“Kia Fakafeheleaki”
“Kia Fakafeheleaki”
“Kia fakafeheleaki ke he feofanaki he tau matakainaga.”—ROMA 12:10.
1, 2. Ko e heigoa e fakafetuiaga ne olioli he taha misionare he vaha fou nei mo e aposetolo ko Paulo mo e tau matakainaga ha laua?
HE 43 e tau hana he gahua misionare he Fahi Uta Mamao, ne talahaua a Don ke he mafanatia hana ma lautolu ne leveki a ia ki ai. He takoto a ia mogonei mo e taufetului mo e gagao nakai fai tului, ko e falu he hana tau tagata fakaako fakamua ne totou afe e tau kilomita ne fenoga mai ke he hana tapa mohega ke talahau, “Kamsahamnida, kamsahamnida!”—“Fakaaue lahi, fakaaue lahi!” he faka-Korea. Ko e fakafeheleaki ha Don ne aamotia e tau loto ha lautolu.
2 Ko e fakafifitakiaga nei ne putoia a Don kua nakai kuenaia. He senetenari fakamua, ne talahau he aposetolo ko Paulo e fakahele hokulo hana ma lautolu ne lagomatai e ia. Ne foaki e Paulo a ia. Pete ni ko ia ko e tagata manatu malolo, kua totonu mo e leveki foki a ia, “tuga ne fifine fakahuhu tama kua leveki fakamitaki hana ni a fanau.” Ne tohi a ia ke he fakapotopotoaga i Tesalonia: ‘Ne pihia ha mautolu a fakahele kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.’ (1 Tesalonia 2:7, 8) Fakamui, he magaaho ne tala age a Paulo ke he tau matakainaga Efeso hana to nakai liu a lautolu ke kitia a ia, “ne tagi lahi a lautolu oti kana, mo e peka kia Paulo, mo e taufigita kia ia.” (Gahua 20:25, 37) Maali ai, ko e fakafetuiaga he vahaloto ha Paulo mo e hana tau matakainaga ne hokulo atu he taha e taofiaga. Kua ha ha ia lautolu e fakafeheleaki.
Fakafeheleaki mo e Feofanaki
3. Matutaki fefe e tau kupu Tohi Tapu ma e fakafeheleaki mo e feofanaki?
3 He tau Tohiaga Tapu, ko e fakafeheleaki, logonaaga fakamatakainaga, mo e fakaalofa hofihofi noa kua fetataaki oti mo e tau fua Kerisiano ne mua ue atu—ko e fakaalofa. (1 Tesalonia 2:8; 2 Peteru 1:7) Tuga ni e tau vala he maka kikila fulufuluola, kua fakalagotatai mo e fegahuaaki he tau aga mahani Atua nei. Kua futiaki fetataaki lahi e lautolu e tau Kerisiano ti pihia foki ke he ha lautolu a Matua he lagi. Ti, fakalagalaga he aposetolo ko Paulo hana tau matakainaga talitonu: “Ua fakaalofa fakatupua. . . . Kia fakafeheleaki ke he feofanaki he tau matakainaga.”—Roma 12:9, 10.
4. Ko e heigoa e kakano he kupu “fakafeheleaki”?
4 Ko e kupu Heleni ne fakaaoga e Paulo ma e “fakafeheleaki” kua moua mai he ua e fahi, ko e taha kakano ko e kapitiga mo e taha foki, ko e fakahele moli. He fakamaama he taha tagata fakaako tokoluga he Tohi Tapu, kua kakano e mena nei ko e tau Kerisiano “kua fakamailoga ai ha ko e fakamoliaga kua kitia ke he magafaoa fakaalofa fakalataha, mo e felagomataiaki tata lahi.” Pihia nakai e logonaaga hau ke he tau matakainaga Kerisiano hau? Ko e takatakaiaga mafana—ko e logonaaga fakaalofa—kua lata ke hufia e fakapotopotoaga Kerisiano. (Kalatia 6:10) Ti, kua talahau he The New Testament in Modern English, ha J. B. Phillips, ke he Roma 12:10: “Kia ha ha ia tautolu e fakafeheleaki mafanatia moli he vahaloto he tau matakainaga.” Mo e totou he The Jerusalem Bible: “Kia fefakaalofaaki tuga ne kua lata tonu he tau matakainaga.” E, ko e fakaalofa he vahaloto he tau Kerisiano kua putoia lahi atu he tonu mo e kotofaaga hokoia. ‘Mo e fakafeheleaki fakamoli ke he tau matakainaga’ kua lata ia tautolu ke ‘feofanaki fakalahi ai mai he loto mea.’—1 Peteru 1:22.
‘Fakaako he Atua ke Feofanaki’
5, 6. (a) Fakaaoga fefe e Iehova e tau fonoaga he lalolagi katoa ke fakaako e tau tagata hana hagaao ke he fakafeheleaki faka-Kerisiano? (e) Maeke fefe e pipiaga he vahaloto he tau matakainaga ke malolo lahi ka leva?
5 Pete ni he lalolagi nei “ko e fakaalofa he tokologa” kua momoko, hane fakaako e Iehova hana tau tagata he vaha fou nei “[ke] fakaalofa ke he tau matakainaga.” (Mataio 24:12; 1 Tesalonia 4:9) Ko e tau fonoaga he lalolagi katoa he Tau Fakamoli a Iehova kua foaki e tau magaaho mua ue atu ma e fakamahaniaga nei. He tau fonoaga nei, ko e Tau Fakamoli he matakavi ne feleveia mo e tau matakainaga mai he tau motu mamao, ti tokologa ne hafagi e tau kaina ha lautolu ke he tau matakainaga motu kehe. He taha fonoaga nakai la leva, falu ne o mai he tau motu ne uka e tau tagata ke fakakite e tau logonaaga ha lautolu. “He magaaho fakamua ne hohoko mai e tau matakainaga nei, kua maimaina mo e ma lahi a lautolu,” he talahau he Kerisiano ne lagomatai ke he tau nonofoaga. “Ka e he ono e aho he mole ti tau mavehe ai mo lautolu, ko lautolu mo e tau tagata ne nonofo ai a lautolu kua fepekaaki mo e tagi ai. Ne fakatapakupaku a lautolu ke he puhala fakaalofa faka-Kerisiano ka nakai maeke ke nimo ai e lautolu.” He fakakite e fakamokoi ke he tau matakainaga ha tautolu, pete e tau tupumaiaga ha lautolu, ka tamai e mitaki lahi ke he matakainaga hau mo e tagata ne nofo ai.—Roma 12:13.
6 He fiafia tuga e tau mena tutupu pihia he fonoaga, kua mua atu e tupu he fakafetuiaga fetataaki ka leva e fekafekau fakalataha he tau Kerisiano ki a Iehova. Ka iloa mitaki e tautolu e tau matakainaga ha tautolu, kua maeke ia tautolu ke loto fakaaue katoatoa ke he ha lautolu a tau aga fakahele—ha lautolu a tua fakamoli, falanaki lahi, mahani fakamoli, mahani totonu, fakamokoi, manamanatu, fakaalofa hofihofi noa, mo e nakai lotokai. (Salamo 15:3-5; Tau Fakatai 19:22) Ko Mark, ne gahua ko e misionare i Aferika Uta, ne pehe, “Ko e gahua auloa mo e tau matakainaga ha tautolu kua fakave e pipiaga kua nakai mamutu.”
7. Ko e heigoa kua lata ma tautolu ke olioli e fakafeheleaki faka-Kerisiano he fakapotopotoaga?
7 Ke moua mo e fakatumau e pipiaga pihia he fakapotopotoaga, kua lata e tau tagata ke futiaki fetataaki. He o tumau ke he tau feleveiaaga Kerisiano, kua fakamalolo e matutakiaga ha tautolu mo e tau matakainaga ha tautolu. He fakalataha mo e putoia he kamataaga, ka hoko, mo e ka oti e tau feleveiaaga, kua fakamalolo mo e fakalagalaga e tautolu e falu ke he “fakaalofa mo e tau gahua mitaki.” (Heperu 10:24, 25) “Ne manatu lahi e au,” he talahau he motua he Tau Fahi Kaufakalataha, “he magaaho ne vaha tama au, ko e magafaoa haku ko e taha he tau magafaoa fakahiku ke toka e Fale he Kautu, ha ko e fai magaaho ke olioli e fakatutalaaga fakakapitiga mo e fai kakano.”
Lata Nakai ia Koe ke ‘Fakalahi Atu’?
8. (a) Ko e heigoa e kakano ha Paulo he magaaho ne tomatoma e ia e tau Korinito ke ‘fakalahi atu’? (e) Ko e heigoa ha tautolu ka taute ke fakatolomaki e fakafeheleaki he fakapotopotoaga?
8 Ke fakalataha katoatoa ke he fakafeheleaki pihia, kua lata ia tautolu ke ‘fakalahi atu’ e tau loto ha tautolu. Ke he fakapotopotoaga Korinito, ne tohi he aposetolo ko Paulo: “Kua fakalahi ha mautolu a tau loto kia mutolu. Nakai ko mautolu kua apitia ai a mutolu.” Ne tomatoma a Paulo ki a lautolu ke ‘fakalahi atu.’ (2 Korinito 6:11-13) Maeke foki nakai a koe ke ‘fakalahi atu’ e tau logonaaga fakahele hau? Kua nakai lata ia koe ke leo ke he falu ke o atu ki a koe. He tohi hana ke he tau Roma, ne matutaki e Paulo e lata ma e fakafeheleaki mo e hatakiaga nei: “Kia takitokotaha mo e mua ke tuku atu e lilifu ke he falu.” (Roma 12:10) Ke fakakite e fakalilifu ke he falu, maeke ia koe ke fakailoilo ke feleveia mo lautolu he tau feleveiaaga. Maeke foki ia koe ke uiina a lautolu ke fakalataha mo koe ke he fekafekauaga he fonua po ke mautauteute ma e feleveiaaga. He taute pihia kua hafagi e puhala ma e fakafeheleaki ke tupu.
9. Ko e heigoa e tau lakaaga kua taute he falu ke eke mo tau kapitiga tata lahi he tau matakainaga Kerisiano? (Putoia ha fakafifitakiaga he matakavi.)
9 Ko e tau magafaoa mo e tau tagata he fakapotopotoaga kua maeke ke ‘fakalahi atu’ he ahi e taha mo e taha, liga he fakalataha ke he kai mukamuka, mo e he fakalataha auloa ke he tau matagahua atihake. (Luka 10:42; 14:12-14) Ne fa fakatokatoka e Hakop e tau pikiniki ma e tau matakau ikiiki. “Kua fakalataha mai a lautolu ne ikiiki mo e momotua, ti pihia mo lautolu e tau matua tokotaha,” he talahau e ia. “Kua liliu e tau tagata oti ki kaina mo e tau manamanatuaga fiafia, ti fetataaki lahi e tau logonaaga ke he taha mo e taha.” Ha ko e tau Kerisiano, kua lata ia tautolu ke nakai ni ko e tau matakainaga talitonu ka e ko e tau kapitiga moli foki.—3 Ioane 14.
10. Ko e heigoa ha tautolu ka taute he magaaho ka lekua e tau fakafetuiaga?
10 Ka e, he falu magaaho, ko e nakai mitaki katoatoa kua fakalaga e paleko ke feaki e tuaga kapitiga mo e fakafeheleaki. Ko e heigoa ha tautolu ka taute? Fakamua, maeke ia tautolu ke liogi ma e tau fakafetuiaga mitaki mo e tau matakainaga ha tautolu. Ko e finagalo he Atua ke femataaki e tau fekafekau hana, mo e to tali e ia e tau liogi fakamoli pihia. (1 Ioane 4:20, 21; 5:14, 15) Kua lata foki ia tautolu ke gahua fakatatau mo e tau liogi ha tautolu. Ko Ric, ko e fekafekau faifano i Aferika Uta, ne liu manatu e matakainaga tane ne tetotonu e aga fakatagata ati uka a ia ke femataaki. “He nakai fakaheu e matakainaga, ne fifili au ke iloa mitaki a ia,” he fakamaama e Ric. “Kua fakahiku ai ko e matua tane he matakainaga ko e tagata kikili lahi e akonakiaga. Ha kua maama e au e uka he matakainaga ke taufetului ke fahia mai he tupuaga nei mo e holo ki mua hana, ne nava au ki a ia. Kua eke a maua mo tau kapitiga mitaki.”—1 Peteru 4:8.
Hafagi e Loto Hau!
11. (a) Ko e heigoa kua lata ke fakatupu e fakafeheleaki he fakapotopotoaga? (e) Ko e ha e fakatumau ke vevehe kehe e logonaaga mai he falu kua hagahagakelea e tuaga fakaagaga?
11 He vaha nei, tokologa e tau tagata ne hokotia e tau momoui ke nakai feaki e tuaga kapitiga tata mo e ha tagata. Ko e momoko ha ia! Nakai eke e mena nei—mo e nakai lata—ke tupu he fakapotopotoaga Kerisiano. Ko e fakaalofa fakamatakainaga moli kua nakai ko e fakatutalaaga totonu noa mo e tau mahani mitaki; po ke kua nakai fakafi ke he falu he fakatata e aga tapatapaa. Ka e, kua lata ia tautolu ke makai he hafagi e tau loto ha tautolu, tuga ne taute e Paulo ke he tau Korinito, mo e fakakite ke he tau matakainaga talitonu ha tautolu kua manamanatu moli a tautolu hagaao ke he mitaki ha lautolu. Pete he nakai ko e aga pauaki he tau tagata oti ke fiafia po ke gutu talatala makaukau, ka ko e vevehe kehe lahi kua maeke ke hagahagakelea. “Ko ia kua vevehe kehe a ia, kua kumi ni e ia e mena ne manako ki ai a ia,” he hataki he Tohi Tapu. “Kua latau a ia mo e tau iloilo oti ni.”—Tau Fakatai 18:1.
12. Kua aoga he ha e matutakiaga ke he tau fakafetuiaga tata he fakapotopotoaga?
12 Ko e matutakiaga fakamoli e matapatuaga ke he tuaga kapitiga moli. (Ioane 15:15) Manako a tautolu oti ke he tau kapitiga kua maeke ia tautolu ke vanivani ki ai e tau fatuakiloto mo e tau logonaaga ha tautolu. Lafi ki ai, ko e iloa mitaki e tautolu e falu, kua mukamuka lahi ke fakamakona e tau manako he falu. Ka mataala a tautolu ke he tau manako he falu ke he puhala nei, kua fakatolomaki e tautolu e fakafeheleaki, mo e to iloa e tautolu e moli he tau kupu ha Iesu: “Kua mua e monuina hana ke foaki atu, ke he monuina hana ke talia mai.”—Gahua 20:35; Filipi 2:1-4.
13. Ko e heigoa ha tautolu ka taute ke fakakite kua ha ha ia tautolu e fakahele moli ma e tau matakainaga ha tautolu?
13 Ke aoga lahi e tau fakafeheleaki ha tautolu, kua lata ia tautolu ke fakakite ai. (Tau Fakatai 27:5) Ka moli e fakafeheleaki ha tautolu, to liga fakakite he fofoga ha tautolu, ti liga fakalagalaga e tau loto he falu ke talia. “Ko e maama he tau mata kua fiafia ai e loto,” he tohi he tagata pulotu. (Tau Fakatai 15:30) Ko e tau gahua manamanatu foki kua fakatolomaki e fakafeheleaki. Pete ni e nakai fai kua fakatau e fakafeheleaki moli, ko e mena fakaalofa ne foaki he loto kua fai kakano lahi. Ko e laupepa, ko e tohi, mo e ‘ko e tau kupu kua vagahau he magaaho tonu’—kua maeke he tau mena nei ke fakakite e fakahele hokulo. (Tau Fakatai 25:11; 27:9) Ka moua agataha e tautolu e tuaga kapitiga he falu, kua lata ia tautolu ke fakatumau ai he matutaki ke fakakite e fakafeheleaki nakai lotokai. Mua atu ke he tau magaaho kua lata, to manako a tautolu ke fakalataha ai mo e tau kapitiga ha tautolu. Kua pehe e Tohi Tapu: “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.”—Tau Fakatai 17:17.
14. Ko e heigoa ha tautolu ka taute kaeke ke tuga kua fai tagata ne nakai talia e fakahele ha tautolu?
14 Moli ai, kua nakai amanaki a tautolu ke tata ke he tau tagata oti he fakapotopotoaga. To pauaki ai ke ha ha ai e falu ka tata lahi e logonaaga ha tautolu ki ai. Ti ka fai tagata kua tuga ke nakai kapitiga atu mo koe tuga kua manako a koe, aua neke mafiti ke fakahiku kua fai lekua a koe po ke tagata ia. Ti ua lali ke fakaohooho e fakafetuiaga tata mo e tagata ia. Ka fakalaulahi e tuaga kapitiga hau kaeke ke fakaata he tagata, lagomatai ai e koe he fakatumau ke hafagi e gutuhala ma e tau fakafetuiaga tata lahi he vaha anoiha.
“Kua Fiafia Au kia Koe”
15. Ko e heigoa e lauiaaga he fakamaloloaga, po ke nakai fai ai, ne ha ha he falu?
15 Kua fiafia ha ia ha Iesu he magaaho papatiso hana, ne kua logona e ia e tau kupu mai he lagi: “Kua fiafia au kia koe”! (Mareko 1:11) Ko e talahauaga nei he taliaaga kua liga ke fakahokulo e fakamalolo ha Iesu kua ha ha he Matua hana e fakahele ma hana. (Ioane 5:20) Momoko ha ia, falu ne nakai logona e fakamaloloaga pihia mai ia lautolu kua fakalilifu mo e fakaalofa a lautolu ki ai. “Tokologa e fuata ikiiki tuga au ne nakai fai tagata he magafaoa kua fakalataha ke he tau taofiaga Kerisiano ha lautolu,” he talahau e Ann. “I kaina kua logona ni e mautolu e tutuhia. Kua taute he mena nei a mautolu ke momoko lahi.” Ka e, he magaaho ne fakalataha a lautolu ke he fakapotopotoaga, kua logona e lautolu e mafanatia he lalagoaga, leveki he magafaoa fakaagaga—ko e tau matua tane mo e tau matua fifine mo e tau tugaane mo e tau mahakitaga ke he tua.—Mareko 10:29, 30; Kalatia 6:10.
16. Ko e ha e fakakite e aga tuhituhi ke he falu kua nakai lagomatai?
16 He falu aga fakamotu, tau mamatua, lautolu ne momotua, mo e tau faiaoga kua nakai fa talahau e taliaaga loto katoa ki a lautolu ne ikiiki, he manamanatu ko e fakahekeaga pihia kua liga taute a lautolu ke fia lahi po ke fakatokoluga. Ko e manamanatu pihia kua lauia foki e tau magafaoa mo e fakapotopotoaga Kerisiano. Ko e nava ke he lauga po ke falu laliaga, liga pehe a lautolu kua momotua: “Laukauka, ka e maeke ia koe ke mitaki atu foki!” Po ke he falu puhala, kua liga talahau e lautolu e nakai fiafia ki a ia ne tote. He taute pihia, tokologa ne talitonu kua fakalagalaga a lautolu ne ikiiki ke hokotia ke he katoatoaaga ha lautolu. Ka ko e talahauaga nei kua ha ha ai e lauiaaga kelea, ha kua liga vevehe kehe po ke kua logona e lautolu ne ikiiki kua nakai maeke ke fakatatau ki ai.
17. Ko e ha kua lata ke kumi magaaho a tautolu ke fakamalolo e falu?
17 Ka ko e fakamaloloaga, kua nakai lata ke foaki ni fakamua to fakatonu. Ha ko e fakamaloloaga moli kua fakatolomaki e fakafeheleaki he magafaoa mo e ke he fakapotopotoaga, ti fakamalolo a lautolu kua ikiiki ke kumi e tau matakainaga iloa lahi ma e fakatonuaga. Ti he nakai fakaata e aga fakamotu ke talahau e puhala ke taute ke he falu, kia “tapulu a [ta]utolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” Fakamalolo tuga ne taute e Iehova.—Efeso 4:24.
18. (a) Ko mutolu ne ikiiki, kua lata fefe ia mutolu ke manamanatu ke he fakatonuaga mai ia lautolu ne momotua? (e) Ko e ha a lautolu ne momotua ke fakaeneene hagaao ke he puhala ka fakatonu atu?
18 He taha fahi, ko mutolu ne ikiiki, kia nakai fakahiku ka fakahako atu po ke takitaki e lautolu ne momotua ki a mutolu, kua kakano kua nakai fia loto a lautolu ki a mutolu. (Fakamatalaaga 7:9) Nakai pihia! Kua tuga ke fakalagalaga a lautolu he manamanatu mo e fakahele hokulo e lautolu a mutolu. Ka nakai pihia, ko e ha kua lali a lautolu ke vagahau ki a mutolu hagaao ke he matakupu? He iloa e lauiaaga he tau kupu malolo, ko lautolu ne momotua—mua atu ke he tau motua he fakapotopotoaga—fa mahani kua foaki fakalahi e magaaho ke manamanatu mo e liogi ato foaki e fakatonuaga ha kua manako a lautolu ke taute e mena kua hako.—1 Peteru 5:5.
‘Kua Fakahele Fakalahi a Iehova’
19. Ko e ha a lautolu ne matematekelea he tau fakaita kua ono ki a Iehova ma e lalagoaga?
19 Ko e tau fakahikuaga nakai mitaki kua liga toka e falu aki e logonaaga ko e fakakite e fakafeheleaki ka takitaki ni ke he falu fakaita. Kua lata agataha ke liu fakamalolo mo e tua malolo ma lautolu kua hafagi e tau loto ha lautolu ke he falu. Ka e nakai lata ia lautolu ke nimo ko Iehova kua “nakai ni mamao a ia mo tautolu takitokotaha.” Kua uiina e ia a tautolu ke fakatata ki a ia. (Gahua 17:27; Iakopo 4:8) Kua maama foki e ia e matakutaku ha tautolu he hukia, ti mavehe a ia to tu a ia he tapa ha tautolu mo e lagomatai a tautolu. Kua fakamafana he salamo ko Tavita a tautolu: “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.”—Salamo 34:18.
20, 21. (a) Maeke fefe ia tautolu ke iloa kua maeke ia tautolu ke moua e fakafetuiaga tata mo Iehova? (e) Ko e heigoa kua lata ke olioli e fakafetuiaga tata mo Iehova?
20 Ko e kapitiga tata mo Iehova ko e fakafetuiaga aoga lahi kua maeke ia tautolu ke feaki. Ka e maeke moli kia e pipiaga ia? E. Kua fakakite he Tohi Tapu e puhala ne logona he tau tagata tane mo e tau fifine tututonu tata lahi ke he Matua ha tautolu he lagi. Ko e tau talahauaga mafanatia ha lautolu ne fakamau ke foaki ki a tautolu e mauokafua ke maeke foki ia tautolu ke fakatata atu ki a Iehova.—Salamo 23, 34, 139; Ioane 16:27; Roma 15:4.
21 Ko e tau poakiaga a Iehova ma e fakafetuiaga mo ia kua maeke he tau tagata oti. “Iehova na e, ko hai kia ke nofo ke he hāu a fale uta fano?” he huhu e Tavita. “Ko ia kua fano mo e mahani hako, mo e tututonu, kua vagahau foki mo e moli ke he hana loto.” (Salamo 15:1, 2; 25:14) He kitia e tautolu ko e fekafekau ke he Atua kua moua mai e tau fua mitaki mo e moua e tautolu hana takitakiaga mo e puipuiaga, to maeke ia tautolu ke iloa ‘kua fakahele fakalahi a Iehova.’—Iakopo 5:11.
22. Ko e heigoa e vahega fakafetuiaga kua manako a Iehova ke olioli he tau tagata hana?
22 Ko e fakamonuina ha ia ha tautolu kua manako a Iehova ke ha ha ai e fakafetuiaga fakatagata pihia mo e tau tagata nakai mitaki katoatoa! Nakai kia lata mogoia ia tautolu ke fakatata e fakafeheleaki? Mo e lagomatai ha Iehova, igatia a tautolu mo e foaki mo e olioli e fakafeheleaki ne kua fakakite he fakamatakainaga faka-Kerisiano ha tautolu. I lalo he Kautu he Atua, to fakalataha e tau tagata oti he lalolagi ke he fakahele tukulagi nei.
Maeke Nakai a Koe ke Fakamaama?
• Ko e vahega takatakaiaga fefe kua lata ke ha ha he fakapotopotoaga Kerisiano?
• Maeke fefe a tautolu ke foaki ke he fakafeheleaki he fakapotopotoaga?
• Maeke fefe he fakamaloloaga fakamoli ke fakatolomaki e fakafeheleaki faka-Kerisiano?
• Lalago mo e fakamalolo fefe he fakafeheleaki ha Iehova a tautolu?
[Tau Huhu he Fakaakoaga]
[Fakatino he lau 25]
Ko e feofanaki he tau Kerisiano kua fakaata lahi nakai ni ko e kotofaaga hokoia
[Tau Fakatino he lau 26, 27]
Maeke nakai a koe ke ‘fakalahi atu’ e fakahele hau?
[Fakatino he lau 28]
Ko koe nakai kua tuhituhi po ke atihake?