“Kia Mataala”—Kua Hoko Mai e Magaaho he Fakafiliaga!
“Kia Mataala”—Kua Hoko Mai e Magaaho he Fakafiliaga!
Ko e vala tala he fakaakoaga nei ne fakave ke he porosua Kia Mataala! ne fakatoka mai he tau fonoaga he fahimotu ne fakahoko he lalolagi katoa he 2004/05.
“Kia mataala . . . ha kua nakai iloa e mutolu po ke magaaho fe ke hau ai e Iki ha mutolu.”—MATAIO 24:42.
1, 2. Ko e heigoa kua fakatatai tonu e Iesu e hauaga hana ki ai?
KO E heigoa hau ka taute kaeke ke iloa e ko e hane takalo e tagata kaiha, he mulefu e tau kaina he kavi kaina hau? Ke puipui e tau fakahele hau mo e tau koloa hau, ai noa kua mataala a koe. Kakano ni, ha kua nakai fakafano he tagata kaiha e tohi ke fakailoa e magaaho ka hau a ia. Kehe ai, kua hau fakatotomo mo e fakahaupo a ia.
2 Ke he falu magaaho foki, ne fakaaoga e Iesu e tau puhala he tagata kaiha mo fakataiaga. (Luka 10:30; Ioane 10:10) Hagaao ke he tau mena tutupu ka hohoko he vaha he fakaotiaga mo e to takitaki atu ke he hana hauaga ke fakahoko e fakafiliaga, ne age e Iesu e hatakiaga nei: “Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu. Kia iloa e mutolu e mena nai, ane iloa he patu he fale po ke magapo fe ke hau ai e kaiha, po kua leveki ne ia, ka e nakai toka e ia hana fale kia keli ki ai.” (Mataio 24:42, 43) Ti kua fakatatai e Iesu e hauaga hana ke he hoko mai he tagata kaiha—fakahaupo.
3, 4. (a) Ko e heigoa ne putoia he muitua ke he hatakiaga ha Iesu ke he hauaga hana? (e) Ko e heigoa e tau huhu ne laga mai?
3 Kua latatonu e fakataiaga, ha kua nakai iloa e aho tonu ka hau a Iesu. Fakamua atu, he perofetaaga taha ia, ne pehe a Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” (Mataio 24:36) Ti ko e mena ia, ne tomatoma e Iesu hana tau tagata fanogonogo: “Kia nonofo tauteute.” (Mataio 24:44) Ko lautolu ne muitua ke he hatakiaga ha Iesu ka nonofo tauteute, he mautali fakamitaki a lautolu, ke he ha magaaho ka hau a ia ko e Hukui Fakafili ha Iehova.
4 Laga mai falu huhu aoga: Ko e hatakiaga ni kia ha Iesu ke lata mo e tau tagata he lalolagi, po ke kua lata foki mo e tau Kerisiano moli “kia mataala”? Ko e ha kua mafiti ai “kia mataala,” ti ko e heigoa ne putoia he mena nei?
Ko e Hatakiaga ma Hai?
5. Iloa fefe e tautolu ko e hatakiaga “kia mataala” kua hagaao ke he tau Kerisiano moli?
5 Kua moli lahi ko e hauaga he Iki to tuga e tagata kaiha ke he tau tagata he lalolagi, ne fakateliga tuli ke he hatakiaga he matematekelea lahi hane tata mai. (2 Peteru 3:3-7) Pete ia, ka e kua e tau Kerisiano moli? Ne tohi he aposetolo ko Paulo ke he tau matakainaga talitonu: “Ko e mena iloa mitaki lahi e mutolu ko e aho a Iehova to hoko mai ai ke tuga lahi ni e tagata kaiha he po.” (1 Tesalonia 5:2, NW) Nakai fakauaua ai ke he tau manamanatuaga ha tautolu ko e “aho a Iehova to hoko mai.” Ka kua fakatote kia he mena ia e lata ha tautolu kia mataala? Mailoga mena tala age e Iesu ke he tau tutaki hana: “Ha ko e magaaho nakai manatu ai e mutolu, ke hau ai e Tama he Tagata.” (Mataio 24:44) Fakamua atu, he tomatoma e tau tutaki hana ke fakatumau ke tutuli e Kautu, ne hataki e Iesu: “Kia nonofo tauteute a mutolu; ha ko e magaaho nakai manatu ai e mutolu, ke hau ai e Tama he tagata.” (Luka 12:31, 40) Nakai kia mahino na manamanatu a Iesu ke he tau tutaki hana he magaaho ne hataki e ia: “Kia mataala”?
6. Ko e ha ne lata a tautolu “kia mataala”?
6 Ko e ha kua lata ia tautolu “kia mataala” mo e “kia nonofo tauteute”? Ne fakamaama e Iesu: “To ha he kaina e tokoua a tagata; ti uta taha, ka e toka taha. To holo fakalataha e tokoua a fifine ke he mena ke holo aki e tau saito; ti uta taha, ka e toka taha.” (Mataio 24:40, 41) Ko lautolu ne nonofo tauteute ka “uta,” po ke fakahao, he magaaho ka moumou e lalolagi nakai mahani Atua. To “toka” e falu ke moumou ha kua tutuli lotokai e lautolu e tau puhala momoui ni ha lautolu. Kua liga putoia ai a lautolu nei ne manamanatu ki ai fakamua ka e nakai matutaki ke mataala.
7. Ko e heigoa he nakai iloa e magaaho ka hoko mai e fakaotiaga ka fakaata a tautolu ke taute?
7 He nakai iloa tonu e aho he fakaotiaga he fakatokaaga tuai nei ne foaki ki a tautolu e magaaho ke fakatata kua fekafekau a tautolu ke he Atua mai he tau manamanatuaga mea. Pihia fefe? Kua liga ke leva lahi to hoko mai e fakaotiaga. Momoko ke talahau, falu Kerisiano ne logona hifo pihia ne fakaata e makai ha lautolu ma e fekafekauaga ha Iehova ke momoko. Ka e, he tukuleleaga ha tautolu, kua nakai fakauaua ai ke foaki katoatoa e tau momoui ha tautolu ke fekafekau ki a Iehova. Ko lautolu ne iloa a Iehova ne mailoga ko e fakakite he makai ke he tau minuti fakahikuhiku ka nakai fakafiafia a ia. Kitia e ia e tau loto.—1 Samuela 16:7.
8. Kua fakalagalaga fefe he fakaalofa ki a Iehova a tautolu kia mataala?
8 Ha kua fakaalofa moli a tautolu ki a Iehova, to moua e tautolu e fiafia lahi mahaki he taute e finagalo hana. (Salamo 40:8; Mataio 26:39) Ti manako a tautolu ke fekafekau tukulagi ki a Iehova. Kua nakai fakateaga e amaamanakiaga ia ha kua leva e fakatali ha tautolu ke nakai tuga he amanaki a tautolu ki ai. Mua atu, kia mataala a tautolu ha kua amaamanaki lahi a tautolu ke he aho ha Iehova to kakano ma e fakakatoatoaaga he hana finagalo. Ko e manako lahi ha tautolu ke fakafiafia e Atua kua fakalagalaga a tautolu ke fakagahua e fakatonuaga he Kupu hana mo e tuku mua e Kautu he tau momoui ha tautolu. (Mataio 6:33; 1 Ioane 5:3) Kia manamanatu a tautolu ke he puhala kua lata he kia mataala ke fakaohooho e tau fifiliaga ne taute e tautolu mo e puhala kua momoui a tautolu ke he tau aho takitaha.
Ko e Ulu ki Fe e Moui Hau?
9. Ko e ha kua lata mafiti ma e tau tagata he lalolagi ke aala hake ke he aoga he tau magaaho ha tautolu?
9 Tokologa e tau tagata he vaha nei kua mailoga e tau lekua hagahagakelea mo e tau mena tutupu ofoofogia ne tupu tumau he tau aho takitaha, ti liga nakai fiafia ke he takitakiaga he tau momoui ni ha lautolu. Pete ia, iloa nakai e lautolu e kakano moli he tau tutuaga he lalolagi? Kua mailoga nakai e lautolu kua nonofo a tautolu ke he “fakaotiaga he lalolagi”? (Mataio 24:3) Kua mailoga nakai e lautolu e tupu lahi he lotokai, vale, pihia mo e tau aga nakai mahani Atua ne fakamailoga e tau magaaho nei “ko e tau aho fakamui”? (2 Timoteo 3:1-5) Ha ha ai e lata mafiti ma lautolu ke aala hake ke he aoga he tau mena oti nei mo e ke manamanatu ke he puhala kua ulu ki ai e tau momoui ha lautolu.
10. Ko e heigoa ha tautolu kua lata ke taute ke maeke moli ia tautolu kia mataala?
10 Ka e kua a tautolu? Kua fakafehagai a tautolu he tau aho takitaha mo e tau fifiliaga ne putoia ha tautolu a tau gahua, malolo tino, magafaoa, mo e tapuakiaga. Iloa e tautolu e mena ne talahau he Tohi Tapu, ti lali a tautolu ke fakagahua. Ko e mena ia, mitaki ke huhu hifo ki a tautolu ni: ‘Kua fakaata kia e au e tau fakaatukehe he moui ke toho kehe au mai he puhala ia? Kua fakaata kia e au e tau fakaakoaga he lalolagi, tau manamanatuaga i ai, ke fifili e tau foliaga ne taute e au?’ (Luka 21:34-36; Kolose 2:8) Kua lata ke fakatumau a tautolu ke fakatata e falanaki ha tautolu ki a Iehova mo e tau loto katoa ha tautolu mo e nakai tua ni ke he tau maamaaga ha tautolu. (Tau Fakatai 3:5) He puhala ia, to fakatumau a tautolu ke ‘toto atu e moui moli’—ko e moui tukulagi he lalolagi fou he Atua.—1 Timoteo 6:12, 19.
11-13. Ko e heigoa e mena ne ako e tautolu mai he tau fakafifitakiaga ke he mena ne tupu (a) he vaha ha Noa? (e) he vaha ha Lota?
11 Kua toka i loto he Tohi Tapu e loga he tau fakafifitakiaga hataki ke lagomatai a tautolu kia mataala. Mailoga e mena ne tupu ke he vaha ha Noa. Kua leva tigahau e kitia he Atua ke foaki e hatakiaga ia. Kehe mai ia Noa mo e magafaoa hana, ne nakai fakateliga e tau tagata. (2 Peteru 2:5) Hagaao ke he mena nei, ne pehe a Iesu: “Ka e tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai [“fakateliga a,” NW] lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.” (Mataio 24:37-39) Ko e heigoa ke ako e tautolu mai he mena ia? Ka fai a tautolu ne fakaata e tau tupetupe he tau aho takitaha—pihia mo e tau matagahua aga mau he moui—ke fakatauhele e tau gahua fakaagaga kua tomatoma he Atua ke tuku mua tumau e tautolu, kua lata ia tautolu ke manamanatu fakahokulo ke he tuaga ha tautolu.—Roma 14:17.
12 Manamanatu foki ke he vaha ha Lota. Ko e maaga ha Sotoma, ne nonofo a Lota mo e magafaoa hana, ne monuina ke he tau koloa ka e fakalialia ke he tau mahani. Ne fakafano e Iehova e tau agelu hana ke moumou e maaga. Ne tomatoma he tau agelu a Lota mo e magafaoa hana ke fehola kehe mai i Sotoma mo e nakai haga ki tua. He fakamalolo he tau agelu, ne toka e lautolu e maaga. Ka ko e hoana ha Lota ne nakai fakatoka kehe moli e tau logonaaga hana ke he kaina hana i Sotoma. Liuliu ai, ne haga a ia ki tua, ati galo ai hana moui. (Kenese 19:15-26) Fakaperofeta, ne hataki e Iesu: ‘Kia manatu e hoana a Lota.’ Kua fakagahua nakai e tautolu e hatakiaga ia?—Luka 17:32.
13 Ko lautolu ne muitua ke he tau hatakiaga faka-Atua ne hao. Pihia e mena ne tupu ki a Noa mo e magafaoa hana mo Lota mo e tau fanau fifine hana. (2 Peteru 2:9) He tokaloto e tautolu e hatakiaga ke he tau fakafifitakiaga nei, kua fakamalolo foki he fekau he fakahaoaga a tautolu nukua toka ai a lautolu ne ofania e tututonu. Kua fakapuke he mena ia e tau loto ha tautolu aki e amaamanakiaga mauokafua he fakamoliaga he maveheaga he Atua ke he “lagi fou mo e lalolagi fou” ke “nofo ai e tututonu.”—2 Peteru 3:13.
‘Kua Hoko Mai e Magaaho he Fakafiliaga’!
14, 15. (a) Ko e heigoa ka putoia ke he “magaaho” he fakafiliaga? (e) Ko e heigoa ne putoia ke he ‘matakutaku ke he Atua mo e ta age kia ia e fakahekeaga’?
14 Ha ko e ha tautolu a kia mataala, ko e heigoa kua amanaki a tautolu ki ai? Kua fakatoka mai he tohi ha Fakakiteaga e tau lakaaga holo ki mua he fakamoli e finagalo he Atua. He taute e mena kua talahau ai ne aoga kaeke fakamoli a tautolu ke nonofo mautauteute. Kua fakamaama malolo he perofetaaga e tau mena tutupu ia ka hohoko he “aho he Iki,” nukua kamata he magaaho ne fakapatuiki a Keriso ke he lagi he 1914. (Fakakiteaga 1:10) Kua fakamanatu mai he Fakakiteaga ki a tautolu e agelu ne tuku age ki ai e “vagahau mitaki tukulagi ke fakamatala atu.” Ne fakapuloa e ia ke he leo lahi: “Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga.” (Fakakiteaga 14:6, 7) Ko e “magaaho” ia he fakafiliaga kua ku; ne putoia e fakailoaaga mo e fakahoko he tau fakafiliaga ne fakatino mai he perofetaaga ia. Kua nonofo a tautolu mogonei he magahala ia.
15 Mogonei, ato fakaoti e magaaho he fakafiliaga, kua tomatoma ki a tautolu: “Kia matakutaku . . . ke he Atua; mo e ta age kia ia e fakahekeaga.” Ko e heigoa kua putoia he mena nei? Ko e matakutaku tonu ke he Atua kua lata ke fakatupu a tautolu ke fuluhi kehe mai he kelea. (Tau Fakatai 8:13) Ka fakaheke e tautolu e Atua, to fanogonogo a tautolu ki a ia fakalataha mo e fakalilifu hokulo. To nakai lavelave lahi a tautolu ke totou tumau e hana Kupu, ko e Tohi Tapu. To nakai fakateaga e tautolu e fakatonuaga hana ke fakalataha ke he tau feleveiaaga Kerisiano. (Heperu 10:24, 25) To tokiofa e tautolu e kotofaaga he fakapuloa e tala mitaki he Kautu faka-Mesia he Atua mo e to taute fakamakai ai. To falanaki a tautolu ki a Iehova ke he tau magaaho oti mo e ha tautolu a tau loto katoa. (Salamo 62:8) He mailoga ko Iehova e Pule Katoatoa he Lagi mo e Lalolagi, to fakalilifu e tautolu a ia he muitua fiafia ki a ia ko e Pule Katoatoa he tau momoui ha tautolu. Kua matakutaku moli nakai a koe ke he Atua mo e foaki ki a ia e lilifu ke he tau puhala oti kana?
16. Ko e ha ne pehe a tautolu ko e fakafiliaga ki a Papelonia Lahi ne talahau he Fakakiteaga 14:8 ne fita e fakamoli?
16 Kua matutaki e Fakakiteaga veveheaga 14 ke fakamaama foki e tau mena tutupu kua hohoko ke he magaaho he fakafiliaga. Ko Papelonia Lahi, ko e kautu he tau lotu fakavai he lalolagi, ne totoku fakamua: ‘Ti mui atu ai e taha agelu, kua pehe atu, Kua veli, kua veli a Papelonia Lahi.’ (Fakakiteaga 14:8) E, mai he onoonoaga he Atua, kua fita he veli a Papelonia Lahi. He 1919, ko e tau fekafekau fakauku ha Iehova ne tokanoa mai he pipiaga he tau fakaakoaga mo e tau mahani faka-Papelonia, ne kua fakapehia e tau tagata mo e tau motu ke he tau tau loga. (Fakakiteaga 17:1, 15) Kua maeke ia lautolu ke foaki katoatoa e lautolu a lautolu ke fakaholo ki mua e tapuakiaga moli. Ko e fakamatala he tala mitaki he Kautu he Atua ke he lalolagi katoa kua fita e taute tali mai he magaaho ia.—Mataio 24:14.
17. Ko e heigoa ne putoia he o kehe mai i Papelonia Lahi?
17 Nakai ni koenaia e fakafiliaga he Atua ki a Papelonia Lahi. Ko e moumouaga fakahiku hana kua tata lahi mai. (Fakakiteaga 18:21) Mo e kakano mitaki, kua tomatoma he Tohi Tapu e tau tagata he tau matakavi oti: “Ati o kehe ā mutolu ia ia [Papelonia Lahi], neke fakalataha a mutolu mo ia ke he hana tau hala.” (Fakakiteaga 18:4, 5) O kehe fefe a tautolu mai i Papelonia Lahi? Kua lahi e mena ne putoia he mena nei ke he vevehe kehe noa mai he lotu fakavai. Ko e fakaohoohoaga faka-Papelonia kua ha ha ai ke he tau fakamanatuaga mo e tau aga fakamotu talahaua, ke he aga fakahanoa he lalolagi ke he mahani fakatane mo e fifine, he fakatolomaki ki mua e fakafiafiaaga ne putoia e matutakiaga fakataulatua, mo e falu foki. Kia mataala, kua aoga ke he tau gahua mo e tau manako he tau loto ha tautolu, ke fakakite kua vevehe kehe moolioli a tautolu mai he tau puhala oti kana ha Papelonia Lahi.
18. He onoonoaga ke he mena ne fakamaama ia Fakakiteaga 14:9, 10, ko e heigoa he tau Kerisiano mataala kua fakaeneene ke kalo kehe mai ai?
18 Ia Fakakiteaga 14:9, 10, ko e taha puhala foki ne fakamaama ai e ‘magaaho he fakafiliaga.’ Pehe e taha agelu: “Kaeke kua hufeilo e taha ke he manu favale mo e hana fakatino, mo e talia e fakamailoga ke he hana matale po ke hana lima, Ti inu ni a ia ke he uaina he ita he Atua.” Ko e ha? Ko e “manu favale mo e hana fakatino” e tau fakamailoga he pule he tagata, ne nakai talia e pule katoatoa ha Iehova. Ko e tau Kerisiano ne mataala kua fakaeneene ke nakai fakaata e lautolu a lautolu ke fakaohooho po ke ke fakamailoga, ke he tau aga po ke tau gahua, kua tonuhia ki a lautolu ne fakaheu ke talia e pule katoatoa tokoluga ue atu he Atua moli, ko Iehova. Kua iloa he tau Kerisiano kua fita e Kautu he Atua he fakatu he lagi, ka fakaotioti ai e tau pule he tagata, ti to tumau tukulagi ai.—Tanielu 2:44.
Ua Fakagalo e Manamanatuaga Fakamafiti ha Mutolu!
19, 20. (a) He hoko atu taha a tautolu ke he tau aho fakamui, ko e heigoa kua iloa moli e tautolu ka lali a Satani ke taute? (e) Ko e heigoa kua lata ia tautolu ke fifili mau ke taute?
19 He hoko atu taha a tautolu ke he tau aho fakamui, to vevela ni ki mua e tau pehiaaga mo e tau kamatamata. He momoui a tautolu he fakatokaaga tuai nei mo e kua pukeina he nakai mitaki katoatoa ha tautolu, kua lauia a tautolu he tau mena tuga e kelea e malolo tino, fuakau, mamate e tau fakahele, mamahi e tau logonaaga, fakahogohogo manava ha ko e nakai fiafia mai ke he tau laliaga ha tautolu ke fakamatala e Kupu he Atua, mo e loga atu. Kia nakai nimo to manako lahi a Satani ke fakaaoga e tau pehiaaga ne fehagai mo tautolu ke huhuki aki a tautolu ke mahala—ke oti e fakamatala he tala mitaki po ke nakai momoui fakatatau ke he tau tutuaga he Atua. (Efeso 6:11-13) Nakai ko e magaaho anei ke galo e manamanatuaga mafiti ha tautolu ke he tau magaaho kua nonofo ai a tautolu!
20 Ne iloa e Iesu to moua e tautolu e tau pehiaaga loga ke mahala ai, ti ko e mena ia ne fakatonu e ia a tautolu: “Kia mataala . . . ha kua nakai iloa e mutolu po ke magaaho fe ke hau ai e Iki ha mutolu.” (Mataio 24:42) Ti, ko e mena ia, kia mataala tumau a tautolu ke he holoaga he tau magaaho. Kia mataala a tautolu ke he tau lagatau a Satani ka fakatupu a tautolu ke tolomuli halatua po ke tiaki. Kia fifili mau a tautolu ke fakamatala e tala mitaki he Kautu he Atua he makai mo e mauokafua lahi atu. Moli, kia fakatumau e manamanatuaga mafiti ha tautolu he muitua a tautolu ke he hatakiaga ha Iesu: “Kia mataala.” He taute pihia, to tamai e lilifu ki a Iehova mo e to ha ha ai fakalataha mo lautolu ne amanaki ma e tau monuina tukulagi hana.
To Tali Fefe e Koe?
• Iloa fefe e tautolu ko e hatakiaga ha Iesu “kia mataala” kua hagaao ke he tau Kerisiano moli?
• Ko e heigoa e tau fakafifitakiaga hataki he Tohi Tapu kua maeke ke lagomatai a tautolu “kia mataala”?
• Ko e heigoa e magaaho he fakafiliaga, ti ko e heigoa ne tomatoma ki a tautolu ke taute ato hoko e moumouaga?
[Tau Huhu he Fakaakoaga]
[Fakatino he lau 23]
Kua fakatatai e Iesu hana hauaga ke he hoko mai he tagata kaiha
[Fakatino he lau 24]
Kua tata mai e moumouaga ha Papelonia Lahi
[Tau Fakatino he lau 25]
Kia fifili mau a tautolu ke fakamatala tumau he makai mo e mauokafua