Ne Totou e Iehova “ha Mutolu a Tau Lauulu”

“Nakai to foki taha [manu tote] ke he kelekele ka noa mo e Matua ha mutolu. Ka kua oti kana he totou ha mutolu a tau lauulu.”—MATAIO 10:29, 30.

1, 2. (a) Ko e ha ne logona hifo e Iopu kua tiaki he Atua a ia? (e) Kua kakano kia e tau talahauaga ha Iopu kua fuluhi kehe a ia mai ia Iehova? Fakamaama.

“KUA tagi atu au kia koe, [“Atua na e,” NW] ka e nakai tali mai ai a koe kia au; kua tu atu au, ka e nakai fofoga mai a koe kia au. Kua liliu kehe a koe kua favale mai a koe kia au; ka tutuli e koe au mo e hau a lima, malolo.” Ko e tagata ne talahau e tau kupu ia ne ita lahi mahaki, ati ne eke ai! Ne nofogati a ia ke he tau koloa, tamate he matematekelea matakutakuina e tau momoui he tau tama hana, ti kua uhu a ia mogonei ha ko e gagao kelea lahi. Ko e higoa he tagata ko Iopu, ti ko e matematekelea lahi hana ne fakamau he Tohi Tapu ma e aoga ha tautolu.—Iopu 30:20, 21.

² Ko e tau talahauaga ha Iopu ne liga tuga kua fuluhi kehe a ia he Atua, ka e nakai pihia e mena ne tupu. Ne tutala a Iopu mai he fatuakiloto malipilipi hana. (Iopu 6:2, 3) Ne nakai iloa e ia ko Satani ne fakatupu e tau kamatamata hana, ti fakahiku hehe a ia kua tiaki tuai he Atua a ia. He taha magahala, ne pehe foki a Iopu ki a Iehova: “Kua haga kehe he ha e koe hau a fofoga ia au, mo e eke e koe au mo fi hau?” *—Iopu 13:24.

3. Ka tutupu e tau matematekelea, ko e heigoa ka liga hau ke he tau manamanatuaga ha tautolu?

³ He vaha nei, tokologa e tau tagata ha Iehova ne matematekelea tumau he tau mena uka ha ko e tau felakutaki, tau fekehekeheaki fakapolitika po ke kaufakalataha, tau matematekelea tutupu pauaki, tino momotua, gagao, nofogati, mo e pa he tau fakatufono. Liga lauia foki a koe he falu kamatamata. He falu magaaho, kua liga manamanatu a koe kua ufiufi e Iehova hana fofoga ia koe. Na iloa mitaki e koe e tau kupu he Ioane 3:16: “Nukua pihia e fakaalofa mai he Atua ke he lalolagi, kua ta mai ai hana Tama fuataha.” Ka matematekelea agaia a koe nakai fai totokaaga, to liga manatu a koe: ‘Fakaalofa moli kia e Atua ki a au? Na mailoga nakai e ia e mena hane tupu ki a au? Kua leveki nakai e ia au fakatagata?’

4. Ko e heigoa e tuaga fakatumau ne fakauka a Paulo ki ai, ti ko e heigoa e tau puhala ne liga lauia a tautolu he tuaga ia?

⁴ Manamanatu ke he mena ne tupu ke he aposetolo ko Paulo. “Ne tuku mai ai kia au e mena mahukihuki ke he tino, ko e agelu a Satani ke tatuki mai kia au,” ne tohi e ia, he matutaki: “Ne ole atu lagatolu au ke he Iki ha ko e mena ia, kia fano kehe ai a ia ia au.” Ne logona e Iehova e tau ole hana. Pete ia, ne fakakite e ia ki a Paulo to nakai fakalava mai a ia he puhala tuluiaga fakamana. Ka e, to mauokafua a Paulo ke he malolo he Atua ke lagomatai a ia ke fahia ke he “mena mahukihuki ke he tino” hana. * (2 Korinito 12:7-9) Tuga a Paulo, to liga lauia a koe ke he taha kamatamata fakatumau. Liga manamanatu a koe, ‘Ko e moli kia kua tuga ke nakai fai mena a Iehova ne taute hagaao ke he kamatamata haku ko e kakano kua nakai mailoga e ia e tuaga haku po ke nakai manamanatu a ia ki a au?’ Kua malolo e tali nakai! Ko e manamanatuaga hokulo ha Iehova ma e tau fekafekau fakamoli takitokotaha hana kua peehi he  mena ne tala age e Iesu ke he tau aposetolo hana nakai leva he mole e fifili e ia a lautolu. O mai la ke kitia e puhala ne fakamalolo he tau kupu hana a tautolu he vaha nei.

“Ua Matakutaku”—Ko e Ha?

5, 6. (a) Lagomatai fefe e Iesu e tau aposetolo ke nakai matakutaku ke he mena ne fakatoka mai i mua? (e) Fakakite fefe e Paulo e mauokafua kua leveki e Iehova a ia?

⁵ Ne moua he tau aposetolo e tau malolo kehe ue atu mai ia Iesu, putoia e “pule ke he tau agaga kelea, ke vega a lautolu, ke fakamalolo foki e tau gagao oti mo e tau mamahi oti.” Ka e, nakai kakano e mena nei ko e puhala ha lautolu to tokanoa mai he tau kamatamata mo e tau mena uka. Ke he taha fahi, ne fakamaama fakamatafeiga e Iesu falu he tau mena ka hoko ki a lautolu. Pete ia, ne fakamalolo e ia a lautolu: “Aua foki neke matakutaku a mutolu kia lautolu ke kelipopo e tino, ka e nakai maeke ke kelipopo e agaga; ka e mitaki ke matakutaku a mutolu kia ia kua maeke ke fakaoti e agaga katoa mo e tino i Kehena.”—Mataio 10:1, 16-22, 28.

⁶ Ke lagomatai e tau aposetolo hana ke maama e kakano ne lata ia lautolu ke nakai matakutaku, ne matutaki atu a Iesu ke talahau ua e fakataiaga. Ne pehe a ia ki a lautolu: “Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.” (Mataio 10:29-31) Mailoga ne matutaki e Iesu e nakai matakutaku ka fakafelau ke he tuaga uka mo e mauokafua to leveki e Iehova a tautolu takitokotaha. Moli ai, ne ha ha he aposetolo ko Paulo e mauokafua pihia. Ne tohi e ia: “Kaeke ke kau e Atua mo tautolu, ko hai kia taha ke paleko mai kia tautolu? Ko ia kua nakai toka hana ni a Tama, ka e tuku mai a ia ke hukui aki a tautolu oti kana, ka e nakai kia foaki noa mai e ia kia tautolu e tau mena oti kana fakalataha mo ia?” (Roma 8:31, 32) Ko e heigoa ni e tau tuaga uka ne fehagai mo koe, to maeke foki ia koe ke iloa moli to leveki e Iehova a koe fakatagata kaeke ke fakatumau a koe ke fakamoli ki a ia. To kitia lahi e mena nei ka onoono fakamakutukutu a tautolu ke he tomatomaaga ha Iesu ke he tau aposetolo hana.

Ko e Fakafua he Manu Tote

7, 8. (a) Ne onoono fefe ke he tau manu ikiiki he vaha ha Iesu? (e) Fakahiku ai, kua fakaaoga nakai he Mataio 10:29 e tau kupu Heleni tote lahi ma e “tau manu ikiiki”?

⁷ Ko e tau kupu ha Iesu ne fakatino lauia mitaki e manamanatuaga ha Iehova ma e tau fekafekau takitokotaha Hana. Manamanatu fakamua ke he tau manu ikiiki. He vaha ha Iesu, ne fakaaoga e tau manu ikiiki mo mena kai, ka kua moumou e lautolu e tau fua he fonua, ne onoono ki a lautolu ko e tau matakuene. Ne loga lahi mo e tau mukamuka e tau manu ikiiki ati maeke ke fakatau ua ki lalo hifo he lima e sene  he fakatupe he vaha nei. Fakalahi ua he totogi ia ka fakatau lima e manu ikiiki ka e nakai fa—ko e manu lele ne lafi ki ai he liti ki loto, ke tuga mena nakai fai aoga!—Luka 12:6.

⁸ Manamanatu foki, ke he lahi he manu lele nei. He fakatatai mo e falu manu lele foki, kua nakai lahi e manu lele tote nei pete kua motua. Ko e tau kupu Heleni ne fakaliliu “manu ikiiki” ia Mataio 10:29 ne hagaao pauaki ke he tau manu lele ikiiki lalahi. Ne manako moli a Iesu ke he tau aposetolo hana ke fakatino e manu lele tote lahi nakai aoga. Talahau he taha tohi, “ne kitia e Iesu e manu lele tote lahi ti fakaaoga e kupu tote lahi ia ke fakamaama aki!”

9. Ko e heigoa e manatu malolo lahi ne taute he fakataiaga ha Iesu ke he tau manu ikiiki?

⁹ Ko e fakatataiaga ha Iesu ke he tau manu ikiiki kua fakakite e manatu malolo: Ko e mena ne tuga e fakateaga ke he tau tagata kua aoga ki a Iehova ko e Atua. Kua peehi foki e Iesu e moliaga nei he lafi ko e manu tote to nakai ‘to ke he kelekele’ ka noa mo e mailoga e Iehova. * Kua maaliali e fakaakoaga. Ka mailoga e Iehova ko e Atua e tau manu ikiiki lalahi mamahaki mo e fakateaga, to mua atu e manamanatu hana ke he tuaga he tagata ne fifili ke fekafekau ki a ia!

10. Ko e heigoa e aoga lahi he talahauaga: “Kua oti kana he totou ha mutolu a tau lauulu”?

¹⁰ He lafi ke he fakataiaga hana hagaao ke he tau manu lele ikiiki, ne pehe a Iesu: “Ka kua oti kana he totou ha mutolu a tau lauulu.” (Mataio 10:30) Ko e talahauaga ku nei ka e hokulo kua fakalaulahi e manatu he fakataiaga ha Iesu ke he tau manu ikiiki. Manamanatu: Ko e evalesi ke he ulu he tagata ne kavi ke he 100,000 e lauulu i ai. Ke he laulahi, ko e taha e lauulu kua tuga ke tatai mo e taha lauulu, ti nakai fai lauulu ne tuga ke mailoga pauaki e tautolu. Ka e, he tau lauulu takitaha ne kitia mo e totou e Iehova ko e Atua. Ha ko e mena anei ne tupu, fai matafeiga foki nakai he tau momoui ha tautolu ne nakai iloa e Iehova? Moli kua maama e Iehova e tufugaaga mua ue atu he tau fekafekau takitaha hana. Moli, kua “kitekite a Iehova ke he loto.”—1 Samuela 16:7.

11. Fakakite fefe e Tavita hana mauokafua ke he manamanatuaga a Iehova ki a ia fakatagata?

¹¹ Ne nakai fou ki a Tavita e tuaga uka, ne mauokafua kua mailoga e Iehova a ia. “Iehova na e, kua kumikumi e koe au, ti kua fioia ni e koe au,” he tohi e ia. “Ko koe ni kua fioia haku a nofo ki lalo mo e haku a tu mai ki luga; kua fioia fakamamao e koe haku a manamanatu.” (Salamo 139:1, 2) Maeke foki ia koe ke moli kua iloa mitaki e Iehova a koe. (Ieremia 17:10) Ua mafiti ke manamanatu kua fakateaga lahi a koe ke mailoga he fofoga ha Iehova!

“Kia Utu Haku a Tau Hihina Mata ke he Hāu a Lupo”

12. Iloa fefe e tautolu kua mailoga katoatoa e Iehova e tau mena uka ne matematekelea e tau tagata hana?

¹² Kua nakai ni iloa e Iehova hana tau fekafekau takitokotaha ka e mailoga katoatoa foki e ia e tau mena uka ne matematekelea a lautolu takitokotaha. Ma e fakatai, he magaaho ne ekefakakelea e tau Isaraela mo tau tupa, ne pehe a Iehova ki a Mose: “Kua kitekite ni au ke he matematekelea he haku motu ha i Aikupito, kua fanogonogo foki e au ke he tagi ha lautolu ha ko lautolu kua pule favale kia lautolu, ha kua kitia e au ha lautolu a mamahi.” (Esoto 3:7) Ko e mafanatia ha ia ke mailoga e mena ia ka  fakauka a tautolu ke he kamatamata, na kitia e Iehova e mena ne tupu mo e logona e tagi ha tautolu! Kua nakai kehe a ia ke he matematekelea ha tautolu.

13. Ko e heigoa kua fakakite na fai logona moli a Iehova ke he tau fekafekau hana?

¹³ Ne leveki e Iehova a lautolu ne hu ke he fakafetuiaga mo ia ha ko e kitiaaga fakalaulahi ke he tau logonaaga hana ma e tau Isaraela. Pete ne matematekelea ha lautolu ne fua mai ha ko e ulu kafilo, ne tohi e Isaia hagaao ki a Iehova: “Nakai fai fi a ia kia lautolu ke he ha tautolu a tau matematekelea oti.” (Isaia 63:9) Ko e fekafekau tua fakamoli a Iehova, kua iloa e koe, ka mamahi a koe, kua mamahi foki a Iehova. Nakai kia fakalagalaga he mena ia a koe ke fofoga atu ke he matematekelea he nakai matakutaku mo e ke fakatumau ke fekafekau katoatoa ki a ia?—1 Peteru 5:6, 7.

14. Ko e heigoa e tau tutuaga viko takai he fati e Salamo 56?

¹⁴ Ko e fifiliaga he Patuiki ko Tavita na leveki e Iehova a ia mo e fai logonaaga ki a ia nukua kitia moli he Salamo 56, ne fati e Tavita he magaaho ne hola kehe mai he patuiki kelipopo ko Saulo. Ne hola a Tavita ki Kata, ka e hopoate a ia neke tapaki he tau Filisitia a ia ka kitia. Ne tohi e ia: “Ko e faguhē mau mai kia au ke he aho oti e tau gutu ha lautolu ne fai fi kia au; ha kua tokologa a lautolu ne tau mai kia au mo e fakatokoluga mai.” Ha ko e tuaga faitaua ki a ia, ne fuluhi atu a Tavita ki a Iehova. “Kua liliu kehe e lautolu haku a tau kupu ke he tau aho oti kana,” he talahau e ia. “Kua eke ha lautolu a tau manamanatu oti ke kelea ai au.”—Salamo 56:2, 5.

15. (a) Ko e heigoa e kakano ha Tavita he magaaho ne ole a ia ki a Iehova ke utu e tau hihina mata hana ke he lupo po ke he tohi? (e) Ka fakauka a tautolu ke he tuaga paleko he tua, ko e heigoa ka moli a tautolu ki ai?

¹⁵ Ti, he fakamau ia Salamo 56:8, ne taute e Tavita e tau talahauaga fulufuluola nei: “Kua totou ni e koe haku a tau fehola fano; kia utu haku a tau hihina mata ke he hāu a lupo; nakai kia ha ha he tohi hāu?” Ko e talahauaga amotia ha ia he leveki fakaalofa noa a Iehova! Ka eke kua tupetupe a tautolu, liga tagi atu a tautolu ki a Iehova mo e tau hihina mata. Ne tagi foki e tagata mitaki katoatoa ko Iesu. (Heperu 5:7) Ne fakalagalaga a Tavita na mailoga e Iehova a ia ti to manatu e mamahi lahi hana, ke tuga kua fakamau e tau hihina mata hana he lupo po ke fakamau hifo he tohi. * Liga logona e koe kua puke lahi e lupo ia he tau hihina mata hau po ke puni foki e tau laupepa he tohi. Kaeke ko e mena a ia ne tupu, kia mafanatia a koe. Kua fakamafana he Tohi Tapu a tautolu: “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.”—Salamo 34:18.

Eke mo Kapitiga Uho he Atua

16, 17. (a) Iloa fefe e tautolu kua nakai fakakehe a Iehova ke he tau lekua ne fehagai mo e tau tagata hana? (e) Ko e heigoa ne taute e Iehova ke fakaata e tau tagata ke moua e fakafetuiaga mo ia?

¹⁶ Ko e moli kua totou e Iehova ‘ha tautolu a tau lauulu’ ne foaki ki a tautolu falu manatu ke he puhala matakite mo e levekiaga he Atua nukua lilifu ai a tautolu ke tapuaki ki ai. Pete to fakatali a tautolu ato hoko ke he lalolagi fou ne mavehe ke utakehe e tau mamahi mo e tau matematekelea oti, ne taute e Iehova e mena mua ue atu ma e tau tagata hana he magaaho tonu nei. Ne tohi e Tavita: “Kua fakafetui a Iehova mo lautolu kua matakutaku kia ia; ti fakailoa foki kia lautolu hana maveheaga.”—Salamo 25:14.

¹⁷ ‘Fakafetui mo Iehova.’ Ko e manatu kua tuga e nakai maama ke he tau tagata nakai mitaki katoatoa! Ka e, uiina e Iehova a lautolu kua matakutaku ki a ia ke eke mo tau tagata nonofo mau he fale uta fano hana. (Salamo 15:1-5) Ti ko e heigoa ka taute e Iehova ma e tau tagata he fale hana? To fakatupu e ia a lautolu ke iloa e maveheaga hana, he talahau e Tavita. Kua tutala a Iehova ki a lautolu, fakakite hana “finagalo” ke he tau perofeta, ke maeke ke iloa e lautolu e tau finagalo hana mo e tau mena ke taute e lautolu ke maeke ke momoui lagotatai mo e tau finagalo ia.—Amosa 3:7.

18. Iloa fefe e tautolu kua manako a Iehova ki a tautolu ke moua e fakafetuiaga tata mo ia?

 ¹⁸ Moli, kua loto mafanatia ke iloa kua maeke ia tautolu e tau tagata nakai mitaki katoatoa ke eke mo tau fakahoania he Mua Ue Atu, ko Iehova ko e Atua. Moli, ne fakamalolo e ia a tautolu ke taute pihia. “Kia fakatata atu a mutolu ke he Atua, ti fakatata mai ai a ia kia mutolu,” he talahau he Tohi Tapu. (Iakopo 4:8) Kua manako a Iehova ki a tautolu ke moua e fakafetuiaga tata mo ia. Moli, ne fita e taute e ia e tau lakaaga ke maeke e fakafetuiaga pihia. Ko e poa lukutoto ha Iesu ne hafagi e gutuhala ma tautolu ke maeke ia tautolu ke kapitiga mo e Malolo Ue Atu. Kua talahau he Tohi Tapu: “Kua fakaalofa a tautolu, ha ko e mena ne fakamua mai hana fakaalofa kia tautolu.”—1 Ioane 4:19.

19. Maeke fefe e fakauka ke fakatolomaki e fakafetuiaga ha tautolu mo Iehova?

¹⁹ Ko e fakafetuiaga tata ia kua fakatolomaki e fakauka ha tautolu ka haia i lalo he tau tutuaga uka. Ne tohi he tutaki ko Iakopo: “Ka kia toka e fakauka ke eke hana gahua katoatoa, kia katoatoa ai mo e fakamaopoopo ai a mutolu, kia nakai toe ha mena kua nakai moua.” (Iakopo 1:4) Ko e heigoa e “gahua” kua fakakatoatoa ha ko e fakauka ke he tau mena uka? Manatu e “mena mahukihuki ke he tino” ha Paulo. Ko e heigoa ne fakakatoatoa he fakauka he mena ne tupu ki a ia? Ne talahau e Paulo e mena nei hagaao ke he tau kamatamata hana: “Haia, to olioli lahi ai au, mo e hula ke he tau mena kua lolelole ai au, kia tumau ai e malolo a Keriso ki luga haku. Ko e mena ia kua fiafia ai au ke he tau mena kua lolelole ai, ko e fakakelea mai, ko e nofogati, ko e favale mai, ko e tau mena ke fakaatukehe ai ha ko Keriso; ha ko e mena ka lolelole au, ti malolo ai au.” (2 Korinito 12:9, 10) Ko e mena ne tupu ki a Paulo to foaki e Iehova e malolo kua lata—ko e ‘mua ue atu he malolo’—ke maeke ia ia ke fakauka. Ti ko e mena ia, ne fakatata lahi a ia ke he Keriso mo e ki a Iehova ko e Atua.—2 Korinito 4:7; Filipi 4:11-13.

20. Maeke fefe ke iloa moli e tautolu to lalago mo e fakamafana e Iehova a tautolu he fehagai mo e tau mena uka?

²⁰ Liga fakaata e Iehova e tau kamatamata hau ke fakatumau. Ka pihia, tokaloto ko e maveheaga hana ki a lautolu kua matakutaku ki a ia: “Nakai tuai toka ni e au a koe, nakai tuai tiaki ni e au a koe.” (Heperu 13:5) Maeke ia koe ke moua e lalagoaga mo e mafanatia ia. Ne totou e Iehova “ha mutolu a tau lauulu.” Kitia e ia e fakauka hau. Kua logona e ia e mamahi hau. Kua leveki moli e ia a koe. Mo e to nakai “fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”—Heperu 6:10.

[Tau Matahui Tala]

Manatu Nakai e Koe?

• Ko e heigoa e tau mena kua fakatupu e tagata ke logona hifo kua tiaki tuai he Atua?

• Ko e heigoa e fakaakoaga kua ako e tautolu mai he tau fakataiaga ha Iesu ke he tau manu ikiiki mo e totou e tau lauulu ha tautolu?

• Ko e heigoa e kakano ke utu e tau hihina mata ke he “lupo” po ke “tohi” ha Iehova?

• Maeke fefe a tautolu ke moua e ‘fakafetui mo Iehova’?

[Tau Huhu he Fakaakoaga]

[Fakatino he lau 24]

Ko e ha ne nakai utakehe e Iehova e “mena mahukihuki ke he tino” ha Paulo?

[Fakatino he lau 25]

Ko e heigoa ne ako e tautolu mai he fakataiaga ha Iesu ke he tau manu ikiiki?

[Credit Line]

© J. Heidecker/VIREO

[Fakatino he lau 27]

He totou tumau e Tohi Tapu, kua moua e tautolu e maloloaga kua leveki he Atua a tautolu takitokotaha