Ko Iehova e ‘Taui ha Lautolu kua Kumi Fakamakutu ki a Ia’

“Ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.”—HEPERU 11:6.

1, 2. Ko e ha ne liga taufetului falu he tau fekafekau ha Iehova ke he tau logonaaga kelea?

“KO AU ko e Fakamoli a Iehova ke teitei 30 e tau, ka e nakai la logona e au e aoga ke fakahigoa pihia,” he talahau e Barbara. * “Pete he paionia au mo e loga atu foki e tau kotofaaga, nakai fai ne liga lahi ke taute au ke talitonu ke he loto haku ke felauaki tonu pihia au.” Kua fakakite e Keith e tau manatu pihia. “Ne fa logona hifo e au e nakai aoga ha kua loga e kakano ke fiafia e tau fekafekau a Iehova, ka e nakai pihia au,” he talahau e ia. “Ne takitaki he mena nei au ke he logonaaga tokihala, ne fakatupu ki mua e kelea ue atu.”

² Tokologa e tau fekafekau tua fakamoli a Iehova, he vaha i tuai mo e mogonei, ne taufetului mo e tau logonaaga pihia. Pihia nakai a koe falu magaaho? Kua liga pehia a koe he tau lekua tupufetui, ka e tuga e olioli he tau matakainaga talitonu hau e moui, ataina mo e fiafia. Ti ko e fua, to liga logona hifo e koe kua nakai ha ha ia koe e taliaaga a Iehova po ke latatonu mo e levekiaga hana. Ua fakatepetepe ke fakahiku ko e mena anei ne tupu. Kua fakamoli he Tohi Tapu ki a tautolu: “Ha kua nakai fakateaga a [Iehova], ti nakai fakavihia foki e ia e matematekelea he tagata matematekelea; ti nakai haga kehe e ia hana fofoga ia ia; ne tagi atu a ia kia ia, ti fanogonogo mai ai a ia ki ai.” (Salamo 22:24) Ko e tau kupu fakaperofeta ia  hagaao ke he Mesia ne fakakite kua nakai ni logona e Iehova a lautolu ne tua fakamoli ka e taui foki e ia a lautolu.

3. Ko e ha ne nakai hao a tautolu ke he tau pehiaaga he fakatokaaga nei?

³ Nakai fai ne hao mai he tau pehiaaga he fakatokaaga nei—ti hoko foki ke he tau tagata a Iehova. Kua nonofo a tautolu he lalolagi ne pule he fi ne mua ha Iehova, ko Satani ko e Tiapolo. (2 Korinito 4:4; 1 Ioane 5:19) Pete he nakai puipui fakamana, ko e tau fekafekau ha Iehova, ko e matapatu fana kaka moli ha Satani. (Iopu 1:7-12; Fakakiteaga 2:10) Ato hoko e magaaho kotofa he Atua, mogoia, kua lata ia tautolu ke “fakauka ke he matematekelea” mo e “fakamakamaka ke he liogi,” he mauokafua kua leveki e Iehova a tautolu. (Roma 12:12) Kua nakai lata ke mahala a tautolu ke manamanatu kua nakai fakaalofa e Atua, ko Iehova ki a tautolu!

Tau Fakafifitakiaga i Tuai he Fakauka

4. Talahau falu fakataiaga he tau fekafekau tua fakamoli ha Iehova ne fakauka ke he tau tuaga tupetupe.

⁴ Tokologa e tau fekafekau i tuai ha Iehova ne fakauka ke he tau tuaga tupetupe. Ko Hana, ma e fakatai, ne “mamahi hana loto” ha kua tufua a ia—ko e tuaga ne onoono a ia ki ai kua nimo he Atua a ia. (1 Samuela 1:9-11) He magaaho ne tutuli he patuiki fifine kelipopo tagata ko Iesepela a Elia, ne matakutaku a ia ti liogi ki a Iehova: “Tokai; kia uta kehe e koe haku a moui, ha kua nakai mua haku a mahani mitaki ke he haku a tau matua.” (1 Tau Patuiki 19:4) Liga logona foki he aposetolo ko Paulo e kavega he nakai mitaki katoatoa hana he magaaho ne talahau e ia: “Ka loto au ke he mena mitaki ke eke, ti ha ha ia au e kelea.” Ne lafi e ia: “Oi te, ko e tagata malaia au!”—Roma 7:21-24.

5. (a) Ne palepale fefe ki a Hana, Elia, mo Paulo? (e) Ko e heigoa e mafanatia kua moua e tautolu mai he Kupu he Atua kaeke ke taufetului a tautolu mo e tau logonaaga kelea?

⁵ Moli, ne iloa e tautolu ko Hana, Elia, mo Paulo ne fakauka oti ke he fekafekauaga ha Iehova, ti palepale lahi e Ia a lautolu. (1 Samuela 1:20; 2:21; 1 Tau Patuiki 19:5-18; 2 Timoteo 4:8) Ne taufetului agaia a lautolu mo e tau vahega kehekehe he tau logonaaga he tagata, ne putoia e maanu, fakaatukehe, mo e matakutaku. Kua nakai ofo a tautolu ke he tau mena ia, kaeke ke kelea e tau logonaaga ha tautolu ke he falu magaaho. Ko e heigoa hau mogoia ka taute ka fakatupu he tau fakaatukehe he moui a koe ke manamanatu kua fakaalofa moli nakai a Iehova ki a koe? Kua maeke ia koe ke moua e mafanatia mai he Kupu he Atua. Ma e fakatai, he vala tala fakamua, kua fakatutala a tautolu ke he talahauaga a Iesu kua totou e Iehova ha “mutolu a tau lauulu.” (Mataio 10:30) Kua fakakite he tau kupu atihake ia na fiafia lahi a Iehova ke he tau fekafekau takitaha hana. Manatu foki e fakataiaga ha Iesu ke he tau manu ikiiki. Ka nakai fai he tau manu lele ikiiki ne mokulu ki kelekele ka e noa mo e mailoga ha Iehova, ko e ha mogoia ka fuluhi kehe e mata hana ke he ole hau?

6. Maeke fefe e Tohi Tapu ke eke mo punaaga he fakamafanatia ki a lautolu ne taufetului ke he tau logonaaga kelea?

⁶ Kua maeke moli kia ia tautolu ko e tau tagata nakai mitaki katoatoa ke uho ke he fofoga he Tufuga malolo lahi ue atu, ko Iehova ko e Atua? E! Moli, loga e tau vala he Tohi Tapu ne fakamoli ki a tautolu e mena nei. He tokaloto e tau mena nei, maeke ia tautolu ke taogo e tau kupu he salamo ne pehe: “Ko e tau manamanatu loga he haku a loto kua fiafia ai au ha ko e fakamafanaaga mai ia koe.” (Salamo 94:19) O mai la tautolu ke tutala ke he falu he tau talahauaga fakamafana nei mai he Kupu he Atua ke lagomatai a tautolu ke loto fakaaue lahi kua uho a tautolu ke he Atua ti ko e mena ia to palepale e ia a tautolu he fakatumau a tautolu ke taute hana finagalo.

“Koloa Uho” ha Iehova

7. Ko e heigoa e perofetaaga fakamalolo ne foaki e Iehova he puhala ia Malaki ke he motu kolokolovao?

⁷ Ko e tuaga fakalialia ne kitia ke he tau Iutaia he senetenari ke lima aki F.V.N. Ne talia he tau ekepoa e tau manu kelea mo e foaki a lautolu ko e tau poa ke he fatapoa ha Iehova. Kua fakakite he tau fakafili e fili tagata. Ne tupu lahi mahaki e matutaki mo e tau hulalo,  pikopiko, fakavaia, mo e faivao. (Malaki 1:8; 2:9; 3:5) Ke he motu kolokolovao nei, ne talahau e Malaki e perofetaaga ofoofogia. Nakai leva to liuaki mai e Iehova e tau tagata hana ke he tuaga talia. Ne totou e tautolu: “To eke foki a lautolu maku, ko e koloa uho ni, kua pihia mai a Iehova Sapaota, ke he aho kua kotofa ai e au; to fakaalofa foki au kia lautolu, tuga he fakaalofa e tagata ke he hana tama tane kua fekafekau kia ia.”—Malaki 3:17.

8. Ko e ha ne hagaao foki e Malaki 3:17, matapatu ke he moto tagata tokologa?

⁸ Ko e perofetaaga ha Malaki ne ha ha ai e fakamoliaga he vaha nei ne matutaki mo e tau Kerisiano fakauku he agaga, ati moua e motu fakaagaga ne 144,000. Ne eke moli e motu ia “ko e koloa uho,” po ke “motu kua moua,” ki a Iehova. (1 Peteru 2:9) Maeke foki he perofetaaga ha Malaki ke fakamalolo ke he “moto tagata tokologa,” ne “tutu mai a lautolu ki mua he nofoaiki, ki mua foki he Punua mamoe, kua tapulu a lautolu ke he tau tapulu hina.” (Fakakiteaga 7:4, 9) Kua eke a lautolu nei mo taha e fuifui mo lautolu ne fakauku, i lalo he Leveki Mamoe, ko Iesu Keriso.—Ioane 10:16.

9. Ko e ha e tau tagata ha Iehova “ko e koloa uho” ki a ia?

⁹ Onoono fefe a Iehova ki a lautolu ne fifili ke fekafekau ki a ia? He talahau ia Malaki 3:17, ne onoono a ia ki a lautolu ke he puhala ne onoono e matua tane fakaalofa ke he tama tane hana. Ti mailoga e tau kupu fakahele ne fakamaama e ia ke he tau tagata hana—“ko e koloa uho.” Pehe e falu fakaliliuaga ke he talahauaga ia “ko e haku ni,” “ko e koloa tauuka lahi haku,” mo e “penina haku.” Ko e ha ne onoono pihia a Iehova ki a lautolu ne fekafekau ki a ia kua uho? Ko e taha kakano, ko e Atua loto fakaaue a ia. (Heperu 6:10) Kua fakatata mo e onoono a ia ki a lautolu kua uho he fekafekau ki a ia mai he tau loto.

10. Foaki fefe e Iehova e puipuiaga ma e tau tagata hana?

¹⁰ Maeke nakai a koe ke manatu e koloa aoga lahi hau ne onoono a koe ki ai ko e koloa uho? Nakai kia taute e koe e tau lakaaga ke puipui ai? Ko e mena taha ia ni ne taute e Iehova ma e “koloa uho” hana. Moli, ne nakai puipui e ia hana tau tagata mai he tau kamatamata mo e tau matematekelea he moui. (Fakamatalaaga 9:11) Ka e maeke ia Iehova mo e to puipui fakaagaga e ia hana tau fekafekau tua fakamoli. Ne foaki e ia ki a lautolu e malolo ne lata mo lautolu ke fakauka ke he ha kamatamata. (1 Korinito 10:13) Ti, tala age a Mose ke he tau tagata he Atua i tuai, ko e tau Isaraela: “Kia fakamalolo a mutolu mo e fakamanavalahi . . . ko Iehova hau a Atua kua o fakalataha mo koe; nakai toka e ia a koe.” (Teutaronome 31:6) Ne lauia mitaki e puhala fakafehagai ha Iehova mo e tau tagata hana. Ki a ia, ko lautolu “ko e koloa uho.”

Ko Iehova ‘Ko e Taui’

11, 12. Maeke fefe he loto fakaaue ki a Iehova he hana matagahua ko e Taui ha tautolu ke lagomatai a tautolu ke totoko e tau logonaaga fakauaua?

¹¹ Ko e taha fakamoliaga kua uho e tau fekafekau ha Iehova ki a ia ha kua taui e ia a lautolu. Ne tala age a ia ke he tau Isaraela: “Mo e kamatamata mai ai e mutolu au ke he tau mena na, kua pihia mai a Iehova Sapaota; po ke hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.” (Malaki 3:10) Fakahiku moli, to taui e Iehova hana tau fekafekau aki e moui tukulagi. (Ioane 5:24; Fakakiteaga 21:4) Kua fakakite he taui nakai fai fakatataiaga nei e lahi he fakaalofa mo e fakamokoi ha Iehova. Kua fakakite foki mena uho moli a lautolu ne fifili ke fekafekau ki a ia. He  ako ke mailoga a Iehova ko e Taui fakamokoi kua lagomatai a tautolu ke totoko e tau fakauaua hagaao ke he tuaga ha tautolu mo e Atua. Hanei, kua tomatoma e Iehova a tautolu ke onoono ki a ia ko e Taui! Ne tohi e Paulo: “Ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.”—Heperu 11:6.

¹² Moli, kua fekafekau a tautolu ki a Iehova ha kua fakaalofa a tautolu ki a ia—he nakai ni ha kua mavehe a ia ke taui a tautolu. Ka e, he tokaloto e tautolu e amaamanakiaga he taui kua nakai tonu po ke lotokai. (Kolose 3:23, 24) Mai he fakaalofa hana ma lautolu mo e uho lahi ne tuku e ia ki a lautolu, ne fakalotomatala a Iehova mo e taui a lautolu ne kumi fakamakutu ki a ia.

13. Ko e ha e foakiaga he lukutoto ko e fakakiteaga lahi mahaki he fakaalofa ha Iehova ma tautolu?

¹³ Ko e fakakiteaga lahi mahaki he kakano ne uho e tau tagata ke he fofoga ha Iehova ko e foakiaga he lukutoto. Ne tohi he aposetolo ko Ioane: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e foakiaga he poa lukutoto ha Iesu Keriso kua fekehekeheaki mo e manatu kua nakai aoga po ke kelea a tautolu ke he fofoga ha Iehova. Moli, ka tokoluga e totogi ne fakatau aki e Iehova a tautolu—he foaki e Tama fuataha hana—kua hokulo moli e fakaalofa hana ki a tautolu.

14. Ko e heigoa ne fakakite e puhala na onoono a Paulo ke he lukutoto?

¹⁴ Ti, ka hufia e tau logonaaga kelea ia koe, kia manamanatu fakahokulo ke he lukutoto. E, ko e onoonoaga ke he mena fakaalofa nei ko e foakiaga fakatagata mai ia Iehova. Ko e mena haia ne taute he aposetolo ko Paulo. Manatu e mena ne talahau e ia: “Oi te, ko e tagata malaia au!” Ka e matutaki a ia ke pehe: “Kua fakaaue atu au ke he Atua, ha ko Iesu Keriso ha tautolu a Iki,” ne, talahau e Paulo, kua “fakaalofa mai kia au, mo e foaki mai e ia a ia ke hukui aki au.” (Roma 7:24, 25; Kalatia 2:20) He talahau e mena nei, ne nakai fakaikaluga a Paulo. Kua mauokafua a ia na uho a ia ki a Iehova. Tuga a Paulo, kua lata foki a koe ke ako ke onoono ke he lukutoto ko e mena fakaalofa fakatagata mai he Atua. Ne nakai ni ko e Laveaki malolo lahi a Iehova ka ko e Taui fakaalofa foki.

Mataala ke he “Tau Lagatau” ha Satani

15-17. (a) Fakaaoga fefe he Tiapolo e tau logonaaga kelea? (e) Ko e heigoa e fakamaloloaga kua maeke ke moua e tautolu mai he mena ne tupu ki a Iopu?

¹⁵ Liga uka agaia ke talitonu e koe e tau fakamafanaaga mai he agaga ne moua he Kupu he Atua kua hagaao moli ki a koe. Kua logona hifo e koe e taui he moui tukulagi ke he lalolagi fou he Atua ko e mena kua maeke ke moua he falu, ka e nakai uho a koe ke moua ai. Kaeke ke pehenei e logonaaga hau, ko e heigoa hau ka taute?

¹⁶ Kua mahani moli a koe mo e tomatomaaga ha Paulo ke he tau Efeso: “Kia tapulu a mutolu ke he tau tapulu tau katoa he Atua, kia maeke ia mutolu ke totoko atu ke he tau lagatau he tiapolo.” (Efeso 6:11) Ka manamanatu a tautolu ke he tau matahele a Satani, ko e tau mena tuga e velevelekoloa mo e mahani feuaki kua liga hau mafiti ke he manamanatuaga hau ti hako moli. Ko e tau kamatamata nei ne kototia e tokologa he tau tagata he Atua ke he vaha i tuai mo e he vaha nei. Pete ia, kua lata ke nakai matapouli a tautolu ke he taha lagatau foki ha Satani—ko e lali hana ke fakaohooho e tau tagata na nakai fakaalofa a Iehova ko e Atua ki a lautolu.

¹⁷ Na makaka e Tiapolo he fakaaoga e tau logonaaga pihia he lali a ia ke fuluhi kehe e tau tagata mai he Atua. Manatu la e tau kupu ha Pilitati ki a Iopu: “Hanai po ke talahaua tututonu fefe e tagata ki mua he Atua? po ke mēa fefe foki a ia ne fanau he fifine? Kitiala, ko e mahina kua nakai huhulu mai a ia; ko e tau fetu foki kua nakai mēa he fofoga a ia ki ai. Ka e au atu he pihia e tagata ko e kelemutu a ia, mo e tama he tagata ko e kelemutu a ia!” (Iopu 25:4-6; Ioane 8:44) Maeke nakai ia koe ke fakatino e fakamamahi loto he tau kupu nei? Ti ua toka a Satani ke fakalolelole a koe.  He taha fahi, kia mataala he tau puhala ha Satani ke maeke ia koe ke moua e malolo mo e fakauka ke tau fakalahi ke taute e mena kua hako. (2 Korinito 2:11) Ma Iopu, pete ne fakatonu a ia, ne taui e Iehova hana fakauka he liuaki age ki a ia fakalahi ua e lahi ke he tau mena hana ne galo fakamua.—Iopu 42:10.

‘Kua Mua a Iehova ke he Tau Loto ha Tautolu’

18, 19. Maeke fefe e Atua ke ‘mua ke he tau loto ha tautolu’ ti ko e heigoa e puhala kua fioia e ia e “tau mena oti kana”?

¹⁸ Moli ai, kua uka ke huo kehe e tau logonaaga he fakalolelole kaeke kua vakavaka hifo muatua ai. Ka e, ko e agaga ha Iehova kua maeke ke lagomatai a koe ke tolomaki atu ke “ulu ai e tau kolo . . . tau mena fakatokoluga oti kua hemu ke he maama ke he kupu he Atua.” (2 Korinito 10:4, 5) Kaeke ke fakapehia he tau manatu kelea a koe, manamanatu fakalahi ke he tau kupu he aposetolo ko Ioane: “Ko e mena foki ia ke iloa ai e tautolu kua fakamoli a tautolu; to iloa tonuhia foki e tau loto ha tautolu ki mua hana. Ha ko e mena kaeke kua fakahala mai he tau loto ha tautolu kia tautolu, kua mua e Atua ke he tau loto ha tautolu, kua fioia foki e ia e tau mena oti kana.”—1 Ioane 3:19, 20.

¹⁹ Ko e heigoa e kakano he talahauaga “kua mua e Atua ke he tau loto ha tautolu”? He falu magaaho, kua totoko he tau loto ha tautolu a tautolu, mua atu ka mailoga mamahi e tautolu e nakai mitaki katoatoa mo e tau kuku ha tautolu. Po ke liga ha ko e feakiaga ha tautolu, ha ha ia tautolu e hihiga lahi ke manamanatu kelea ki a tautolu ni, ke tuga kua nakai fai mena ne taute e tautolu ka talia e Iehova. Kua fakamalolo he tau kupu he aposetolo ko Ioane a tautolu kua mua atu a Iehova ke he mena ia! Kua nakai takele a ia he tau hehe ha tautolu kua mole ka e kitia ai e tuaga moli ha tautolu. Kua iloa foki e ia e tau manatu mo e tau foliaga ha tautolu. Ne tohi e Tavita: “Ha kua fioia e ia e mena ne eke aki a tautolu; kua manatu e ia ko e kelekele ni a tautolu nai.” (Salamo 103:14) E, kua iloa mitaki lahi e Iehova a tautolu!

Ko e “Foufou Fulufuluola” mo e “Potiki he Patuiki”

20. Ko e heigoa he perofetaaga ha Isaia ke he fakafouaga ne fakakite hagaao ke he puhala ne onoono a Iehova ke he hana tau fekafekau?

²⁰ Puhala he perofeta ko Isaia, ne age e Iehova ke he hana tau tagata i tuai e amaamanakiaga he fakafouaga. Ne uta fakapaea a lautolu ki Papelonia, ti ko e fakamafanaaga mo e fakamoliaga anei kua latatonu moli ma lautolu nei ne loto lolelole! He onoono atu ke he magaaho ka liliu a lautolu ke he motu moli ha lautolu, ne talahau e Iehova: “To eke a koe mo foufou fulufuluola ke he lima a Iehova, mo potiki he patuiki foki ke he aloalolima he hau a Atua.” (Isaia 62:3) Mo e tau kupu nei, ne fakatapulu e Iehova e tau tagata hana aki e lilifu mo e monuina. Ne taute pihia foki e ia ke he motu he Isaraela fakaagaga he vaha nei. Ne tuga kua toto fakatokoluga e ia a lautolu ma e tau tagata oti ke nava ki ai.

21. Maeke fefe ia koe ke moua e mauokafua to taui e Iehova e fakauka fakamoli hau?

²¹ Ha kua matapatu e fakamoliaga he perofetaaga ki a lautolu ne fakauku, kua fakatai e lilifu ne liligi e Iehova ki a lautolu oti ne fekafekau ki a ia. Ti, he magaaho ne maluia e tau logonaaga he fakauaua, manatu pete ne nakai mitaki katoatoa, kua uho agaia a koe ko e “foufou fulufuluola” mo e “potiki he patuiki” ki a Iehova. Ti fakatumau ke fakafiafia e loto hana he kumi fakamakutu ke taute e finagalo hana. (Tau Fakatai 27:11) He taute pihia, maeke ia koe ke mauokafua to taui e Iehova e fakauka fakamoli hau!

[Matahui Tala]

Manatu Nakai e Koe?

• Eke fefe a tautolu mo “koloa uho” ki a Iehova?

• Ko e ha kua aoga ke onoono ki a Iehova ko e Taui?

• Ko e heigoa e “tau lagatau” ha Satani kua lata ia tautolu ke mataala ki ai?

• Ko e heigoa e puhala he Atua ne ‘mua ke he tau loto ha tautolu’?

[Tau Huhu he Fakaakoaga]

[Fakatino he lau 28]

Paulo

[Fakatino he lau 28]

Elia

[Fakatino he lau 28]

Hana

[Fakatino he lau 30]

Kua ha ha he Kupu he Atua e loga he tau manatu fakamafana