Aoga Kia Ke Mahani Fakamoli?
Aoga Kia Ke Mahani Fakamoli?
“LAHI mahaki e mena ne totogi e koe ma e inisua malolo tino,” he talahau e Karl, ko e hukui inisua. * “Ka hiki mai a koe ke he kamupani haku, to mau ai $20 he mahina, ko e tupe lahi a ia.”
“Liga moli e mena ia,” he tali e Jens. “Ka kua loga e tau ne fakalataha e inisua malolo tino haku mo e kamupani taha ia ni. Ne lahi e lagomatai ha lautolu kua mole, ti manako au ke fakamoli ni ki a lautolu.”
“Ko e mahani fakamoli e mahani mitaki,” he tali e Karl. “Ka e, totogi tupe agaia ni e koe e mahani fakamoli!”
Hako a Karl. Aga ai, ko e mahani fakamoli, po ke tua fakamoli, ke he taha tagata kua fa totogi tupe. * Kua manako lahi foki ke he magaaho, malolo, mo e logonaaga katoatoa. Latatonu kia e mahani fakamoli?
Fakaheke Lahi ka e Nakai Fakagahuahua
He kumikumiaga ne taute i Sihamani he Allensbach Opinion Research Institute, 96 e pasene ha lautolu ne tali hagaao ke he tua fakamoli ko e mahani mitaki lahi. Ko e kumikumiaga ke uaaki he Allensbach ne taute ki a lautolu ne 18 ke he 24 e tau tau he moui ne fakakite 2 mai he 3 a lautolu ne tali hagaao ke he tua fakamoli ko e “mena mogonei,” kakano, kua talia a lautolu ki ai.
Pete ni ko e mahani fakamoli, po ke tua fakamoli, kua fakaheke lahi, kua nakai tatai ai ka hoko ke taute e mahani fakamoli, po ke taute e tua fakamoli. He falu motu Europa, ma e fakatai, kua fakakite tumau he tau hoa mau po ke tau tagata he magafaoa e temotemoai he mahani fakamoli ke he falu. Fa mahani e tau kapitiga ke nakai mahani fakamoli ke he falu. Ti ko e mahani fakamoli he tau vaha kua mole atu ne pipi e takitaki gahua mo e tagata gahua po ke pisinisi mo e tau tagata hana nukua galo tuai. Ko e ha?
Falu magaaho ko e tuaga lavelave he moui ne toka e magaaho tote po ke malolo he logonaaga ke he tau maveheaga ne peehi malolo e mahani fakamoli. Ko e tau tagata ne nakai fiafia mo e hogohogomanava he tau fakafetuiaga fakatagata ne liga fakagalo e tua fakamoli ke he ha tagata. Kua hihiga e falu ke he puhala moui taute-mogonei-ti-galo-a-pogi ne nakai peehi malolo e mahani fakamoli.
Ko e heigoa ni e kakano, ko e mahani fakamoli e mahani mitaki ne fakaheke lahi ka e nakai fakagahuahua. Ti, ko e huhu: Aoga kia ke mahani fakamoli? Ka pihia, ki a hai kua lata ke foaki e mahani fakamoli ha tautolu ki ai, mo e ke he tau puhala fe? Ko e heigoa e tau aoga he taute e mahani fakamoli?
[Tau Matahui Tala]
^ para. 2 Hiki tuai falu higoa he vala tala nei mo e he vala ka mui mai.
^ para. 5 Ha ko e “mahani fakamoli” mo e “tua fakamoli” kua nakai fakaaoga tumau he talahauaga taha, kua fakaaoga fakafetokaki ai he falu magaaho he tau vala tala nei.
[Blurb he lau 3]
Ko e mahani fakamoli e mahani mitaki ne fakaheke lahi ka enakai fakagahuahua