To Olioli Nakai e Tautolu e Haohao Mitaki Moli?

KO E tau fanau kua fefeua fiafia mo e tau mamatua fakahele ha lautolu​—ko hai kua nakai olioli he onoono ke he fakatataaga pihia? Ko e tau fanau kua logona katoatoa e haohao mitaki he auloa mo e tau mamatua aga leveki. Pete ia, ke he tokologa he tau fuata mui, ko e tau magaaho pihia he fiafia kua lavea ni. Ka e, ko e falu fanau kua tupetupe ke he tau aho oti ko e moua la i fe e lautolu e matakavi ke momohe he po. Fai amaamanakiaga nakai ma e tau fanau pihia ne nakai fai kaina mo e falu tagata ne nonofo mo e nakai haohao mitaki?

Pete kua nakai fai amaamanakiaga e vaha i mua, kua foaki he Kupu he Atua e amaamanakiaga. Kua talahau tuai he perofeta ko Isaia to hoko mai e aho ka nonofo oti he haohao mitaki katoatoa. Ne tohia e ia: “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. Nakai ta fale e lautolu ke nonofo ai e falu, ti nakai to uluvine e lautolu ke kai ai e falu.”​—Isaia 65:21, 22.

Kua fai fakaveaga moli kia e amaamanakiaga nei? Ka e fakakatoatoa ai, ko e kupu “amaamanaki” ne nakai fa fakakite tumau e mauokafua. Ma e fakatai, i Parasili, ne fa logona mau e talahauaga: “A esperança é a última que morre.” Kua kakano, “Ko e amaamanakiaga ko e mena fakahiku ke mate.” Kua hagaao e mena nei kua tokologa e tagata kua fakatumau ke he amaamanaki pete he nakai fai fakaveaga malolo ma e amaamanaki. Pete ia, ko e amaamanakiaga ne fakamatutaki mai he Atua moui ki a tautolu kua kehe. Ne tohia he aposetolo ko Paulo: “To nakai momoko a taha kua falanaki hana tua [ke he Atua].” (Roma 10:11, NW) Ko e tau perofetaaga he Tohi Tapu ne kua fita he fakamoli kua tamai ki a tautolu e mauokafua ko e tau maveheaga oti ne taute e Iehova ko e Atua to hoko moli mai foki. Ka fakakite moli mai e tau maveheaga ia, ko e tau tutuaga ne kua peehi malolo e tau fanau ke nonofo puhala tu to eke mo mena fakamua atu.

Pihia foki ke he vaha nei ko e tomatomaaga aoga ne moua i loto he Tohi Tapu ka lagomatai a lautolu ne nakai fai amaamanakiaga ke fakatolomaki ha lautolu a tau momoui mo e moua e haohao mitaki moli. Maeke fefe e mena ia? Ko e Tau Fakamoli a Iehova he matakavi hau kua fiafia lahi ke lagomatai a koe ke moua e tali ke he huhu nei.