Kua Fakavihia Teao

“Kua fakavihia teao mai a lautolu kia au.”​—IOANE 15:25.

1, 2. (a) Ko e ha ne fakagogoa ai falu he magaaho ne vagahau pikopiko hagaao ke he tau Kerisiano, ka e ko e ha kua nakai lata e tau talahauaga pihia ke ofo ai a tautolu? (e) Ko e kakano fe he kupu “fakavihia” ka fakatutala a tautolu ki ai i loto he vala tala nei? (Kikite matahui tala.)

KO E Tau Fakamoli a Iehova kua ukufakina ke momoui ke he tau matapatu fakaakoaga kua moua i loto he Kupu he Atua. Ti ko e fua, kua olioli e lautolu e talahauaaga mitaki he tau motu loga. He falu magaaho, pete ia, kua hehe e talahauaga hagaao ki a lautolu. Ke fakatai ki ai, ko e tagata gahua fakatufono he maga ko St. Petersburg, Rusia, ne manatu: “Ko e Tau Fakamoli a Iehova kua fakamaama mai ki a mautolu ko e taha vahega lotu fufu ne nonofo fakagalogalo mo e fakakikiveka e tau tama mo e tamate ne lautolu a lautolu.” Ka e he mole e gahua mo e Tau Fakamoli a Iehova ne matutaki atu ke he fonoaga he lalolagi katoa, ne talahau he tagata gahua taha ia ni: “Mogonei kua kitia e au e tau tagata mitaki mo e mamali . . . Kua loto mafola mo e milino a lautolu, mo e lahi mahaki e fakaalofa ha lautolu ke he taha mo e taha.” Ne lafi e ia: “Nakai maama e au ko e ha ne pikopiko pihia e tau tagata hagaao ki a lautolu.”​—1 Peteru 3:16.

² Ko e tau fekafekau he Atua kua nakai fiafia he fakamailoga fakavai ko e tau tagata taute mena kelea, pete he pihia, kua nakai ofo a lautolu he magaaho ka vagahau pikopiko e tau tagata hagaao ki a lautolu. Ne hataki tuai e Iesu e tau tutaki hana: “Kaeke ke fakavihia he lalolagi a mutolu, kua iloa e mutolu ne fakavihia fakamua mai kia au, ti fakavihia ai kia mutolu. . . . Ka e pihia ni kia fakamoli ai e kupu ne tohi ke he fakatufono ha lautolu, Kua fakavihia teao mai a lautolu kia au.” * (Ioane 15:18-20, 25; Salamo 35:19; 69:4) Ne tala age a ia ke he tau tutaki hana he vaha fakamua atu: “Kaeke kua ui e lautolu e patu he magafaoa ko Pelesepulo, nakai kia au atu he ui pihia e lautolu hana magafaoa?” (Mataio 10:25) Nukua maama tuai he tau Kerisiano ko e fakauka ke he tau ekefakakelea pihia ko e vala he “akau fakakikiveka” ne talia e lautolu he magaaho ne eke a lautolu mo tau tutaki he Keriso.​—Mataio 16:24, NW.

3. Kua laulahi fefe e favale ke he tau tagata tapuaki moli?

³ Ko e favaleaga ke he tau tagata tapuaki moli kua leva tigahau, ti hoko atu ke he vaha ha “Apelu ko e tagata tututonu.” (Mataio 23:34, 35) Kua nakai fakakaupa ke he fiha ni he tau mena tutupu takitaha. Ne talahau e Iesu ko e tau tutaki hana to ‘fakavihia he tau tagata oti’ ha ko e hana higoa. (Mataio 10:22) Mua atu, ne tohia he aposetolo ko Paulo ko e tau fekafekau oti kana he Atua​—fakalataha mo tautolu takitokotaha—​kua lata ke amanaki ke moua e favale. (2 Timoteo 3:12) Ko e heigoa e kakano he mena nei?

Ko e Punaaga he Fakavihia Nakai Tonu

4. Fakakite fefe he Tohi Tapu e punaaga he tau fakavihia nakai tonu oti?

⁴ Kua fakakite he Kupu he Atua tali mai he kamataaga, kua ha ha ai a ia nakai kitia mata ne fakatupu e tau mena nei. Mailoga e kelipopo muikau he tagata fakamua he tua, ko Apelu. Ne talahau he Tohi Tapu ko e taokete keli tagata hana, ko Kaino, “ne mai ia ia ne mahani kelea,” ko Satani ko e Tiapolo. (1 Ioane 3:12) Ne fakatata e Kaino e aga ha Satani, mo e fakaaoga he Tiapolo a ia ke fakahoko e tau foliaga kelea hana. Ne fakakikila foki he Tohi Tapu e maama ke he matagahua ha Satani he favale kaka ki a Iopu mo Iesu Keriso. (Iopu 1:12; 2:6, 7; Ioane 8:37, 44; 13:27) Ko e tohi ha Fakakiteaga kua nakai fakauaua he fakakite e punaaga he favale ke he tau tutaki ha Iesu, ne talahau: “Ko e tuku ne fai he tiapolo e falu a mutolu ke he fale puipui, kia kamatamata ai a mutolu.” (Fakakiteaga 2:10) E, ko Satani ko e punaaga he tau fakavihia nakai tonu oti ke he tau tagata he Atua.

5. Ko e heigoa i tua he fakavihia ha Satani ke he tau tagata tapuaki moli?

 ⁵ Ko e heigoa i tua he fakavihia ha Satani ke he tau tagata tapuaki moli oti? He pulega ne fakakite e matapatu manatu, ne paleko a Satani ke he “Patuiki tukulagi,” ko Iehova ko e Atua. (1 Timoteo 1:17; 3:6) Ne talahau e ia kua kikili e fakakaupaaga he Atua ke he tau mena momoui hana mo e kua nakai fai tagata ne fekafekau ki a Iehova ha ko e manako mitaki, kua taute ni he tau tagata ma e tau mena ka moua e lautolu. Ne talahau e Satani kaeke ke fakaata a ia ke kamatamata e tau tagata, to maeke ia ia ke fuluhi kehe mai a lautolu oti he fekafekau ke he Atua. (Kenese 3:1-6; Iopu 1:6-12; 2:1-7) He fakavai ko Iehova ko e fakamamahi, ko e pikopiko, mo e kua kaumahala, ne lali a Satani ke fakatu ne ia a ia ko e fi ne pule katoatoa. Kitia ai, ko e ita hana ke he tau fekafekau he Atua nukua omoomoi he manako lahi hana ke tapuaki ki a ia.​—Mataio 4:8, 9.

6. (a) Kua putoia fakatagata fefe a tautolu ke he matakupu he pule katoatoa a Iehova? (e) Maeke fefe he maamaaga ke he matakupu nei ke lagomatai a tautolu ke fakatumau e mahani fakamoli ha tautolu? (Kikite puha, lau tohi 12.)

⁶ Kitia nakai e koe e puhala ne aamo he matakupu nei e moui hau? Ko e fekafekau ha Iehova, liga kua mailoga e koe he magaaho ne taute e koe e finagalo he Atua kua lata ni ke lalilali fakamakutu, ko e tau aoga ne moua he taute pihia kua mua ue atu. Ka e kua mogoia, kaeke tamai he tau tutuaga he moui hau e uka, po ke mamahi, ki a koe ke fakatatai ke omaoma ke he tau fakatufono mo e tau matapatu fakaakoaga a Iehova? Mo e ka e kua ka tuga nakai moua e koe e aoga mai ai? To fakahiku kia a koe ke pehe kua nakai aoga ke fakaholo atu ke fekafekau ki a Iehova? Po ke, to omoi nakai he fakaalofa ma Iehova mo e loto fakaaue hokulo ma e tau fua homo ue atu hana a koe ke fakatumau ke fano ke he tau puhala oti hana? (Teutaronome 10:12, 13) He fakaata a Satani ke tamai taha fuafuaaga uka lahi ma tautolu, kua tuku mai e Iehova ki a tautolu takitokotaha e fifiliaga ke foaki e tali fakatagata ha tautolu ke he paleko ha Satani.​—Tau Fakatai 27:11.

“Ka Ekefakakelea e Tau Tagata ki a Mutolu”

7. Ko e heigoa taha lagatau ne fakaaoga he Tiapolo ke lali ke fuluhi kehe aki a tautolu mai ia Iehova?

⁷ Kia onoono fakamakutu atu a tautolu mogonei ke he taha he tau lagatau ne fakaaoga e Satani he lali ke fakamoli e fahi hana he matakupu​—ko e hana fakaaogaaga he pikopiko. Ne ui e Iesu a Satani ko e “matua he pikopiko.” (Ioane 8:44) Ko e higoa fakatai ko e Tiapolo, ne kakano “Fatipiko,” kua fakakite a ia ke mua atu e pikopiko ke he Atua, ke he hana kupu mitaki, mo e higoa tapu hana. Kua fakaaoga he Tiapolo e puhala fakagalogalo, talahau fakapikopiko, mo e fakavai maaliali he paleko ke he pule katoatoa a Iehova, mo e fakaaoga e ia e tau lagatau tatai ke fakamailoga fakavai aki e tau fekafekau loto fakamoli he Atua. He tapeehi e Tau Fakamoli nei aki e ekefakakelea, kua maeke ia ia ke taute e tau kamatamata lalahi ke au atu e uka ma lautolu ke fakauka ki ai.

8. Ekefakakelea fefe e Satani a Iopu, mo e heigoa ne tupu fakamui?

⁸ Mailoga e mena ne tupu ki a Iopu, ne kakano hana higoa ko e “Foliaga he Faitaua.” Ke lafi ke he fakatupuaga he galo he tau koloa ha Iopu, hana fanau, mo e malolo tino hana, ne taute e Satani a Iopu ke tuga e tagata agahala kua fakahala he Atua. Pete he lahi e fakalilifu ki a ia he vaha fakamua, kua vihiatia lahi mogonei a Iopu, ti pihia foki mai he tau magafaoa mo e tau kapitiga tata hana. (Iopu 19:13-19; 29:1, 2, 7-11) Taha mena foki, he puhala he tau tagata fakamafana fakavai, ne lali a Satani ke ‘lipilipi a Iopu ke he tau  kupu,’ he talahau fakamua kua liga agahala a ia mo e tukumale a ia ko e tagata taute hehe. (Iopu 4:6-9; 19:2; 22:5-10) Ko e loto fakalolelole ha ia ma Iopu!

9. Ne taute fefe a Iesu ke tuga ko e tagata agahala?

⁹ Ko ia ne fakamalikiti e pule katoatoa a Iehova, ne eke e Tama he Atua ko e foliaga he totoko vale ha Satani. He magaaho ne hau a Iesu ke he lalolagi, ne lali a Satani ke eke a ia ke tuga kua ilaila fakaagaga, tuga ne taute e ia ki a Iopu, he taute a Iesu ke tuga e tagata agahala. (Isaia 53:2-4; Ioane 9:24) Ne ui he tau tagata a ia ko e konahia mo e kai lahi mo e talahau kua ‘ha ha ia ia e temoni.’ (Mataio 11:18, 19; Ioane 7:20; 8:48; 10:20) Ne tukupau fakavai a ia ke vagahau kelea. (Mataio 9:2, 3; 26:63-66; Ioane 10:33-36) Ne fakatupetupe he mena nei a Iesu, ha kua iloa e ia kua fakaata e nakai tonu he ekefakakelea ke he hana Matua. (Luka 22:41-44) Fakahiku, ne fakatautau a Iesu mo tagata keli tagata kelea muitui. (Mataio 27:38-44) He fakatumau e mahani fakamoli mitaki katoatoa, ne fakauka fakalahi a Iesu “ke he totoko mai he tau tagata hala.”​—Heperu 12:2, 3.

10. Puhala fe ne eke e tau tagata fakauku ne toe mo foliaga ha Satani he vaha fou nei?

¹⁰ He vaha fou nei, ko lautolu ne toe he tau tutaki fakauku he Keriso kua eke foki mo tau foliaga he totoko vale ha Satani. Kua fakakite a Satani ke ‘hokotaki e tau matakainaga ha [Keriso], ne hokotaki a lautolu ki mua he Atua ha tautolu ke he aho mo e po.’ (Fakakiteaga 12:9, 10) Tali he liti mai a ia he lagi mo e nofomau ke he tau kalakala he lalolagi, ne fakatolomaki ki mua e Satani e tau laliaga hana ke fakamailoga e tau matakainaga he Keriso ko e tau efuefu fakalialia. (1 Korinito 4:13) He falu motu, kua talahau pikopiko a lautolu ko e vahega lotu hagahagakelea, kua pihia foki ke he tau Kerisiano he senetenari fakamua. (Gahua 24:5, 14; 28:22) Tuga ne mailoga fakamua, nukua fakamailoga fakavai a lautolu ke he tau hokotaki pikopiko. Pete ia, “ke he lilifu mo e fakakelea, ke he talahaua mitaki, mo e talahaua kelea,” ko e tau matakainaga fakauku he Keriso, ne lalago he tau kapitiga he “mamoe kehe,” kua ukufakina mo e loto fakatokolalo ke ‘omaoma ke he tau poaki he Atua, mo e taute e fakamatalaaga kia Iesu.’​—2 Korinito 6:8; Ioane 10:16; Fakakiteaga 12:17.

11, 12. (a) Liga ko e heigoa e punaaga he falu ekefakakelea ne moua he tau Kerisiano? (e) Ko e tau puhala fe ka liga matematekelea nakai tonu ai e Kerisiano ha ko e tua hana?

¹¹ Moli, ko e tau ekefakakelea oti ne moua he tau fekafekau he Atua kua nakai tutupu katoa ha ko e “mahani tututonu.” (Mataio 5:10) Ko e falu lekua kua liga fua mai he ha tautolu ni a tau nakai mitaki katoatoa. Kua nakai fai palepale pauaki ‘kaeke hala mo e tatuki ki a tautolu, kua fakauka a tautolu ki ai.’ Ka e, kaeke e Kerisiano ‘ha ko e loto manamanatu hifo ke he Atua, ke fakauka ke he mamahi kua fakamamahi nakai tonu, ko e mena haia kua mitaki ainei’ ke he kitiaaga ha Iehova. (1 Peteru 2:19, 20) I lalo he tau tutuaga fefe ka liga tutupu ai e tau mena nei?

¹² Ko e falu kua fehagai fakakelea ha kua nakai mahalo a lautolu ke fakalataha ke he tau aga fakamotu he tau finolo ne nakai mai he Tohi Tapu. (Teutaronome 14:1) Ko e tau fuata Fakamoli kua piu ki ai he ui aki e tau higoa kehekehe ha kua pipiki mau a lautolu ke he tau tutuaga a Iehova. (1 Peteru 4:4) Ko e falu matua Kerisiano kua fakamailoga fakahehe ai ke “fakahanoa” po ke “taute mena kelea” ha kua nakai kumi e lautolu e toto mo vai tului fakaekekafo ma e fanau ha lautolu. (Gahua 15:29) Kua fakamamao mai e tau magafaoa mo e tau tuutakaina he tau Kerisiano ha kua eke a lautolu mo tau fekafekau ha Iehova. (Mataio 10:34-37) Ko lautolu oti ia kua mumuitua ke he fakaholoaga ne fakatoka he tau perofeta mo Iesu ke he matematekelea nakai tonu.​—Mataio 5:11, 12; Iakopo 5:10; 1 Peteru 2:21.

Fakauka Fakalahi i Lalo he Ekefakakelea

13. Ko e heigoa ka lagomatai a tautolu ke fakatumau e lagotatai fakaagaga ha tautolu he magaaho ka fehagai a tautolu mo e ekefakakelea velagia?

¹³ He magaaho ka ha ha a tautolu i lalo he ekefakakelea velagia ha ko e tua ha tautolu, liga to loto mamahi a tautolu, ke tuga e perofeta ko Ieremia, mo e logona hifo kua nakai maeke ia tautolu ke fakaholo atu ke fekafekau ke he Atua. (Ieremia 20:7-9) Ko e heigoa ka lagomatai a tautolu ke fakatumau e lagotatai fakaagaga ha tautolu? Lali ke kitia e tau matalekua ia mai he onoonoaga a Iehova. Kua mailoga e ia a lautolu ne fakatumau ke loto fakamoli i lalo he kamatamata ko e tau tagata kautu, nakai ko e tau tagata  kaumahala. (Roma 8:37) Lali ke kitia he loto hau a lautolu ne kua fakamalikiti e pule katoatoa a Iehova pete ko e tau nakai lilifu oti ka hava age he Tiapolo ki a lautolu​—ko e tau tane mo e tau fifine tuga a Apelu, Iopu, matua fifine ha Iesu ko Maria, mo lautolu foki ne tua fakamoli mai i tuai, pihia foki e tau katofia fekafekau ha tautolu he vaha fou nei. (Heperu 11:35-37; 12:1) Manamanatu fakahokulo ke he tau puhala ne mahani fakamoli a lautolu. Ko e aolu lahi ia he tau tagata loto fakamoli kua alo mai ki a tautolu ke matutaki atu ki a lautolu i luga he tuaga-kautu ne toka fakamahao ma lautolu ne kautu ke he lalolagi ha ko e ha lautolu a tua.​—1 Ioane 5:4.

14. Maeke fefe he liogi fakamakamaka ke fakamalolo a tautolu ke tumau ke tua fakamoli?

¹⁴ Kaeke ‘ke loga ha tautolu a tau manatu kapaletu i loto ia tautolu,’ kua lata ia tautolu ke haga atu ki a Iehova he liogi fakamakamaka, mo e to fakamafana mo e fakamalolo e ia a tautolu. (Salamo 50:15; 94:19) To foaki e ia ki a tautolu e pulotu ne kua lata ia tautolu ke fahia atu ke he kamatamata mo e lagomatai a tautolu ke onoono fakamahao atu ke he matakupu lahi, ko e pule katoatoa a Iehova, ne ha ha i tua he fakavihia nakai tonu kua hokotia ke he tau fekafekau hana. (Iakopo 1:5) Maeke foki ia Iehova ke foaki ki a tautolu e ‘mafola mai he Atua kua mua ue atu ke he tau mena oti.’ (Filipi 4:6, 7) Ko e loto fakahautoka nei ne foaki he Atua kua taute a tautolu ke tumau ke loto milino mo e mauniva he fehagai ke he tau peehiaga makimaki, he nakai mahala ke he fakauaua po ke matakutaku. He puhala he hana agaga, kua maeke ia Iehova ke lalago a tautolu ke he ha mena ni ka toka e ia ke tupu ki a tautolu.​—1 Korinito 10:13.

15. Ko e heigoa ka lagomatai a tautolu ke kalo mai neke loto kona ka matematekelea a tautolu?

¹⁵ Ko e heigoa ka lagomatai a tautolu neke hufia a tautolu ke loto kona ki a lautolu ne fakavihia teao mai ki a tautolu? Manatu ko e tau fi ne mua ha tautolu ko Satani mo e tau temoni. (Efeso 6:12) Pete kua iloa po ke favale pauaki e falu tagata ki a tautolu, ko e tokologa ia lautolu ne totoko ke he tau tagata he Atua kua taute ai ha kua nakai maama po kua fakaohooho he falu. (Tanielu 6:4-16; 1 Timoteo 1:12, 13) Kua finagalo a Iehova ke moua he ‘tau tagata oti kana e moui mo e hokotia ke he maama he kupu moli.’ (1 Timoteo 2:4) Moli, ko e falu tagata ne totoko fakamua hane he mogonei ko e tau matakainaga Kerisiano ha tautolu ha ko e fua he kitekite mai ke he mahani hakohako ha tautolu. (1 Peteru 2:12) Ke lafi ki ai, lata ia tautolu ke futia mai e fakaakoaga he fakafifitakiaga he tama ha Iakopo ko Iosefa. Pete he matematekelea lahi a Iosefa ha ko e tau matakainaga hana, ne nakai fakafualoto a ia ki a lautolu. Ko e ha ne nakai pihia ai? Ha kua fioia e ia kua ha ha ai e lima a Iehova ke he matalekua ia, he fakatokatoka e tau mena tutupu ke fakamoli aki e finagalo Hana. (Kenese 45:4-8) Maeke foki ia Iehova ke fakatupu ha matematekelea nakai tonu ka liga hokotia ki ai a tautolu ke gahuahua ke lata mo e lilifu he hana higoa.​—1 Peteru 4:16.

16, 17. Ko e ha kua nakai lata ia tautolu ke nakai kapaletu lahi ke he tau laliaga he tau tagata totoko ke fakaalaia e gahua fakamatala?

¹⁶ Kua nakai lata ia tautolu ke molea e tupetupe kaeke ke tuga kua fai magaaho ne kautu ai a lautolu ne totoko mai he fakaalaia e fakalaulahiaga he tala mitaki. Hane luelue e Iehova mogonei e tau motu he kakano he gahua fakamatala ke he lalolagi katoa, mo e hane o mai ai e tau mena kua manako ki ai. (Hakai 2:7) Ko Keriso Iesu, ko e Leveki Mamoe Mitaki, ne talahau: “Ko e haku a tau mamoe kua fanogonogo mai ke he haku a leo, kua iloa foki e au a lautolu; kua mumui mai foki a lautolu kia au. To ta atu foki e au e moui tukulagi kia lautolu . . . ti nakai maeke ni ia taha ke fofo a lautolu mai hoku lima.” (Ioane 10:27-29) Ko e tau agelu tapu kua putoia foki ke he heleheleaga fakaagaga ne mua. (Mataio 13:39, 41; Fakakiteaga 14:6, 7) Ko e mena ia, kua nakai fai mena ne talahau po ke taute he tau tagata totoko ka maeke ke  fakatu noa aki e finagalo he Atua.​—Isaia 54:17; Gahua 5:38, 39.

¹⁷ Ka e, kua fa mahani e tau laliaga he tau tagata totoko ke liliu tua. Ke he taha maga Aferika, kua loga e tau fakavai kelea muitui ne kua folafola hagaao ke he Tau Fakamoli a Iehova, putoia ki ai kua ui a lautolu ko e tau tagata tapuaki ke he Tiapolo. Ha ko e mena nei, he magaaho ne aahi atu e Tau Fakamoli, ne poi a Grace ki tua he fale ke fakamumuli ato o a lautolu. He taha aho ne toto hake he akoako taha he tau tohi ha tautolu mo e tala age ke he tau tagata ne ha ha ai ke nakai totou neke taute he tohi ia a lautolu ke tiaki e tua ha lautolu. Ko e mena nei ne fakalagalaga aki e fia iloa mena ha Grace. He taha magaaho ne liliu e Tau Fakamoli, kua nakai fakamumuli a ia ka e fakatutala e ia a lautolu mo e uta e tohi ma hana. Ne kamata ai e fakaako Tohi Tapu, mo e he 1996 ne papatiso a ia. Kua fakaaoga e Grace he mogonei e magaaho hana ke kumi e falu ne liga talahau fakahehe ki ai hagaao ke he Tau Fakamoli a Iehova.

Atihake Mogonei e Tua Hau

18. Ko e ha kua lata ai ke fakamalolo e tua ha tautolu ato mafuta mai e tau kamatamata velagia, mo e maeke fefe ia tautolu ke taute pihia?

¹⁸ Ha kua maeke ia Satani ke tau fakalutukia mai fakalataha mo e fakavihia nakai tonu he ha magaaho ni, kua lata lahi ia tautolu ke atihake mogonei e tua ha tautolu. Maeke fefe ia tautolu ke taute e mena nei? Ko e hokotaki mai he taha motu ne favale ke he tau tagata ha Iehova, ne talahau: “Taha e mena kua kitia maali lahi: Ko lautolu ne ha ha ai e tau puhala fakaagaga mau ne mitaki mo e loto fakaaue hokulo ke he kupu moli he Tohi Tapu kua nakai fai lekua ke tutu mauokafua he magaaho ka hohoko mai e tau kamatamata. Ka e ko lautolu ‘he tau aho kua mitaki’ ne fakato falu feleveiaaga, ne nakai fakatumau ke he gahua fekafekau, mo e fakahui e tau matakupu ikiiki, nukua veveli tumau he magaaho ka ha ha i lalo he kamatamata ‘puhopuho.’” (2 Timoteo 4:2) Kaeke  kitia e koe e tau puhala kua maeke ia koe ke fakatolomaki atu ki mua, kia lali fakalahi ke taute agataha ai mo e nakai fakatuai.​—Salamo 119:60.

19. Ko e heigoa kua fakakatoatoa he mahani fakamoli he tau fekafekau he Atua he fehagai mo e vihiatia nakai tonu?

¹⁹ Ko e mahani fakamoli he tau tagata tapuaki moli i lalo he vihiatia kaka fakasatani ko e fakakiteaga moli ke he tonuhia, latatonu, mo e tututonu he pule katoatoa a Iehova. Ko e tua fakamoli ha lautolu ne kua taute e loto he Atua ke fiafia. Pete kua tapeehi aki he tau tagata e ekefakakelea a lautolu, ko ia ne mahomo hake e lilifu ki luga he lalolagi mo e lagi kua ‘nakai ma kia lautolu ke totoku ai ko ia ko e Atua ha lautolu.’ Moli ai, he hagaao atu ki a lautolu ne loto fakamoli pihia, kua tonuhia ke talahau: “Nakai lata e lalolagi ke nonofo ai a lautolu.”​—Heperu 11:16, 38.

[Matahui Tala]

Maeke Nakai a Koe ke Fakamaama?

• Ko e heigoa i tua he fakavihia nakai tonu ne tuhi fakahako atu ke he tau tagata tapuaki moli?

• Puhala fe ne fakaaoga e Satani e ekefakakelea he lali ke moumou e mahani fakamoli ha Iopu mo Iesu?

• Puhala fe ne fakamalolo e Iehova a tautolu ke tutu mauokafua ka fehagai mo e fakavihia fakasatani?

[Tau Huhu he Fakaakoaga]

[Puha/Fakatino he lau 12]

Mailoga e Lautolu e Matakupu Moli

Taha he Tau Fakamoli a Iehova i Ukaraine, kavi ne pa e gahua fakamatala he Kautu ke molea e 50 e tau tau ne talahau: “Ko e tuaga ne ha ha ki ai e Tau Fakamoli a Iehova kua nakai lata ke fuafua ke he puhala ne fakafehagai mai falu tagata. . . . Ko e laulahi he tau tagata ofisa kua taute tuli ni ha ko e tau gahua ha lautolu. Ka hiki e fakatufono, ne hiki e tau fakamoliaga he tau tagata ofisa, ka e tumau ni a mautolu. Iloa e mautolu ko e punaaga moli he tau lekua ha mautolu nukua fakakite mai i loto he Tohi Tapu.

“Ne nakai kitia ne mautolu a mautolu ko e tau tagata noa ne fakamatematekelea he tau tagata fakamamahi. Ko e mena ne lagomatai a mautolu ke fakauka ko e maama mahinohino ke he matakupu ne mafuta hake he katene ko Etena​—ko e matakupu ke he tonuhia he Atua ke pule. . . . Kua fakatumau a mautolu ke he matakupu ne nakai ni matutaki atu ke he tau fiafia ni he tagata ka e pihia foki ke he tau fiafiaaga he Pule Katoatoa he lalolagi mo e lagi katoatoa. Ne lahi mahaki e maamaaga ha mautolu ke he mena ne putoia ki ai e matakupu moli. Ne taute he mena nei a mautolu ke malolo lahi mo e taute a mautolu ke tumau e mahani fakamoli ha mautolu pihia foki ki lalo he tau tutuaga uka fefeke.”

[Fakatino]

Ko Victor Popovych, ne tapaki he 1970

[Fakatino he lau 9]

Ko hai i tua he ekefakakelea ne hokotia a Iesu ki ai?

[Tau Fakatino he lau 11]

Ko Iopu, Maria, mo e tau fekafekau he Atua he vaha fou nei, tuga a Stanley Jones, kua fakamalikiti e pule katoatoa a Iehova