Ko e Kumi ma e Loto Mafola

KO ALBERT ko e tagata tane ne fiafia e fakamauaga mo e tokoua e tama mitaki. Ka e logona e ia fai mena ne galo he moui hana. He magahala ne taufetului a ia he kumi gahua, ne putoia a ia ke he tau mena fakapolitika mo e kaufakalatahaaga. Kua eke foki a ia mo tagata malolo lahi he fahi faka-Kominisi he maaga.

Ka e nakai leva, ti nakai fiafia a Albert ke he faka-Kominisi. Ne fakaoti e matutaki hana mo e tau mena fakapolitika mo e fakalataha katoatoa mo e magafaoa hana. He matakaki ke he fiafia ha lautolu nukua eke mo amaamanakiaga hana he moui. Pete ne logona agaia e Albert e gatigati he loto; ne matutaki e mafola moli he loto ke fakamataofi a ia.

Na tupu lahi e mena ne hoko ki a Albert. Ke maeke ke moua e amaamanakiaga fai kakano he moui, totou miliona ne kumikumi ke he tau taofiaga, tau fakaakoaga, mo e tau lotu kehekehe. He lalolagi he Fahi Lalo, ko e fakaholoaga he tau hipi he atu tau he 1960 ko e totokoaga ke he tau mahani fakamotu tuai mo e tau aoga he kaufakalatahaaga. Mua atu ke he tau fuata mui ne kumi ma e fiafia mo e kakano he moui puhala he tau tulaki ne hiki aki e manamanatuaga mo e tau fakaakoaga he fakaholoaga he tau hipi ne fakahigoa ko e tau takitaki fakalotu mo e tau ekepoa ne mua. Moha ia, ne kaumahala e fakaholoaga he tau hipi ke tamai e fiafia moli. Ka e, ne lagomatai he mena ia ke moua e tau hufiaaga tulaki mo e tau fuata mahani feuaki, he tuku hifo muatua e kaufakalatahaaga ke he tau mahani fakagoagoa.

Ke he tau senetenari, tokologa ne kumi fiafia he puhala he mautu, pule, po ke fakaakoaga. Ko e tau puhala nei ne takitaki lahi ke he fakaita.  Pehe a Iesu: “Ko e mena nakai moui taha he loga hana tau mena ha i ai.” (Luka 12:15) Ka e, ko e fifili ke tutuli e muhu koloa kua tamai e nakai fiafia. Pehe e Tohi Tapu: “Ka ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia. Ha ko e loto lahi ke he tau tupe, ko e vaka haia he tau mena kelea oti kana; ko e falu foki kua manako lahi ki ai, . . . kua hoka e lautolu a lautolu ti ati ni ke he tau mena matematekelea loga.”—1 Timoteo 6:9, 10.

Maeke fefe mogoia he taha ke moua e mafola he loto mo e amaamanakiaga he moui? Ko e puhala kia ke moua e kautu, kua tuga e fana pouli he matatao? Fiafia ai, nakai pihia. To kitia e tautolu he vala tala ka mui mai, ko e kautuaga he fakamakona e manako aoga lahi ne mua ue atu he tagata.

[Fakatino he lau 3]

To maeke kia he tutuli e mautu, pule, po ke fakaakoaga ke lagomatai a koe ke moua e mafola he loto?