Tutuli e “Penina Fakafua Lahi” he Vaha Nei
Tutuli e “Penina Fakafua Lahi” he Vaha Nei
“To fakamatala atu foki e tala mitaki nai he kautu ke he lalolagi oti, ke eke mo talahau.”—MATAIO 24:14.
1, 2. (a) Fefe e logonaaga he tau Iutaia he vaha ha Iesu hagaao ke he Kautu he Atua? (e) Ko e heigoa ne taute e Iesu ke foaki e maamaaga tonu he Kautu, ti ko e heigoa e tau fua?
KO E Kautu he Atua e mataulu tala ne fiafia lahi mahaki ki ai e tau Iutaia he magaaho ne hau a Iesu ke he lalolagi. (Mataio 3:1, 2; 4:23-25; Ioane 1:49) Ka e fakamua, tokologa ia lautolu ne nakai maama katoatoa e laulahi mo e pule i ai; po ke nakai maama e lautolu to eke ai mo fakatufono he lagi. (Ioane 3:1-5) Ha ha i ai foki a lautolu nukua eke mo tau tutaki ha Iesu ne nakai maama katoatoa e kakano he Kautu he Atua po ke mena ka taute e lautolu ke moua e monuina he eke mo tau pule fakalataha mo Keriso.—Mataio 20:20-22; Luka 19:11; Gahua 1:6.
2 Ne fai magaaho he mole, ne fakaako fakatekiteki e Iesu hana tau tutaki ke he loga e tau fakaakoaga, putoia e fakatai he penina fakafua lahi ne tutala e vala tala fakamua ki ai, he fakakite ki a lautolu e aoga he eketaha a lautolu ke tutuli e Kautu he lagi. (Mataio 6:33; 13:45, 46; Luka 13:23, 24) Kua maeke e mena nei ke amotia lahi e tau loto ha lautolu ha kua nakai leva ti eke a lautolu mo tau tagata fakapuloa malolo mo e nakai mategugu he tala mitaki he Kautu ke he tau kalakala mamao he lalolagi, ne kua fakamoli lahi pihia he tohi ha Gahua.—Gahua 1:8; Kolose 1:23.
3. Hagaao ke he vaha ha tautolu, ko e heigoa ne talahau e Iesu hagaao ke he Kautu?
3 Ka e kua mogoia e vaha nei? Ko e tau monuina he parataiso he lalolagi i lalo he Kautu nukua fakatoka mai ke he tau tagata tokologa. He perofetaaga lahi hana hagaao ke he “fakaotiaga he lalolagi,” ne talahau fakahako e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:3, 14; Mareko 13:10) Ne fakamaama foki e ia ko e gahua makimaki nei to taute pete ne tau fakalavelave mo e tau paleko lalahi, mo e favaleaga foki. Pete ia, ne foaki e ia e maveheaga nei: “Ko ia ke tumau ato hoko ke he fakaotiaga, to fakamoui na ia.” (Mataio 24:9-13) Ko e tau mena oti nei kua lata mo e puhala foaki fakatagata mo e tukuleleaga ne fakakite he tagata fakafua koloa he fakatai ha Iesu. Fai tagata nakai he vaha nei kua fakatata e tua mo e makai pihia he tutuli e Kautu?
Ko e Olioli he Moua e Kupu Moli
4. Ko e heigoa e lauiaaga he kupu moli he Kautu ne ha ha ke he tau tagata he vaha nei?
4 Ko e tagata fakafua koloa he fakatai ha Iesu ne molea e olioli he magaaho ne moua e ia e mena ne mailoga e ia ko e “penina fakafua lahi.” Kua omoi he olioli ia a ia ke taute e tau mena oti ke he malolo hana ke moua e penina. (Heperu 12:1) He vaha nei, ko e kupu moli hagaao ke he Atua mo e hana Kautu kua futia mo e fakalagalaga pihia e tau tagata. Kua fakamanatu he mena nei e tau talahauaga ha Matakainaga A. H. Macmillan, ne tohi hagaao ke he kumikumi fakatagata hana ma e Atua mo e Hana finagalo ma e tau tagata, ke he tohi Faith on the March. Pehe a ia: “Moua e au tokologa e tau tagata hane kumi agaia he tau tau takitaha. Ti ko e tau tagata tuga ni a koe mo au, ha kua o mai a lautolu he tau motu oti kana, tau lanu, tau puhala momoui mo e kehekehe e tau tau he moui. Nakai fili tagata e kupu moli. Kua futia e tau vahega tagata oti kana.”
5. Ko e heigoa e tau fua mitaki ne kitia he hokotaki he tau he fekafekauaga he 2004?
5 Ko e moli he tau kupu ia kua kitia ai ke he tau tau takitaha ne totou teau afe he tau tagata loto fakamoli ne omoi he tala mitaki he Kautu he Atua ke tukulele e tau momoui ha lautolu ki a Iehova mo e ke taute hana finagalo. Ko e tau he fekafekauaga he 2004, ne mai ia Sepetema 2003 ke he Aokuso 2004, ne nakai fai kehe. He 12 e mahina ia, 262,416 e tagata ne fakamailoga ke he moto tagata e tukuleleaga ha lautolu ki a Iehova he papatiso ke he vai. Kua hoko e mena nei ke he 235 e motu, ne kua taute he Tau Fakamoli a Iehova 6,085,387 e fakaakoaga Tohi Tapu he kaina he tau fahi tapu takitaha ke maeke ke lagomatai e tau tagata mai he tau puhala moui oti mo e mai he tau motu, tau magafaoa, mo e tau vagahau loga ke uta e kupu moli foaki moui mai he Kupu he Atua.—Fakakiteaga 7:9.
6. Ko e heigoa e tau talahauaga ne malikiti mitaki ki mua ke he tau tau?
6 Ko e heigoa ne maeke ai e tau mena oti nei? Nakai fakauaua ai kua futia e Iehova ki a ia a lautolu nei kua latatonu. (Ioane 6:65; Gahua 13:48) Pete ia, he nakai fakateaga e tau laliaga malolo mo e nakai lotokai he vala ha lautolu kua foaki ne lautolu ke tutuli e Kautu. He 79 e tau he moui, ne tohi e Matakainaga Macmillan: “Ko e kitiaaga fakamua haku ke he tau maveheaga ne fakatoka mai ke he tau tagata gagao mo e mamate ko e amaamanakiaga haku ke he fekau ne fakakite he Tohi Tapu kua nakai galo. Mogo tonu ia ne fifili au ke kumi fakalahi hagaao ke he mena ne fakaako he Tohi Tapu ke liga maeke au ke lagomatai e falu ke tuga au ke kumi e iloilo hagaao ke he Atua Mua Ue Atu, ko Iehova, mo e tau amaamanakiaga mitaki hana ke he tau tagata.”
7. Ko e heigoa e mena tupu ne fakatai ke he olioli mo e makutu ha lautolu ne moua e kupu moli he Tohi Tapu?
7 Ko e fakamakai ia kua kitia foki ke he tau fekafekau a Iehova he vaha nei. Tuga ma e fakatai, ko Daniela mai i Vienna, Auseturia. Pehe a ia: “Tali mai he tote au, ko e Atua e kapitiga mitaki lahi haku. Ne manako tumau au ke iloa hana higoa kakano ki a au kua tonutika e ‘Atua.’ Ka e leo au ato 17 e tau he moui, magaaho ia ne o mai laia e Tau Fakamoli a Iehova ke he gutuhala haku. Ne fakamaama e lautolu e tau mena oti ne manako au ke iloa hagaao ke he Atua. Ne moua agataha e au e kupu moli, nukua homo ue atu! Ne fiafia lahi au ha kua kamata au ke fakamatala ke he tau tagata oti.” Ko e fakafeleveia hakahakau hana ne nakai leva ti vaiga mogoia he tau kapitiga aoga hana. “Ma haku, kua tuga e kitia e perofetaaga he Tohi Tapu nukua fakamoli,” he matutaki e Daniela, “ha kua ako e au na pehe a Iesu to vihiatia mo e favale ke he tau tutaki hana ha ko e higoa hana. Kua fiafia lahi mo e ofoofogia au.” Nakai leva, ne tukulele e Daniela hana moui ki a Iehova, ne papatiso, mo e kamata ke tutuli e foliaga he gahua misionare. He mole e mau hana, ne taute e Daniela mo e tane hana, ko Helmut e gahua fakamatala ke he tau tagata Aferika, Filipino, Saina mo e tau tagata Initia i Vienna. Kua gahua a Daniela mo Helmut mogonei ko e tau misionare ke he fahi toga ki lalo ha Aferika.
Nakai Mahala a Lautolu
8. Ko e heigoa taha puhala monuina ne kua fakatata he tokologa ha lautolu a fakaalofa ke he Atua mo e fakamoli ke he Kautu hana?
8 Moli, ko e gahua misionare ko e taha he tau puhala kua fakatata he tau tagata ha Iehova he vaha nei e fakaalofa ha lautolu ke he Atua mo e fakamoli ha lautolu ke he Kautu hana. Tuga e tagata fakafua koloa he fakatai ha Iesu, ko lautolu ne taute e gahua nei kua makau ke fenoga atu ke he tau matakavi mamao ke lata mo e Kautu. Moli, ko e tau misionare nei kua nakai fenoga ke kumi e tala mitaki he Kautu; kua uta ai e lautolu ke he tau tagata ne nonofo he tau kalakala mamao he lalolagi, he fakaako mo e lagomatai a lautolu ke eke mo tau tutaki ha Iesu Keriso. (Mataio 28:19, 20) He tau motu loga, kua fakauka a lautolu ke he tau mena uka fefeke. Ka kua fakamonuina lahi e fakauka ha lautolu.
9, 10. Ko e heigoa e tau mena tutupu fiafia ne olioli he tau misionare he tau matakavi mamao tuga ke he Central African Republic?
9 Tuga ma e fakatai, he Central African Republic, ke he tau kua mole ne fakalataha ke he Fakamanatuaga he mate he Keriso ko e 16,184, kavi ke he fakalahi fitu e numera he tau tagata fakamatala he Kautu he motu ia. Ha kua tokologa he fahi ia he motu ne nakai fai hila, kua fa mahani e tau tagata ke taute e tau gahua ha lautolu i fafo he lalo akau malu. Ti kua pauaki ni ma e tau misionare ke taute pihia e tau gahua ha lautolu—taute e tau fakaakoaga Tohi Tapu i fafo he lalo akau. Nakai ni he maama lahi mo e hauhau a fafo ka e fai aoga foki. Kua loto fakaaue moli e tau tagata ma e Tohi Tapu, mo e fakatutala ke he tau matakupu fakalotu kua mahani tuga ni he tutala ke he tau sipote po ke matagi ke he falu aga fakamotu. Fa mahani, ko e tau tagata ne o he puhala ne kitia e mena ne tupu ti fakalataha foki ke he fakaakoaga.
10 Ti, ko e taha misionare ne taute e fakaakoaga Tohi Tapu i fafo, ko e fuata tane he taha fahi he puhala tu ne hau mo e talahau ha kua nakai fai tagata kua ahi atu ki a ia, kua lata e misionare ke fina age mo e fakaako e Tohi Tapu mo ia foki. Moli, ne fiafia e misionare ke taute, ti kua mafiti e holo ki mua he fuata tane. He motu ia, ne fa fakatu he tau leoleo e Tau Fakamoli he puhala tu, nakai ke poaki po ke fakahala a lautolu, ka e ole ke he tau fufuta fou he tau mekasini Watchtower mo e Awake! po ke fakaaue ki a lautolu ke he vala tala kua fiafia pauaki a lautolu ki ai.
11. Pete e tau kamatamata, fefe e logonaaga he tau misionare kua leva hagaao ke he gahua ha lautolu?
11 Tokologa a lautolu ne kamata e gahua misionare 40 po ke 50 e tau tau kua mole hane gahua fakamoli agaia he fonua. Ko e fakafifitakiaga ha ia he tua mo e fakauka ma tautolu oti! He 42 e tau tau kua mole, taha e hoa mau ne gahua tokoua ko e tau misionare ke he tolu e motu kehekehe. Kua pehe e tane: “Ha ha i ai e tau mena uka. Ma e fakatai, kua taufetului a maua ke he malaria ke 35 e tau. Ka e, nakai tokihala a maua ke he fifiliaga ha maua ke misionare. Lafi he hoana hana: “Ha ha i ai loga lahi e mena ke fakaaue ki ai. Olioli lahi e gahua he fonua, ti mukamuka ke kamata e tau fakaakoaga Tohi Tapu. Ka kitia e koe e tau tagata fakaako ne o mai he tau feleveiaaga mo e maeke ke feiloaaki, kua tuga e fakalatahaaga he magafaoa he tau magaaho takitaha.”
“Nakai Aoga e Tau Mena Oti Kana” ki a Lautolu
12. Fakakite fefe e loto fakaaue moli ma e aoga he Kautu?
12 He magaaho ne moua he tagata fakafua koloa e penina fakafua lahi, “ati fano ai a ia, kua fakafua atu hana tau mena oti ti fakafua aki mai.” (Mataio 13:46) Ko e makau nei ke foaki e tau mena oti kua liga aoga ko e fakakiteaga ha lautolu kua loto fakaaue moli ke he aoga he Kautu. Ko ia ka fakalataha mo Keriso ke he lilifu he Kautu, ne pehe e aposetolo ko Paulo: “Ko e haku a manatu kua nakai aoga e tau mena oti kana ha ko e mitaki mua ue atu he iloa a Keriso Iesu ko e haku a Iki; ha ko ia kua nakai aoga ai kia au e tau mena oti, kua manatu foki au ko e otaota ia, kia moua e au a Keriso.”—Filipi 3:8.
13. Fakatata fefe he taha tagata he Czech Republic hana manako ke he Kautu?
13 He puhala taha, tokologa he vaha nei kua makau ke taute e tau hikihikiaga lalahi he tau momoui ha lautolu ke maeke ke moua e tau monuina he Kautu. Ma e fakatai, ia Oketopa 2003, ko e ulu faiaoga ne 60 e tau he moui, ke he aoga i Czech Republic ne moua e tohi lagomatai ke fakaako e Tohi Tapu ko e Iloilo ne Takitaki Atu ke he Moui Tukulagi. He oti e totou, ne matutaki mafiti a ia mo e Tau Fakamoli a Iehova he matakavi hana ke fakaako e Tohi Tapu. Kua holo ki mua e malolo fakaagaga mitaki hana ti nakai leva mo e fano he tau feleveiaaga. Ka e kua mogoia e tau pulega hana ke tu he gahua takitaki maaga mo e tu ke he viliaga ke eke mo ekepule? Ne fifili a ia ke hu he poitufi kehe—ko e poitufi he moui, ko e tagata fakapuloa he Kautu. Pehe a ia, “kua maeke ia au ke foaki e tau tohi faka-Tohi Tapu ke he tau tama aoga haku.” Ne fakamailoga e ia hana tukuleleaga ki a Iehova he tanumia ke he vai he fonoaga ia Iulai 2004.
14. (a) Ko e heigoa he tala mitaki he Kautu kua omoomoi e tau miliona ke taute? (e) Ko e heigoa e tau huhu hokulo kua maeke ia tautolu takitokotaha ke huhu hifo?
14 Totou miliona e falu he lalolagi katoa ne tali ke he tala mitaki he Kautu ke he puhala pihia. Ne o mai a lautolu he lalolagi kelea, aki kehe e aga tuai ha lautolu, tiaki e tau feoakiaga fakamua ha lautolu, ti toka kehe e tau tutuliaga fakalalolagi ha lautolu. (Ioane 15:19; Efeso 4:22-24; Iakopo 4:4; 1 Ioane 2:15-17) Ko e ha ne taute e lautolu e tau mena oti nei? Ha kua tuku fakatokoluga e lautolu e tau monuina he Kautu he Atua ki luga he tau mena oti kua foaki he fakatokaaga nei. Pihia nakai e logonaaga hau hagaao ke he tala mitaki he Kautu? Kua fakalagalaga nakai he tala mitaki ia a koe ke taute e tau hikihikiaga kua lata ke tamai e puhala moui, tau aoga, mo e tau foliaga hau ke fakalautatai mo e mena ne manako a Iehova ki ai? Ko e taute pihia to fua mai e tau monuina loga ma hau, mogonei mo e anoiha.
Kua Hokotia e Heleheleaga ke he Tapunu
15. Ko e heigoa ne perofeta tuai ka taute he tau tagata he Atua he tau aho fakahiku nei?
15 Ne tohi he salamo: “To eke poa mo loto hāu a tau tagata ke he aho he hāu a malolo.” Ko lautolu ne foaki a lautolu kua putoia e ‘hahau he fakalatahaaga he fuata’ mo e ‘kau lahi he tau fifine ne fakamatala.’ (Salamo 68:11; 110:3) Ko e heigoa e fua he fakailoilo mo e foaki fakatagata he tau tagata a Iehova—ko e tau tagata tane mo e fifine, fuata mo e fuakau—he tau aho fakahiku nei?
16. Foaki e fakafifitakiaga ke he puhala kua fakalaulahi atu e tau fekafekau he Atua ke lagomatai e falu ke iloa e Kautu.
16 Ko e paionia, po ke tagata fakapuloa tumau he Kautu, i Initia, ne tupetupe ke he puhala ke lagomatai e ua e miliona he tau tagata kuhukuhu he motu ia ke iloa e Kautu. (Isaia 35:5) Ne fifili a ia ke hu he aoga i Bangalore ke ako e vagahau matalima. Kua maeke ia ia mogoia ke talahau e amaamanakiaga he Kautu ki a lautolu ne kuhukuhu, mo e fakatu ai e tau matakau fakaako Tohi Tapu. He tau fahitapu gahoa, ha ha i ai e tau tagata fihafiha ne kamata ke o mai ke he tau feleveiaaga he Fale he Kautu. Fakahiku, he galue he fakamauaga, ne feleveia e paionia mo e fuata tane kuhukuhu mai Calcutta ne loga e tau huhu mo e fakakite e fiafia lahi ke iloa lahi a Iehova. Pete ia, fai lekua. Amanaki ai e fuata tane ke liu ki Calcutta, kavi ke he 1,600 kilomita, ke kamata e koliti, ti nakai fai Fakamoli i ai ne iloa e vagahau matalima. Mo e fakamalolo lahi, ne omoomoi e ia hana matua tane ke fakaata a ia ke fano ni ke he koliti i Bangalore ke maeke ai a ia ke matutaki hana fakaakoaga Tohi Tapu. Ne mitaki e holo ki mua fakaagaga hana, mo e teitei mole e taha e tau, ne tukulele e ia e moui hana ki a Iehova. Ne maeke a ia ke fakaako foki e Tohi Tapu mo lautolu ne kuhukuhu, putoia e kapitiga hana tali mai he tote. Kua fakatoka he la ofisa mogonei i Initia e tau paionia ke ako e vagahau matalima ke lagomatai e fonua ia.
17. Talahau e mena ne fakamalolo pauaki ki a koe hagaao ke he hokotaki he fekafekauaga he tau he 2004 he lau 19 ke he 22 he The Watchtower.
17 He mekasini nei The Watchtower, he lau 19 ke he 22, to moua e koe e hokotaki he lalolagi katoa he gahua he fonua he Tau Fakamoli a Iehova ma e fekafekauaga he tau he 2004. Fakaaoga e magaaho tote ke kumikumi ki ai, mo e kitia ni e koe e fakamoliaga ne kua hagaaki malolo e tau tagata a Iehova he lalolagi katoa ke tutuli e “penina fakafua lahi” he vaha nei.
Kia ‘Kumikumi Fakamua e Kautu’
18. Ko e heigoa e vala tala ne nakai putoia e Iesu he fakatai ke he tagata fakafua koloa, ti ko e nakai talahau he ha?
18 He liu manatu e fakatai ha Iesu ke he tagata fakafua koloa, ne mailoga e tautolu kua nakai tutala a Iesu ke he puhala ne maeke he tagata fakafua koloa ke moui he mole e fakafua e ia e tau mena oti kana hana. Moli, liga huhu e falu: ‘To maeke fefe e tagata fakafua koloa ke moua e tau mena kai, tau mena tui, mo e kaina he mogonei ne kua nakai fai mena a ia ne toe? Ko e heigoa e mitaki he penina uho ia ma hana?’ Ko e tau huhu mitaki a ia mai he onoonoaga fakatino? Ka e nakai kia tomatoma a Iesu ke he tau tutaki hana: “Kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu”? (Mataio 6:31-33) Ko e matapatu manatu he fakatai kua lata ke fakatata e fakamoli loto katoa ke he Atua mo e makai ma e Kautu. Fai fakaakoaga nakai e mena nei ma tautolu?
19. Ko e heigoa e matapatu fakaakoaga kua ako e tautolu mai he fakatai ha Iesu ke he penina fakafua lahi?
19 He ako laia e tautolu e tala mitaki homo ue atu po kua kumikumi e tautolu e Kautu mo e tala age ke he falu e tau monuina i ai ke he loga e tau tau, kua lata ia tautolu ke fakatumau ke hagaaki fiafia ke he Kautu. Ko e tau magaaho uka anei, ka e ha ha ia tautolu e tau kakano mauokafua he talitonu kua tutuli e tautolu e mena kua moli mo e nakai fai mena ke fakatatai ki ai—tuga e penina ne moua he tagata fakafua koloa. Ko e tau mena tutupu he lalolagi mo e tau perofetaaga he Tohi Tapu kua foaki e fakamoliaga omoomoi hane nonofo a tautolu ke he “fakaotiaga he lalolagi.” (Mataio 24:3) Kia eke a tautolu, ke tuga e tagata fakafua koloa, ne fakatata e makai loto katoa ma e Kautu he Atua mo e olioli ke he monuina he fakapuloa e tala mitaki.—Salamo 9:1, 2.
Manatu Nakai e Koe?
• Ke he tau tau kua mole, ko e heigoa ne lafi ke he holo ki mua he tau tagata tapuaki moli?
• Ko e heigoa e aga ne kitia ki a lautolu ne eke mo tau misionare?
• Ko e heigoa e tau hikihikiaga ne taute he tau tagata ha ko e tala mitaki he Kautu?
• Ko e heigoa e fakaakoaga aoga kua iloa e tautolu mai he fakatai a Iesu ke he penina fakafua lahi?
[Tau Huhu he Fakaakoaga]
[Fakatino he lau 23]
“Ko e kupu moli . . . kua futia e tau vahega tagata kehekehe.”—A. H. Macmillan
[Fakatino he lau 25]
Ne fakamatala a Daniela mo Helmut he fonua vagahau kehe i Vienna
[Tau Fakatino he lau 26, 27]
Tuga e tagata fakafua koloa, kua fakamonuina lahi e tau misionare he vaha nei
[Fakatino he lau 27]
“To foaki fakamakai he tau tagata ha mutolu a lautolu”