Ko e Mena kua Lata Moli Ke Fiafia

KO IEHOVA, ‘ko e Atua fiafia,’ mo Iesu Keriso, ‘kua fiafia mo e Iki tokotaha,’ ne iloa e mitaki lahi mahaki ke he tau mena oti kana kua lata ke fiafia. (1 Timoteo 1:11; 6:15) Ti, kua nakai ofo ai ko e kei ke fiafia nukua moua i loto he Kupu he Atua, ko e Tohi Tapu.​—Fakakiteaga 1:3; 22:7.

He hana Lauga talahaua he Mouga, ne fakamaama e Iesu e mena kua lata ke fiafia. Pehe a ia: “Fiafia a lautolu” (1) ne manamanatu ke he tau manako fakaagaga ha lautolu, (2) ne fakatutuku, (3) kua loto molu, (4) fia kai mo e fia inu ma e tututonu, (5) ne fakaalofa noa (6) ne loto mea, (7) ne loto mafola, (8) favaleaga ma e tau mena he tututonu, mo e (9) eke fakakelea mo e favale ke he tau tagata.​—Mataio 5:3-11, NW. *

Tonu Kia e Tau Fakamauaga ha Iesu?

Ko e fakamoliaga ke he falu he tau talahauaga ha Iesu kua lata mo e fakamaamaaga tote. Ko hai ka fakatikai ko e tagata mahani molu, fakaalofa noa, mo e mafola ne fakalagalaga he loto mea ka fiafia lahi ka nakai pihia e tagata ita, taufetoko, mo e nakai fai fakaalofa noa?

Liga manatu a tautolu, moha, maeke fefe e tau tagata kua fia kai mo e fia inu ma e tututonu  mo e fakatutuku ke talahau kua fiafia. Ha ha ia lautolu ia e onoonoaga moli ke he tau tutuaga he lalolagi. “Kua tauoi mo e mānu ha koe tau mena vihiatia kua eke” e lautolu he vaha ha tautolu. (Esekielu 9:4) Ko e mena ia ne nakai taute a lautolu ke fiafia. Pete ia, he magaaho ne ako e lautolu e finagalo he Atua ke tamai e tau tuaga tututonu ke he lalolagi mo e fakafili tonu ki a lautolu ne loto malipilipi, to olioli hololoa ai a lautolu.​—Isaia 11:4.

Ko e manako lahi ke he tututonu kua fakatupu foki e tau tagata ke fakatutuku ke he ha lautolu ni a tau kaumahala tumau ke taute e mena hako. Kua moli ni kua fiafia a lautolu ne manamanatu ke he tau mena fakaagaga. Ko e tau tagata pihia kua makai ke ono ke he Atua ma e takitakiaga ha kua mailoga e lautolu ko ia hokoia kua maeke ke lagomatai e tau tagata ke fahia ke he ha lautolu a tau lolelole.​—Tau Fakatai 16:3, 9; 20:24.

Ko e tau tagata kua fakatutuku, kua hoge mo e fia inu ma e tututonu, mo e kua manamanatu ke he tau manako fakaagaga ha lautolu kua mailoga e aoga he moua e fakafetuiaga mitaki mo e Tufuga. Ko e fakafetuiaga mitaki mo e tau tagata kua lafi ke he fiafia, ka e mua atu ke he fakafetuiaga mitaki mo e Atua. E, ko lautolu ne ofania kua manamanatu hokulo ke he mena hako, hane makai ke talia e takitakiaga faka-Atua, ne talahau moli kua fiafia.

Pete ia, maeke ia koe ke uka ke talitonu kua maeke e tagata ne favale ki ai mo e ekefakakelea ke fiafia. Ka e, kua lata ke moli, ha kua talahau pihia e Iesu. Ti, kua lata ke maama fefe hana tau kupu?

Favale ka e Fiafia​—Maeke Fefe ke Pihia?

Mailoga nakai pehe a Iesu ko e ekefakakelea mo e favale ni kua takitaki ke he fiafia. Ne fakamahino e ia: “Fiafia a lautolu ne fita he ha ha i ai e favaleaga ma e tau mena he tututonu, . . . ka eke fakakelea e tau tagata ki a mutolu mo e favale ki a mutolu ha ko au.” (Mataio 5:10, 11, NW) Ti fua mai e fiafia kaeke ni kua matematekelea e tagata he ekefakakelea ha kua eke mo tutaki he Keriso mo e ha kua fakatoka hana moui he mole e tau matapatu fakaakoaga tututonu ne fakaako e Iesu.

Ne fakataitai e mena nei ke he mena ne tupu ke he tau Kerisiano fakamua. Ko e tau tagata he Saneheturini, ko e hopoaga tokoluga Iutaia, “kua ui age ke he tau aposetolo ke o mai, kua fahi a lautolu, mo e tala age, aua neke vagahau ke he higoa a Iesu; ti tuku atu ai a lautolu ke o.” Tali atu fefe e tau aposetolo? “Ati o ai a lautolu mai mua he fakapotopotoaga mo e fiafia, ha kua eke ni kua aoga a lautolu ke eke fakakelea ha ko e hana higoa. Kua nakai oki foki e tau aho oti he fakaako atu e lautolu, mo e fakamatala atu ke he faituga, ke he taha fale foki mo e taha fale, e tala mitaki kia Iesu Keriso.”​—Gahua 5:40-42; 13:50-52.

Ko e aposetolo ko Peteru ne foaki falu maamaaga ke he matutaki he vahaloto he ekefakakelea mo e fiafia. Ne tohi e ia: ‘Ka ekefakakelea a mutolu ha ko e higoa a Keriso, fiafia a mutolu, ha kua nofo mau ia mutolu e agaga lilifu he Atua.’ (1 Peteru 4:14) E, ko e matematekelea e Kerisiano he taute e mena hako, pete ni kua fakamamahi ai, ka kua tamai e fiafia kua hau he iloa ko ia ne moua e agaga tapu he Atua. Matutaki fefe e agaga he Atua ke he fiafia?

Tau Gahua he Tino po ke Tau Fua he Agaga?

Kua fakalago ni e agaga tapu he Atua ki luga ha lautolu kua omaoma ke he Atua ko e pule. (Gahua 5:32) Nakai foaki e Iehova hana agaga ki a lautolu kua taute e “tau gahua he tino.” Ko e tau gahua ia ko e “faivao, ko e feuaki, ko e mahani kelea, ko e matahavala, ko e hufeilo ke he tupua, ko e eke lagatau he taulaatua, ko e feitaaki, ko e taufetoko, ko e ita tafuā, ko e vale, ko e lagalagahou, ko e feveheveheaki, ko e tau veveheaga, ko e mahekeheke, ko e keli tagata, ko e konahia, ko e tafeauhi, mo e tau mena pihia.” (Kalatia 5:19-21) Moli, he lalolagi he vaha nei kua kitia maali e “tau gahua he tino.” Ka e, ko lautolu ne taute ai kua nakai olioli moli mo e fiafia tukulagi. Ka e, ko e taute e tau  mena ia kua moumou e fakafetuiaga mitaki he taha mo e tau magafaoa, tau kapitiga, mo e tau tagata mahani. Mua atu, kua talahau mai he Kupu he Atua ko lautolu kua ‘taute e tau gahua nei ka nakai eke ma lautolu e kautu he Atua.’

Kehe ai, kua foaki he Atua e agaga hana ki a lautolu kua feaki e ‘tau fua he agaga.’ Ko e tau fua kua fakakatoatoa e tau fua nei ko e “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” (Kalatia 5:22, 23) Ka fakatata e tautolu e tau fua nei, kua taute e tautolu e tau tutuaga ma e fakafetuiaga mafola mo e falu mo e Atua foki, nukua fua mai e fiafia moli. (Kikite e puha.) Mua atu e aoga, he fakakite e fakaalofa, totonu, mahani mitaki, mo e falu fua mahani Atua, kua fakafiafia e tautolu a Iehova mo e moua e amaamanakiaga fiafia he moui tukulagi ke he lalolagi tututonu fou he Atua.

Ko e Fifiliaga e Fiafia

Ko Wolfgang mo Brigitte, ko e hoa mau ne nonofo i Sihamani, he magaaho ne kamata fakaako fakamakutu e Tohi Tapu, ne tanaki tuai e laua loga e tau koloa tino ne logona he tau tagata kua lata ke fiafia ai. Ne fuata mo e tino malolo a laua. Ne tui e laua e tau mena tui tauuka, nonofo he tau kaina fulufuluola, ti ha ha ai e pisinisi kua kautu. Lahi e magaaho ha laua ne fakamole he tutuli e tau koloa he tino, ka e nakai foaki he tau mena ia ki a laua e fiafia moli. Ka e, fai magaaho ai, ne taute e Wolfgang mo Brigitte e fifiliaga aoga. Kua kamata a laua ke foaki fakalahi e magaaho mo e malolo ke he tutuliaga he tau koloa fakaagaga mo e kumi puhala ke fakatata lahi ki a Iehova. Ko e fifiliaga ha laua ne nakai leva ti takitaki ke hiki e tau aga ha laua, ne hokotia ai ke omoi a laua ke fakamukamuka e tau momoui ha laua ti eke mo tau paionia, po ke ko e tau tagata fakamatala mau he Kautu. He magaaho nei, ne eke a laua mo tau tagata gahua noa he la ofisa he Tau Fakamoli a Iehova i Sihamani. Lafi ki ai, hane ako e laua e vagahau Asia ke maeke ke lagomatai e tau tagata motu kehe ke iloa e kupu moli ne moua he Kupu he Atua, ko e Tohi Tapu.

Moua kia he hoa mau nei e fiafia moli? Pehe a Wolfgang: “Tali mai he putoia lahi a maua he tutuli e tau mena fakaagaga, kua fiafia lahi mo e moua e maua e makona lahi. He fekafekau loto katoa ki a Iehova kua fakamalolo foki e fakamauaga ha maua. Na fiafia e fakamauaga  ha maua fakamua, ka e ha ha ia maua e tau matagahua mo e tau mena fiafia ne toho kehekehe aki a maua. Mogonei kua tutuli fakalataha a maua ke he taha e matakai.”

Ko e Heigoa kua Lata ke Fiafia Ai?

He pao tonu ai: Fakamamao mai he “tau gahua he tino,” mo e feaki e ‘tau fua he agaga he Atua.’ Ke fiafia, kua lata e taha ke manako lahi ke tata e fakafetuiaga mo e Atua. Ko e tagata kua lali ke moua e mena nei ka felauaki mo e talahauaga ha Iesu he tagata fiafia.

Ko e mena ia, kia nakai fakahiku hehe ai ko e fiafia kua nakai moua e koe. Moli, he mogonei kua liga nakai mitaki e malolo tino hau po ke liga ha ha ia koe e tau lekua foki he fakamauaga hau. Liga ko e tau palepale he tuaga matua kua fakatemole ia koe, po ke liga taufetului a koe ke kumi e gahua kua kautu. Liga nakai tuai palega e pesi hau tuga fakamua. Moha ia, kia fakamalolo; nakai fai kakano a koe ke fakaatukehe! Ko e pule he Kautu he Atua ka utakehe e tau lekua nei mo e loga atu foki. Moli, nakai leva to fakamoli e Iehova ko e Atua e maveheaga hana ne talahau he tau kupu he salamo: ‘Ko e hau a patuiki ko e patuiki tukulagi ia. Kua fakamafola e koe hau a lima, mo e fakamakona e manako he tau mena momoui oti.’ (Salamo 145:13, 16) He miliona e tau fekafekau ha Iehova he lalolagi katoa kua talahau moli, he tokaloto e maveheaga mafanatia nei ha Iehova ka lafi fakalahi ke he fiafia hau he vaha nei.​—Fakakiteaga 21:3.

[Matahui Tala]

[Puha/Fakatino he lau 6]

Tau Fua kua Lafi ke he Fiafia

Fakaalofa ne omoi e falu ke fakaalofa atu e falu ki a koe.

Olioli ne foaki atu ki a koe e malolo ke fahia mai he tau paleko.

Mafola ne lagomatai a koe ke taofi e fakafetuiaga hau ke ataina he favale.

Fakauka ne fakamalolo a koe ke fiafia tumau pete ni ke he tau magaaho ka kamatamata a koe.

Totonu ne futia e falu ki a koe.

Mahani mitaki hau kua taute e falu ke tali atu ka manako lagomatai a koe.

Tua ka iloa moli e koe e takitakiaga fakaalofa he Atua.

Mahani molu ka tamai ki a koe e milino he loto, manamanatuaga, mo e tino.

Manako fakalatalata kua kakano to gahoa lahi e tau hehe hau.

[Tau Fakatino he lau 7]

Ke moua e fiafia, kua lata ia koe ke fakamakona e tau manako fakaagaga hau