Maama e Tau Fakamailoga Ko e Mena Hokulo Lahi!

“He magaaho fakamua ne manatu au ko e mamahi noa ne ulu he tama tane ha maua ko Andreas. Ka e nakai fia kai a ia ti tokoluga e fiva. Ne kelea lahi mahaki e mamahi he ulu, ati tupetupe ai au. He hau e tane haku ki kaina, ne uta e maua a Andreas ke he ekekafo. Ne fuafua e ia e tau fakamailoga ti uta fakahako a Andreas ke he fale gagao. Ne nakai ni ko e mamahi he ulu e lekua. Ne moua e Andreas e gagao meningitis. Ne tului e gagao hana ti nakai leva liu ai malolo.”—Gertrud, ko e matua fifine i Sihamani.

KO E mena ne tupu ki a Gertrud kua liga mahani ke he tokologa he tau matua. Kua kitia e lautolu e tau fakamailoga kua liga gagao e tama ha lautolu. Pete e nakai hagahagakelea e tau gagao oti, kua nakai lata he tau matua ke fakaheu e tau fakamailoga he gagao e tau tama ha lautolu. He mailoga e tau fakamailoga mo e taute taha mena nukua lata ne aoga lahi mahaki. Ko e mena hokulo lahi.

Moli foki e mena nei ke he tau mena ne nakai lauia e malolo tino. Ko e fakataiaga ne felauaki tonu ko e matematekelea he peau kula ia Tesemo 2004 he tau matakavi ne tutu viko he Moana Initia. Ko e tau fakatokatokaaga he tau matakavi tuga a Ausetalia, mo Hauai ne mailoga e mafuike makimaki he fahi tokelau i Sumatra mo e kitia tuai e hagahagakelea moli he fakahikuaga. Ka e, nakai fai puhala e tau tagata ne apitia he tau matakavi ia ne hagahagakelea ke moua po ke tali e ha hatakiaga. Ti ko e fua, molea e 220,000 e tau momoui ne galo.

Tau Fakamailoga kua Mua Atu e Aoga

He haia a Iesu Keriso he lalolagi, ne age e ia e fakaakoaga ke he tau tagata fanogonogo hana ke mailoga e tau fakamailoga mo e gahua fakatatau ki ai. Kua tutala a ia ke he taha mena ne mua atu e aoga. Pehe e Tohi Tapu: “Ati o mai ai e tau farasaio mo e tau satukaio, kua kamatamata a lautolu mo e tala age kia ia, ke fakakite kia lautolu taha fakamailoga mai he lagi. Ati tala age ai a ia, kua pehe age kia lautolu, Ka hoko ke he afiafi, kua pehe ai a mutolu, To afua, nukua kula mai e lagi. Ka pogipogi foki, kua pehe ai a mutolu, To uha e aho nai, nukua kula mai mo e malumalu hifo e lagi. Ko e tau tagata  fakavai na e, kua iloa e mutolu ke fakafili e mahani he lagi, ka ko e tau fakamailoga he tau vaha nakai kia maeke e mutolu?”—Mataio 16:1-3.

He totoku e “tau fakamailoga he tau vaha,” ne fakakite e Iesu ko e tau tagata fanogonogo Iutaia hana he senetenari fakamua kua lata ke mataala ke he mafiti he tau magaaho nukua nonofo ai a lautolu. Ko e fakatokaaga Iutaia ne nakai leva ti moua e matematekelea ka lauia oti a lautolu. He tau aho gahoa to mate a ia, ne tutala a Iesu ke he tau tutaki hana hagaao ke he taha fakamailoga foki—ko e fakamailoga he ha ha hinei hana. Ko e mena ne talahau e ia he magaaho ia kua aoga lahi ke he tau tagata oti he vaha nei.