aposetolo ko Paulo, ne fakauka ke he tau tutuaga tupetupe loga, ne talahau mauokafua: “Ma e tau mena oti ne maeke ai ia au ha ko ia ne foaki mai e malolo ki a au.” (Filipi 4:13, NW) Tatai ai, ko e tau Kerisiano loga he vaha nei kua logona hifo e fakafou he malolo fakaagaga mo e loto manamanatu ha ko e tali ke he tau liogi ha lautolu. Fa mahani, ko e tau lekua fakamatematekelea kua nakai eke ke lofia lahi he mole e moua e tautolu e lagomatai he agaga he Atua. Ha ko e malolo nei ne mai he Atua, kua maeke ia tautolu ke talahau tuga ne talahau he aposetolo: “Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa; kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava.”—2 Korinito 4:8, 9.
13, 14. (a) Puhala fe ne eke moli a Iehova mo taue ha tautolu he puhala he Kupu tohia hana? (e) Puhala fe kua lagomatai fakatagata he fakagahuahua e tau matapatu fakaakoaga he Tohi Tapu a koe?
13 Ko e agaga tapu kua omoomoi mo e puipui foki e Kupu tohia he Atua ma e aoga ha tautolu. Puhala fe ne eke moli a Iehova mo taue ha tautolu he tau vaha matematekelea he puhala he tau lau tohi he Kupu hana? Taha puhala he foaki mai ki a tautolu e pulotu aoga mo e iloilo ke manamanatu. (Tau Fakatai 3:21-24) Kua fakaako he Tohi Tapu e tau puhala manamanatu ha tautolu mo e fakatolomaki e lotomatala ke fakakakano. (Roma 12:1) He puhala mai he totou mo e fakaako tumau e Kupu he Atua, katoa mo e fakagahuahua ai, kua maeke ia tautolu ke ‘fakaako e tau manamanatuaga ha tautolu ke mailoga e tau mena mitaki mo e tau mena kelea.’ (Heperu 5:14, fakatatai NW.) Liga kua fakafita fakatagata a koe ke he puhala ne lagomatai he tau matapatu fakaakoaga he Tohi Tapu a koe ke taute e tau fifiliaga pulotu ka fehagai mo e tau mena uka. Kua foaki he Tohi Tapu ki a tautolu e lotomatala ka lagomatai a tautolu ke moua e tau tuluiaga ke he tau lekua fakamatematekelea.—Tau Fakatai 1:4.
14 Kua foaki he Kupu he Atua ma tautolu taha punaaga foki he malolo—ko e amaamanakiaga he fakamouiaga. (Roma 15:4) Ne talamai he Tohi Tapu ki a tautolu ko e tau mena kelea to nakai tumau ke tutupu tukulagi. Po ke heigoa e tau kamatamata ne matematekelea ki ai a tautolu, na tutupu fakaku ni. (2 Korinito 4:16-18) Kua ha ha ia tautolu e “amaamanakiaga he moui tukulagi, kua talahau mai he Atua kua nakai maeke ke pikopiko, ka e nakaila kamata ai e tau hau.” (Tito 1:2) Kaeke olioli a tautolu ke he amaamanakiaga ia, fakalataha mo e mataala tumau ke he vaha anoiha kua kikila lahi ne mavehe e Iehova, maeke ia tautolu ke fakauka i lalo he kamatamata.—Roma 12:12; 1 Tesalonia 1:3.
Fakapotopotoaga—Ko e Fakatataaga he Fakaalofa he Atua
15. Maeke fefe he tau Kerisiano ke eke mo tau fakamonuina ke he taha mo e taha?
15 Taha foakiaga mai ia Iehova kua maeke ke lagomatai a tautolu he tau vaha matematekelea ko e fekapitigaaki ne olioli e tautolu i loto he fakapotopotoaga Kerisiano. Ne talahau he Tohi Tapu: “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.” (Tau Fakatai 17:17) Ko e Kupu he Atua kua fakamalolo a lautolu oti i loto he fakapotopotoaga ke fefakalilifuaki mo e ke feofanaki. (Roma 12:10) “Aua neke kumi e taha e mitaki hana ni, ka kia takitokotaha mo e kumi e mitaki he falu,” he tohia he aposetolo ko Paulo. (1 Korinito 10:24) He moua e puhala manamanatu pihia ka lagomatai a tautolu ke onoono atu ke he tau manako he falu ka e nakai ke he tau kamatamata ni ha tautolu. He magaaho ka foaki ne tautolu a tautolu ke he falu, kua nakai ni lagomatai e tautolu a lautolu ka e olioli foki e tautolu e taha fuafuaaga he fiafia mo e makona ka taute e tau kavega ha tautolu ke fahia ke hahamo.—Gahua 20:35.
16. Maeke fefe e tau Kerisiano takitokotaha ke fakamalolo?
16 Ko e tau tagata tane mo e tau fifine motua fakaagaga kua lata ke lahi e matagahua ke fakamalolo e falu. Ke maeke ke pihia, kua taute ne lautolu a lautolu ke ata mo e fakakapitiga. (2 Korinito 6:11-13) Ko e fakapotopotoaga kua fakamonuina moli ka fai magaaho e tau tagata oti ke fakamafana e tau fuata ikiiki, ke atihake a lautolu ne talitonu fou, mo e ke fakamalolo a lautolu ne fakaagitau. (Roma 15:7) Ko e fakaalofa fakamatakainaga foki ka lagomatai a tautolu ke kalo mai he agaga tuaha ke he falu. Lata ia tautolu ke eto ke fakahiku ko e tau puhala uka fakatagata ko e fakamailoga he lolelole fakaagaga. Ko Paulo ne ole age fakamitaki ke he tau Kerisiano ke “fakamafana a lautolu kua manava tote.” (1 Tesalonia 5:14) Fakakite he Tohi Tapu kua fakafita foki e tau Kerisiano tua fakamoli ke he matematekelea.—Gahua 14:15.
17. Ko e heigoa e tau magaaho hane ha ha ia tautolu ke fakamalolo aki e liliaga he fakamatakainaga faka-Kerisiano?
17 Kua foaki he tau feleveiaaga faka-Kerisiano e magaaho mitaki lahi ma tautolu ke fakamafana mo e fakamalolo e taha mo e taha. (Heperu 10:24, 25) Ko e fakafetui fakaalofa nei kua nakai fakakaupa ke he tau feleveiaaga he fakapotopotoaga. Ka e, ko e tau tagata he Atua kua kumi foki e tau magaaho ke putoia ke he lafiaga atihake he tau magahala noa. Ka mafuta hake mogoia e tau tutuaga matematekelea, to mautali a tautolu ke papale e taha mo e taha ha ko e tau liliaga malolo he fekapitigaaki ne kua fita he fakamau. Ne tohia he aposetolo ko Paulo: “Kia nakai ha i ai ke he tino e feveheaki, ka kia feleoleoaki e tau fahi tino oti kana. Kaeke foki ke mamahi e taha fahi tino, ti mamahi fakalataha ai e tau fahi tino oti; ka nava ke he taha fahi tino, ti fiafia fakalataha ai e tau fahi tino oti.”—1 Korinito 12:25, 26.
18. Ko e heigoa e fatuakiloto kua lata ia tautolu ke kalo mai ai he magaaho ka logona e tautolu e loto lolelole?
18 He tau magaaho, liga logona e tautolu e loto lolelole lahi ke olioli e lafiaga mo e tau katofia Kerisiano. Lata ia tautolu ke tau ke he tau logonaaga pihia neke fakatonoa a tautolu mai he mafanatia mo e papaleaga ka foaki he tau katofia talitonu. Ne hataki he Tohi Tapu a tautolu: “Ko ia kua vevehe kehe a ia, kua kumi ni e ia e mena ne manako ki ai a ia; kua latau a ia mo e tau iloilo oti ni.” (Tau Fakatai 18:1) Ko e tau matakainaga ha tautolu ko e fakatataaga a ia he levekiaga he Atua ma tautolu. Kaeke mailoga e tautolu e foakiaga fakaalofa ia, to moua e tautolu e totoka he tau vaha matematekelea.
Fakatumau e Aga Fiafia
19, 20. Puhala fe ne lagomatai he tau Tohiaga Tapu a tautolu ke tiaki e tau manamanatu fakalolelole?
19 Ka tupu e loto mamahi mo e momoko, kua mukamuka ke putoia ke he tau manamanatu fakalolelole. Ke tuga anei, ka hokotia ke he tau mena uka, liga kamata falu ke fakauaua ke he ha lautolu a tuaga fakaagaga, he fakahiku ko e tau mamahi ha lautolu ko e fakamailoga he nakai fiafia e Atua. Ka e kia manatu, na nakai kamatamata e Iehova ha tagata ke he ‘tau mena kelea.’ (Iakopo 1:13) “Kua nakai fiafia a ia [Atua] ke fakamatematekelea, po ke fakamamahi ai e tau tagata,” he talahau he Tohi Tapu. (Tagi Aue 3:33) Ke he taha fahi, na lahi e momoko ha Iehova ka matematekelea e tau fekafekau hana.—Isaia 63:8, 9; Sakaria 2:8.
20 Ko Iehova ‘ko e Matua he fakaalofa hofihofi, ko e Atua foki he tau fakamafanaaga oti.’ (2 Korinito 1:3) Na leveki e ia a tautolu, mo e to fakamatalahi e ia a tautolu he magaaho kua tata mai. (1 Peteru 5:6, 7) Ko e mataala tumau ke he fakaalofa hohofi he Atua ma tautolu ka lagomatai a tautolu ke fakatumau e aga mitaki, ti ke fiafia foki. Ne tohia e Iakopo: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe.” (Iakopo 1:2) Ko e ha? Ne tali e ia: “Ha ko e mena ka oti e kamatamata, ti moua ai e ia e foufou he moui, kua talahau mai ai he Iki ke foaki e ia kia lautolu kua fakaalofa kia ia.”—Iakopo 1:12.
21. Pete ko e tau mena uka ne fehagai mo tautolu, ko e heigoa e fakamoliaga ne age he Atua ki a lautolu ne eke ke tua fakamoli ki a ia?
21 Tuga kua hataki e Iesu a tautolu, i loto he lalolagi to matematekelea lahi a tautolu. (Ioane 16:33) Ka e mavehe mai e Tohi Tapu to nakai vevehe kehe he ‘matematekelea po ke fakaatukehe po ke favale po ke hoge po ke telefua po ke hagahaga kelea’ a tautolu mai he fakaalofa a Iehova mo e fakaalofa he hana Tama. (Roma 8:35, 39) Ko e mafanatia ha ia ke iloa ko e ha matematekelea ka fehagai mo tautolu ko e tau mena tutupu fakaku! He magaaho taha, he fakatalitali a tautolu ke he fakaotiaga he matematekelea he tau tagata, ko e ha tautolu a Matua fakaalofa, ko Iehova, hane onoono mai ki a tautolu. Kaeke tafepoi a tautolu ki a ia ma e puipuiaga, to eke moli a ia “mo kolo tokoluga ma lautolu ne malipilipi, ko e kolo tokoluga ke he tau vaha matematekelea.”—Salamo 9:9.
Ko e Heigoa ne Ako e Tautolu?
• Ko e heigoa kua lata ke amanaki e tau Kerisiano ki ai he nonofo agaia he lalolagi kelea nei?
• Maeke fefe he tau liogi fakamakamaka ha tautolu ke eke mo fakamaloloaga he magaaho ka fehagai a tautolu mo e tau kamatamata?
• Puhala fe kua eke e agaga he Atua mo lagomatai?
• Ko e heigoa kua maeke ia tautolu ke taute ke lagomatai ke he taha mo e taha?
[Tau Huhu he Fakaakoaga]
[Fakatino he lau 14]
Lata ia tautolu ke kumi a Iehova ke tuga kua tafepoi a tautolu ki loto he kolo uka
[Tau Fakatino he lau 16]
Ko e tau tagata motua fakaagaga kua fakaaoga e tau magaaho oti ke fakamafana mo e fakamalolo e falu