Mataala ke he “Leo he Tau Tagata Kehe”
Mataala ke he “Leo he Tau Tagata Kehe”
“Ka e nakai mumui atu a lautolu ke he tagata kehe, ka e fehola kehe ai; ha kua nakai iloa e lautolu e tau leo he tau tagata kehe.”—IOANE 10:5.
1, 2. (a) Tali atu fefe a Maria he magaaho ne ui e Iesu hana higoa, ti ko e heigoa e talahauaga fakamua ha Iesu ne fakatai ke he mena nei ne tupu? (e) Ko e heigoa ne fakamalolo a tautolu ke nonofo fakatata ki a Iesu?
KO IESU ne liu fakatu mai kua mailoga e fifine ne tu tata ke he tuagamau gatigati hana. Ne iloa mitaki e Iesu a ia. Ko Maria Makatala. Teitei ua tuai e tau, ne fakamaulu e Iesu a ia he hu temoni. Tali mai ai ne fakalataha a ia mo Iesu mo e hana tau aposetolo, he leveki ha lautolu a tau manako ke he tau aho takitaha. (Luka 8:1-3) He aho nei, kua fakatutuku a Maria, he maanu lahi mahaki ha kua kitia e ia a Iesu ne mate, ti ko e mogonei kua galo foki e gati tino hana! Ti huhu a Iesu ki a ia: “Teme na e, kua tagi a koe he ha? Ko hai kia ne kumi e koe?” He manatu ko Iesu ko e leoleo he kaina, ne tali a ia: “Ko e iki na e, kaeke kua uta kehe e koe a ia, ati talahau mai a kia au, po ko fe e mena ne tuku ai a ia e koe, ke uta kehe ai e au a ia.” Ti pehe a Iesu: “Maria na e.” Mafiti ai, ne mailoga e ia e puhala vagahau ha Iesu ki a ia. “Raponi na e,” he tagi fiafia atu e ia. Ti kaputi atu a ia ki a ia.—Ioane 20:11-18.
2 Kua fakatai he talahauaga nei e puhala fakaalofa ne talahau e Iesu he falu magaaho fakamua. He fakatai a ia ke he leveki mamoe mo e hana tau tutaki ke he tau mamoe, ne pehe a ia kua ui he leveki mamoe hana tau mamoe ke he ha lautolu a tau higoa ti iloa e lautolu hana leo. (Ioane 10:3, 4, 14, 27, 28) Moli, tuga e tau mamoe ne mailoga ha lautolu a leveki, ti mailoga pihia e Maria hana Leveki Mamoe, ko Keriso. Kua moli foki e mena nei ke he tau tutaki ha Iesu he vaha nei. (Ioane 10:16) Tuga ni he fakamalolo he teliga ogo e mamoe ke nofo fakatata ke he hana leveki, ti fakamalolo foki he maama fakaagaga ha tautolu a tautolu ke o fakatata ke he tau tuagahui he ha tautolu a Leveki Mamoe Mitaki, ko Iesu Keriso.—Ioane 13:15; 1 Ioane 2:6; 5:20.
3. Ko e heigoa falu huhu ne fakamanatu he fakatai ha Iesu ke he fuifui mamoe?
3 Pihia foki, hagaao ke he fakatai taha ia, ko e lotomatala he mamoe ke mailoga e tau leo he tagata kua fakamalolo a ia ke iloa nakai ko e kapitiga hana ka e ko e fi foki hana. Kua aoga lahi e mena ia ha ko e mena ha ha ia tautolu e tau tagata totoko fakataki. Ko hai a lautolu? Gahua fefe a lautolu? Puipui fefe e tautolu a tautolu? Ke moua e tali, o mai la ke kikite foki e falu mena ne talahau e Iesu he hana fakatai ke he fuifui mamoe.
‘Ko Ia kua Nakai Hu Atu ke he Gutuhala’
4. Hagaao ke he fakatai he leveki mamoe, ko hai ne mumui e tau mamoe ki ai, ti ko hai ka nakai mumui a lautolu ki ai?
4 Ne talahau e Iesu: “Ko ia kua hu atu ke he gutuhala, ko e leveki mamoe ni a ia. To vevete mai he leveki e pahala kia ia; kua fanogonogo foki e tau mamoe ke he hana leo. Kua ui ni a ia ke he hana tau mamoe ke he tau higoa ha lautolu; kua takitaki foki e ia a lautolu. Ka uta e ia hana tau mamoe, ti mua a ia ki ai; ti mumui atu ai e tau mamoe kia ia, ha kua iloa e lautolu hana leo. Ka e nakai mumui atu a lautolu ke he tagata kehe, ka e fehola kehe ai; ha kua nakai iloa e lautolu e tau leo he tau tagata kehe.” (Ioane 10:2-5) Mailoga, kua lagatolu e fakaaoga e Iesu e kupu “leo.” Lagaua ne tutala a ia hagaao ke he leo he leveki mamoe, ka e ke lagatolu aki ne hagaao a ia ke he “leo he tau tagata kehe.” Ko e faga tagata kehe fe ne hagaao a Iesu ki ai?
5. Ko e ha kua nakai foaki e tautolu e mahani fakamokoi ke he vahega tagata kehe ne talahau ia Ioane veveheaga 10?
5 Nakai fakatutala a Iesu ke he vahega he tagata kehe kua manako a tautolu ke fakakite ki ai e aga fakamokoi—ko e kupu he vagahau he Tohi Tapu fakamua kua kakano “fiafia ke he tau tagata kehe.” (Heperu 13:2) He fakatai ha Iesu, ko e tagata kehe ne nakai ko e tagata uiina. “Ko e tagata nakai hu atu ke he gutuhala ki loto he lotopa mamoe, ka e hake ki ai ke he taha fahi, ko e kaiha a ia mo e fofo mena.” (Ioane 10:1) Ko hai e tagata fakamua ne talahau he Kupu he Atua ko ia ko e tagata kaiha mo e ko e fofo mena? Ko Satani ko e Tiapolo. Kua kitia e tautolu e fakamoliaga he tohi a Kenese.
Magaaho ne Logona Fakamua e Leo he Tagata Kehe
6, 7. Ko e ha kua latatonu ke ui a Satani ko e tagata kehe mo e ko e kaiha?
6 Kua fakamaama he Kenese 3:1-5 e puhala ne logona e leo he tagata kehe he lalolagi ke he magaaho fakamua. Kua talahau he fakamauaga kua fina atu a Satani ke he fifine fakamua, ko Eva, he puhala he gata mo e vagahau ki a ia he puhala fakahehe. Moli, he fakamauaga nei nakai talahau moli ki a Satani ‘ko e tagata kehe.’ Pete ia, ko e tau gahua hana kua fakakite ke he loga he tau puhala kua tuga e tagata kehe a ia ne fakamaama he fakatai ha Iesu ne fakamau ia Ioane veveheaga 10. Manamanatu ke he falu tataiaga.
7 Ne talahau e Iesu kua hau e tagata kehe ke he tau tagata he fuifui hana ke he puhala tavikoviko fano. Tuga ia, kua hau tavikoviko fano a Satani ke faiola a ia, he fakaaoga e gata. Ko e tatao nei kua fakatapakupaku a Satani ke kitia moli a ia—ko e tagata fofo mena fakataki. Lafi ki ai, ko e tagata kehe he fuifui ne amanaki ke fofo e tagata ne pule ke he hana tau mamoe. Mena ia, kua mua atu e kelea hana ke he tagata kaiha, ha ko e foliaga hana foki ke ‘keli mo e fakaoti.’ (Ioane 10:10) Pihia foki, ko Satani ko e kaiha. He fakataki a Eva, ne fofo e ia e mahani fakamoli ha Eva ke he Atua. Mua atu, ne fakahoko e Satani e mate ke he tau tagata. Ti, ko ia ko e tagata kelipopo tagata.
8. Fakakeukeu fefe e Satani e tau kupu mo e tau manatu a Iehova?
8 Ko e mahani nakai fakamoli ha Satani kua kitia ke he puhala ne fakakeukeu e ia e tau kupu mo e tau mahani a Iehova. “Ko e moli kia kua pehe mai e Atua, aua neke kai e mua ke he tau akau oti he kaina?” he huhu e ia ki a Eva. Ne fakatupua a Satani ke ofogia, ke tuga na pehe a ia: ‘Maeke fefe e Atua ke nakai fai manamanatuaga moli?’ Ne lafi e ia: “Kua fioia he Atua ko e aho ka kai ai e mua, ti fakaala ai ha mua a tau mata.” Mailoga hana tau kupu: “Kua fioia he Atua.” Kua pehe ai a Satani: ‘Iloa e au e mena ne fioia he Atua. Iloa e au hana tau manatu, kua kelea lahi ai.’ (Kenese 2:16, 17; 3:1, 5) Momoko ai, ne nakai fuluhi kehe a Eva mo Atamu mai he leo he tagata kehe nei. Ka e, ne fanogonogo a laua ki ai ati fakamalaia ai a laua mo e tau hologa ha laua.—Roma 5:12, 14.
9. Ko e ha kua lata ke amanaki a tautolu ke he leo he tau tagata kehe ke logona he vaha nei?
9 Kua fakaaoga e Satani e tau puhala pihia ke fakahehe aki e tau tagata he Atua he vaha nei. (Fakakiteaga 12:9) Ko ia ko e “matua he pikopiko,” ti ko lautolu kua tuga a ia, ne lali ke fakahehe e tau fekafekau he Atua ko e tau fanau hana a ia. (Ioane 8:44) Kia mailoga e tautolu falu puhala nukua maeke e tau leo he tau tagata kehe nei ke logona he vaha nei.
Puhala kua Logona e Leo he Tau Tagata Kehe he Vaha Nei
10. Ko e heigoa taha puhala ne kua logona e leo he tau tagata kehe?
10 Tau talahauaga fakavaia. Ne pehe e aposetolo ko Paulo: “Aua neke hikihikifano a mutolu ke he tau kupu kehe, mo e tau kakano kehekehe.” (Heperu 13:9) Ko e vahega fakaakoaga fefe? Ha kua maeke ai ke ‘hiki kehe a tautolu,’ kua maaliali ai kua hagaao a Paulo ke he tau fakaakoaga ne fakalolelole e lagotatai fakaagaga ha tautolu. Ko hai ne talahau e tau fakaakoaga kehe pihia? Ne tala age a Paulo ke he matakau he tau motua Kerisiano: “To tutupu foki ia mutolu ni e tau tagata ke vagahau mai ke he tau mena fakakeukeu, to futiaki ai e tau tutaki kia mumui atu kia lautolu.” (Gahua 20:30) Moli, he vaha nei tuga he vaha a Paulo, ha ha i ai falu ne fakalataha ke he fakapotopotoaga Kerisiano he taha vaha ne kua lali he mogonei ke fakahehe e tau mamoe he vagahau e “tau mena fakakeukeu”—ko e tau kupu nakai moli katoatoa mo e pikopiko moli. He talahau he aposetolo ko Peteru, kua fakaaoga e lautolu e “tau kupu fakatupua”—ko e tau kupu ne tuga kua moli ka kua teao noa ia.—2 Peteru 2:3.
11. Fakatapakupaku fefe he tau kupu ne moua ia 2 Peteru 2:1, 3 e puhala mo e foliaga he tau tagata tiaki e taofiaga?
11 Kua fakatapakupaku atu foki e Peteru e tau puhala he tau tagata tiaki e taofiaga he talahau kua “fakatupu fakagalo e lautolu e tau taofi kehekehe ke malaia ai.” (2 Peteru 2:1, 3) Tuga ni e tagata kaiha he fakatai ha Iesu he fuifui mamoe ne nakai “hu atu ke he gutuhala ki loto he lotopa mamoe, ka e hake ki ai ke he taha fahi,” ti o mai pihia e tau tagata tiaki e taofiaga ki a tautolu he puhala fakagalogalo. (Kalatia 2:4; Iuta 4) Ko e heigoa e foliaga ha lautolu? Ne lafi e Peteru: ‘To fakaaoga hehe e lautolu a mutolu.’ Moli, ko e heigoa ni ne lali e tau tagata tiaki e taofiaga ke talahau fakahako, ko e foliaga moli he tau tagata fofo mena ‘ke kaiha mo e keli mo e fakaoti.’ (Ioane 10:10) Mataala ke he tau tagata kehe pihia!
12. (a) Fakatapakupaku fefe he tau fioaga ha tautolu a tautolu ke he leo he tau tagata kehe? (e) Ko e heigoa e tataiaga ke he tau lagatau a Satani mo e he tau tagata kehe ia he vaha nei?
12 Tau fioaga hagahagakelea. Ko e leo he tau tagata kehe ne liga logona he puhala ia lautolu ne fio mo tautolu. Ko e tau feoakiaga hagahagakelea kua fakamatematekelea pauaki e tau fuata. (1 Korinito 15:33) Manatu, ne tatao e Satani a Eva—ko ia ne fakamui mo e tote e iloaaga ki a laua e hoa tagata fakamua. Ne omoomoi e ia a Eva ko e mena fakakaupa e Iehova hana tokanoaaga, ka ko e mena nakai moli nukua a ia. Ne ofania e Iehova hana tufugatiaaga tagata mo e leveki ki a lautolu. (Isaia 48:17) Pihia foki he vaha nei, kua lali e tau tagata kehe ke fakaohooho a mutolu ko e tau fuata ko e mena papa malu lahi he tau matua Kerisiano e tokanoaaga ha mutolu. Lauia fefe a koe mai he tau tagata kehe ia? Pehe taha tama fifine Kerisiano: “Fai magaaho ne lolelole e tua haku ha ko e tau kapitiga he vahega haku. Ne fakatumau a lautolu ke talahau kua papa malu mo e kelea e lotu haku.” Ka e, ko e mena moli kua fakaalofa e tau matua hau ki a koe. Ti ka lali e tau kapitiga aoga hau ke fakaohooho a koe ke nakai falanaki ke he tau matua hau, ua fakahehe tuga a Eva.
13. Ko e heigoa e puhala pulotu ne moua e Tavita mo e ko e heigoa taha puhala kua maeke ia tautolu ke muitua ki a ia?
13 Hagaao ke he tau fioaga hagahagakelea, ne talahau he salamo ko Tavita: “Nakai nofo au mo e tau tagata matahavala; ti nakai fano au mo e tau tagata pikopiko.” (Salamo 26:4) Liu foki, kua mailoga nakai e koe e aga moli he tau tagata kehe? Ne ufiufi e lautolu ko hai moli a lautolu—tuga ni a Satani ne ufiufi a ia he fakaaoga e gata. He vaha nei, kua ufiufi he tau tagata faivao e aga mo e tau amaamanakiaga moli ha lautolu he fakaaoga e Internet. He tau poko tututala, kua fakakite he tau tagata lalahi mahani kelea a lautolu ko e tau fuata ke fakataki a mutolu ke he matahele. Tau fuata ikiiki, fakamolemole kia mataala fakalahi neke fakahagahagakelea fakaagaga a mutolu.—Salamo 119:101; Tau Fakatai 22:3.
14. Lomi fakailoa fefe he puhala uta tala he falu magaaho e leo he tau tagata kehe?
14 Tau tukumale fakavai. Pete ni kua moli falu tala hokotaki hagaao ke he Tau Fakamoli a Iehova, ke he falu magaaho ne fakaaoga ni e lautolu he puhala uta tala a lautolu ke fakapuloa e leo hehe he tau tagata kehe. Tuga anei, he taha motu ko e vala tala hokotaki ne talahau fakavai na lalago he Tau Fakamoli e fakatufono a Hitler he Felakutaki II he Lalolagi. He taha motu foki, ne tukumale he taha hokotaki e Tau Fakamoli he moumou e tau fale tapu. He tau motu loga ne tukumale he puhala uta tala e Tau Fakamoli he fakaheu ke tului e tau fanau ha lautolu aki e tau vai fakaekekafo mo e fakamagalo noa pauaki foki e tau agahala kelea muikau ne taute he tau matakainaga talitonu. (Mataio 10:22) Pete he pihia, ko e tau tagata fakamoli ne iloa mitaki a tautolu kua mailoga ko e tau tukumale pihia kua fakavai.
15. Ko e ha kua nakai pulotu ke talitonu e tau mena oti ne fakakite he puhala uta tala?
15 Ko e heigoa ha tautolu ka taute kaeke ke fakafelau a tautolu mo e tau tukumale ne fakaholofa he leo he tau tagata kehe pihia? Kua mitaki ke tokaloto e tautolu e fakatonuaga he Tau Fakatai 14:15: “Kua talia he tagata goagoa e tau kupu oti; ka ko e tagata lotomatala, kua manamanatu a ia ke he hana tau puhala.” Kua nakai pulotu ke talitonu mena hako oti e tau mena ne talahau he puhala uta tala. Moli kua nakai falanaki oti a tautolu ke he tau vala tala oti he lalolagi, kua mailoga tuai e tautolu “ko e lalolagi oti ha he pule hana kua mahani kelea.”—1 Ioane 5:19.
‘Kamatamata e Tau Talahauaga he Agaga’
16. (a) Fakatai fefe e mahani he tau mamoe ke he moliaga he tau kupu ha Iesu ne moua ia Ioane 10:4? (e) Ko e heigoa ne fakamalolo he Tohi Tapu ki a tautolu ke taute?
16 Iloa moli fefe e tautolu kua fakafehagai a tautolu mo e kapitiga po ke fi? Na pehe a Iesu kua muitua e tau mamoe ke he leveki mamoe “ha kua iloa e lautolu hana leo.” (Ioane 10:4) Nakai ko e foliga moli he leveki mamoe kua omoi e tau mamoe ke muitua ki a ia; ka ko e leo hana. Ko e tohi ke he tau fonua he Tohi Tapu kua fakakite e talahauaga he tagata ahi atu he pehe kua mailoga he tau mamoe e leveki ha lautolu ke he tapulu hana, ka e nakai ko e leo hana. Ne tali e leveki mamoe ko e leo ne iloa e lautolu. Ke fakamoli e mena nei, ne fehikitaki e ia hana tapulu mo e tagata kehe. He tui e tapulu he leveki mamoe, ne ui he tagata kehe e tau mamoe, ka e nakai tali atu a lautolu. Nakai iloa e lautolu e leo hana. Ka e, he magaaho ne ui he leveki mamoe a lautolu, pete ni he kehe e tapulu hana, ne o mai agataha e tau mamoe. Ti, ko e tagata ne tapulu tuga e leveki mamoe, ka e nakai talia he tau mamoe ko ia moli haia. Kua kamatamata he tau mamoe e leo he tagata ne ui, he fakatatai ai mo e leo he leveki mamoe. Ne talahau he Kupu he Atua ke taute pihia e tautolu—he ‘kamatamata e tau talahauaga po ke mai he Atua a lautolu.’ (1 Ioane 4:1; 2 Timoteo 1:13) Ko e heigoa ka lagomatai a tautolu ke taute pihia?
17. (a) Mahani fefe a tautolu mo e leo ha Iehova? (e) Kua fakamalolo he iloilo ha Iehova a tautolu ke taute e heigoa?
17 Maama ai, ko e iloa tonu e tautolu e leo, po ke fekau, ha Iehova, kua maeke ke mailoga mitaki e tautolu e leo he tagata kehe. Kua fakakite mai he Tohi Tapu e puhala ke feaki e tautolu e iloilo ia. Kua pehe: “To logona foki he tau teliga ha mutolu e kupu ki tua ha mutolu, . . . kua pehe mai, Ko e puhala hanai ke o ai a mutolu.” (Isaia 30:21) Ko e “kupu” ia i tua ha tautolu kua hau he Kupu he Atua. He tau magaaho oti ka totou e tautolu e Kupu he Atua, kua logona e tautolu e leo he ha tautolu a Leveki Mamoe Mua Ue Atu, ko Iehova. (Salamo 23:1) Ti, ko e lahi e fakaako ha tautolu ke he Tohi Tapu, kua lahi foki e mahani ha tautolu mo e leo he Atua. Ko e iloilo moli ia kua fakamalolo a tautolu ke mailoga mafiti e leo he tau tagata kehe.—Kalatia 1:8.
18. (a) Ko e heigoa kua putoia he iloa e leo a Iehova? (e) Hagaao ke he Mataio 17:5, ko e ha kua lata ia tautolu ke omaoma e leo a Iesu?
18 Ko e heigoa foki kua putoia he iloa e leo a Iehova? He lafi ke he fanogonogo, kua putoia e omaoma. Liu ke mailoga e Isaia 30:21. Kua fakapuloa he Kupu he Atua: “Ko e puhala hanai.” E, puhala he fakaako e Tohi Tapu, kua logona e tautolu e tau takitakiaga ha Iehova. Matutaki atu, ne poaki e ia: “Ke o ai.” Kua manako a Iehova ke taute e tautolu e tau mena kua logona e tautolu. Ti, he fakagahua e mena kua ako e tautolu, kia fakakite e tautolu he nakai logona noa e leo a Iehova ka e fanogonogo foki ki ai. (Teutaronome 28:1) He omaoma ke he leo a Iehova kua kakano foki ke omaoma ke he leo a Iesu, ha kua tala mai e Iehova ke taute pihia e tautolu. (Mataio 17:5) Ko e heigoa ha Iesu, ko e Leveki Mamoe Mitaki, ne talahau ki a tautolu ke taute? Kua fakaako e ia a tautolu ke taute tutaki mo e ke falanaki “e fekafekau fakamoli mo e loto matala.” (Mataio 24:45; 28:18-20) He omaoma e leo hana kua kakano ko e moui tukulagi ma tautolu.—Gahua 3:23.
‘To Fehola Kehe a Lautolu ia Ia’
19. Ko e heigoa e tali atu ha tautolu ke he leo he tau tagata kehe?
19 Kua lata fefe mogoia ia tautolu ke tali atu ke he leo he tau tagata kehe? Ke he puhala ne taute he tau mamoe. Pehe a Iesu: “Ka e nakai mumui atu a lautolu ke he tagata kehe, ka e fehola kehe ai.” (Ioane 10:5) Ua e puhala he tali atu ha tautolu. Fakamua, ‘to nakai mumui atu’ a tautolu ke he tagata kehe. E, kua fifili a tautolu ke tiaki e tagata kehe. Moli ni, he Tohi Tapu Heleni, ko e tau kupu “ka e nakai” ne liliu ke he vagahau ia e puhala malolo lahi ke fakakite e tiakiaga. (Mataio 24:35; Heperu 13:5) Uaaki, ‘to fehola kehe mai ia ia,’ po ke fuluhi kehe mai ia ia a tautolu. Ko e puhala hako ni a ia ke tali atu ki a lautolu kua nakai fetataiaki e tau fakaakoaga mo e leo he Leveki Mamoe Mitaki.
20. To tali atu fefe a tautolu kaeke ke fakafelau a tautolu mo e (a) tau tagata tiaki e taofiaga fakavaia, (e) tau fioaga hagahagakelea, (i) tau puhala uta tala fakavai?
20 Ko e mena ia, ka fakafelau mo lautolu ne talahau e tau manatu tiaki e taofiaga, kua manako a tautolu ke taute e mena kua talahau he Kupu he Atua: “Ke kitekite kia lautolu kua fakatutupu e feveheveheaki, mo e tau mena ke tupetupe ai; ko e tau mena ia kua nakai lata mo e tau kupu kua ako ai e mutolu; kia kalo kehe foki a mutolu kia lautolu.” (Roma 16:17; Tito 3:10) Pihia foki, ko e tau fuata Kerisiano ne feleveia mo e tau matematekelea he tau fioaga hagahagakelea kua lata ke fakagahua e fakatonuaga a Paulo ne age ke he fuata tote ko Timoteo: “Kia hola kehe mo e tau manako lahi he tau fuata.” Ka fakafelau mo e tau tukumale fakavai he puhala uta tala, to manatu e tautolu e tomatomaaga ha Paulo ki a Timoteo: “To mafoki kehe foki ha lautolu [ko lautolu kua fanogonogo ke he leo he tau tagata kehe] ke he tau tala tuai. Ka ko koe, kia nofo fakalatalata a koe ke he tau mena oti.” (2 Timoteo 2:22; 4:3-5) Pete ni kua liga momole e leo he tau tagata kehe, kia fehola a tautolu mai he tau mena oti ka liliu kehe a tautolu he tua.—Salamo 26:5; Tau Fakatai 7:5, 21; Fakakiteaga 18:2, 4.
21. Ko e heigoa e palepale kua tatali ma lautolu ne tiaki e leo he tau tagata kehe?
21 He tiaki e tau leo he tau tagata kehe, kua talia he tau Kerisiano fakauku he agaga e tau kupu he Leveki Mamoe Mitaki ne moua ia Luka 12:32. Ne talahau e Iesu i ai ki a lautolu: “Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.” Tuga ia, ko e ‘tau mamoe kehe’ kua amanaki lahi ke logona e tau kupu ha Iesu: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.” (Ioane 10:16; Mataio 25:34) Ko e palepale mafanatia ha ia kua tatali ma tautolu kaeke ke tiaki e tautolu e “leo he tau tagata kehe”!
Manatu Nakai e Koe?
• Kua latatonu fefe a Satani mo e talahauaga he tagata kehe ne talahau e Iesu he fakatai hana hagaao ke he fuifui mamoe?
• Logona fefe e leo he tau tagata kehe he vaha nei?
• Maeke fefe ia tautolu ke mailoga e leo he tau tagata kehe?
• Ko e heigoa ha tautolu a tali atu ke he leo he tau tagata kehe?
[Tau Huhu he Fakaakoaga]
[Fakatino he lau 32]
Tali atu fefe a tautolu ke he leo he tau tagata kehe?