Kia O Fano Tuga ne Fano a Iesu Keriso
Kia O Fano Tuga ne Fano a Iesu Keriso
“Ko ia kua pehe, ha ne nofo a ia ki loto ia [Atua], lata ke he tagata nā ke mahani tuga ne mahani a [Iesu].”—1 IOANE 2:6.
1, 2. Ko e heigoa ne putoia ke he onoono fakalahi ki a Iesu?
“KA E tafepoi fakauka a tautolu ke he poitufi kua toka ki mua ha tautolu,” ne tohi he aposetolo ko Paulo, “[“he onoono fakalahi atu a tautolu ke he Iki Hukui mo e Fakamitaki Katoatoa he tua ha tautolu, ko Iesu,” NW].” (Heperu 12:1, 2) He muitua e puhala he tua fakamoli kua lata ke onoono fakalahi ki a Iesu Keriso.
2 Ko e kupu he vagahau fakamua ma e “onoono fakalahi,” kua fakaaoga he tau Tohiaga Tapu Heleni Kerisiano, ne kakano “ke onoono fakahako e tagata ka e nakai fakatauhele,” “ke ono kehe mai he taha mena ke maeke ke kitia e taha mena,” “ke hagaaki ki ai.” Taha e talahauaga ne pehe: “Ko e ha magaaho ni ka utakehe he tagata poitufi Heleni e onoonoaga hana mai he male poitufi mo e foliaga ke poi fakamafiti, he haga atu ke he tau tagata kitekite, ati fakaeto a ia. Ti pihia foki e Kerisiano.” To fakaalaia he tau fakalavelave e tupu fakaagaga ha tautolu. Kua lata ia tautolu ke onoono fakalahi ki a Iesu Keriso. Ti ko e heigoa ne onoono a tautolu ki ai mai he Iki Hukui? Ko e kupu Heleni ne talahau “iki hukui” kua kakano “iki-takitaki, ko ia ne mataulu e tau mena oti ti fakatoka foki e fakafifitakiaga.” Ko e onoono fakalahi ke he manako ha Iesu ke muitua ke he fakafifitakiaga hana.
3, 4. (a) He o fano tuga he fano a Iesu Keriso kua lata mo e heigoa he fahi ha tautolu? (e) Ko e heigoa e tau huhu kua lata mo e onoonoaga ha tautolu?
3 “Ko ia kua pehe, ha ne nofo a ia ki loto ia [Atua], lata ke he tagata nā ke mahani tuga ne mahani a [Iesu],” he talahau he Tohi Tapu. (1 Ioane 2:6) Kua lata ia tautolu ke nonofo mo e Atua he omaoma e tau poakiaga ha Iesu ha kua omaoma e ia e tau poakiaga he Matua hana.—Ioane 15:10.
4 Ti, he o fano tuga ne fano a Iesu kua lata ke kitekite fakatata e tautolu a ia tuga e Iki-Takitaki mo e muitua fakatata e tautolu e tau lakaaga hana. Ko e tau huhu aoga ke manamanatu ki ai ko e: Takitaki fefe e Keriso a tautolu he vaha nei? Lata fefe he fifitaki e puhala hana ne fano ke lauia a tautolu? Ko e heigoa e tau aoga he pipiki ke he puhala ne fakatoka e Iesu Keriso?
Puhala ne Takitaki e Keriso Hana Tau Tutaki
5. Ato hake ke he lagi, ko e heigoa e maveheaga ne taute e Iesu mo e tau tutaki hana?
5 Ato hake ke he lagi, ko Iesu Keriso ne haia mo e tau tutaki hana mo e kotofa ki a lautolu e gahua aoga. Ne pehe a ia: “Hanei, kia o atu a a mutolu ke eke e tau motu oti kana mo tutaki.” He magaaho ia ko e Iki-Takitaki ne mavehe foki ke fakalataha mo lautolu he fakamoli e lautolu e kotofaaga nei, he pehe: “To fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mataio 28:19, 20) Fefe a Iesu Keriso mo e tau tutaki hana he magaaho nei he fakaotiaga he lalolagi?
6, 7. Maeke fefe a Iesu ke takitaki a tautolu he puhala he agaga tapu?
6 ‘Ko e lagomatai, ko e agaga tapu haia, ko ia ke fakafano mai he Matua ke he haku a higoa,’ he talahau e Iesu, “to fakaako e ia a mutolu ke he tau mena oti kana; to fakamanatu foki e ia kia mutolu e tau mena oti kua tala atu ai e au kia mutolu.” (Ioane 14:26) Ko e agaga tapu, ne fakafano he higoa a Iesu, kua takitaki mo e fakamalolo a tautolu he vaha nei. Kua fakamalolo a tautolu fakaagaga mo e lagomatai a tautolu ke maama “e tau mena hokulo ia he Atua.” (1 Korinito 2:10) Lafi ki ai, ko e tau mahani faka-Atua he “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, Ko e mahani molu, mo e manako fakalatalata” ko e “fua he [a]gaga.” (Kalatia 5:22, 23) Mo e lagomatai he agaga tapu, maeke ia tautolu ke feaki e tau mahani nei.
7 He fakaako e tautolu e tau Tohiaga Tapu mo e lali ke fakagahua e mena ne ako e tautolu, kua lagomatai he agaga ha Iehova a tautolu ke tupu e pulotu, loto manamanatu, iloaaga, mo e iloilo. (Tau Fakatai 2:1-11) Kua lagomatai foki he agaga tapu a tautolu ke fakauka ke he tau kamatamata. (1 Korinito 10:13; 2 Korinito 4:7; Filipi 4:13) Ne tomatoma ke he tau Kerisiano ke “fakamea e tautolu a tautolu ke he tau mena oti ke kelea ai e tino katoa mo e agaga, kia fakakatoatoa ai e tau mahani mitaki.” (2 Korinito 7:1) Maeke moli nakai a tautolu ke fakalagotatai mo e tau poakiaga he Atua ke he mahani mitaki, po ke mahani mea, ka noa mo e lagomatai he agaga tapu? Ko e taha puhala ne fakaaoga e Iesu ke takitaki a tautolu he vaha nei ko e agaga tapu, ne kua foaki age e Iehova ko e Atua ke he Tama hana ke fakaaoga.—Mataio 28:18.
8, 9. Fakaaoga fefe e Keriso e “fekafekau fakamoli mo e loto matala” ke foaki e takitakiaga?
8 Manamanatu ke he falu puhala ne takitaki e Keriso e fakapotopotoaga he vaha nei. He talahau ke he ha ha hinei hana mo e fakaotiaga he lalolagi nei, ne pehe a Iesu: “Ko hai foki e fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho? Uhoaki e fekafekau ia, ka hau hana iki mo e moua e ia ha ne eke pihia. Ko e moli, ke tala atu e au kia mutolu, to kotofa a ia ke pule ke he hana tau mena oti.”—Mataio 24:3, 45-47.
9 Ko e “iki” ko Iesu Keriso. Ko e “fekafekau” ko e matakau he tau Kerisiano fakauku he lalolagi. Ko e matakau fekafekau nei ne tuku age ki ai e levekiaga he tau mena ha Iesu he lalolagi mo e foaki e tau mena kai fakaagaga he magaaho tonu. Ko e matakau tote he tau leveki ne lata mai he vahega “fekafekau fakamoli mo e loto matala” ne fakatu e Kau Fakatufono, ne eke mo tau hukui he vahega fekafekau. Ne takitaki e lautolu e gahua fakamatala he Kautu he lalolagi katoa mo e foaki e tau huhua fakaagaga ke he magaaho tonu. Kua takitaki e Keriso e fakapotopotoaga he puhala he “fekafekau fakamoli mo e loto matala” ne fakauku mo e Kau Fakatufono i ai.
10. Ko e heigoa kua lata he tau aga ha tautolu ke he tau motua, ti ko e ha?
10 Ko e taha kitiaaga foki he takitakiaga he Keriso ko e “tau mena fakaalofa ke he tau tagata”—ko e tau motua, po ke tau leveki Kerisiano. Kua foaki ki a lautolu e “fakakatoatoa ai e mitaki he tau tagata tapu, ke eke ai e lautolu e tau gahua he tau fekafekau, kia ati hake ai e tino a Keriso.” (Efeso 4:8, 11, 12) Hagaao ki a lautolu, ne pehe e Heperu 13:7: “Kia manamanatu e tau takitaki ha mutolu, ko lautolu kua talahau atu e kupu he Atua kia mutolu; kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu.” Ko e tau motua ne takitaki e fakapotopotoaga. Ha kua fifitaki e lautolu a Keriso Iesu, kua uho lahi e tua ha lautolu ke muitua ai. (1 Korinito 11:1) Maeke ia tautolu ke fakakite e fakaaue ha tautolu ma e fakatokaaga he tau motua he omaoma mo e lalago e “tau mena fakaalofa ke he tau tagata” nei.—Heperu 13:17.
11. Ko e heigoa e tau puhala kua takitaki e Keriso hana tau tutaki he vaha nei, ti ko e heigoa ne putoia he o fano tuga a ia?
11 E, kua takitaki e Iesu Keriso e tau tutaki hana he vaha nei he puhala he agaga tapu, “[ko] e fekafekau fakamoli mo e loto matala” mo e tau motua he fakapotopotoaga. Ko e o fano ha tautolu tuga he fano a Keriso ne putoia e maamaaga he puhala takitaki hana mo e muitua ki ai. Kua lata foki ke fifitaki a tautolu ke he puhala ne fano a ia. “Ha ko e mena ia ni kua ui ai a mutolu,” he tohia he aposetolo ko Peteru, “ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.” (1 Peteru 2:21) Ko e heigoa e puhala kua lata he muitua ke he tuagahui ha Iesu ne lauia a tautolu?
Kia Lagotatai Ka Fakagahua e Pule
12. Ko e heigoa e puhala he fakafifitakiaga he Keriso kua aoga pauaki ke he tau motua he fakapotopotoaga?
12 Pete kua moua e Iesu e pule ne mua ne mai he Matua hana, ne lagotatai a ia he puhala ne fakagahua e ia. Ko lautolu oti he fakapotopotoaga—mua atu ke he tau leveki—kua lata ke “iloa ha mutolu a mahani [“lagotatai,” NW] he tau tagata oti kana.” (Filipi 4:5; 1 Timoteo 3:2, 3) Ha kua fai vala e tau motua ke he pule he fakapotopotoaga, kua latatonu ia lautolu ke muitua ke he tau tuagahui he Keriso he fakagahua ai.
13, 14. Ko e heigoa e puhala kua maeke he tau motua ke fifitaki e Keriso he fakamalolo e lautolu e falu ke fekafekau ke he Atua?
13 Ne mailoga e Iesu e tau kuku he tau tutaki hana. Ne nakai poaki malolo a ia ki a lautolu ke he mena ne nakai fahia a lautolu ke foaki. (Ioane 16:12) He nakai peehi a lautolu, ne fakamalolo e Iesu hana tau tutaki ke ‘eketaha fakamalolo a lautolu’ he taute e finagalo he Atua. (Luka 13:24) Ne taute e ia e mena nei he takitaki mo e hokotia ke he tau loto ha lautolu. Pihia foki, ko e tau motua Kerisiano he vaha nei kua nakai matakutaku e falu ke fekafekau ke he Atua he puhala he fakama mo e agahala. Ka e, kua fakamalolo he tau motua a lautolu ke fekafekau ki a Iehova mai he fakaalofa ki a Ia mo Iesu, ti pihia ke he tau matakainaga ha lautolu.—Mataio 22:37-39.
14 Ne nakai fakaaoga hehe e Iesu e pule ne tuku age ki a ia ke takitaki e tau momoui he tau tagata. Ne nakai fakatoka e ia e tau tutuaga tokoluganea po ke fakave e tau matafakatufono loga. Ko e puhala hana ke fakalagalaga e falu he hokotia e tau matapatu fakaakoaga ke he tau loto ha lautolu ke he tau matafakatufono ne puhala age ia Mose. (Mataio 5:27, 28) He muitua ki a Iesu Keriso, fakamamao e tau motua he taute e tau matafakatufono fakave he tagata po ke peehi ha lautolu a tau manatu fakatagata. He puhala ke he tau mena tui mo e tauteuteaga po ke tau feua mo e fakafiafiaaga, lali e tau motua ke hokotia ke he tau loto he fakaaoga e tau matapatu fakaakoaga mahani Atua, tuga ia ne tohi ia Mika 6:8; 1 Korinito 10:31-33; mo e 1 Timoteo 2:9, 10.
Kia Loto Fakaalofa mo e Fakamagalo
15. Tali atu fefe a Iesu ke he tau kuku he tau tutaki hana?
15 Ne fakatoka e Keriso e fakafifitakiaga ma tautolu ke muitua he puhala ne fakatonu e ia e tau kuku mo e hehe he tau tutaki hana. Manamanatu ke he ua e mena ne tupu he po fakahiku hana he lalolagi ko e tagata. He hoko atu ki Ketesemane ne “uta e [Iesu] fakalataha mo ia a Peteru, mo Iakopo, mo Ioane” ti tala age ki a lautolu “kia mataala.” Ti, “tolotolomaki atu a ia ki mua, ti fakaveli a ia ke he kelekele, mo e liogi atu.” He liu mai a ia, ne “moua a lautolu ha ne momohe.” Tali atu fefe a Iesu? Ne pehe a ia: “Kua makai ni e loto, ka koe tino kua lolelole.” (Mareko 14:32-38) He nakai vale fakakaka ki a Peteru, Iakopo, mo Ioane, ne fakakite e ia e loto fakaalofa! He po ia foki, ne fakatikai lagatolu e Peteru a Iesu. (Mareko 14:66-72) Tali atu fefe a Iesu ki a Peteru he magaaho fakamui? “Kua tu mai e Iki; kua fakakite foki a ia kia Simona [Peteru].” (Luka 24:34) “Ne kitia foki e Kefa a ia” he talahau he Tohi Tapu, “ti kitia ai he tokohogofulu ma ua.” (1 Korinito 15:5) He nakai manatu ita, ne fakamagalo e Iesu e aposetolo fakatokihala ti fakamalolo a ia. Fakamui, ne tuku age e Iesu ki a Peteru e tau matagahua lalahi.—Gahua 2:14; 8:14-17; 10:44, 45.
16. Maeke fefe a tautolu ke o fano tuga ne fano a Iesu ka fakaita po ke taute fakakelea he tau matakainaga talitonu ha tautolu a tautolu ke he falu puhala?
16 Ka fakaita he tau matakainaga talitonu ha tautolu a tautolu po ke taute fakakelea ki a tautolu he falu puhala ha ko e nakai mitaki katoatoa he tagata, nakai kia loto fakaalofa mo e fakamagalo a tautolu tuga a Iesu? Ne tomatoma a Peteru ke he tau matakainaga talitonu hana: “Kia loto fakalataha a mutolu oti, kia feofanaki, kia fakaalofa ke he tau matakainaga, kia hofihofi noa e fakaalofa, kia mahani totonu, Aua neke taui atu e kelea ke he kelea, po ke amuamu ke he amuamu; ka kia fakamonuina atu e mutolu, ha kua iloa ko e mena ia ne ui ai a mutolu, kia moua e mutolu e monuina.” (1 Peteru 3:8, 9) Ka e kua ka kaumahala e taha tagata ke taute a tautolu tuga ne taute e Iesu, he fakaheu ke loto fakaalofa mo e fakamagalo? Ko e magaaho pihia kua fakalago ki a tautolu ke fifitaki a Iesu mo e tali atu tuga ne taute e ia.—1 Ioane 3:16.
Tuku Fakamua e Tau Mena he Kautu
17. Ko e heigoa ne fakakite kua tuku fakamua e Iesu e taute he finagalo he Atua he moui hana?
17 He taha puhala foki, kua lata ia tautolu ke o fano tuga ne fano a Iesu Keriso. Ko e fakapuloa e tala mitaki he Kautu he Atua e matapatuaga he moui ha Iesu. He mole e fakamatala ke he fifine Samaria ne tata ke he maaga ko Sikara i Samaria, ne tala age a Iesu ke he tau tutaki hana: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ko e taute he finagalo he Matua hana ka fakatumau aki a Iesu; kua huhua, makona mo e hahau tuga e tau mena kai. Ko e fifitaki ki a Iesu he fakatumau ke hagaaki ke taute e finagalo he Atua kia ka takitaki atu ke he moui nakai makona mo e fai kakano moli?
18. Ko e heigoa e tau monuina ne fua mai he fakamalolo e tau fanau ke taute e fekafekauaga mau?
18 Ka fakamalolo he tau matua e tau fanau ha lautolu ke taute e fekafekauaga mau, to moua foki e lautolu mo e tau fanau ha lautolu e tau monuina loga. Ko e matua tane he mahaga tane ne fakatoka ki mua ha laua e tau tama tane hana e gahua paionia he vaha ikiiki ha laua. He oti e tau fakaakoaga ha laua, ne paionia e mahaga. He fakaata e tau olioli he fua ne moua e ia, kua tohi he matua tane nei: “Ne nakai fakaita he tau tama tane ha maua a maua. Fiafia ai a maua ke talahau, ‘Ko e tau fanau ko e tufaaga mai ia Iehova.’ ” (Salamo 127:3) Ti aoga fefe e tau fanau mai he tutuli e fekafekauaga mau? Kua pehe e matua fifine ne lima e tama: “Kua lagomatai he gahua paionia e tau tama tokolima haku ke feaki e fakafetuiaga tata lahi mo Iehova, ati tupu ki mua e tau aga fakaako fakatagata ha lautolu, ne lagomatai a lautolu ke ako e puhala ke fakaaoga fakamitaki e tau magaaho ha lautolu, ti kua lagomatai a lautolu ke ako ke tuku fakamua e tau mena fakaagaga he tau momoui ha lautolu. Pete ne igatia a lautolu mo e taute e tau hikihikiaga loga, nakai fai ia lautolu ne tokihala he puhala ne fifili a lautolu ke o ai.”
19. Ko e heigoa e tau pulega ma e vaha anoiha kua lata he tau fuata ke manamanatu fakailoilo?
19 Tau fuata, ko e heigoa e tau pulega ha mutolu ma e vaha anoiha? Hane tutuli kia a mutolu ke makaka lahi he matafeua fakalalolagi? Po ke hane gahua a mutolu ke he matafeua he fekafekauaga mau? “Kia o fakalaulau a mutolu; nakai tuga ne tau tagata goagoa ka kia tuga e tau tagata iloilo,” he tomatoma e Paulo, “[“fakatau e tau magaaho ne lata ma mutolu, ha kua kelea e tau aho,” NW].” Ne lafi e ia: “Hanai, aua neke goagoa a mutolu, ka kia iloa e mutolu e finagalo he Iki.”—Efeso 5:15-17.
Kia Mahani Fakamoli
20, 21. Ko e heigoa e puhala ne mahani fakamoli a Iesu, ti fifitaki fefe a tautolu ke he mahani fakamoli hana?
20 He o fano tuga ne fano a Iesu kua lata ke fifitaki hana mahani fakamoli. Hagaao ke he mahani fakamoli ha Iesu, kua pehe e Tohi Tapu: “Ko ia ne mahani fakalataha mo e Atua, nakai manatu a ia ko e fofo mena ke fakataufata a ia mo e Atua; Ka kua fakatokolalo e ia a ia, ne mahani a ia fakalataha mo e tupa, nukua eke a ia tuga ne tagata; Ne kitia foki a ia kua tino mai po ke tagata, ne fakatokolalo e ia a ia, ne oma e ia kua hoko ke he mate, ko e mate haia he [“akau fakakikiveka,” NW].” Ne tuku fakatokoluga e Iesu e pule katoatoa ha Iehova he eke e finagalo he Atua ma hana. Ne omaoma a ia ke hokotia ke he mate mamahi he akau fakakikiveka. Kua lata ia tautolu ke ‘toka mau e manatu nei’ mo e omaoma fakamoli ke taute e finagalo he Atua.—Filipi 2:5-8.
21 Ne fakakite foki e Iesu e mahani fakamoli ke he tau aposetolo tua fakamoli hana. Pete ne tau lolelole mo e tau nakai mitaki katoatoa ha lautolu, ne ofania e Iesu a lautolu ke “hoko ke he fakaotiaga.” (Ioane 13:1) Pihia foki, kua nakai lata ia tautolu ke toka e tau nakai mitaki katoatoa he tau matakainaga ha tautolu ke fakatupu a tautolu ke moua e aga tuhituhi.
Pipiki ke he Puhala ne Fakatoka e Iesu
22, 23. Ko e heigoa e tau aoga he pipiki ke he puhala ne fakatoka e Iesu?
22 Moli, ha ko e tau tagata nakai mitaki katoatoa, kua nakai maeke ia tautolu ke o fakahako he tau tuagahui he Fakafifitakiaga mitaki katoatoa ha tautolu. Pete ia, maeke ia tautolu ke lali ke muitua fakatata e tau lakaaga hana. Ko e taute pihia kua lata ke maama mo e omaoma a tautolu ke he puhala he Keriso ne takitaki mo e pipiki ke he puhala ne fakatoka e ia.
23 He eke mo tau fakafifitaki he Keriso kua takitaki ke he tau monuina loga. Kua mahomo atu e fai kakano mo e makona he tau momoui ha tautolu ha kua hagaaki a tautolu ke he taute e finagalo he Atua ka e nakai ko e ha tautolu ni. (Ioane 5:30; 6:38) Ha ia tautolu e loto manamanatu mitaki. Ko e puhala ne o fano ai a tautolu kua eke mo fakafifitakiaga. Ne uiina oti e Iesu a lautolu ne matematekelea mo e pehia ke o mai ki a ia mo e moua e okiokiaga ma e tau momoui ha lautolu. (Mataio 11:28-30) Ka muitua a tautolu ke he fakafifitakiaga ha Iesu, kua maeke foki ia tautolu ke atihake e falu ha ko e feoakiaga ha tautolu. O mai a tautolu, ke fakatumau ke o fano tuga he fano a Iesu.
Manatu Nakai e Koe?
• Takitaki fefe he Keriso e tau tutaki hana he vaha nei?
• Maeke fefe e tau motua ke muitua e takitakiaga he Keriso he fakagahua e pule ha lautolu ne foaki he Atua?
• Muitua fefe e tautolu e fakafifitakiaga ha Iesu he fehagai mo e tau kuku he falu?
• Maeke fefe e tau fuata ke tuku fakamua e tau mena he Kautu?
[Tau Huhu he Fakaakoaga]
[Fakatino he lau 19]
Lagomatai he tau motua Kerisiano a tautolu ke muitua ke he takitakiaga he Keriso
[Tau Fakatino he lau 20]
Tau fuata, ko e heigoa e tau pulega kua taute e mutolu ma e moui Kerisiano palepale mitaki?