Lolelole ka e Nakai Mategugu

‘Ko Iehova ko ia ne eke e tau motuaga he lalolagi, kua foaki atu e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu.’​—ISAIA 40:28, 29.

1, 2. (a) Ko e heigoa e uiina talahaua kua fakalaulahi atu ke he tau tagata oti ne manako ke fakagahuahua e tapuaki moli? (e) Ko e heigoa ka fakalaga aki e hagahagakelea lahi ke he tuaga fakaagaga ha tautolu?

KO E tau tutaki ha Iesu, kua mahani lahi a tautolu mo e uiina talahaua hana: ‘Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.’ (Mataio 11:28-30) Kua foaki foki ke he tau Kerisiano e “tau tau ke okioki ai mai mua he Iki [Iehova].” (Gahua 3:19) Moli kua iloa tonu tuai e koe e tau lauiaaga he okioki he fakaako e tau kupu moli he Tohi Tapu, ti moua e amaamanakiaga mahino ma e vaha anoiha, mo e fakagahuahua e tau matapatu fakaakoaga ha Iehova ke he hau a moui.

² Pete ia, ko e falu tagata tapuaki ha Iehova kua hokotia ke lauia he lolelole e manamanatuaga. Ke he falu magaaho kua tutupu fakaku e tau magaaho nei he loto mamahi. He falu magaaho kua liga hololoa e totagetage he logonaaga. He fai magaaho ne mole, liga logona hifo he falu e tau matagahua faka-Kerisiano ha lautolu ke mamafa ka e nakai ko e kavega kua okioki tuga ne mavehe e Iesu. Ko e tau logonaaga hehe pihia ka liga fakalaga aki e hagahagakelea lahi ke he fakafetuiaga he Kerisiano mo Iehova.

3. Ko e ha ne foaki e Iesu e fakatonuaga ne moua he Ioane 14:1?

³ Nakai leva ato hoko e tapaki mo e fakahala hana, ne tala age a Iesu ke he hana tau tutaki: “Aua neke fakaatukehe ha mutolu a tau loto; kia tua a mutolu ke he Atua, ati tua mai a foki kia au.” (Ioane 14:1) Ne talahau e Iesu e tau kupu nei he teitei tuai e tau aposetolo ke fehagai mo e tau matematekelea. To muitua ke he mena nei e tau favaleaga. Iloa e Iesu ko e tau aposetolo hana to liga fakatupetupe he loto mamahi kelea muitui. (Ioane 16:1) Ka nakai fakahako, to liga eke e tau logonaaga momoko ke fakamatulituli fakaagaga mo e taute a lautolu ke galo e falanaki ki a Iehova. Kua moli foki e mena nei ke he tau Kerisiano he vaha nei. Ko e loto mamahi ne toka loa kua maeke ke tupu mai e loto ita lahi, ti liga pehia ai e tau loto. (Ieremia 8:18) Ko e tagata i loto ha tautolu to liga lolelole. I lalo he pehiaaga nei, liga to matulituli e loto manamanatu mo e fakaagaga ha tautolu, mo e galo foki e manako ha tautolu ke tapuaki ki a Iehova.

4. Ko e heigoa ka lagomatai a tautolu ke puipui ha tautolu a loto fakatai mai he mategugu?

⁴ Kua latatonu moli e tomatoma he Tohi Tapu: ‘Kia mua he leveki e koe e loto hāu ke he tau mena oti kua leveki ai; ha kua tupu mai ai e moui.’ (Tau Fakatai 4:23) Kua foaki he Tohi Tapu e tomatoma aoga ke lagomatai a tautolu ke puipui e loto fakatai ha tautolu mai he loto mamahi mo e lolelole fakaagaga. Ka e, fakamua, kua lata ia tautolu ke kitia e tupumaiaga he totagetage ha tautolu.

Nakai Aga Vale e Faka-Kerisiano

5. Ko e heigoa e uhukehe ne kitia maali hagaao ke he tutaki faka-Kerisiano?

⁵ Moli, ke eke mo Kerisiano kua lata ke eketaha. (Luka 13:24) Ne talahau foki e Iesu: ‘Ko ia kua nakai fua hana ni a akau fakakikiveka, mo e nakai mui mai kia au, nakai maeke ke eke a ia mo tutaki haku.’ (Luka 14:27) Ke he tau kupu nei kua tuga ke uhukehe e talahauaga ha Iesu ne hagaao ke he hana kavega ne mama mo e okioki, ka e ke he moliaga kua nakai uhukehe.

6, 7. Ko e ha kua talahau ko e ha tautolu a puhala tapuaki kua nakai totagetage?

⁶ Ko e eketaha mo e gahua fakamalolo, pete kua mategugu moli, kua maeke ke fakamakona mo e okioki ka taute ai e gahua mitaki. (Fakamatalaaga 3:13, 22) Mo e fai gahua mitaki foki  kia he folafola e tau kupu moli homo ue atu he Tohi Tapu ke he tau katofia ha tautolu? Taha mena foki, ko e taufetului ha tautolu ke moui ke he tau tutuaga he mahani mitaki lahi he Atua, kua temotemoai ka fakataitai mo e tau aoga kua olioli e tautolu ha ko e fua mai ai. (Tau Fakatai 2:10-20) Pihia foki he magaaho ka favale mai, kua mailoga ai e tautolu mo mena lilifu ke matematekelea ma e Kautu he Atua.​—1 Peteru 4:14.

⁷ Kua okioki moli e kavega ha Iesu, mua atu he magaaho ka fakatatai mo e pouligia fakaagaga ha lautolu ne tumau ke ha ha i lalo he lakau hahamo he lotu fakavai. Kua ha ha he Atua e fakaalofa mafanatia ma tautolu mo e nakai foaki ki a tautolu e tau poakiaga uka. Kua ‘nakai mamafa e tau poaki’ ha Iehova. (1 Ioane 5:3) Ko e tau Kerisiano moli, tuga ne tohi he tau Tohiaga Tapu, kua nakai aga vale. Kitia maali ai, ko e ha tautolu a puhala tapuaki kua nakai tupu mai e totagetage mo e loto mamahi.

‘Tuku Kehe e Tau Mena Mamafa Oti Kana’

8. Ko e heigoa e mena ne fa tupu ai e lolelole fakaagaga?

⁸ Ko e ha lolelole fakaagaga ne moua e tautolu kua fa fua mai he mamafa ne tuku mai he fakatokaaga keukeu nei ki a tautolu. Ha ko e “lalolagi oti ha he pule hana kua mahani kelea,” kua viko takai a tautolu he tau malolo totoko ne kua maeke ke fakalolelole a tautolu mo e moumou e lagotatai faka-Kerisiano ha tautolu. (1 Ioane 5:19) Maeke he tau gahua nakai aoga ke fakahagahaga uka mo e faguna e puhala mau faka-Kerisiano ha tautolu. Liga maeke he tau kavega fakalahi hake nei ke fakamamafa a tautolu mo e pepela foki ha tautolu a agaga. Kua lata ai, he tomatoma e Tohi Tapu ki a tautolu ke “kia tuku kehe e tautolu e tau mena mamafa oti kana.”​—Heperu 12:1-3.

9. Maeke fefe he tutuli e tau koloa ke fakamamafa a tautolu?

⁹ Ke tuga anei, kua maeke he lavelave fakalalolagi ke moua e mahuiga, tupe, fakafiafiaaga, o fenoga fakafiafia, mo e falu tutuli koloa foki ke fakaohooho e manamanatuaga ha tautolu. (1 Ioane 2:15-17) Ko e falu Kerisiano he senetenari fakamua ne tutuli e maukoloa ne fakahagahaga uka e tau momoui ha lautolu. Ne fakamaama he aposetolo ko Paulo: “Ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia. Ha ko e loto lahi ke he tau tupe, ko a vaka haia he tau mena kelea oti kana; ko e falu foki kua manako lahi ki ai, ti hehe ai a lautolu mai he tua, kua hoka e lautolu a lautolu ti ati ni ke he tau mena matematekelea loga.”​—1 Timoteo 6:9, 10.

10. Ko e heigoa ka ako e tautolu hagaao ke he maukoloa he fakataiaga ha Iesu ke he tagata gana saito?

¹⁰ He magaaho ka logona e tautolu e lolelole mo e loto mamahi he fekafekauaga ha tautolu ke he Atua, liga kia kua pihia ha kua fakaapitia he tau tutuli koloa e tuaga fakaagaga ha tautolu? Kua moli lahi e tuaga nei, tuga ne fakakite he fakataiaga a Iesu ke he tagata gana saito. Ne fakataitai e Iesu e “fakaatukehe ke he tau mena he lalolagi nai, mo e fakavai he koloa, mo e manako lahi ke he falu a mena” ke he vao talatala ne “hu atu ke he loto, ti apitia” e tega he kupu he Atua he tau loto ha tautolu. (Mareko 4:18, 19) Ko e mena ia ne fakatonu he Tohi Tapu a tautolu: “Kia noa ha mutolu a mahani mo e velevelekoloa; kia fakamamate a mutolu ke he tau mena ha ia mutolu; ha ko e mena talahau mai a ia, Nakai tuai toka ni e au a koe, nakai tuai tiaki ni e au a koe.”​—Heperu 13:5.

11. Puhala fe ka liga tiaki e tautolu e tau mena ka fakamamafa a tautolu?

 ¹¹ He falu magaaho ko e tau mena ne fakahagahaga uka aki e tau momoui ha tautolu, nakai ko e tutuli ke moua atu foki e tau koloa, ka e ko e mena kua taute aki ni e tautolu e tau koloa kua ha ha ia tautolu. Ne moua he falu e nakai fai hagafi he manamanatuaga ha ko e fua he tau lekua malolo tino lalahi, mamate he tau fakahelehele, po ke falu lekua fakamamahi. Ne mailoga e laua e lata ke taute e tau hikihikiaga he tau magaaho kehekehe. Taha e hoa mau ne fifili ke tiaki falu a gahua fakafiafia mo e tau feua fakatagata nakai aoga lahi. Ne kikite moli atu a lautolu ke he ha lautolu a tau koloa mo e fafao e tau koloa oti ne lata mo e tau feua pihia ti toka kehe. He tau magaaho kehekehe, maeke oti ia tautolu ke aoga mai he kikite atu ke he tau aga mau mo e tau koloa ha tautolu, ti utakehe e tau mena mamafa oti kana ne nakai aoga neke fakalolelole e tau loto ha tautolu mo e nakai fahia.

Aoga e Loto Mitaki mo e Fakalatalata

12. Ko e heigoa kua lata ia tautolu ke mailoga hagaao ke he tau hehe ni ha tautolu?

¹² Ko e ha tautolu ni a tau hehe, pihia foki ke he tau lekua ikiiki, ka taute fakahaga e tau momoui ha tautolu ke hagahaga uka. Moli ha ia he tau kupu a Tavita: “Kua hoko ni haku a tau hala ki luga hoku ulu; ne tuga e kavega mamafa, kua pehia ai au.” (Salamo 38:4) Fa mahani, to fakatotoka he tau hikiaga aoga a tautolu mai he tau kavega mamafa.

13. Maeke fefe he loto mitaki ke lagomatai a tautolu ke moua e onoonoaga lagotatai ke he fekafekauaga ha tautolu?

¹³ Kua fakamalolo he Tohi Tapu a tautolu ke feaki e “iloilo mo e loto manamanatu.” (Tau Fakatai 3:21, 22) ‘Ko e iloilo mai luga, kua loto mitaki,’ he talahau he Tohi Tapu. (Iakopo 3:17) Falu kua logona e uka ke fakataitai ke he tau mena ne taute he falu i loto he fekafekauaga faka-Kerisiano. Pete ia, ne tomatoma he Tohi Tapu a tautolu: “Kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha. Ha ko e mena to igatia e tagata mo e fua hana ni a kavega.” (Kalatia 6:4, 5) Moli, kua maeke he tau fakafifitakiaga he tau katofia Kerisiano ke fakamalolo a tautolu ke fekafekau ki a Iehova mo e loto katoa, ka e to lagomatai he iloilo mo e he loto mitaki a tautolu ke fakatoka e tau foliaga aoga hagaao ke he tau tutuaga ni ha tautolu.

14, 15. Maeke fefe ia tautolu ke fakakite e fakailoilo he leveki e tau manako he manamanatuaga mo e fakaagaga ha tautolu?

¹⁴ Ko e loto mitaki ha tautolu ke he tau fahi ne tuga e nakai aoga lahi ka lagomatai ke kalo mai he tau logonaaga he lolelole. Ke tuga anei, na feaki tumau nakai e tautolu e aga lagotatai ne aoga ma e malolo tino mitaki? Mailoga e fakafifitakiaga he hoa mau ne gahua he taha he tau la ofisa he Tau Fakamoli a Iehova. Kua fioia e laua e uho he fakailoilo ke kalo mai neke nakai fai hagafi. Ne talahau he hoana: “Pete ni he loga fefe e tau gahua ha maua, ne lali a maua ke momohe he tau matahola tatai he tau po oti. Kua taute tumau foki e maua e faofao tino. Ne lagomatai moli he mena nei a maua. Ne ako e maua ko e heigoa ha maua a tau kaupaaga, mo e taute e maua e tau mena ke fakatatau ki ai. Ne nakai lali a maua ke fakatatai a maua ki a lautolu ne tuga ke nakai fai fakaotiaga e tau malolo.” Fa taumafa  tumau nakai a tautolu ke he tau kai mitaki mo e moua e mohe mitaki? Ko e mamata fakamitaki atu ke he malolo tino ha tautolu ka maeke ke fakatote hifo e tau logonaaga he mategugu he manamanatuaga mo e fakaagaga.

¹⁵ Ha ha he falu ia tautolu e tau manako kehe lahi. Ke tuga anei, taha e Kerisiano fifine ne fekafekau mau ke he tau kotofaaga paleko kehekehe. Ne moua e ia e tau lekua malolo tino lalahi, ti moua foki he kanesa. Ko e heigoa ne lagomatai a ia ke fahia ke he tau tutuaga matematekelea? Ne pehe a ia: “Kua aoga lahi ki a au ke fai magaaho ke nofo tokotaha mo e maagifua. Ka logona lahi e au e matematekelea mo e nakai fai hagafi hane holo ki mua, ne manako mafiti lahi au ke fai magaaho mamanofua ke maeke ia au ke totou mo e okioki.” Lagomatai he fakailoilo mo e loto manamanatu a tautolu ke mailoga mo e fakamakona e tau manako takitokotaha ha tautolu mo e puipui mai ai he lolelole fakaagaga.

Fakamalolo e Iehova ko e Atua a Tautolu

16, 17. (a) Ko e ha kua aoga lahi mahaki ke leveki e moui malolo fakaagaga ha tautolu? (e) Ko e heigoa kua lata ia tautolu ke lafi ke he puhala mau ha tautolu he tau aho oti?

¹⁶ Ke leveki moli e moui malolo fakaagaga ha tautolu, kua aoga lahi mahaki. He magaaho ka moua e tautolu e fakafetuiaga tata lahi mo Iehova ko e Atua, liga to lolelole fakatino a tautolu, ka e to nakai mategugu a tautolu ke tapuaki ki a ia. Na ko Iehova ne foaki “e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu.” (Isaia 40:28, 29) Ko e aposetolo ko Paulo, ne fakafita fakatagata ke he moliaga he tau kupu nei, ne tohia: ‘Kua nakai kaumahala ai a mautolu; ha ko e mena pete ni he moumou ha mautolu a tagata i fafo, kua fakafou ha mautolu a tagata i loto ke he taha aho mo e taha aho.’​—2 Korinito 4:16.

¹⁷ Mailoga e tau kupu “ke he taha aho mo e taha aho.” Kua pehe a ia ke fakaata ne tautolu a tautolu ke moua e tau foakiaga a Iehova. Ko e misionare ne fekafekau tua fakamoli ke 43 e tau tau ne fakafehagai mo e tau vaha he lolelole fakatino mo e loto mamahi. Ka e nakai mategugu a ia. Ne pehe a ia: “Ne fakamahani au ke ala tuai ti fakamua to kamata ha gahua, ne maeke ia au ke fakaaoga taha magaaho ke liogi ki a Iehova mo e totou e Kupu hana. Ne lagomatai he puhala nei au he tau aho oti ke fakauka ke hoko mai ke he mogonei.” Kua maeke moli ia tautolu ke falanaki ke he malolo fakatumau a Iehova kaeke ke liogi, e “ke he taha aho mo e taha aho,” ki a ia mo e manamanatu fakahokulo ke he tau mahani tokoluganea mo e tau maveheaga hana.

18. Ko e heigoa e fakamafanatia ne foaki he Tohi Tapu ma lautolu ne tua fakamoli ne fuakau po kua gagao?

¹⁸ Kua mua atu e lagomatai he mena nei ki a lautolu ne logona e loto mamahi ha ko e tau vaha fuakau mo e tino gagao. Liga to loto momoko a lautolu ia, nakai ha kua fakataitai e lautolu a lautolu ke he falu, ka e ha kua fakataitai ne lautolu a lautolu ke he vaha fakamua ha lautolu. Ko e mafanatia moli a ia ke iloa kua fakalilifu e Iehova e tau tagata momotua! Ne talahau he Tohi Tapu: “Ko e foufou fulufuluola e ulu hina, kaeke ke moua ai ke he puhala he tututonu.” (Tau Fakatai 16:31) Iloa e Iehova e tau kaupaaga ha tautolu mo e tokoluga e onoonoaga ke he ha tautolu a tapuakiaga loto katoa pete ni ko e tau mahukihuki ha tautolu. Mo e tau gahua mitaki ne fita he taute e tautolu hane fakamau tukulagi he loto manamanatu he Atua. Ne fakamafana he tau Tohiaga Tapu a tautolu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.” (Heperu 6:10) Kua fiafia lahi a tautolu ke ha ha mo lautolu ne eke e mahani fakamoli ki a Iehova ke he tau tau hogofulu tau!

Aua Neke Kaumahala

19. Moua fefe e tautolu e aoga mai he nakai faihoania ke taute e mahani mitaki?

¹⁹ Kua talitonu e tokologa kua maeke he gahua eketaha fakatino ke fakatotoka e lolelole. Pihia foki, kua maeke he tau gahua fakaagaga tumau ke lagomatai ke fakatotoka ha logonaaga he mategugu he manamanatuaga po ke fakaagaga. Ne talahau he Tohi Tapu: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu. Hanai, kia  mahani mitaki a tautolu fakalata ke he tau aho ha i ai ia tautolu, ke he tau tagata oti kana, ka e au atu ke he faoa ne tua.” (Kalatia 6:9, 10) Mailoga e tau kupu ‘taute e mahani mitaki.’ Kua pehe mai ke taute e tautolu taha mena. He taute e tau mena mitaki ma e falu ka lagomatai moli a tautolu ke kalo mai he mategugu he fekafekauaga ha tautolu ki a Iehova.

20. Ke tau ke he loto mamahi, ko hai kua nakai lata ia tautolu ke fio atu ki ai?

²⁰ Ke he taha fahi, ko e lafi mo e gahua mo e tau tagata ne fakaheu e tau fakatufono he Atua ka eke mo kavega mategugu. Kua hataki he Tohi Tapu a tautolu: “Kua mamafa e maka, kua mamafa foki e oneone; ka ko e ita he tagata goagoa kua mua hana mamafa ke he tau mena ua na.” (Tau Fakatai 27:3) Ke tau ke he tau logonaaga he loto mamahi mo e lolelole, kua lata ia tautolu ke kalo mai he fio mo lautolu ne holofia ke he tau manatu nakai mitaki mo e kumi hehe mo e tuhituhi tumau ke he falu.

21. Maeke fefe ia tautolu ke eke mo fakamaloloaga ke he falu he tau feleveiaaga Kerisiano?

²¹ Ko e tau feleveiaaga Kerisiano ko e tau foakiaga mai ia Iehova ne kua maeke ke fakalaga e malolo fakaagaga ia tautolu. Kua moua ai e tautolu e magaaho mitaki lahi ke fakamalolo ke he taha mo e taha aki e fakaakoaga mo e lafiaga kua okioki. (Heperu 10:25) Kua lata e tau tagata oti i loto he fakapotopotoaga ke ukufakina ke atihake he magaaho ka tali he tau feleveiaaga po ke ka putoia ke he polokalama mai i luga he tuula. Ko lautolu ne taute e takitakiaga ke tuga e tau faiaoga kua lago lahi ki ai ke fakamalolo ke he falu. (Isaia 32:1, 2) Pihia foki ka lata ke akonaki po ke tomatoma, kua lata e leo he fakatonuaga ke ha i ai e okioki. (Kalatia 6:1, 2) Ko e fakaalofa ha tautolu ma e taha mo e taha ka lagomatai moli a tautolu ke fekafekau ki a Iehova mo e nakai mategugu.​—Salamo 133:1; Ioane 13:35.

22. Pete ko e foliga fakatagata nakai mitaki katoatoa ha tautolu, ko e ha kua maeke ia tautolu ke fakamalolo?

²² Ke tapuaki ki a Iehova he vaha fakahiku nei kua putoia ki ai e tau gahua. Mo e tau Kerisiano kua nakai puipui mai he tau lauiaaga he hagafi mo e mamahi he manamanatuaga, mo e tau tutuaga matematekelea. Ko e foliga fakatagata ha tautolu kua molulu, tuga e kapiniu kelekele. Ka e, ne talahau he Tohi Tapu: “Ha ha ia [t]autolu e koloa nai ke he tau kapiniu kelekele, kia ha ha he Atua e lahi ue atu he malolo, ka e nakai mai ia [t]autolu.” (2 Korinito 4:7) E, to lolelole a tautolu, ka kia nakai lata ia tautolu ke mategugu po ke kaumahala. Ka e, kia eke a tautolu ke ‘fakamalolo mo e talahau, Ko Iehova, ko e haku a lagomatai haia.’​—Heperu 13:6.

Ko e Fakamanatu Ku

• Ko e heigoa falu kavega mamafa lahi ka liga maeke ia tautolu ke utakehe?

• Maeke fefe ia tautolu ke fakalataha ke he gahua “mahani mitaki” ke he ha tautolu a tau katofia Kerisiano?

• Puhala fe ne fakamalolo e Iehova a tautolu he magaaho ka logona e tautolu e lolelole po ke loto mamahi?

[Tau Huhu he Fakaakoaga]

[Fakatino he lau 19]

Iloa e Iesu kua maeke he loto mamahi toka loa ke matematekelea ai e tau aposetolo

[Fakatino he lau 20]

Kua tiaki he falu e tau gahua fakafiafia mo e tau feua fakatagata nakai aoga lahi

[Fakatino he lau 22]

Pete ni ko e tau kaupaaga ha tautolu, nukua tokoluga e onoonoaga a Iehova ke he ha tautolu a tapuakiaga loto katoa