Kua Moui e Kupu ha Iehova

Tau Fakamaamaaga Mai he Tohi he Tau Fakafili

TALI fefe a Iehova he magaaho ne hagatua e tau tagata hana ki a ia mo e kamata ke tapuaki e tau atua fakavai? Ka e kua kaeke kaumahala tumau a lautolu mo e ui lagomatai ni ki a ia he magaaho ka matematekelea a lautolu? Foaki nakai e Iehova e fakahaoaga ma lautolu pete he pihia? Kua tali he tohi he Tau Fakafili e tau mena nei mo e falu huhu aoga lahi. Ne fakaoti ai he perofeta ko Samuela he kavi he 1100 F.V.N., ne putoia e tau mena tutupu he kavi ke he 330 e tau tau—tali mai he mate ha Iosua ke he fakatuaga he patuiki fakamua ha Isaraela.

Ha ko e vala malolo lahi mahaki he kupu, po ke fekau he Atua, ko e tohi he Tau Fakafili kua aoga lahi ki a tautolu. (Heperu 4:12) Ko e tau tala omoomoi i loto kua fakamaama mai ki a tautolu e aga he Atua. Ko e tau fakaakoaga ne ako e tautolu mai he tau mena ia kua fakamalolo e tua ha tautolu mo e lagomatai a tautolu ke toto mau ke he ‘moui moli,’ ko e moui tukulagi he lalolagi fou ne mavehe he Atua. (1 Timoteo 6:12, 19; 2 Peteru 3:13) Ko e tau gahua fakamoui ne taute e Iehova ke lata ma e tau tagata hana kua foaki mai e ata he fakahaoaga mua ue atu ka puhala mai he Tama hana, ko Iesu Keriso he vaha anoiha.

KO E HA NE LATA E TAU FAKAFILI?

(Tau Fakafili 1:1–3:6)

He mole e fakakaumahala ke he tau patuiki he motu ko Kanana i lalo hifo he takitakiaga ha Iosua, ko e tau magafaoa takitaha ha Isaraela ne o ai ke he ha lautolu a tufaaga mo e fofo e motu. Pete ia, ne kaumahala e tau Isaraela ke vega e tau tagata he motu. Ko e kaumahalaaga nei kua eke mo matahele moli ma Isaraela.

Ko e atuhau he mole e vaha a Iosua ‘ne nakai iloa a Iehova po ke gahua ne taute e ia ma Isaraela.’ (Tau Fakafili 2:10) Lafi ki ai, ne holo atu e tau tagata ke kau mo e tau Kanana mo e ke fekafekau ke he tau atua ha lautolu. Ti tuku age e Iehova e tau Isaraela ke he tau lima he tau fi ha lautolu. Magaaho ne kelea lahi e totokoaga, ne kumi lagomatai e fanau Isaraela ke he Atua moli. He magahala nei ko e fakalotu, fakalatahaaga, mo e fakapolitika kua hane kitia fakahaga e tala ati fakatutu e Iehova e tau fakafili ke fakahao hana tau tagata mai he tau fi ha lautolu.

Tali he Tau Huhu Faka-Tohiaga Tapu:

1:2, 4—Ko e ha ne fifili a Iuta mo magafaoa fakamua ke moua e fonua ne kotofa ki ai? Mahani ai, ko e kotofaaga nei kua liga moua he magafaoa ha Reupena, ko e tama uluaki ha Iakopo. Ka e he perofetaaga hana he teitei mate, ne talahau tuai e Iakopo ko Reupena to nakai kautu he fakatikai e tonuhia hana ko e uluaki. Ko Simeona mo Levi, ne favale, ne nonofo fano i Isaraela. (Kenese 49:3-5, 7) Ti, ko ia ne tatao hake ko Iuta, ko e tama ke faaki ha Iakopo. Ko Simeona, ne o hake ai mo Iuta, ne moua he tau vala fonua ikiiki ne toka fano he matakavi lahi ha Iuta. *—Iosua 19:9.

1:6, 7—Ko e ha ne hio kehe e tau matalima motua mo e tau matahui motua he tau patuiki ne kaumahala? Ko e tagata ne nakai fai matalima motua mo e tau matahui motua kua nakai fahia moli ke tau. He nakai fai matalima motua, to maeke fefe e kautau ke toto e pelu po ke tao? Ti ko e fua he mamutumutu e tau matahui motua to liga nakai maeke e tagata ke lagotatai ka tu.

Tau Fakaakoaga ma Tautolu:

2:10-12. Kua latatonu ia tautolu ke fai fakaholoaga fakaako Tohi Tapu tumau ke ‘ua nimo e tau gahua ha Iehova.’ (Salamo 103:2) Lata e tau mamatua ke fakataogo hifo e moli he Kupu he Atua ke he tau loto he tau fanau ha lautolu.—Teutaronome 6:6-9.

2:14, 21, 22. Fai kakano ne fakaata e Iehova e tau mena kelea ke tutupu ke he tau tagata nakai omaoma hana—ke fakamea a lautolu, ke hakahaka a lautolu, mo e ke omoomoi a lautolu ke liliu age ki a ia.

 FAKATU HAKE E IEHOVA E TAU FAKAFILI

(Tau Fakafili 3:7–16:31)

Ko e tala omoomoi ke he tau gahua he tau fakafili ne kamata he magaaho ne fakaoti e Otinielu e valu e tau tau ne kaumahala a Isaraela ke he patuiki ha Mesopotamia. He fakaaoga e fakaholoaga loto malolo, ne tamate he Fakafili ko Ehuta a Ekelona, ko e patuiki gako ha Moapi. Ko e toa ko Samekara ne keli tokotaha toko 600 e tau Filisitia he fakaaoga e huki povi. Mo e he fakamaloloaga mai ia Tapora, ne fekafekau ko e perofeta fifine, mo e he lalagoaga ha Iehova, ko Parako mo e hana tau kautau ne gahoa e tau kanavaakau ne fakakaumahala hogofulu e afe he kautau malolo ha Sisera. Ne fakatu hake e Iehova a Kiteona mo e foaki ki a ia mo e hana tau tagata toko 300 e kautuaga ke he tau Mitiana.

Puhala ia Iefeta, ne laveaki e Iehova a Isaraela mai he tau Amoni. Ko Tulaga, Iairo, Ivisona, Elona, mo Avatonu ko lautolu foki ia he toko 12 ne fakafili a Isaraela. Ne fakaoti e vaha he tau Fakafili ia Samisoni, ko ia ne tau ke he tau Filisitia.

Tali he Tau Huhu Faka-Tohiaga Tapu:

4:8—Ko e ha ne fakamakamaka a Parako ke fano e perofeta fifine ko Tapora mo ia ke he male tau? Maaliali ai, ne logona e Parako kua nakai fahia a ia ke fano ke totoko tokotaha e kautau a Sisera. Ka ha ha e perofeta fifine mo ia to mauokafua a ia mo e hana tau tagata kua ha ha ia lautolu e takitakiaga he Atua mo e to foaki ki a lautolu e mafanatia. Ko e fakamakamaka ha Parako ke fano a Tapora mo ia, mogoia, ne nakai ko e fakakiteaga he lolelole ka ko e malolo he tua.

5:20—Ne latau fefe e tau fetu mai he lagi ke lata mo Parako? Ne nakai talahau he Tohi Tapu po kua putoia nakai e lagomatai fakaagelu ke he mena nei, ko e tau valavala maka kikila ne mokulu mai he lagi ne talahau fakataulatua he tau taulatua ha Sisera, po ke kua fakavai e tau fuafuaaga ke he tau aolagi ne tala age ki a Sisera. Nakai fakauaua ai mogoia, ne fai lalagoaga faka-Atua.

7:1-3; 8:10—Ko e ha ne pehe a Iehova kua tokologa lahi e 32,000 tagata ha Kiteona ke totoko e tau fi malolo toko 135,000? Kakano ha ko Iehova ka foaki e kautuaga ki a Kiteona mo e hana a kau. Ne nakai manako e Atua ke manamanatu a lautolu kua fakakaumahala e lautolu a Mitiana ha ko e malolo ni ha lautolu.

11:30, 31—He taute e omonuo hana, ne tokaloto kia e Iefeta ke poa taha tagata? Ko e manatu pihia kua mamao ligo he manamanatuaga a Iefeta, ha kua fakave he Fakatufono: “Aua neke kitia ia koe taha kua fakafano age hana tama tane po ke hana tama fifine ki loto he afi.” (Teutaronome 18:10) Ka e, ne tokaloto e Iefeta e tagata ka e nakai ko e manu. Ko e tau manu ne felauaki mo taute poa ne nakai fa mahani ke toka i loto he tau kaina he tau Isaraela. Mo e kua nakai ko e mena kehe lahi ke poa taha manu. Ne fita e mailoga e Iefeta ko ia ka hau he kaina hana ke fonofono a ia ne liga ko e tama fifine hana. Ko ia hanei ka foaki mo “poa huhunu” kakano ko e tagata ia to fekafekau katoatoa fakamoli ki a Iehova he faituga.

Tau Fakaakoaga ma Tautolu:

3:10. Ko e kautu he tutuli ke he tau mena fakaagaga kua uta ni, nakai ke he pulotu fakatagata, ka e he agaga ha Iehova.—Salamo 127:1.

3:21. Ne fakaaoga fakamakaka mo e fakamalolo e Ehuta e pelu hana. Kua latatonu ia tautolu ke moua e puhala ke fakaaoga fakamakaka e “pelu he [a]gaga ko e kupu he Atua.” Kakano e mena nei ke fakaaoga fakamalolo e tautolu e tau Tohiaga Tapu he fekafekauaga ha tautolu.—Efeso 6:17; 2 Timoteo 2:15.

6:11-15; 8:1-3, 22, 23. Kua fakaako mai he mahani fakatokolalo ha Kiteona tolu e fakaakoaga aoga ma tautolu:(1) Ka tuku mai e kotofaaga he fekafekauaga ki a tautolu, kua lata ia tautolu ke manamanatu ke he matagahua ne fakave ki ai ka e nakai takele ke he talahaua po ke tuaga tokoluga ne liga fakapiki ki ai. (2) Ka fehagai mo lautolu ne hihiga ke taufetoko, ko e fakakiteaga he pulotu ka mahani fakatokolalo. (3) Puipui he mahani fakatokolalo a tautolu mai he foli tuaga tokoluga.

6:17-22, 36-40. Kua lata foki ia tautolu ke fakaeneene mo e “aua neke talia e tau agaga oti kana.” Ka e, lata ia tautolu ke “kamatamata e tau agaga po ke mai he Atua a lautolu.” (1 Ioane 4:1) He mauokafua ko e fakatonuaga kua amanaki a ia ke foaki kua fakave malolo ke he Kupu he Atua, kua pulotu ma e motua Kerisiano fou ke tutala ke he motua kua iloa lahi ki ai.

6:25-27. Ne fakailoilo a Kiteona ke nakai fakaita teao e tau tagata totoko hana. Ka fakamatala e tala mitaki, kua lata ia tautolu ke fakaeneene ke nakai fakaita teao e falu ke he puhala vagahau ha tautolu.

 7:6. Ka hoko ke he fekafekauaga ki a Iehova, kua lata ia tautolu ke tuga e tau tagata ne 300 ha Kiteona—mataala mo e mautali.

9:8-15. Kua goagoa ha ke fakatokoluga mo e fakafualoto ke foli tuaga po ke pule!

11:35-37. Ko e fakafifitakiaga mitaki ha Iefeta kua nakai fakauaua ko e fakaohoohoaga mitaki he lagomatai e tama fifine hana ke feaki e tua malolo mo e agaga foaki fakatagata. Maeke he tau mamatua he vaha nei ke fakatoka e fakafifitakiaga mitaki pihia ma e tau fanau ha lautolu.

11:40. Ko e nava ke he taha tagata ne fakakite e agaga fakamakai ke he fekafekauaga ha Iehova kua fakamalolo ke he tagata ia.

13:8. He fakaako e tau fanau ha lautolu, kua lata e tau mamatua ke liogi ki a Iehova ma e takitakiaga mo e muitua ke he hana tau puhala.—2 Timoteo 3:16.

14:16, 17; 16:16. Maeke e fakaohooho he tagi mo e fakafi ke ulu moumou e fakafetuiaga.—Tau Fakatai 19:13; 21:19.

FALU AGAHALA I ISARAELA

(Tau Fakafili 17:1–21:25)

Ko e vala fakahiku he tohi he Tau Fakafili ne toka ai ua e tala kua mua atu e kehe. Ko e tala fakamua ne hagaao ke he tagata ne higoa ko Mika, ne fakatu e tupua talaga he fale hana ti taute e tagata Levi mo ekepoa hana. He mole e moumou e maaga ko Laisa, po ko Lesema, ne talaga he tau Tano e maaga ma lautolu ti fakahigoa ko Tano. He fakaaoga e tupua ha Mika mo e ekepoa hana, ne fakatu e lautolu taha vahega tapuaki foki i Tano. Maaliali ai, ne fofo a Laisa ato mate a Iosua.—Iosua 19:47.

Ko e mena ke uaaki ne tupu ai he nakaila leva e mate ha Iosua. Ko e kolokolovao muitui he mahani fakatane mo e fifine he falu tagata tane he maaga a Peniamina ko Kipea ne takitaki ke teitei tafi kehe e magafaoa katoa ha Peniamina—toko 600 ni e tagata tane ne hao. Pete ia, ne taute e fakaholoaga ke fakaata a lautolu ke faihoana, ti malikiti e numera ha lautolu ke teitei 60,000 he tau tagata tau he magahala ne pule ai a Tavita.—1 Nofoaga he Tau Patuiki 7:6-11.

Tali he Tau Huhu Faka-Tohiaga Tapu:

17:6; 21:25—Kaeke “takitaha e tagata mo e eke e tau mena kua tonu ke he hana ni a manatu,” fakatupu kia he mena nei e miha? Nakai lata ke pihia, ne loga e tau foakiaga ne age e Iehova ke takitaki aki hana tau tagata. Ne age e ia e Fakatufono mo e fakatokaaga ekepoa ke fakaako aki a lautolu ke he hana puhala. Puhala he Urima mo e Tumima, kua maeke e ekepoa ne mua ke kumi ke he Atua ma e tau mena kua aoga. (Esoto 28:30) Ko e tau maaga oti ne ha ha ai foki e tau patu ne maeke ke foaki e tau fakatonuaga hako. Ka fakaata he tagata Isaraela a ia ma e tau foakiaga nei, nukua moua e ia e takitakiaga hako ma e manamanatuaga hana. He taute e ia e “mena kua tonu ke he hana ni a manatu” ke he puhala nei kua moua e tau fua mitaki. Ke he taha fahi, ka fakaheu he tagata e Fakatufono mo e taute ni e ia hana tau fifiliaga hagaao ke he mahani mo e tapuakiaga, nukua kelea e fakahikuaga.

20:17-48—Ko e ha ne fakaata e Iehova e tau tagata Peniamina ke lagaua e fakakaumahala he falu magafaoa, pete kua lata a lautolu ke fakahala? He fakaata fakamua e tau magafaoa tua fakamoli ke matematekelea lahi, ne kamatamata e Iehova e mauokafua ha lautolu ke utakehe aki e kelea i Isaraela.

Tau Fakaakoaga ma Tautolu:

19:14, 15. He nakai fakamakai e tau tagata i Kipea ke fakamokoi kua fakakite ai e kaumahala he tau mahani mitaki. Kua tomatoma ke he tau Kerisiano “kia fakamalolo ke [“fakamokoi,” NW].”—Roma 12:13.

Ko e Fakahaoaga i Mua

Nakai leva mogonei, ko e Kautu he Atua ha ha he tau lima ha Iesu Keriso ka fakaotioti e lalolagi kelea mo e foaki e fakahaoaga lahi mahaki ma e tau tagata tututonu mo lautolu kua katoatoa e mitaki. (Tau Fakatai 2:21, 22; Tanielu 2:44) ‘Ko e tau fi oti kana ha Iehova to mahaikava, kia tuga ne la a lautolu ka fina atu a ia mo e malolo.’ (Tau Fakafili 5:31) Kia fakamoli a tautolu ko tautolu falu kua fakaalofa ki a Iehova he fakaaoga e tau mena kua ako e tautolu mai he tohi he Tau Fakafili.

Ko e matapatu kupu moli ne fakatata lagaloga he tala he tau Fakafili hanei: Ko e omaoma ki a Iehova kua takitaki ke he tau monuina loga, ko e liuliu ke he matematekelea lahi. (Teutaronome 11:26-28) Kua aoga lahi ha ia ke ‘omaoma mai he loto’ ke he finagalo he Atua nukua fakakite mai!—Roma 6:17; 1 Ioane 2:17.

[Matahui Tala]