Ko e Lalolagi Nakai Tonu

KUA talia nakai e koe kua nonofo a tautolu he lalolagi nakai tonu? Nakai fakauaua kua talia e koe. Haia ni, pete ne tau taleni ha tautolu mo e puhala ne pulega fakapulotu aki e tau momoui ha tautolu, to nakai fakamoli ki a tautolu e muhukoloa po ke kautu po ke muhumena kai foki. Kua fa fakahiku ai tuga ne talahau he patuiki pulotu ko Solomona i tuai: “Nakai ha ha i ai foki e tau mena kai ke he tau tagata iloilo, ti nakai ha ha i ai e koloa ke he tau tagata pulotu, nakai ko e tau tufuga foki kua ofania.” Ko e ha? Ha kua matutaki e Solomona, “ko e vaha mo e tau mena ke tutupu ai kua hoko ia kia lautolu oti.”—Fakamatalaaga 9:11.

‘Ka Hoko Fakalutukia e Vaha Kelea’

E, ko e “vaha mo e tau mena ke tutupu ai” ne fa kakano ko e haia he matakavi hepe he magaaho hepe, ne fa tukia aki e tau pulega fakatokatoka mitaki mo e tau amaamanakiaga fiafia ha tautolu. Hagaao ki a Solomona, ko tautolu kua ‘tuga he moua e tau ika ke he kupega, tuga he moua foki e tau manu lele ke he matahele, ka hoko fakalutukia e vaha kelea.’ (Fakamatalaaga 9:12) Miliona he tau tagata, ma e fakatai, ne gahua taumate ke feaki e kelekele ke moua aki e tau mena kai ma e tau magafaoa ha lautolu, ka e lauia fakalutukia a lautolu ke he “vaha kelea” ka nakai fai uha mo e mago e kelekele ti moumou e tau fua he fonua ha lautolu.

Kua lali e falu ke lagomatai, ka ko e lagomatai ne foaki ki a lautolu ne matematekelea he “vaha kelea” he fakatokatokaaga he lalolagi kua tuga e nakai tonu. He totoko ke he hogeia, ma e fakatai, he taha tau e kua mole, “ko e fahimotu katoa [ha Aferika] ne moua e lagomatai foaki ko e taha mai he lima ni e tupe ne foaki ke he felakutaki he Loto Ava,” hagaao ke he taha matakau foaki lagomatai ne takitaki. Kua tonu kia ko lautolu ne fakamole laga lima e lahi he tupe ke latau he felakutaki he taha motu ke he fakaaoga e lautolu ke fakatote e mamahi mo e matematekelea ne fakatupu he hogeia he fahimotu katoa? Ti kua tonu kia ke he tokologa ne muhukoloa ko e 1 ke he 4 e tagata ne nonofo he lalolagi kua mativa lahi mahaki po ke totou miliona he tau fanau ne mamate he tau tau takitaha ha ko e tau gagao nakai fai puipuiaga? Nakai pihia!

Moli, lahi atu e mena kua putoia he “vaha mo e tau mena ke tutupu ai” ka ‘hoko fakalutukia e vaha kelea.’ Kua molea e pule katoatoa he tau kau malolo lahi ki a tautolu ti pule lahi ke he  tau momoui ha tautolu mo e poaki e tau mena ka tutupu ki a tautolu. Kua moli e mena ia i Beslan, Alania, he vaha tau tupu he 2004, kua totou teau e tau tagata, tokologa ia lautolu e tau tama ikiiki he aho fakamua ha lautolu he aoga, ne kelipopo he taufetoko vale he vahaloto he tau tagata fakamatakutaku mo e tau matakau leoleo. Moli, ko lautolu ne mamate mo lautolu ne momoui he matematekelea ia ne lauia lahi ke he tau tupu totamaki—ka ko e tupuaga lahi mahaki he “vaha kelea” ia ko e taufetoko he tau tagata.

To Pehe Tumau Ni Kia?

“Ka ko e puhala a ia he moui,” he talahau he falu ka tutala hagaao ke he nakai fakafili tonu. “Kua pihia tumau ni, mo e to pihia tumau ni.” Hagaao ki a lautolu, to fakapehia tumau e lautolu ne malolo a lautolu ne lolelole, mo e to fakaaoga tumau e lautolu ne monuina a lautolu ne mativa. Kua putoia he mena ia e “vaha mo e tau mena ke tutupu ai,” he talahau e lautolu, to lauia a tautolu pete he momoui e magafaoa tagata.

Kua lata moli kia ke pehe? To maeke kia ia lautolu ne fakaaoga fakamitaki ha lautolu a tau lotomatala mo e helehele fakapulotu e palepale tonu ma e tau gahua malolo oti ha lautolu? Maeke nakai he ha tagata ke taute ha mena ke tamai e hikiaga tukulagi ke he lalolagi nakai tonu nei? Manamanatu la ke he mena ka talahau he vala tala ka mui mai hagaao ke he matakupu nei.

 [Fakatino Credit Line he lau 2]

COVER: Man with a child: UN PHOTO 148426/McCurry/Stockbower

[Fakatino Credit Line he lau 3]

MAXIM MARMUR/AFP/Getty Images