Fakalataha ha ko e Fakaalofa he Atua

HE MAGAAHO ne fakatu e fakapotopotoaga Kerisiano he senetenari fakamua he Vaha Nei ha tautolu, taha he tau fua kelea lahi mahaki—pete e kehekehe e tau tagata i ai—ko e kaufakalatahaaga. Ko e tau tagata tapuaki ia he Atua moli ne o mai he tau motu i Asia, Europa, mo Aferika. Ne hukui e lautolu e tau tupumaiaga kehekehe—tau akoako, tau kautau, tau tupa, tau tagata paea, tau tagata fakafua koloa, tau tagata feua lotomatala, mo e tau tagata pisinisi. Falu ko e tau Iutaia, mo e falu ko e tau Tagata Motu Kehe. Tokologa ia lautolu ko e tau tagata faivao, tau tagata mahani sotoma, tau tagata konahia, tau tagata kaiha, po ke tau tagata fofo mena. Moha ia, he magaaho ne eke a lautolu mo tau Kerisiano, ne toka kehe e lautolu e tau gahua kelea ha lautolu mo e fakalataha fetataaki ke he tua.

Ko e heigoa ne fakamalolo e faka-Kerisiano he senetenari fakamua ke fakapotopoto mai e tau tagata oti nei ke he kaufakalatahaaga? Ko e ha ne mafola a lautolu ko e taha ke he taha ti pihia mo e tau tagata oti? Ko e ha ne nakai matutaki a lautolu ke he tau totokoaga mo e taufetoko? Ko e ha e faka-Kerisiano fakamua atu kua kehe lahi mai he tau lotu lalahi he vaha nei?

Ko e Heigoa ne Fakalataha Auloa e Tau Tagata he Fakapotopotoaga?

Ko e puhala mua ue atu ne fakalataha e tau matakainaga talitonu he senetenari fakamua ko e fakaalofa he Atua. Ne mailoga he tau Kerisiano ia e matapatu gahua ha lautolu ke fakaalofa  ke he Atua moli, ko Iehova, mo e tau loto, solu, mo e tau manatu katoa ha lautolu. Tuga anei, ko e aposetolo ko Peteru, ko e Iuta, ne hataki ke fina atu ke he fale he tagata motu kehe ne nakai aga mau a ia ke feoaki fakalataha ai. Ko e mena kua omoi a ia ke omaoma ne fakamatapatu he fakaalofa ma Iehova. Ko Peteru mo e falu he tau Kerisiano fakamua atu ne olioli e fakafetuiaga tata mo e Atua ne fakave ke he iloilo tonu he Hana aga, tau mena ne loto ki ai, mo e tau mena ne nakai loto ki ai. Fai magaaho, ne maama he tau tagata tapuaki oti ko e finagalo ha Iehova ma lautolu ke ‘fakalataha ke he loto taha mo e manatu taha.’—1 Korinito 1:10; Mataio 22:37; Gahua 10:1-35.

Ko e tau matakainaga talitonu ne fetataaki lahi ha ko e ha lautolu a tua ia Iesu Keriso. Ne manako a lautolu ke mumui fakatata ke he tau tuagahui hana. Ne poaki a ia ki a lautolu: “Kia feofanaki a mutolu; tuga he fakaalofa atu au kia mutolu, . . . Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Ko e mena nei, nakai ko e logonaaga potake, ka ko e fakaalofa foaki fakatagata. Ko e heigoa mogoia e fua? Ne liogi a Iesu hagaao ki a lautolu kua tua ki a ia: “Haku a liogi . . . kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe, kia taha a lautolu ki loto ia taua.”—Ioane 17:20, 21; 1 Peteru 2:21.

Ne liligi e Iehova hana a agaga tapu, po ke malolo gahuahua, ki luga he tau fekafekau moli hana. Ne fakatupu ki mua he agaga nei e kaufakalatahaaga ha lautolu. Ne hafagi ki a lautolu e maamaaga he tau fakaakoaga he Tohi Tapu ne kua talia he tau fakapotopotoaga oti kana. Ne fakamatala he tau tagata tapuaki ha Iehova e fekau taha ia—ko e fakatapuaga he higoa a Iehova puhala he Kautu faka-Mesia he Atua, ko e fakatufono he lagi ka pule ke he tau tagata oti kana. Ne maama he tau Kerisiano fakamua atu e matagahua ha lautolu ke ‘nakai fai vala he lalolagi nei.’ Ti, ka ha ha ai e tau totokoaga fakamatakau po ke taufetoko fakakautau, ne fakatumau ni e tau Kerisiano ke tu uho. Ne tutuli e lautolu e mafola mo e tau tagata oti.—Ioane 14:26; 18:36; Mataio 6:9, 10; Gahua 2:1-4; Roma 12:17-21.

Ne maama oti he tau matakainaga talitonu e matagahua ha lautolu ke fakatupu e kaufakalatahaaga. Fefe? He iloa moli ko e mahani ha lautolu kua lautatai mo e Tohi Tapu. Ti, tohi ai he aposetolo ko Paulo ke he tau Kerisiano: “Kia tuku kehe e mutolu e tagata tuai ke he tau mena ne mahani ai a mutolu i tuai,” mo e “tapulu a mutolu ke he tagata fou.”—Efeso 4:22-32.

Fakatumau e Kaufakalataha

Moli, ko e tau matakainaga talitonu he senetenari fakamua mena nakai mitaki katoatoa, mo e tau tutuaga ne tutupu kua paleko e kaufakalatahaaga ha lautolu. Ma e fakatai, kua talahau he Gahua 6:1-6 e fekehekeheaki ne tupu he vahaloto he tau Kerisiano Iutaia ne vagahau Heleni mo lautolu ne vagahau Heperu. Ko lautolu ne vagahau Heleni ne logona hifo kua onoono hifo ki a lautolu. Ko e magaaho ne fakailoa e matakupu ke he tau aposetolo, ne fakamafola ai fakamafiti mo e fakahako. Fakahiku, ko e huhu he fakaakoaga ne takitaki ke he taufetoko hagaao ke he tau matagahua ha lautolu ne nakai ko e tau Iutaia i loto he fakapotopotoaga Kerisiano. Ko e fifiliaga ne taute fakave ke he tau matapatu fakaakoaga he Tohi Tapu, ti ko e fifiliaga nei nukua talia auloa ai.—Gahua 15:1-29.

Kua fakakite he tau fakataiaga nei ko e mena nakai takitaki atu e tau taufetoko ke he tau feveheveheaki fakamotu po ke nakai kaufakalataha e tau fakaakoaga he fakapotopotoaga Kerisiano ke he senetenari fakamua. Nakai pihia he ha? Ha ko e tau puhala kaufakalataha—ko e fakaalofa ma Iehova, tua ia Iesu Keriso, fakaalofa  foaki fakatagata ke he taha mo e taha, talia e takitakiaga he agaga tapu, ko e maamaaga mahani mau he tau fakaakoaga he Tohi Tapu, mo e mautali ke hiki e mahani he tagata—ne malolo lahi ke fakatumau e fakapotopotoaga fakamua atu ke fakalataha mo e mafola.

Tapuaki Fakalataha he Tau Vaha Fou Nei

Maeke nakai e kaufakalatahaaga ke moua ke he puhala taha ia he vaha nei? Maeke agaia nakai e tau puhala taha nei ke fakapotopoto auloa e tau tagata he tua ti fakamalolo a lautolu ke mafola mo e tau tagata oti he tau fahi oti he lalolagi? E, maeke ia lautolu! Kua kaufakalataha e Tau Fakamoli a Iehova he fakamatakainaga he lalolagi katoa ke hokotia atu ke molea e 230 e tau motu, tau aelani, mo e tau maagamotu. Ti fakalataha a lautolu he tau puhala taha ne fakalataha aki e tau Kerisiano he senetenari fakamua atu.

Mua atu e olioli ke he kaufakalatahaaga he Tau Fakamoli a Iehova ko e fakamoli ha lautolu ki a Iehova ko e Atua. Kakano he mena nei kua tutuli a lautolu ke mahani fakamoli ki a ia i lalo he tau tutuaga oti. Kua fakagahuahua foki he Tau Fakamoli a Iehova e tua ia Iesu Keriso mo e hana tau fakaakoaga. Kua fakakite he tau Kerisiano nei e fakaalofa foaki fakatagata ma e tau matakainaga talitonu mo e fakamatala e tala mitaki taha nei he Kautu he Atua ke he tau motu oti kana ne gahua malolo ai a lautolu. Kua fiafia a lautolu ke tutala hagaao ke he Kautu nei mo e tau tagata he tau lotu, tau faoa, tau motu, mo e tau matakau fakalataha oti. Kua fakatumau foki e Tau Fakamoli a Iehova ke tu uho he tau mena he lalolagi, nukua lagomatai a lautolu ke fakauka ke he tau peehiaga fakapolitika, aga fakamotu, fakalatahaaga, mo e fakatupe ne kua lekua lahi e tau tagata i ai. Kua talia he Tau Fakamoli oti e matagahua ha lautolu ke fakatupu e kaufakalatahaaga he mahani a lautolu fakalautatai mo e tau tutuaga he Tohi Tapu.

Futiaki he Kaufakalataha e Falu

Kua fa mahani e kaufakalatahaaga nei ke fakatupu e fiafia he tau tagata ne nakai ko e Tau Fakamoli. Ko Ilse, * ke fakatai, ne eke mo taupou pope Katolika he taha magahala he fale pope i Sihamani. Ko e heigoa ne futiaki a ia ke he Tau Fakamoli a Iehova? Pehe a Ilse: “Ko e tau tagata mitaki lahi mahaki a lautolu ne feleveia laia e au. Nakai o a lautolu ke he tau; nakai fai mena ne taute e lautolu ke fakahagahagakelea ha tagata. Manako a lautolu ke lagomatai e tau tagata ke momoui fiafia he lalolagi parataiso i lalo he Kautu he Atua.”

Ti ha ha ai a Günther, ko e kautau Sihamani ne fano ki Falani he felakutaki ke uaaki he lalolagi. Taha e aho ne taute he akoako Porotesano e tapuakiaga fakalotu ma e tau kautau he poko ha Günther. Ne liogi e akoako ma e tau monuina, puipuiaga, mo e kautuaga. He oti e liogi, ne tu a Günther ke he matagahua hana ko e tagata toko. Puhala he hulu hana, ne mailoga e ia e tau matakautau fi he taha fahi he male tau kua fakahoko foki e tapuakiaga ne taute he akoako. Ne talahau e Günther he magaaho fakamui: “Liga kua liogi foki e akoako ia ma e tau monuina, puipuiaga, mo e kautuaga. Ne manamanatu au ke he mena kua maeke he tau lotu Kerisiano ke kau ke he fahi totoko he felakutaki taha ia.” Ko e tau muituaaga nei ne pite ke he manamanatuaga ha Günther. He magaaho fakamui ne matutaki a ia mo e Tau Fakamoli a Iehova, ne nakai putoia ke he tau, ne eke a Günther mo vala he fakamatakainaga ha lautolu he lalolagi katoa.

Ko Ashok mo Feema ne o he lotu he Fahi Uta. He kaina ha lautolu, ha ha ai e poko tapuaki ke he atua. He magaaho ne lauia e magafaoa ha laua ke he gagao kelea lahi mahaki, ne liu a laua kumikumi foki e lotu ha laua. He tau fakatutalaaga mo e Tau Fakamoli a Iehova, ne nava lahi a Ashok mo Feema ha ko e tau fakaakoaga he Tohi Tapu mo e ha ko e fakaalofa ne ha ha he Tau Fakamoli. Ko e mogonei ko e tau tagata fakailoa makai lahi he tala mitaki he Kautu a Iehova.

Ko Ilse, Günther, Ashok, mo Feema kua fakalataha mo e toko miliona he Tau Fakamoli a Iehova he fakamatakainaga he lalolagi katoa. Kua talitonu a lautolu ke he maveheaga he Tohi Tapu ko e tau puhala taha ia ne fakalataha a lautolu ke he tapuakiaga he vaha nei ka nakai leva ti fakalataha e tau tagata omaoma oti kana. Ti, to nakai liu fai tamateaga, nakai kaufakalataha, mo e feveheveheaki ha ko e higoa he lotu. To fakalataha e lalolagi katoa ke he tapuakiaga ke he Atua moli, ko Iehova.—Fakakiteaga 21:4, 5.

[Matahui Tala]

[Tau Fakatino he lau 4, 5]

Pete he o mai he tau tupumaiaga kehekehe, ne fakalataha e tau Kerisiano fakamua atu