Tau Huhu Mai he Tau Tagata Totou

Fefe e onoonoaga he fakapotopotoaga Kerisiano ke he kai lotokai?

Ne fakahala he Kupu he Atua e konahia mo e kai lotokai ko e mahani kua nakai felauaki mo lautolu ne fekafekau ke he Atua. Ko e mena ia, ko e onoonoaga he fakapotopotoaga Kerisiano ke he tagata kai lotokai pauaki kua tatai ni mo e tagata konahia tumau. Nakai lata e tagata konahia po ke tagata kai lotokai ke fai vala he fakapotopotoaga Kerisiano.

Pehe e Tau Fakatai 23:20, 21: “Ua eke a koe mo taha ia lautolu kua inu lahi ke he uaina; mo lautolu kua kai lotokai ke he maga kakano he tau manu. Ha ko e tagata kua inu lahi ke he uaina, mo e tagata kai lotokai to nonof[o]gati ai a laua; mo ia kua fia mohe mau to tapulu ai a ia ke he tau tapulu mahehe.” Ia Teutaronome 21:20, ne totou e tautolu hagaao ke he tagata “faliuliu to matauka,” ne lata ni ke tamate i lalo he Fakatufono faka-Mose. Hagaao ke he kupu tohi nei, ua e aga ia he tagata totoko mo e nakai liliuina ko e “kai lotokai foki a ia, mo e inu a ia ke konahia.” Maaliali ai, i Isaraela tuai, ko e kai lotokai ne onoono ki ai ko e gahua kua nakai talia ma lautolu ne manako ke fekafekau ke he Atua.

 Ka e, ko e heigoa ne putoia ke he tagata kai lotokai, mo e ko e heigoa ne talahau he Tau Tohiaga Tapu Heleni Kerisiano ke he mataulu nei? Ko e tagata kai lotokai ne kakano “ko e tagata kua lotokai tumau mo e kai aoao mo e inu lahi.” Ti, ko e kai lotokai ko e taha vahega ia he lotokai, ti talahau e Kupu he Atua ki a tautolu ‘ko e tau tagata velevelemena’ ko e tau vahega tagata ka nakai moua e Kautu he Atua. (1 Korinito 6:9, 10; Filipi 3:18, 19; 1 Peteru 4:3) Ke lafi, magaaho ne hataki he aposetolo ko Paulo e tau Kerisiano ke he taute e “tau gahua he tino,” ne totoku e ia e “konahia, ko e tafeauhi, mo e tau mena pihia.” (Kalatia 5:19-21) Kua fa mahani e kai lahi ke putoia e konahia mo e tafeauhi. Laulahi ai, kua putoia moli e kai lotokai ke he talahauaga ha Paulo ke he “tau mena pihia.” Ma e falu “gahua he tino,” ko e Kerisiano ne talahaua he hana kai lotokai mo e ulu uka nakai manako ke hiki hana mahani lotokai kua lata ke utakehe mai he fakapotopotoaga.​—1 Korinito 5:11, 13. *

Pete kua tuku fakalataha he Kupu he Atua e tagata konahia mo e tagata kai lotokai, kua mukamuka e tagata fakamua ke kitia ke he tagata ke uaaki. Ko e tau fakamailoga he konahia kua fa mukamuka ke kitia. Pete ia, ko e fifiliaga ke fakamoli ko e tagata kai lotokai kua uka lahi kakano kua nakai mukamuka ke kitia maaliali. Ko e mena ia, ko e tauteaga ke he tau tutuaga he lekua nei kua lata ke fakaeneene fakalahi mo e manamanatu ke he vala he tau momotua i loto he fakapotopotoaga.

Ma e fakatai, ko e gako ko e fakamailoga he kai lotokai, ka e fa nakai pihia tumau. Ko e taha kua molea e mamafa ha kua liga he gagao. Ko e tau tupuaga fakamagafaoa ka liga lafi ke he gako. Lata foki ia tautolu ke tokaloto ko e gako ko e tuaga he tino, ka e ko e kai lotokai kua mai he loto. Ne kua fakamaama e kupu gako ko e tuaga he lahi mahaki e gako he tino, ka e ko e kai lotokai ko e lotokai po ke hufia lahi. Ti, nakai kitia e kai lotokai he tagata ha kua tino lahi ka e ha ko e hana aga ke he tau mena kai. Pete ko e tagata ne liga tino latalata po ke tino tote kua maeke agaia ke eke mo tagata kai lotokai. Laulahi ai, ko e onoonoaga ke he mamafa po ke tino kaokao mitaki kua kehekehe lahi he taha matakavi ke he taha matakavi.

Ko e heigoa e tau fakamailoga he kai lotokai? Ko e tagata kai lotokai kua fakakite tumau e nakai maeke ke taofi ni, hokotia ke kai ti faguhe ti hoko mogoia ke hagahaga kelea lahi po ke gagao. Ko e nakai maeke hana ke taofi ni kua kitia e nakai fai manamanatuaga pauaki ke he tutuhia ne taute e ia ki a Iehova mo e higoa mitaki he Hana tau tagata. (1 Korinito 10:31) Ke he taha fahi, ko e tagata ne kai lahi he falu magaaho gahoa kua nakai eke pauaki a ia mo ‘tagata velevelemena.’ (Efeso 5:5) Pete ia, ke he hagaaoaga he Kalatia 6:1, ko e Kerisiano pihia kua liga lata ke moua e lagomatai. Ne talahau e Paulo: “Ko e tau matakainaga na e, kaeke ke moua he tagata he taha holifono ko mutolu kua mahani fakalata ke he [a]gaga, kia liuaki mai e mutolu a ia kua pihia mo e loto he mahani molu.”

Ko e ha kua mua atu e aoga e tomatomaaga he Tohi Tapu ke kalo mai he kai lahi he vaha nei? Kakano, mua atu ke he vaha ha tautolu, ne hataki e Iesu: “A mutolu neke pehia ha mutolu a tau loto, he [kai lahi], mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele.” (Luka 21:34, 35) Ko e kalo mai he kai lahi ko e taha vala aoga he fakaheu e puhala moui ke matematekelea fakaagaga.

Ko e mahani fakalatalata ko e mahani mitaki faka-Kerisiano. (1 Timoteo 3:2, 11) Ko e mena ia, to lagomatai moli e Iehova a lautolu oti ne kumi fakamakamaka ke fakagahua e tau hatakiaga he Tohi Tapu hagaao ke he kai fakalatalata mo e tau puhala inu kava.​—Heperu 4:16.

[Matahui Tala]